ورحنا التوكيل و دفعت كتيييييييييييييييييييييير

[hamada_amg]

بسم الله الرحمن الرحيم

اولا انا بعتذر عن التأخير فى كتابه الموضوع ده لانشغالى الفتره السابقه جدا لكن يالا الحمد لله نكتب و امرنا لله

طبعا انا كنت عملت موضوع قبل كده قلت على العيوب اللى واجهتنى فى عربيتى السيفيك الجديده و ده رابط الموضوع

http://www.nilemotors.net/Nile/248251-a.html

و عموما ده الحكايه من يوم مارحت يوم الاربعاء اللى فات لحد يوم الاحد

حجزت معاد فى التوكيل يوم الاربعاء الساعه 10 الصبح فرع التجمع و رحت قابلت المهندس

و قعدت معاه و قلتله على كل اللى فى العربيه و الراجل طلع معايا استلم منى العربيه و دخلت الورشه

طلعت الاستراحه و اتفرجت عليها و اول ما دخلت دخلت على قسم الكهربا

اولا غيروا البطاريه بنوع جديد اسمه مولتو ( مش اللى بيتاكل ) نفس مقاس البطاريه القديمه و لكنها صناعه تركى و ضمان من التوكيل لمده سنه عليها
و كنت قبلها سألت بره التوكيل لقيت نوع تاني اسمه جلوبال كوري تمنه 400 جنيه لكن فى التوكيل انا لقيتها ب 520 +10% ضريبه طبعا بس بصراحه قلت التوكيل يكون اضمن فى الحاجات ده و اهى مره و السلام

تاني حاجه اتغيرت كانت ريش المساحات و مش فاكر و الله سعرها كام حاليا بالظبط

ثالت حاجه كانت الكشف على النور و على اضاءه الفوجات و اكتشاف ان الحساس اللى فى الفانوس يمين مكسور و انا كنت عارف العيب ده و تمنه 920 جنيه +10% ضريبه طبعا

رابع حاجه العربيه كان فيها كلاكس مش بتاعها كان فيها واحد بتاع اوبيل و تيوانى مش المانى كمان المهم غيرته بالاصلى بتاعها اتكلف حوالى 400 جنيه بالتقريب

و طلعت العربيه من قسم الكهربا و استنت الدور لحد العفشه و الماكينه

بعدها بحوالى ساعه كده لقيت المهندس اخد العربيه و طلع بيها على الطريق اللى بين التوكيل و بين اكاديميه الشرطه يجربها و شويه ورجع دخلت على الكوريك و اترفعت
و لقيت الفنى بيبص اوي تحت و يطلع يجيب حد يبص معاه و ينادي للمهندس و موضوع كبير

المهم شويه لقيت المهندس بينادي عليا و قالى الاتى

اولا العربيه فيها راس كوبلن متغيره بره التوكيل و هى اللى عامله الرجه و القلق اللى فى العربيه و ده لازم تتغير و قعد يورينى الراس من تحت العربيه عشان يقنعنى انها متغيره و مختلفه عن اللى فى الجنب التاني

المهم من هنا لها قلتله مفيش مشكله و غيرها و بالمره نعمل الحساس عشان النور يظبط

قالى هتستلم يوم الاحد مش النهارده
و كمان الخميس اجازه عشان 6 اكتوبر و الجمعه اجازه و السبت بيكون فى ضغط شغل يبقى تستلم الاحد ان شاء الله

رجعت من التوكيل و الحمد لله بسلام و دخلت لقيت مهندس احمد بكر عامل الموضوع ده هنا

http://www.nilemotors.net/Nile/248437-a.html

و فعلا كلمته و الراجل ماشاء الله عليه متعاون جدا و محترم جدا

و فعلا شافلى العربيه يوم السبت و جربها بنفسه و اتأكد ان العربيه بقت تمام و كل اللى اتفقنا عليه اتعمل و اتغير ورحت يوم الاحد و قابلته هناك و بجد انسان قمه فى الاحترام و خدوم ماشاء الله

رحت يوم الاحد و قابلت المهندس احمد و بعدها سالت على العربيه و شفتها و اللى حصبل فيها كالاتى

1- تغيير بطاريه
2- تغيير جلد المساحات
3- تغيير الكلاكس
4- شراء طفايه سجاير لانها مش موجوده
5- تغيير راس الكوبلن شمال
6- تغيير حساس الفانوس يمين
7- تغيير تيل فرامل امامى و خلفى
8- مراجعه دوره التبريد للمحرك و عمل كبس تام للدوره
9- مراجعه دوره التكييف و تنظيف الفلتر
10- مراجعه العفشه كامله و تركيب بعض الصواميل الناقصه

كل ده تم فى العربيه و الفاتوره اتعملت ب 5800 جنيه لكن المهندس عملى خصم ب 10% فاصبحت حوالى 5200 جنيه و طلعت بعدها جربت العربيه و كانت تمام و الحمد لله

و على فكره انا جبت شويه اسعار من التوكيل للى عايز يعرفها


فانوس امامى فى تى اى 2112
فانوس خلفى اللى فى الرفرف 385
فانوس خلفى اللى فى الشنطه 740
تيل امامى 595
تيل خلفى 330
زجاج امامى 3750
طفايه سجاير 253
بطاريه 570
فلتر هوا 143
فلتر زيت 45
فلتر تكييف 420
راس الكوبلن 1660
حساس الفانوس للفى تى اي 1012
كلاكس 440
كاوتش تويو مقاس 15 بتاع السيتي 580
كاوتش بريدجستون مقاس 16 بتاع السيفيك 840
كاركيت نوع غريب كده 1250
كاركيت موتورولا 1850

الملاحظات :

1- التوكيل الناس محترمه و تعاملهم كويس ماشاء الله
2- الاسعار شايف انهم مبالغين فيها فى حاجات كتيره و كمان سعر المصنعيه اهبل اوي
3- عدم الاهتمام بالسياره طول الوقت واقفه بره فى الشمس و التراب و اكتشفت ان بعد ما كبسوا دوره المياه حطوا مياه عاديه فى الاربه مش خضرا
4- فى مشكله زي نقله الفتيس ماهتموش بيها و لقيتها زي ما هى و المهندس بيقنعنى تماما انها طبيعيه جدا و مش محتاجه اى شيء

عن نفسي اعتقد ان ده اخر تعاملى مع التوكيل و اى حاجه تانيه هتكون بره ان شاء الله الا لو اتزنقت فى قطعه غيار او حاجه
كمان انا عملت حسابى و جبت كام فلتر زيت عشان غيار الزيت من التوكيل لكن طبعا هاغيره بره لانى مش هاتحمل مصاريف تغيير زيت هبل كده

و اى سؤال انا معاكم و اسف مره تانيه على تأخير التقرير

[wellfine]

تقرير وافي اوي
ربنا يباركلك فى عربيتك وفى حاجه جميل فى الهوندا
مش بتقف إلا لما بيكون فى فعلآ مشكله فيها مش اي حاجه بتوقفها
الف شكر

[HISHAM80]

استاذ حماده أخبارك ايه متهيألي كده بدأت دتعي عليا:-) بس الصراحه موضوع الكوبلن انه متغير مكنتش عارفه حتى صاحبها مقليش عليه ومبنش في تقرير المحطه الي كان معمول قبل ما نشهتريها بس مهندس الصيانه لما كشف عليها في التوكيل مقلش انه كان متغير بس هو مكنش فيه وقت للامانه علشان يكشف براحته ده كان في فرع جسر السويس بس حضرتك دفعت ليه 5000 جنيه العربيه لسه ماشيه 30000km بس ومكنش فيها حاجه غير موضوع ألهزه بس ده أنا حاسس أنك بتكلم عن عربيه تانيه

[hamada_amg]

تقرير وافي اوي
ربنا يباركلك فى عربيتك وفى حاجه جميل فى الهوندا
مش بتقف إلا لما بيكون فى فعلآ مشكله فيها مش اي حاجه بتوقفها
الف شكر

تسلم ياباشا و ده اقل واجب اعمله للرجاله هنا فى المنتدى

[hamada_amg]

استاذ حماده أخبارك ايه متهيألي كده بدأت دتعي عليا:-) بس الصراحه موضوع الكوبلن انه متغير مكنتش عارفه حتى صاحبها مقليش عليه ومبنش في تقرير المحطه الي كان معمول قبل ما نشهتريها بس مهندس الصيانه لما كشف عليها في التوكيل مقلش انه كان متغير بس هو مكنش فيه وقت للامانه علشان يكشف براحته ده كان في فرع جسر السويس بس حضرتك دفعت ليه 5000 جنيه العربيه لسه ماشيه 30000km بس ومكنش فيها حاجه غير موضوع ألهزه بس ده أنا حاسس أنك بتكلم عن عربيه تانيه

ياباشا ربنا ما يجيب حاجه وحشه مفيش اى سبب يدعى انى ادعى عليك و لا حاجه بالعكس

ده شيء طبيعي فى اى عربيه استعمال مفيش مشكله فيه
و الاستاذ حسن كان صريح معايا و قالى على اللى فيها من غير اى مشكله هو اينعم مقليش سعر الحساس بس مش مشكله تعدي ده

و عموما السعر اللى دفعته ده بالفاتوره و شوف ياباشا كل الحاجات اللى اتغيرت اللى انا كاتبها فى الاول هتلاقيها تعمل كده و اكتر ده غير كمان مصنعيات التوكيل المبالغ فيها جدا

عموما ياباشا خير و ده شيء طبيعي انى اكشف على العربيه و اعرف كل كبيره و صغيره عشان ابقى مطمن منها و انا على الطريق
و ما تقلقش برده عزومتك عندى زي ما هى :b4_388:

[HISHAM80]

ربنا يباركلك فيها انشاء الله بس هوا مكنش يعرف سعر الحساس لانه مكنش موجود في جسر السويس وقلولو يجيبو من بره من عند مجدي الدسوقي بس هو كان مستعجل علشان السفر بس التوكل بيستهبل اوي الصراحه المهم هوندا فعلا عربيه محترمه و ميقدرهاش غير الي يركبهاو لولا انها مش مناسبه لينا وظروف السفر مكناش فرطنا فيها بس الحج واخد على الاوبل وعايز حاجه عاليه وميخفش عليها .بردو لاحظت حاجه غريبه في العربيه الهوندا الموديل ده بالذات مهما كنت بتسوق هتلاقي نفسك مخضوض من ابعادها والناس كلها عايزه تشد معاك.

[IronHead]

هى دى ضريبة اللى يركب ركوبة الهوندا الحلوة, المعادلة محفوظة, عربية حلوة=صيانة غالية
بس انا شايف ان اسعار قطع الغيار الدورية مش غاليه ولا حاجة, الميتسوبيشى والتويوتا مش فارقة كتير عنها, والمازدا اغلى من الهوندا بشوية حلوين
هى الغلطة اللى عملتها انك مكشفتش فى التوكيل, كنت هتدفع حوالى 400 بس كنت على الاقل هتعرف موضوع الكوبلن وكان ممكن تتفاوض مع صاحبها القديم
عموما الحمد لله ان اللى طلع فيها كلام فارغ مش حاجة خطيرة

[amr_2009]

حاجه غريبه فعلا...

الاسعار دى اقل من اسعار قطع الغيار عندى وشامله حاجات كتير..

الفانوس الخلفى والفانوس الامامى والفلاتر..فلتر الهوا والزيت..مع انى كنت فاكر الاسعار هنا اعلى

[szaalouk]

الف مبروك يا باشا و ربنا يديك خيرها و يكفيك شر طريقها و تستمتع بيها بعد كل التظبيط ده .

[dramir1]

ربنا يباركلك فى عربيتك

[Youssef.Awad]

قدر الله وماشاء فعل
بس حرام الواحد يشترى عربية كسر زيرو وملعوب فيها وناقص فيها حاجات ويدفع 5000 ج كده بالساهل
عشان كده انا ضد شراء عربية حديثة استعمال بسيط

[hamada_amg]

ربنا يباركلك فيها إن شاء الله بس هوا مكنش يعرف سعر الحساس لانه مكنش موجود في جسر السويس وقلولو يجيبو من بره من عند مجدي الدسوقي بس هو كان مستعجل علشان السفر بس التوكل بيستهبل اوي الصراحه المهم هوندا فعلا عربيه محترمه و ميقدرهاش غير الي يركبهاو لولا انها مش مناسبه لينا وظروف السفر مكناش فرطنا فيها بس الحج واخد على الاوبل وعايز حاجه عاليه وميخفش عليها .بردو لاحظت حاجه غريبه في العربيه الهوندا الموديل ده بالذات مهما كنت بتسوق هتلاقي نفسك مخضوض من ابعادها والناس كلها عايزه تشد معاك.

فعلا يا استاذ هشام و الله كلامك
حاسس ان كل الناس عايزه تشد معايا

ياراجل ده من يومين لقيت سواق ميكروباص بيشد معايا و مصر انه يعدينى قلت اسيبه بدل ما يخبطنى و لا حاجه

متهيألى لو مش كنت سبته كان نزل فرد سلاح عليا و لا حاجه

[hamada_amg]

هى دى ضريبة اللى يركب ركوبة الهوندا الحلوة, المعادلة محفوظة, عربية حلوة=صيانة غالية
بس انا شايف ان اسعار قطع الغيار الدورية مش غاليه ولا حاجة, الميتسوبيشى والتويوتا مش فارقة كتير عنها, والمازدا اغلى من الهوندا بشوية حلوين
هى الغلطة اللى عملتها انك مكشفتش فى التوكيل, كنت هتدفع حوالى 400 بس كنت على الاقل هتعرف موضوع الكوبلن وكان ممكن تتفاوض مع صاحبها القديم
عموما الحمد لله ان اللى طلع فيها كلام فارغ مش حاجة خطيرة

بالظبط ياباشا المهم ان اللى طلع فيها كلام صغير مش حاجه مصيبه لقدر الله و ده المفيد

و موضوع قطع الغيار و الله انا شايف انها فيها حاجات ارخص من البومه على اعتبار انى كنت راكبها و حافظها

لكن عيب قطع غيار الهوندا و ده اللى مبوظ سوقها فى مصر عدم انتشارها فى كل حته

يعني انا من طنطا مثلا لو وقفت عند سوبر ماركت هلاقى قطع بوما كتير جدا و اصلى و تيوانى لكن الهوندا لا عايزه نازله القاهره عشان اجيب حاجتها ده الفرق اللى انا حاسس انه قوي فى قطع الغيار لكن فى الاسعار الموضوع ظريف جدا

[hamada_amg]

حاجه غريبه فعلا...

الاسعار دى اقل من اسعار قطع الغيار عندى وشامله حاجات كتير..

الفانوس الخلفى والفانوس الامامى والفلاتر..فلتر الهوا والزيت..مع انى كنت فاكر الاسعار هنا اعلى

لا ياباشا انت عندك فى الشارك بلاوي و قصص و اسعار غريبه فى قطع الغيار و اعتقد ده اللى مش معلى سوق البيع فى الشارك بسبب الرواس

انا كتير قارنت بين الشارك و بين الهوندا و البومه عشان اعرف اعمل ايه و اجيب ايه

لكن اعذرنى اللى يخلينى ادفع 160 الف فى شارك ادفعهم فى هوندا صح و لا ايه

[hamada_amg]

الف مبروك يا باشا و ربنا يديك خيرها و يكفيك شر طريقها و تستمتع بيها بعد كل التظبيط ده .

ربنا يباركلك فى عربيتك

ربنا يباركلكم يا رجاله