حصريا: تغطية وصول سـيــتــي 2012 الى مصر - أسعار ومواصفات وصور

[eng_maged]

حصريا: تغطية وصول سـيــتــي 2012 الى مصر - أسعار ومواصفات وصور

السلام عليكم
اعلن توكيل الفطيم في مصر عن نزول السياره هوندا سيتي 2012 الى مصر وهو الفيس ليفت للشكل القديم من 2009 الى 2011.
واليكم التفاصيل التي استطعت ان اجمعها واعذروني لو في أي خطا لاني مجمع المعلومات من اكتر من مصدر ومن الوكيل.








أولا : الفئات والاسعار
السيتي 2012 هتنزل في فئتين الفئه الاساسيه و هيكون تمنها 132الف والهاي لاين و تمنها 143الف ولكل اللي عارف الفروقات اللي في الموديلات القديمه احب ااكد ان تقريبا نفس فرق الكماليات تقريبا موجود في الشكل الجديد

الفئه الاساسيه فيها:
عدد 2 ايرباج - فرامل ABS و EBD - اتوماتيك 5 نقلات - كاسيت سي دي و ام بي ثري - وصله يو اس بي و اوكس - سماعتين اماميتين - طاسات على جنط 15 - امبوليزر للمفتاح لمنع السرقه - مرايات كهرباء - زجاج اوتو للسائق - قواعد موتور قابله للكسر عند حدوث حوادث قويه وذلك لمنع السياره من الانقلاب - شاشه معلومات عن استهلاك البنزين - التحكم في ارتفاع المصابيح الاماميه - التحكم في ارتفاع عجلة القياده
السعر: 132 الف جنيه مصري

الهاي لاين تزيد:
جنوط اسبور 16 بوصه - فتيس ستيب ترونيك 5 نقلات مع ناقل بالطاره - اشارات في المرايات - ملتي فنكشون للتحكم بالكاسيت من الطاره - 4 سماعات - جهاز انذار بريموت - فوانيس شبوره - اضائه خريطه - مسند يد خلفي - مسند يد امامي - كنب خلفي قابل للطي - اكر نيكل - ارتفاع كرسي السائق قابل للتغيير
السعر: 143 الف جنيه مصري


ثانيا: المحرك
المحرك هو نفسه محرك الفئه السابقه وهو 1500 سي سي و 118 حصان بتقنيه I-VTEC وخمس نقلات اتوماتيك او ستيبترونيك في الهاي لاين ومفيش اي تعديلات في المحرك او الجير بوكس. والميزه الكبرى للمحرك ده عن تجربه شخصيه استهلاكه القليل جدا للبنزين عشان فيه 8 بوجيهات مش 4 والحرق بتاع البنزين بيكون افضل اكيد.



ثالثا: الصور
ملحوظه: ده مش صور موديل مصر بس هحاول قدر الامكان تقريب وجهات النظر




































رابعا: الالوان المتوفره
سلفر فاتح - فيراني غامق - ابيض - نبيتي - اسود - والجديد بني غامق
تم الغاء اللون الازرق والاحمر الناري





خامسا: الفرق بين موديل 2012 وبين الموديل السابق:

طبعا موديل 2012 للاسف مفهوش تعديلات جامده كلها حاجات بسيطه جدا وتتلخص في الاتي:













1- شبكه اماميه جديده
2- اكصدام امامي وخلفي مختلف مع خلفيه سوداء لضوء الشبوره الامامي
3- كساحات خلفيه مع ضوء شبوره خلفي
4- جنوط جديده - اسواء من الجنوط القديمه في رائي
5- فانوس خلفي جديد
6- العدادات لونها اصبح ازرق
7-ال Paddle Shift اصبحت جلد بدل نيكل
8- الوان جديده - احمر و بني
9- كبوت جديد
10- خامات افضل لفرش الكراسي
11- السياره اعلى من الارض عن الموديل السابق بنصف سنتي

ملحوظه: نظام الاكو درايف وفتحة السقف ومثبت السرعه منزلوش في مصر مع انهم موجودين في موديل 2012 خارج مصر.



الموضوع من تجميعي الشخصي. اتمنى ان يعجبكم
مهندس ماجد
.
.

[kar!m]

تسلم ايدك .. موضوع جامد و منظم و شامل.

بصراحه التعديلات عن الموديل القديم محبطة جدا .. كنا متوقعين تعديلات أقوى من كده.

من ناحيه تانية تفتكر انها هتنافس العربيات اللي في نفس فئتها بالسعر بتاعها ده؟

[khaleddapino]

التابلوه وحش اوووى

[abo-berry]

تسلم ايدك

[ahmedeihab]

موضوع ممتاز تسلم ايدك

^_^

[YahiaAshraf]

تقرير متميز
بارك الله فيك

[egyptiandiver]

100 / 100

[S O P H O S]

ما شاء الله
تسلم يا باشا ..

[makmak_10]

ياباشا هو ده الكلام...
تسلم ايدك و عايزين نشوف حاجات من دي كتير بقي...

[FrozenFire]

الله ينور عليك يا بشمهندس
أنا لسه داخل البيت حالا كنت في التوكيل اللي في التجمع الخامس بعمل صيانة ال 15 ألف وشفوتها هناك
مممممممممم
شكل التابلوه من جوا ماعجبنيش خالص، حسيت بتاعنا أشيك. هي أزواق على العموم.
طبعا الشكل الخارجي من الأمام فرق بس في الشبكة.
طبعا عربية راااااااااااااااااااائعة ولا يقتنيها إلا الذي يبحث عن الجودة والفخامة والتميز في إطار نفس الفئة السعرية.

[Unendlich]

بسعرها ده مبروك عليها الدكة مقدما
اللي عايز يركب ياباني (هو مش ياباني قوي بس هنمشيها ياباني زي بعضه) في الفئة دي هيركب الصني (أنا مش طايق شكلها بس بتكلم على ثقافة شعب) و اللي هيطلع لل 140 ده مظنش هيفكر أصلا في السيتي عشان هيلاقي إن ال 140 دول يركبوه عربيات كتييييييير قوي تندرج تحت فئات أعلى من السيتي

[eng_maged]

شكرا للجميع

الله ينور عليك يا بشمهندس
شكل التابلوه من جوا ماعجبنيش خالص، حسيت بتاعنا أشيك. هي أزواق على العموم.

فعلا لون التابلوه الجديد الازرق اتعمل طلسقه وخلاص. بدليل ان لون الكاسيت لسه اصفر واللونين مش راكبين على بعض حاسس ان في حاجه غلط

[eng_maged]

اسمحولي اقول رأيي في كل تعديل على حده


1- شبكه اماميه جديده
الشبكة الجديده فتحات التهويه فيها اوسع وده في مصلحه العربيه. لكن شكل القديمه اجمل في رائي.

2- اكصدام امامي وخلفي مختلف مع خلفيه سوداء لضوء الشبوره الامامي
الاكصدام الامامي الجديد عريض في المنطقه اللي حوالين النمر بطريقه اكبر بكتير من القديمه. وده هيقلل الكرف اللي في بوز العربيه. مع العلم ان بوز السيتي القديم كان كرفي اوي بطريقه زايده عن اللزوم. تقلييل الكرف ده ميزته ان الشكل هيبقى اجمل. لكن هيقلل ميزه القدره على المناورات الضيقه.

الخلفيه السوداء لفوانيس الشبوره هتسهل تركيب وفك فوانيس الشبوره بدل الحفر في الاكصدام.

3- كساحات خلفيه مع ضوء شبوره خلفي
شكلها حلو جدا وفعلا العربيه كانت محتاجاها

4- جنوط جديده - اسواء من الجنوط القديمه في رائي
الجنط القديم في رائيي جميل جدا والجديد مش عاجبني ابدا

5- فانوس خلفي جديد
الفانوس القديم مش عاجبني. الجديد احلى. بس كنت اتمنى تغيير حجم الفنوس الخلفي اساسا مش بس تغيير رسمته.

6- العدادات لونها اصبح ازرق
اسواء تعديل حصل في العربيه الجديده. الوان الطابلوه بقت مترقعه. العدادات زرقاء والكاسيت اصفر والتكييف تقريبا اصفر. مش عارف ازاي تفوت على هوندا ده.

11- السياره اعلى من الارض عن الموديل السابق بنصف سنتي
السيتي القديمه ارتفاعها متوسط. وانا اصلا معنديش مشكله في ان العربيه تبقى واطيه وشايف ان المشكله في شوارع مصر اساسا. النص سنتي دول اخاف يأثروا على ثبات العربيه

.

[Abu3aly]

تسلم ايديك والله .... انا كنت مستنى أى معلومات عنها لقيتك قلت كل اللى عاوزه و زيادة
الله يكرمك

[eng_maged]

شكرا ليك