عاجل لسمسم باشا 000000000

[waled4u]

سمسم ازيك وحشتني انت وكل اعضاء المتدى والعصابه اللى بعتبرهم اخوتى ف الهوندا المهم انا شفت موضوعك ف ترويق ونظافه الهوندا وغسلها ونظافه الموتور ونفذت حرفيا اللى قرأته ف موضوعك وزودت عليه انى جبت عدادات فيها آر بي ام وركبتها بنفسى مكان القديمه واشتغلت والحمد لله بنفس الفيش القديمه وزودت فيشه كمان لقيتها نورت لمبه الاير باج srsففصلتها علشان انا اصلا ما عنديش اير باج (سيفك 98 خليجى exl) المهم كل العدادات اشتغلت تمام ما عدا لمبات النقلات الاتو ماتيك كلها هيست وتنور مع بعض وبتطفى مع بعض حاولت أجيب البورده من العداد القديم وهى شغاله زى الفل لقيتها أكبر وما تنفعش تركب حاليا بفكر أفك سلوك الفيشه الراكبه للعدادات وأغير أماكن السلوك وأجرب لحد ما أوصل للتركيبه الصح بس خايف أعمل قفله فعايز رأيك علما بأن العدادات الجديده فيها s والقديمه فيها 2dو3dوالجديده ما فيهاش ودى كانت المشكله الأولى0000
المشكله التانيه بقى يا سيدى انا فكيت البوابه والحساسات ونضفتهم كويس وركبتهم وفكيت التشوك ومسمار الهوا ونضفتهم وركبت وبعد ما ركبت العربيه ما عدتش بتعلا ف التسخين الصبح ففكيت مسمار التشوك ولعبت ف العيار ولعبت ف مسمسار الهواء لغايه ما لقيه صواريخ بتطلع م البوابه لما بزود بسرعه
واحد صاحبي قالي الكهربا عاوزه تعلا وغير البوجيهات انا غيرت البو جيهات بس التجميع مش عاجبني !!!
عايز أعرف منك ازاى أظبط مسمار الهوا وحساس الايدل وحساس البوابه والكهربا لان الميكانيكي اللى انا عنده ما بيفهمش خالص وانا بحب أعرف كل حاجه وأعملها بنفسي
انا عارف اني وجعت دماغك بس بجد مستني ردك لانك موسوعه الهوندا وربنا يبارك لك واحب اسمع مشاركات باقي الاعضاء لكل منت عنده الفكره او الحل

[SAMEH_FOUAD]

وانت اكتر ياباشا فينك

بالنسبة للعداد فطبعا دة مش بتاعة بس لو عايز تشغل لمض النقلات يبقى تروح عند حسنى فى الحرفيين هيشغلهالك لان اللى انت هتعملة دة غلط هو هيشوفلك اية المشكلة وهيحصلهالك واتعلم منة وشوفة هو بيعمل اية , وصدقنى العب فى اى حاجة ماعدا كهرباء العربية

* بالنسبة بقى لموضوع تنظيف البوابة :

انت دلوقتى والعربية على السلانسية العادى بتبقى عدد لفات المحرك كام لو 850 يبقى مظبوطة ومتلعبش فى ال tps , لكن لو واطية يبقى كدة انت عندك التشوك كدة مش شغال ولازم يتفك ويتنظف كويس وحاول تنشطة بأنك تصولة بفولت اعلى منة شوية يعنى فكة ووصلة مثلا direct بالبطارية ثانية وتشيل , ثانية وتشيل وكرر المحاولة وشوف النتيجة

بالنسبة للمدافع اللى بتطلع من الشكمان لما بتزود دة معناة ان الكهرباء عندك مش مظبوطة , ولو ماتعدلتش يبقى لازم تغير ال ignitor

مسمار الهواء هقولك على الظبطة الاصلية لية بس اهم حاجة يكون المكنة عندك اصلا مظبوطة عشان يتظبط عليها صح , وعموما انت هتسيب مسافة ثلاثة ملى من حرف مكان المسمار يعنى تقدر تقول فى الوسط وعلى فكرة حتى لو فتحت مسمار الهواء او قفلتة كل اللى هيحصل ان العربية لائما هتتخنق او تاكل بنزين لكن انها تدى مدافع لأ طبعا

* حساس الهواء والايدل مالهمش ظبطة بيتركبوا على طول هوة بس بلف الايدل هو اللى بيتنظف عن طريق وضع اسبراى wd-40 فى فتحات الايدل وتركها على الاقل ربع ساعة وبعد كدة تجيب اسبراى carb cleaner وتروح راشش فية كويس جدا , لحد ماينظف + وبعد كدة تحاول تتدخل مفك رفيع مابين ماسورتين المياة اللى نازلين منة وتقعد كانك بتحفر من جوة هتلاقى الصدأ بينزل كلة اول لما ترش ال wd-40 وياريت تكحت بالمفك وانت بترش wd-40 ولو فية اى حاجة مش واضحة تليفونى 01003088605 كلمنى وانت بتعمل العربية وانا اقولك تعمل اية

* البوابة عشان تتفك كلها محتاجة عدة ماعتقدش انها عندك وانصحك ماتفكهاش لانها صعبة جدا وخصوصا فى تركيبها وظبطها

* بالنسبة لظبط الكهرباء هتلاقى ثلاث صواميل واحدة علوية فى النص واتنين من اسفل على الطرفين
هتريح الثلاثة دول وبعد كدة تبدأ توسط الاسبراتير بحيث يكون المسافة مابين المجرتين اللى فى ظهر الاسبراتير تكون واحدة بالظبط او بمعنى اصح المجرى اللى متثبتة عليها الصامولة

ولو فية اى حاجة كلمنى هيبقى احسن واقولك تعملها ازاى ولو نازل القاهرة ولا حاجة قولى وانا اقابلك واعملهالك انا كنت لسة عامل عربية زميلنا mohamed hassan 204 وعمتلة تنظيف للمحرك كلة خد منى ساعة الا ربع بس الحمد لله العربية طلعت حاجة تانية خالص

فانت ياباشا كلمنى واهو نسمع صوتك

[waled4u]

سمسم باشا انا شاكر جدا لردك عليا وده عشمي فيك دايما ربنا يخليك وما اتحرمش من ذوقك
وبالنسبه للعدادات انا هسيبها لغايه لما انزل القاهره وارن عليك تقولى على مكان الكهربائي ده وبالنسبه للايدل انا اول ما جبت العربيه كانت بتعلا السلانسيه الصبح لحد ما تسخن وبعدين تهدا تانى وتعلى مع تشغيل النقل او تشغيل التكيف
طبعا ده شغل الايدل هو اللى بيفتح للهوا علشان زياده الحمل على المكنه ومن فتره ما عدتش بتعلا الصبح ولا عند تشغيل التكيف بتعلا بس ف النقل ....
فالميكانيكي قالي غير حساس الايدل غيرته وجبت واحد تاني كامل بالبوابه ومعاه كل الحساسات وبرضه العربيه مش بتعلا الا ف النقل والميكانيكي قالى ممكن يكون عيب ف كمبيوتر العربيه ما بيديش الامر علشان اليدل يشتغل ونصحني ما أخدش بالي وعلا السلانسيه شويه وكبير دماغك ...
فا بصراحه لما شفت موضوع التنظيف ده قررت أنظف زى ما قولت لى بالظبط والعربيه فعلا فاقت وظبط الكهربا زى ما قولت لى وفعلا فرقت كتير عن الأول وربن يبارك لك
بس ما عدش غير مشكله الايدل اللى ما بيعلاش غير ف النقل
وبصراحه انا مش مقتنع انه بياخد امر خصوصا ف الصبح والعربيه بارده لأنه واصل فيه خرطوم الميه اللى بينبه ان الموتور وصلت درجه حرارته للدرجه المطلوبه فابيهدا باحساسه بالحراه مش بأمر الايكو
انا مش عارف لى كلامى صح قولى ولو غلط ياريت تقولى ع الصح وعلى فكره فيه مسمارين على ملف الايدل جنب فيشه التوصيل بفكهم وأحرك الحساس يقوم يعلى السلانسيه ويوطيه وده كان قصدى ومستني ردك ياباشا
ودايما تعبك معانا بس احنا مالناش غيرك

[SAMEH_FOUAD]

انت اللى متحكم عندك فى ان العربية ترفع الاربى ام بتاعها الصبح عشان تسخن بسرعة هو ال choke هتلاقيك ركبتة مش مظبوط

واللى انت بتعلى الاربى ام منة دة اسمة ال tps ودة المفروض مايتلعبش فية اصلا دة بيتظبط على 850 لفة وسيبة على كدة

[waled4u]

الف شكر يا سمسم ومش عارف من غيرك نعمل ايه