العربيه ماشيه من غير زيت ( Crazy honda :D)

[wael ahmed]

السلام عليكم
دلوقتى بعيدآ عن ان عربيتى ساعات بتبقى ناشفه وساعات الاقيها حرير بس بقيت متأقلم مع جنونها ده

بس اللى مش طبيعى انى اجى اقيس الزيت ملاقيش المقياس معلم خالص غير حاجه بسيطه اووى بتاع سم !!!!!!!!!!!!

انا مغير زيت كاسترول ماجينتك من شهر تقريبا وماشى عليه لحد دلوقتى 7000 كيلو

لما كملت 5000 الزيت نقص نص كيلو وزودته ... بس سواقتى فى الفتره دى كلها حرق وعلى سرعات عاليه (طرق سريعه وزحمه )

الغريبه بقى انى مفيش اى تغير فى صوت الموتور ولا دخان ولا حراره ولا رشح ولا اى حاجه

حد يقدر يفدنى فى الموضوع ده يا رجاله علشان خلاص قربت اتجنن

[tarekzein]

خد بالك ياوائل عشان حصلت معايا قبل كده

والموضوع ده بيآثر على الموتور

ةممكن لا قدر الله الموتور يبدأ يرزع

قيس مستوى الزيت والعربيه بارده

وزود اللى ناقص ومتقرصش عالمكنه عمال على بطال

[mmharoun]

ايوة الكلام بتاع طارق باشا دة صح الصح واسئل مجرب علشان عندى عمل كدة ومن ضمن التوابع ان عمود الكامة ( تأكل ) من عند الترس وطلمبة الزيت باظت هى الاخرى فلابد وان تتابع مقياس الزيت وبشرط وان تكون السيارة باردة وخد بالك من المكنة بتاعتك يا وائل

[أبو_يوسف]

واتأكد ان فلتر الزيت متركب كويس ومفيش تسريب من ناحيته..

[wael ahmed]

والله يا رجاله انا مش بقرص على العربيه عمال على بطال ولا حاجه يعنى مش بعلى عن 6 rpm ده فى أسؤ الظروف يعنى

اعتقد المشكله كلها فى ان الزيت بيتاكل انى بمشى على سرعات عاليه لمده طويله :$

بس اللى انا عايز اعرفه مش المفروض ان الزيت لما ينقص لمبه الزيت تنور العربيه تسخن او تدخن او تعمل اى حاجه

طيب هقولكوا حاجه بقى نازل النهارده كنت فى المرور بخلص ورق تكهين السيراتو

اقال ايه العربيه بقيت انعم من الاول هههههههههههه والله العظيم كنت هتجنن وانزل اقيس الزيت مفيش زيت خالص بمعنى الكلمه .... يعنى اشيل المقياس الاقيه متغطى كله زيت .. امسحه واحطه واطلعه النقطه اليتيمه اللى كانت بتظهر دى مبقتش تعلم اصلا :)
هنزل اشترى زيت وامرى لله ... وانا كان نفسى اغيره بالمره بس مفيش حد بيبع فلاتر هنا ومغيرتش فلتر الغيار اللى فات ... والحمد لله فيه موزع معتمد لكاسترول فى الغردقه ... هزود كيلو ولا كيلو ونص واشوف الدنيا ماشيه ازاى :)

[M_Nabil]

مش طبيعى ان الزيت ينقص بالشكل ده طلما الماتور عندك سليم طيب أنت متأكد ان الزيت اللى غيرته أخر مره مش مضروب؟ وياريت ترفع العربية في بنزينه وتنزل تبص تحت لو في تسريب جاى من عند طبه الزيت أو الفلتر

عموماً أكشف على الزيت والعربية باردة شوف لونه اية؟! وحط نقطة على صبعك وشوف اللزوجة بتاعته! وزود الناقص وتابعه كل يومين وقولنا الأخبار وممكن الغيار الجاى تحط زيت شل الأصفر أو الأزرق وشوف هيعمل معك اية

[wael ahmed]

والله يا محمد باشا انا بشترى الزيت من بنزينة طاقه وده تانى غيار لكاسترول واول مره كان زى الفل مع ان سامح كان قالى انه بيتبخر بس كان معايا زى الفل ... بس فعلا تانى مره اشتريته مش عارف ليه احساس جالى كده انه مضروب :)

وعامة انا كنت بفكر فعلا اجرب شل الاصفر بس مش عايز اعقد اجرب زيوت كتيير لانى من ساعات ما اشتريت العربيه كنت بحط فيها فيسكو

ان شاء الله بكره هنزل ارفع العربيه وازود الزيت واشوف الدنيا "

[tarekzein]

فيسكو برضه محترم جدا ..بس بينقص مع القرص هوه كمان

[M.Nabeeh]

متابع

[wael ahmed]

فيسكو برضه محترم جدا ..بس بينقص مع القرص هوه كمان

والله يا طارق باشا موضوع الزيوت ده بقى عامل زى البطيخه >>

يعنى فيه ناس بتجرب فيسكو تلاقيه خلى صوت الموتور عالى والعكس

انا اول مره حطيت فيسكو 2000 ايام ما كان تعبئه مصرى قلت انضف بيه المكنه وبعد كده نزلته وحطيت فيسكو 3000 بس فعلا كان بيتبخر بسرعه ..

بس انا عايز اسأل على حاجه جت على بالى

موضوع الفلاش بتاع الموتور لو هغير من نوع لنوع .. غلط ولا لأ ؟؟
علشان فيه ناس بتقول غلط وناس بتقول لأ !!!

انا بصراحه نفسى اجرب فالفولين بس مش زى ما قولت مش عايز اقعد اغير فى زيوت

[OmaR_FekrY]

ههههههه الكلام ده حصل معايا النهارده الصبح ... دورت و لقيت العربيه بتطلع دخان ابيض كتييير .. بطلت و نزلت شفت الزيت . مظبوط و زى الفل :) بس الغريب ان الدخان ده بيطلع و هى العربيه على ال p بس و بعد كده مفييش :)

[wael ahmed]

العربيه خدت 2 كيلو تقريبا زيت يا رجاله d:

[pop_king3]

فى حاجه عندك مش تمام تحتاج فنى ماهر

[wael ahmed]

والله يا كبير انا العربيه اصلا تعبت جرى وفحت معايا الشهرين اللى فاتوا دول وسفر على سرعات عاليه مسافات طويله
وزودت الزيت والحمد لله كله تمام .. وربنا يستر :)

[SAMEH_FOUAD]

وائل باشا اية الاخبار يارب تكون بخير

بالنسبة لموضوع زيت كاسترول ماجنيتك انا عارف انة بيتبخر مع الجرى بس مش بالطريقة دية اخرة يوم ماينقص كيلو كل 3000 دة مع القرص الشديد على المكنة باستمرار

بالنسبة للى حصل عندك دة دة ناتج عن رداءة الزيت اللى انت حطيتة فى المحرك والنتيجة ان ماستحملش الحرارة العالية لمسافات طويلة وبدأ فى فقدان لزوجتة وخواصة سريعا واتبخر فى مدة قصيرة جدا

انصحك بشيل الازرق ممتاز وبيستحمل بس هتتعب شوية على ماتلاقية

* بالنسبة لهدوء المحرك مع انخفاض مستوى الزيت للنصف تقريبا دة بيكون بسبب ان الحمل على الكرنك بيبقى خفيف جدا فبتحس بسرعة الاستجابة , وفى نفس الوقت مع الضغط على المحرك اجزاء المحرك بتتأكل بسرعة مع التحميل الزائد لان مافيش زيت كافى يقدر يبردها بسرعة لان نسبة الزيت قليلة

* نقطة ان لمبة الزيت مانورتش ودة لان لمبة الزيت بتنور لما يكون فى السيارة لتر زيت فقط اعلى من كدة يبقى انت لسة مادخلتش فى الخطر