معلومه على الماشي للي مايعرفهاش خاصه بأسلوب سواقة الاوتوماتيك

[hany63]

مساء الخير على احلى عصابه

يوم الجمعه اللي فات عديت على واحد صاحبي نروح النادي و قلت له ييجي معايا بعربيتي بدل مانروح بعربيتين (عادة بنتقابل هناك و كل واحد بيروح بعربيته)

المهم اول ماطلعت لقيت صاحبنا (راكب 318 بي ام) متبت في الكرسي بتاعه و بيقول لي ياعم فيه ايه؟ انت مركب تربو؟ قلت له ليه بتسأل؟

قال لي ابن عمي عنده برضه سيفيك 2009 بس عربيتك زي ماتكون حاجه تانيه دي بتنط من اقل لمسه ايه الحكايه؟

انا على طول فهمت السبب و حبيت احكيه ليكم وغالبا انتم عارفينه بس قلت اعمله عشان لو حد مش واخد باله اهو الفايده تعم و للناس الضيوف من الاقسام التانيه

لو قسمنا طريقة تعامل الناس مع الفتيس الاوتوماتيك نلاقي 3 طرق

1-معظم الناس بتحط رجليها و زي ماتيجي وبالتالي الفتيس هو اللي بيتحكم في النقله ويقول لك السحب ضعيف و لما يحبوا يقرصوا يعملوا كيك داون

2-الشباب اللي بيحب يسحب (انا بعمل كده في العادي) بيدوس لحد 3000-4000 لفه و يخف رجله لفوق يقوم الفتيس ناقل الغيار الاعلى و هكذا وطبعا ده عايز حساسيه و تعود عشان الفتيس ينقل زي مانت عايز بنعومه و التسارع يبقى سلس بدون delay

3-الطريقه التالته اللي لقيت كل اصحابي مش عارفينها هي تقوم ساحب على النقله التالته مثلا (و العصايه في وضع الD ) تشيل رجلك و تحطها تاني بسرعه كأنك بتخطفها و تكررها في الحاله دي العربيه مش هتنقل و الكمبيوتر هيقلب البرنامج من اقتصادي لرياضي و اعتقد بوابه البنزين هتفتح على الاخر و ادي دقني لو سيطرت عليها هتحس احساس تاني ولا المانيوال ولو عايزها تنقل شيل رجلك و استنى النقله

ارجو مكنش تقلت عليكم انا عارف ان الموضوع ممكن يكون هايف في نظر البعض بس قلت ممكن ناس تستفيد

و كنت عايز استفيد انا بالمره و اسأل هي الحركه دي تجيب قواعد موتور؟
عشان بس الواحد يعملها و ضميره مستريح

[CosmicOne]

بس اظن ان ده بيسقط نقله
اصل انا بعمل كده بردوا :)

[mody3on]

هي مش السيفيك فيها وضع رياضي ( اللي هو s ) ؟

[Android]

بصراحه ولا فهمت حاجه

وعموما مش بحب العربيات الاتوماتيك خالص ولا حتى فكرت اني اتعلمها
انا بفضل المانيوال بكتير بصراحه هو الاساس وبيخليك تحس بالعربية ..بحس بالتحكم في العربية فعلا عكس الاتوماتيك

انا اعتقادي الاتوماتيك مناسب اكتر للي مش بيحب المانيوال او السيدات او عموما الى بيحب يدوس بنزين وخلاص

ممكن يكون كلامي غلط لاني معرفش طبيعه عمل الاتوماتيك وكمان ليه انواع مختلفه واوبشنز وحوارات وانا على ادي

بس الف شكر على تقديمك المعلومات دي واكيد ناس كتير هتستفيد منها

[Mostafa.Ismail]

لا ارجوك واحدة واحدة كدة واشرحلى رقم 3 بس بالهداوة علشان نفسى اجربها.

[hany63]

بس اظن ان ده بيسقط نقله
اصل انا بعمل كده بردوا :)

ما فيش نقله بتسقط لو رفعت رجلك و حطيتها بسرعه هتحس زي احساس المانيوال لما بتشيل رجللك من على البنزين و ترجعها فالعربيه بتنط
انما لوشيلت رجلك ونزلتها بالراحه هتنقل فتتضطر تسقط نقله و مش هتجمع بنفس القوه

[hany63]

هي مش السيفيك فيها وضع رياضي ( اللي هو s ) ؟

موجود في ال VTI بس وفايدته انه اوتو عادي لحد D3 بجانب التحكم اليدوي في النقلات من خلال shift pedals

[hany63]

لا ارجوك واحدة واحدة كدة واشرحلى رقم 3 بس بالهداوة علشان نفسى اجربها.

بص حضرتك هتبقى مثلا على سرعة 80 و الار بي ام على 3500 تقريبا لو الفتيس 4 نقلات يعني الفتيس يكون على التالت ورجللك تقريبا واصله لنص الدواسه
ترفع رجللك بمنتهى السرعه و ترجعها بسرعه في نفس المكان كأنك بتنتشها هتلقى العربيه بتشد جامد ومش عايزه تنقل بسهوله
الموضوع متجرب في السيفيك و الكورولا و الصني مش عارف نظام الاوروبي بس ياريت تقول لي

[hany63]

بصراحه ولا فهمت حاجه

وعموما مش بحب العربيات الاتوماتيك خالص ولا حتى فكرت اني اتعلمها
انا بفضل المانيوال بكتير بصراحه هو الاساس وبيخليك تحس بالعربية ..بحس بالتحكم في العربية فعلا عكس الاتوماتيك

انا اعتقادي الاتوماتيك مناسب اكتر للي مش بيحب المانيوال او السيدات او عموما الى بيحب يدوس بنزين وخلاص

ممكن يكون كلامي غلط لاني معرفش طبيعه عمل الاتوماتيك وكمان ليه انواع مختلفه واوبشنز وحوارات وانا على ادي

بس الف شكر على تقديمك المعلومات دي واكيد ناس كتير هتستفيد منها

طبعا انا بحترم رأيك لانه كان نفس رأيي بالمللي من كام سنه لدرجة اني اجبرت والدي يجيب a5 اوكتافيا مانيوال بس لما حضرتك تجرب الاوتوماتيك و خصوصا لما توفر 300 دوسة دبرياج يوميا على الاقل هتغير رأيك

[hany63]

الفكره باختصار وانت بتسحب بدل ماتفضل دايس one shot سيب ودوس تاني بس اخطفها