التعاون ياهونداوية

[SAMEH_FOUAD]

اذيكوا ياهونداوية عاملين اية يارب تكونوا بخير وبأحسن حال

دلوقتى فية موضوعات كتير ناقصة فى القسم عندنا , لازم تتعمل

ومش هينفع انكوا تعتمدوا عليا فى المواضيع دية , لازم يكون فية تعاون مشترك

انا مش هشتغل لوحدى

ياريت تفاعل اكتر ياهونداوية

ولو اى حد محتاج معلومة او حاجة ممكن يبعتلى رسالة وانا اقولة عليها

عموما دية المواضيع اللى انا شايفها فى الوقت الحالى محتاجينها

1- سيفيك الجيل السابع ( كان معمول قبل كدة بس من استاذنا الكبير أ/محمد شامى ) بس عايز يتزود علية حاجات زى مدى توافر قطع الغيار - السعر الحالى - المواتير المتاحة )

2- هوندا سيتى 2004-2005

3- هوندا سيتى 2006-2008 ال face lift

4- جدول صيانة سيفيك الجيل الثامن ( من اول صيانة لحد اخر صيانة وبالتكلفة )

دول مبدأيا كدة اربع مواضيع شوفوا انتوا عايزين تعملوا منهم وتسيبولى اية وانا هعملة

عايزين نشاط اكتر , وممكن اتنين يشتركوا فى نفس الموضوع ويجمعوا البيانات

والى مزيد من التقدم ياهونداوية , مش عايزين القسم بتاعنا يبقى ناقصة حاجة

[ahmedeihab]

مش هقدر افيدك فى كل ده و انت عارف

و بالاخص حته قطع الغيار دى

سبنى انا فى اى حته غير دول و هسد

المشكله انك مختار 3 حاجات انا مليش فيهم اوى فا مش هقدر افيدك

بس الجيل الثامن لازم اصحابه يقولولنا ثمن الصيانات ايه

^_^

[SAMEH_FOUAD]

اصل حرام كدة يابرنس انى اعمل كل دة لوحدى

عايزين مساعدة ياجماعة طيب من الاخوة اللى معاهم السيتى , اية اخبارهم

[ahmedeihab]

اصل حرام كدة يابرنس انى اعمل كل دة لوحدى

عايزين مساعدة ياجماعة طيب من الاخوة اللى معاهم السيتى , اية اخبارهم

نفسى اشوف رجاله السيتى و الجيل السابع

^_^

[SAMEH_FOUAD]

نفسى اشوف رجاله السيتى و الجيل السابع

^_^

اللى معاهم السيتى الجيل الرابع مافيش غير ( عمر فكرى )

ومافيش غير واحد بس معاة سيفيك الجيل السابع وتواجدة يكاد يكون معدوم , يعنى بيدخل كل سنة مرة

خلاص ياعم انا هعمل المواضيع دية ربنا يسهل ويعينى

بس بردة مش هينفع كدة عايز مشاركة من الاعضاء

ياجماعة احنا بس مش عشان نرد على اعطال وخلاص

ان شاء الله بإذن الله يكون فية كل اسبوع موضوع جديد لحد مالمجموعة تكتمل , مش عايزين حد يكون محتاج حاجة بإذن الله

[Saeed-Taha]

ربنا يعينك يا عم سامح والله الحمل عليك كبير ..
وياريت عندى خبرة فى اى حاجة من دى وانا اساعد فيها بس للاسف انت عارف بقى دى اول عربيه عندى ولسه بتعلم فيها ومنكم

بس المعلومة الوحيدة اللى انا اعرفها فى الموضوع دا هيا بنزينة & زيوت (التعاون)

[yousflee]

الى الاخوة وحوش الهوندا انا عندى الجيل السابع و هاحاول على الاقل اسئل على اسعار قطع الغيار و احطها ان شاء الله فى موضوع صغير و لو الاستاذ سامح و الاستاذ ايهاب حابين يدونى افكار اقدر اشتغل عليها ياريت يقولو لى وانا طبعا مهما قولت مش هاعرف اشكركم ازاى على الافادة الكبيرة من مواضيعكم الشيقة
يوسف نبيل

[ahmedeihab]

الى الاخوة وحوش الهوندا انا عندى الجيل السابع و هاحاول على الاقل اسئل على اسعار قطع الغيار و احطها ان شاء الله فى موضوع صغير و لو الاستاذ سامح و الاستاذ ايهاب حابين يدونى افكار اقدر اشتغل عليها ياريت يقولو لى وانا طبعا مهما قولت مش هاعرف اشكركم ازاى على الافادة الكبيرة من مواضيعكم الشيقة
يوسف نبيل

مميزات العربيه

عيوب العربيه

توافر قطع الغيار و اسعارها

اماكن بيع قطع الغيار

احسن الزيوت اللى استخدمتها و ريحت العربيه

ياريت تعمل موضوع متوفر فيه الكلام ده علشان نقدر نفيد الاعضاء

معلش هنتعبك معانا

^_^

[SAMEH_FOUAD]

بعد اذنك يابو حميد الموضوع زى مانت قولت كدة بالظبط بس لازم يكون فية نبذة عن السيارة

يعنى عايز اولا : مواصفات السيارة

ابعاد السيارة ووزنها

انواع محرك السيارة والمحرك الموجود فى مصر

فئات السيارة وكل واحد بالاوبشن بتاعها

ياريت صور للعربية وهية استوك من جميع الجوانب وصورة داخلية

بعد كدة الحاجات اللى قالك عليها احمد ايهاب + سعر العربية

[SAMEH_FOUAD]

كويس والله ثلاثة بس اللى ناويين يساعدوا فى القسم والباقى متفرج وخلاص ولا اية ؟؟؟؟؟؟؟؟؟؟؟؟؟؟؟

اية ياجماعة انتوا فين ؟؟؟؟؟

[Mhmdz]

انا مش عارف اعمل ايه لاني مفهمش غير فى 95 و البرلييود وعلى ادى فشوفوا اعمل اية وانا اعملة

[hitham_sh]

طيب انا معايا هوندا سيتي 2009 اقدر افيدكم بايه ؟؟؟
انا مستعد اعمل اي حاجه اقدر عليها ان شاء الله
انا كمان كنت عملت جدول على الاكسل لمواعيد الصيانات والي يتعمل فيها لاني بعمل صياناتي بره التوكيل وكان مصدري في الجدول ده الكتلوج بتاع العربيه وان شاء الله هنزلهلكم قريب

[dozo]

لو سمحت يا سامح ليه مفيش مواضيع مثبته عن السيفيك الجيل التاسع .
معلش انا معيش هوندا بس بحترم العربيه دى اوى و بحب اعرف معلومات عنها

[SAMEH_FOUAD]

لو سمحت يا سامح ليه مفيش مواضيع مثبته عن السيفيك الجيل التاسع .
معلش انا معيش هوندا بس بحترم العربيه دى اوى و بحب اعرف معلومات عنها

العربية احنا جربناها اكتر من مرة , واتفقنا فيها على حاجات وهية ليها موضوعات هنا كتير , والعربية مافيش فيها اى تغير فى اداء المحرك او الفتيس يعنى كل اللى اتغير اوبشن وشكل فقط لاغير , فربنا يسهل واعملكوا تقرير كامل متكامل بس العربية تكمل ال15000 الف ونشوف الدنيا هتبقى عاملة ازاى