مشكلة فى دورة التبريد لسيفيك الجيل الرابع

[kaboo4]

يا رجاله هوندا الكرام انا زهقت و اتخرب بيتى من دايرة التبريد
دلوقتى اانا كان عندى مشكله انى حاسس ان الميه بتغلى فى دورت التبريد و كنت شاكك فى الماروح المهم رحت لكهربائى قالى عندك الترموستات الكهربه بتاع المراوح مش كويس رحت التوكيل اشتريته ب290 بعد التخفيض المهم ركبناه و المراوح اشتغلت بس ملااحظ انى لما اعمل مشوار و ابطل العربيه و اجى افتح غطاء الريداتير القيه بيضرب ميه هل دة طبيعى ولا كدة فيه حاجة غلط انا ملاحظ كمان ان المرواح بتشتغل متأخر ولا انا موسوس مش عارف و بتشتغل فترة قليله جدا مع العلم ان المؤشر بتاع الحرارة مش بيعلى ابدا عن النص بالعكس هو ديما تحت النص بشرطه او شرطيتين هل دة طبيعى طمنونى

العضو الكريم ، برجاء أختيار العناويين المناسبة لمحتوى الموضوع
تم تغيير العنوان بمعرفتى
3/2/2013 م5:30
م ب 8

[AlGazar2]

طبيعى ان بعد مشوار طويل لما تفتح غطا الريدياتير الميه تضرب عشان الضغط جوه دوره التبريد على من الضغط الجوى الى بيحصل ده معادله للضغط بطريقه سريعه

المراوح بتشتغل متاخر ممكن من ترموستات الكوعه راجع عليها بس هيه لما تشتغل الطبيعى فى العربيات الحديثه متعملش صوت او متسمعش صوتها و انت جوه العربيه و بتشتغل لفترات قليله يبقى يبقى دوره التبريد عندك شغاله بكفائه المفروض المراوح بتشتغل عند درجة حراره مثلا 92 الريدياتير كويس و مش مسدود المياه جواه بتبرد بسرعه تنزل ل 87 المراوح تبطل ده الطبيعى الا لو غيرت صباع الحراره و خليته 90-72 هيشتغل بدرى و المراوح تقعد فتره كبيره عشان تفصل

[M.Al-Hefnawy]

طبيعي لما تفتح غطا الردياتير والعربية سخنة الميه تخرج بضغط جامد منه ... يفضل تفتح والعربية باردة

[AHMED_HAMDY]

وانت ازاي بعد مشوار طبيعي تفتح الغطاء اززااااااااي دنتا اكثر حاجه مكتوبه على اي حاجه ميتفتحشي والعربيه سخنه تحذيييير هام

كدا غلط جدا والميه دي لو ضربت لا قدر الله في وشك هتلاقي حروق ملهاش حل او في ايدك

لازم الغطاء ده يتفتح والعربيه بارده

بص حضرتك الخرطوم اللي طالع من الرادياتير اول مالعربيه تسخن شوف فيه كبس ولا لاء

امسك الخرطوم لاقيته منفوخ وجامد كدا يبقى الكبس كويس ومش تقللق وسيبك من اي كلام

لقيته طري قولنا واكيد في سبب لكدا

[SAMEH_FOUAD]

اولا : الثرموستات original من خارج التوكيل ب175 جنية

ثانيا : طبيعى جدا انك لما تروح مشوار وتفتح غطاء الردياتير لازم المياة تخرج برة بقوة ودة نتيجة الضغط المحتبس داخل دورة التبريد نتيجة لارتفاع الحرارة ( وكل مالحرارة بتزيد الضغط بيزيد )

ثالثا : لو هنفرض ان مروحة الريدياتير لو هتشتغل يبقى بتشتغل وتفصل كل 3 دقائق ولمدة 39 ثانية تقريبا

رابعا : طبيعى ياباشا ان الحرارة عندك تكون تحديدا عند الثلث الاول , ودية بتكون عندها درجة حرارة المحرك 89 درجة مئوية

ماتقلقش ياباشا كل حاجة عندك تماما , الحمد لله

[kaboo4]

شكرا جزيلا لكل الاعضاء الى بجد انا معرفش من غيرهم كنت حعمل ايه اور بالنسبه لسعر الترموسات الكهرباء للئسف الاصلى مش موجود غير فى التوكيل و فيه تفاوت جامد فى الاسعار بعد كدة التيوانى ب 60 و اليبانى 175 و الصينى 55 لكن كل دة مش الاصلى لانى شوفت كلوا و يوجد فرق فى الخامه و الوزن حتى التوكيل الى عند سور نادى الترسانه مكنش عندوا غير اتنين و اصلا السعر الاصلى ليه 347 و عملولى خصم علشان اعرف واحد صديق شغال فى محل قطع غيار و التوكيل بيدى ليهم خصم
بالنسبه للمروحه المروحه مبتشتغلش اكتر من 10 ثوانى و بتفصل و بتشتغل على فترات متبعدة جدا
الحمد لله النهردة لما نزلت فتحت الريداتير لقيته ملين على الاخر سبتوا مفتوح و دورت العربيه الحمد لله محصلش اى فوران للميه الحمد لله
قفلت غطاء الريداتير و بصيت على القربه لقيتها ناقصه جامد جدا و د
المهم زودت الميه الى نقصه و طلعت مشوار طويل و رجعت بصيت لقتها الحمد لله ثابته لما فكرت افتكرت انى غيرت الثرموثتات بتاع المروحه و مكونتش مزود ميه و قبليها كنت غاسل دورت التبريد و الراجل قالى انى لازم ازود ميه تانى يوم لانها حتنقص لما ثرموثتات الميه تفتح الحمد لله لحد الان حاسس ان كل حاجه تمام بعد لخبطه انا مكنتش فهمها و شكرا بجد لكل الاعضاء الاعزاء الى بجد بجد منهم كل فائدة و نفسى بجد انى اسعدهم بئى مرة من نفسى :)

[khalid_adel]

ومتنساش تبقي تاخد هوا من دوره الميه برضه

[AHMED_HAMDY]

بص نصصيحه مني علشان مش تتعب نفسك كثير لان ده اكثر موضوع متعب للعربيه اصلا

لو الخرطوم فيه كبس ومفيش اي تسريب مش تقلق خااالص

بص كل يوم الصبح مش تيجي تفتح خالص والعربيه سخنه

انك فتحت الغطاء ودورت ومحصلشي نطر او خروج للماء كدا الجوان عندك الحمد الله كويس

تجنب بجد فتح الرادياتير والعربيه سخنه

لو لا قدر الله حتى العريه سخنت م بتفتح غير اما تبرد تجنب اصاببتك باي ضرر وصحتك بالدنيا كلها طبعا ^_^

واي حاجه الناس هنا مش بتقصر بجد