حكايه يحيي و احمد فى بورسعيد و اسعار قطع الغيار ^_^

[ahmedeihab]

السلاام عليكم اخوانا الهونداويه

تم بحمد الله السفر لبورسعيد امس السبت

انا و حمايا يحيي علشان انا خطبت بيرى منه امبارح و قرينا الفاتحه سوا

المهم نبتدى الحكايه من اولها لاخرها

يحيي اتصل بيا الصبح الساعه 8

طبعا انا نايم كلعاده

صحانى و قالى اييه يا عم انت لسه نايم قولتله يا سيدى اهو صحيت

هو كان نزل من البيت و رايح يركب

و انا لسه قايم من على السرير

المهم هو كان واصفلى طريق علشان اركب بورسعيد

من الهرم للمرج و من المرج اركب بورسعيد

انا قلت بقا استقرب الساعه لسه 8 و شويه

اروح اركب سوبر جيت على السريع كده اتوبيس 9

المهم رحت قطعت التذكره و قولتله يا يحيي انا هركب اتوبيس 9

و فعلا ركبت اتوبيس 9 و يارتنى ما ركبت بلصلاه على النبى اخد 3 ساعات فى الطريق

غير الافلام ال....... اللى هما بيشغلوها كانوا مشغلين فيلم ثانى اوكسيد الكربون بتاع هانى رمزى

حاجه يعنى تجيب الكساح

وانا اللى قلت اركب سوبر جيت العال لو عسى يبقى فيه مضيفات تطرى القعده

بدل ما اركب بيجو و اتزنق و ريحه العرق تخنق اهلى

ركب السوبر جيت لقيتها ناشفه زى المستشفى

لا مضيفه ولا يحزنون

قلت عادى يمكن فى موقف الماظه هيركبوا

وصلنا موقف الماظه لقيتها بردو ناااااااااااااااشفه زى المستشفى حاجه يعنى تجيب الشلل

قمت حاطط جزمه فى بقى و عمال اتفرج على الفيلم اللى يجيب الكساح

عند القنطره كان يحيي وصل بورسعيد بلسلامه

كلمنى انت فين انا فى القنطره يا سيدى

قدامك قد ايه قلتله تلت ساعه و ان شاء الله اكون فى بورسعيد

و السواااااااق يعنى 3 ساعات يعنى 3 ساعات مفيش لا اقل ولا ازيد

وصلت الحمد لله لبورسعيد

اتصلت بيحيي انت فين يا سيدى قالى انا عند عبدالله فى بنك الاسكان

ركبت تاكسى شاهين ما يعلم الا ربنا قمت قايل فى سرى ورايا ورايا العربيه دى

بقا انا سايبها فى البيت تطلعى فى بورسعيد

ركبت بنك الاسكان يا سيدى

نزلنا بنك الاسكان و انا ماسك الباب بأيدى لانه مش بيقفل بقوله يا عم بقا من بورسعيد و مش قادر تجيب

باب قالى انا مش من بورسعيد قلتله منين قالى من بولاق الدكرور قلتله و انا من الهرم طلعنا جيران و

مكنش عايز ياخد فلوس خاااااااااالص غير ما انا نزلت و قمت حاططله الفلوس على الكرسى و قلوتله

ربنا يستر طريقك استنى بقا اربط الحبل فى الباب علشان ميفتحش تانى

و قمت ماشى رايح ليحيي

ازيك يا عم يحيي ايه يا عم اخبارك انت متأخرتش و كده قولتله الحمد لله

قعدنا عند عبد الله و دى كانت اول قعده ليا معاه بس كنت بروحله على طول

سلمت على عبد الله بجد ولد زى العسل و دمه خفيف جدااا اينعم حصلت مشكله بينى و بينه كبيره

اوووووى

هو عايز يخطب بيرى و انا اقوله يا سيدى مفيش الكلام ده انا قريت فاتحه ههههههههههه

المهم يلا يا يحيي نقوم ناخد لفه فى بورسعيد

لفينا عند طوب الارض فى الاسكان على موتور SIR & GSR ملقناش غير عند

محسن و مواتيره تعبانه و كودهم b16a2 & b16a4 و الاتنين يحيي مش

عايزهم و سعرهم 8500 بلعصايه و جوز الكبالن و الضفيره

بس حالتهم مش حلوه

قعدنا نلف تانى و تانى و تانى و تانى

قالى تعالى نروح لظاظا قولتله لاء ظاظا اخر واحد علشان انا لو رحت هعربن على المكنه فا سيبوا اخر
واحد

بعد ما زهقنا لف و سؤال عن الموتورين دول

تامر كلمنى و سألنى على موتور 1500 كربيراتير كان عامل 4500 عند ظاظا

و واحد تانى كلمنى و الله مش فاكر اسمه

المهم قلنا ايه بقا كفايه كده و نروح لابو الظيظ نشوف عنده ايه

رحنا لظاظا قلتله بس قبل ما ندخل على ظاظا فى واحد هنا عنده حاجات هوندا نسأل عنده

دخلنا سلام عليكم و عليكم السلام

عايزين مكنه SIR قالى موجوده ببص بعينى لقيت واحده محطوطه فى

الارض بس شكلها مش ولابد

قالى لاء مش دى دى خلع و بتاعت زبون تعالى

اخدنى فتح نص عربيه سيفيك 2000 موجود جواها المكنه

و الموتور زيييييييييييييييييييييرو الكود بتاعه b16a2

بكام يا عم ده قالى هتاخده بأيه قولتله بكل حاجه بلعفشه كمان قالى بس ده من غير اسكاترا

قالنا هى موديل كام قولناله 92 طب يا سيدى الاسكاترا مش هتركب عندكوا

طب يا عم الرغاااى اخلص بكااام

قالى موتور بلقواعد بلضفيره و الكونتروال و القنطره و العفشه كامله من الالف للياء قالى هتفضى

الحوض و تسيبه على الصاج هدفعك 13 الف جنيه

اييييييييه صدمه العمر بقا و بعدين مش ده اللى احنا عايزينه يا عم احنا عايزين b16a &
b16a5

قالى و الله ده اللى عندى

طب يا سيدى متشكرين

و اخدنا بعضنا و دخلنا على ابو الظيظ

اهلا اهلا اهلا عايزين موتور SIR يا حاج ظاظا لا و الله مش عندى طب عايزين

خزنه باور يا حاج ظاظا لا و الله مش عندى بس اقولك عندى على حاجه الخزنه ال 3 مخرج مش موجوده

ولو موجوده هيتكلم فى 450 جنيه



انت ممكن تشترى واحده 2 مخرج عادى جدااااا جدااااااا و تييجى عند المخرج اللى فى الجنب و تخرم

العلبه و تحط ماسوره نحاس و تعمل حواليها مادتين لزق قالى و انسى بقا الكلام لان ده راجع مش مهم


طبعا انا قمت معربن على المكنه ال GSR و يحيي ان شاء الله فيه مفاجأه

معاه بس مش هتتقال دلوقتى كمان 20 او 25 يوم ان شاء الله

و سألناه على الصاج




جوز رفارف 400 جنيه

اكصدام امامى عادى ب 400 جنيه

اكصدام امامى كوبيه بلفوجات 750 جنيه

اكصدام خلفى 400 جنيه

4 باب كاملين ب 1200 او 1300 جنيه

موتور السيفيك ال 1500 الانجكشن اول مره اشوفه بس ما علينا ب 3500 جنيه كامل




بس كده اخدنا بعضنا و سلام عليكم يا عم محمود و عليكم السلام

اخدنا بعضنا و رجعنا لعبدالله تانى

قعدنا معاه

بس و الله مكنش راضى يسبينا نمشى و كل ده طبعا علشان يحيي معانا المهم

دخلت جوه لقيت جنط عجبنى اوووووووووووووى قمت قافش فيه بأيدى و سنانى بكام ده قالى عجبك

قولتله اه قالى خده و امشى طب بكام يا عم عبده قالى خده و امشى ده انت جاى مع يحيي


يمين شمال مفيش خده و امشى

عجبتنى علبه شكمان اووووى بكام دى يا برنس قالى سيبك من الكلام ده و تعالى

اخدنا و دخلنا المكتب طلعلنا علبه ديفيل هوندا اوريجنال المااااااااظ لم تستخدم نهااااااااائى

بكام دى قالى خدها بردو مع الجنط و امشى

يا سيييييييييييدى بكاااااااااام مع الجنط و امشى

و بعد ساعه تقريبا من الكلام ده فين و فين بقا اما قالى دول ب كذا و كذا دى مش هتتقال دلوقتى

خاااااااااااااالص ولا اى اسعار هتتقال دلوقتى غير بعد ما العريبه تخلص تماما

خد عربون يا عم عبده مفيش يا سيدى يهديك يرضيك مفيش

يا باشمهندس مفيش كلامنا بفلوس قولتله انا السبت موجود ان شاء الله و هاخدهم مع الموتور

و يلا يا عم يحيي يلا يا ابو حميد

اتمشينا لحد الموقف يحيي ركب السويس علشان خاطر رايح الشغل

و انا قلت اركب السوبر جيت و امرى لله و قطعت تذكره 6 و اخدت بعضى و كل واحد رجع على مكانه

بسلااااااااام

تحياتى ليكوا يا هونداويه و معلش لو كنت بطول عليكما بس لازم اقولكلوا اللى حصل بلتفصيل الممل

^_^

[kar!m]

ربنا يوفقك و يتممهالك على خير .. العربية و العروسه.

بجد أنت لو كنت يتكتب محاضرات بالطريقة دي .. كنت تبقى هايل

[ahmedeihab]

ربنا يوفقك و يتممهالك على خير .. العربية و العروسه.

بجد أنت لو كنت يتكتب محاضرات بالطريقة دي .. كنت تبقى هايل

ده لو بقا يا استاذ كريم كان زمان الواحد فلح
ولو حرف شعلقه فى الجو :D:D:D
^_^

[SAMEH_FOUAD]

تمام يعنى الحمد لله جت بفايدة

[ahmedeihab]

تمام يعنى الحمد لله جت بفايدة

الحمد لله يا موحه
^_^

[honda forever]

حمد الله على السلامه
وألف مبروك

[wildwest100]

ده لو بقا يا استاذ كريم كان زمان الواحد فلح
ولو حرف شعلقه فى الجو :d:d:d
^_^

انا اللى كلمتكواسمى مصطفى وكنت باساللك على لاكصدام الكوبيه

[ahmedeihab]

حمد الله على السلامه
وألف مبروك

تسلم يا كبير
^_^

انا اللى كلمتكواسمى مصطفى وكنت باساللك على لاكصدام الكوبيه

ايووووووووه هو انت يا معلمى
معلش بقا اصل فى ناس كتير كلمتنى و نسيت الاسامى
و على فكره يا رجاله وائل كمان اتصل بيا امبارح علشان نسيت اكتبه
^_^

[totti78ali]

اولا انا بباركلك على الحجات الى عربنت عليها و يا رب تيجى و تركب على خير
و بجد مش عارف اشكرك ازاى انا سالتك على حجات كتير و اتصلت بيك اكتر من مره و انت كونت بترد و و عاوز تساعد بجد الله بيركلك

[ahmedeihab]

اولا انا بباركلك على الحجات الى عربنت عليها و يا رب تيجى و تركب على خير
و بجد مش عارف اشكرك ازاى انا سالتك على حجات كتير و اتصلت بيك اكتر من مره و انت كونت بترد و و عاوز تساعد بجد الله بيركلك

يا عم تامر دى اقل حاجه اقدر اقدمها و الله كلنا هنا بنتعلم من بعض و بنساعد بعض
فا متقلقش محدش هيبخل عليك بمعلومه واحده توحد ربنا
و كل الناس هتساعدك متقلقش
اهم حاجه اننا نوصل لنتيجه كويسه تريحنا
^_^

[totti78ali]

يا عم تامر دى اقل حاجه اقدر اقدمها و الله كلنا هنا بنتعلم من بعض و بنساعد بعض
فا متقلقش محدش هيبخل عليك بمعلومه واحده توحد ربنا
و كل الناس هتساعدك متقلقش
اهم حاجه اننا نوصل لنتيجه كويسه تريحنا
^_^

تسلم يا باشه
بس فى سوال كده على الماشى الموتور ال 1500 الانجكشن ده من غير العفشه ؟
طيب العفشه تعمل كام و التنك كمان (عاوز اضبط الميزانيه )
معلش انا اسالتى كتير

[ahmedeihab]

تسلم يا باشه
بس فى سوال كده على الماشى الموتور ال 1500 الانجكشن ده من غير العفشه ؟
طيب العفشه تعمل كام و التنك كمان (عاوز اضبط الميزانيه )
معلش انا اسالتى كتير

ولا يهمك يا كبير
عفشتك هتركب عليه مفيش مشاكل
و التانك هيعمل فى حدود 500 جنيه
^_^

[totti78ali]

ولا يهمك يا كبير
عفشتك هتركب عليه مفيش مشاكل
و التانك هيعمل فى حدود 500 جنيه
^_^

يا باشه انا الموتور عندى 1300 cc هينفع الركب الموتور ال1500 cc من غير ما اغير العفشه و الكبالن

[ahmedeihab]

يا باشه انا الموتور عندى 1300 cc هينفع الركب الموتور ال1500 cc من غير ما اغير العفشه و الكبالن

الموتور هييجى بكبالن دى اول حاجه
و بعدين ازاى الموتور اللى عندك 1300 مش انت سيفيك
قولى بقا انت سيفيك موديل كام علشان الفار بيلعب فى عبى
^_^

[totti78ali]

يا باشه من غير فار ولا حاجه سيفك 83