يوم غريب جدااااااا والحمد لله انة عدى على خير

[SAMEH_FOUAD]

اذيكوا ياهونداوية عاملين اية

طبعا كل اللى بقولة الحمد لله ان اليوم دة عدى على خير لان بجد اليوم كان غريب جدا

ندخل فى التفاصيل

الوالدة كلمتنى وقالتلى عايزين نروح هايبر وان فى الشيخ زايد والكلام دة كان يوم الجمعة اللى فاتت واتحركنا فعلا على الساعة 8:30 مساءا من وسط البلد وكانت معايا والدتى ومراتى فقط لاغير ومشيت طبعا على سرعة ماتعداش ال40 كيلو داخل المدينة ومادراكوا بالخنقة اللى انا كنت فيها عشان حسيت ان عربيتى بقت 20 حصان بس , لان اى عربية ماشية فى الشارع كانت بتكلكسلى عشان اوسع

المهم طلعنا على المحور وكانت السرعة 80 كم ماعديتش كيلو واحد يمكن كنت بنزل فى بعض الاحيان ل 70 كم مع ان احساس العربية منعدم بالسرعة اصلا على سرعة 100 بس والدتى عينها على العداد عشان ماجريش وفجأءة عربيتين bmw e36 بيجروا مع بعض واحدة كوبية والتانية سيدان طايرين من جنبى وواحد منهم راح منزنق عليا عشان ياخد غرزة , انا طبعا دمى اتحرق ازاى واحد يعمل فيا كدة ومش عارف اخد حقى ولسة هدوس بنزين روحت راجع فى كلامى تانى وقولت ياواد عدى الليلة بدل مانسعملنا كلمتين

المهم وصلنا هايبر الحمد لله على خير الساعة 9:05 والطريق كان فاضى تماما , طبعا انا لو كنت لوحدى كنت زمانى واصل من ربع ساعة

لحد كدة وتمام والدنيا بيس واليوم جميل ولطيف وعملنا الشوبينج بتاعنا ومشينا الساعة 12:15

نيجى بقى هنا وحاجات غريبة بتحصل

دورت وطلعت ولفيت عشان ارجع وواخد الكوبرى وسرعتى وصلت ل80 كم , وفوجئت بعربية ريجاتا بتاخد غزرة من قدام العربية اللى ماشية امامى وفجأءة الاقى العربية الريجاتا بتخبط فى السور وعفرة جامدة , والعربية خبطت فى العربية اللى جنبها ولطشت معاها عربية كانت ماشية قدامها تقريبا , وقعدت تلف حوالين نفسها بتاع 5 -6 مرات والحمد لله انها ماتقلبتش , وانا بقى الخوف والرعب اترسم على وجوة عائلتى , وانا عادى لانى كنت مركز جدا هعمل اية وخصوصا اللى جى ورايا سريع لو انا وقفت فجاْة , والحمد لله اتصرفت شغلت الانتظار على طول , وفضات اهدى مع ضغط قوى شوية لحد ماجيت قبل العربية وروحت هوب واقف لما مالقيتش حد ورايا
طبعا الواد بتاع الريجاتا لف وفية عربية bmw 320 2010 يدوبك وقفت بس لما اديت للواد بتاع الريجاتا بوسة فى البابيين بس خفيفة , وطبعا واحد قدامى حسبى الله ونعم الوكيل فية واقف فى نص الشارع بيتفرج بالعربية مش يركن على جنب لو اى حد كان جاى بسرعة كان ممكن يخبط فينا وفيا بالتحديد لان مافيش غير عربية واحدة اللى ورايا , المهم الواد طبعا بتاع الريجاتا ربنا يكون فى عونة من هول الصدمة نزل ماسك دماغة وبيترعش من كتر الخوف والخضة

ومشيت عادى مافيش اى مشاكل وقولت الحمد لله يارب سلم , وانا ماشى عادى فى طريقى سواق تاكسى بعربية فيرنا بيفادى عربية رمت علية فجأءة راح رامى عليا انا وانا جنبى سيارات ماكنش قدامى غير انى افرمل , والحمد لله عدت على خير والرجل اعتذر .عديت على خير الحمد لله
مافيش بكيلو واحد بعربية ميكروباص جت فى دماغة يدخل شمال فجأءة بعد ماكان بينزل زبون وانا ماشى مافيش بينى وبينة عربية وسرعتى كانت 60كم والحمد لله وقفت بس رميت شوية ناحية الشمال لان كان الباشا خرج نص عربيتة , وطبعا مش عارف اتكلم معايا مراتى ووالدتى قولت كبر دماغك

نزلنا على خير الحمد لله ونزلت ميدان التحرير , لقيت ناس بتجرى علينا وبتقول اقفلوا الزجاج فية بلطجية , والتنبية لكل السيارات طبعا الخوف والرعب اترسم على وجوة العائلة مرة اخرى بس اكثر بقى من المرات اللى فاتت , ولقيت فعلا ناس عمالة تجرى معرفش مين دول فى وسط كل دة بقى , واحد بردة حسبى الله ونعم الوكيل راح واقف بعربيتة بيتفرج بيشوف فية اية وانا واقف وراة واديلة فى كلكس خرجنى عن شعورى ومش عايز افتح الزجاج طيب اعمل اية , الحمد لله فاق راح ماشى , وانا روحت طاير من الميدان فى اتجاة شارع التحرير , والحمد لله وصلت الحاجة بسلام وامان

هل اليوم خلص على كدة لأ لسة , وانا طالع قولت يارب سلمها وتوكلت على الله ومشيت فى اتجاهى الى دائرى المعادى

الجو جميل والدنيا حلوة والطريق حلو وماشى وعديت عادى جدا اول ماعديت نزلة شارع البحر الاعظم كان كلة تمام والجو حلو , طبعا معايا مراتى بس وانا عندى كبت سواقة لمدة ساعة سايق بالورقة والقلم .

فجيبت 100 كم وقولت كفاية كدة وحلو الاقى واحد معاة x3 2012 بيغرز وبيجرى قولت اشد معاة لسة هاقول هاشد معاة وهو لسة قدامى مش بعيد يعنى لقينا مقطورة على بعد 300 متر محملة طوب ورملة لونها طوبى كدة وفجأة الدنيا بقت حمرااااااااا , والاسفلت بقى احمر , والمقطورة وقفت وال x3 وراها وانا دخلت فى المنطقة اللى فيها الرملة , وراع بتاع ال x3 رامى عليا مرة واحدة وانا سرعتى 100 كم , وتحتيا تراب وانا بقول فى بالى اليوم الغريب هيختمها بيا ولا اية؟؟؟؟؟

وطبعا زوجتى راحت مصوتة فى العربية لان خلاص مافيش مجال للهرب بتاع ال bmw x3 خاف تقريبا راح رامى عليا من غير مايبص فى المرايا والجو احمر والارض تراب والدنيا بليل , والحمد لله روحت دايس فرامل ودخلت شمال عكس اتجاة الbmw وقولت زى ماتيجى تيجى والحمد لله العربية ماتهزتش من مكانها ولا عومت ولا زحفت ولا اى حاجة ونزلت سرعتى ل50 كم لحد مبتاع ال bmw x3 عدى , والصراحة راح راقع غرزة فى الارض اللى كلها تراب العربية ماعومتش من ورا نهائى وحرق على العربية وطار قولتلة فى بالى صباح الانظمة يا bm , وانا كمان قولت مااجرب والحمد لله نفس اللى حصل عندة حصل عندى وساعتها قولت ربنا يخليكى ليا ياهوندتى , وطيرت وراة قولت لازم اجيبة وفعلا وصلت لسرعة 160 كم وقربت منة جداااااااا , تقرييبا فرق عربية وفجأة لازم اهدى عشان النزلة بتاعتى جت وانا مجرد مادوست فرامل هو طار من قدامى وكان بيجرى وجايب اخر العربية , وبردة عرفت قيمة الهوندا انها ولا يهما 3000 c.c ولا حتى 5000 سى سى بتشد مع اى حد

الحمد لله اليوم عدى على خير وكان يوم غريب جدا والحمد لله وحمدت ربنا انة عدى من غير مشاكل

معلش طولت عليكما بس كان لازم احكى

[hany_bendary]

ههههههههههههههههههههه

الحمد لله أن ربنا كرمك وعدى اليوم على خير

نصيحة أبعد عن الدائرى طالما الدنيا كويسة والشوارع ماشية حلو

كان ممكن تلف لفة بسيطة وتاخد كورنيش المعادى أحسنلك

الحمد لله أنك بخير والأسرة بخير وبجد بجد رغم أن عربيتى محتاجة شغل إلا أنى بحمد ربنا أنى راكب هوندا

أنا فى طريق العين السخنة أخدت غرزة وأنا فوق الـ 160 كم لو بعربية عادية كنت أتقلبت وقتى وقتى لأن كنت باخد الغرزة من جنب مقطورتين محملين كونتنرات لدرجة أن كاوتش العربية مشى على حافة الرمل

وكان ورايا عربية تيوتا لاند كروزر 2012 تبعنا برضه فى السفرية وكان معانا لانسر 2007 برضه والتيوتا طبعاً خد الغرزة زى ما أنا أخدتها بالضبط اللانسر مقدرش يهوب ناحية المقطورة خالص

وده الفرق فعلاً فى العربيات.

[A.Saad]

حمد الله على سلامتك يا سمسم

[tikatalaat]

حمدلة على سلامتك يا سامح باشا وربنا بيستر

[ABO MALEK]

فضفض ولا يهمك شيل من على قلبك..........المهم انكم وصلتم بالسلامة.

[hany63]

هو على العموم كل مده تحس ان الناس سواقتها غريبه زي ما يكون كلهم ركبهم عفريت في اليوم ده و الكل زي ما يكون قاصد يخبطك لدرجة ان الواحد بيقعد يقول يا رب اروح سليم النهارده
الف سلامه ليك و للاسره

[tarekomar66]

الف حمد الله على سلامتك يا موحه
واضح ان كل العربيات فى المنتدى واخده عين جامده
ربنا يستر علينا جميعا

[abo-berry]

حمد الله علي السلامة يا أبو السماسم
بتفكرني يوم ما كنا طالعين بورسعيد أنا و إيهاب ، الناس كانت بترمي علينا رمي غريب في صلاح سالم ، تقريبا الناس بقت تعتبر المرايات دي اكسسوارات :d:d:d

[MNabeih]

الف حمد الله علي سلامتك يا معلم
و ربنا يستر طريقنا كلنا

[ahmedeihab]

حمد لله على السلامه يا سمسم

و بجد الواحد دلوقتى اكرمله يروح مشاويره بلمواصلات لان بجد كده بقت حاجه مستفزه الناس كلها مش عارفه تسوق و كله واخدها بالدراع

فا انت لازم تاخدها بالدراع زيهم علشان ميحصلش حاجه لا قدر الله

ربنا يعفينا و يعدى الايام دى على خير

^_^

[szaalouk]

حمدالله عالسلامه يا باشا و ربنا يستر طريقك و طريقنا كلنا
و يصبرنا علي السواقه العجب اللي بقت في كل حته حوالينا دي .

[hacksystem]

الف حمد لله على سلامتك يا سامح انت والأسرة كلها بتحصل هو فى ايام كدة تلاقى بيحصل فية حاجات غريبة جدا ومتجمعة كلها ورا بعض بس الحمد لله ربنا بيسلم ربنا يسترها علينا وعلى كل الناس يارب

[S O P H O S]

حمد الله علي سلامتك ..