بلف غطاء الريداتير

[tsaid]

السلام عليكم و رحمة الله و بركاته
الحكاية إني من كام يوم كده كنت مسافر الفيوم و الطريق كان حلو فجريت بالعربية شوية و وصلت 140 كم/ساعة
و فجاة ببص علي مؤشر الحرارة لقيتة بيعلي و قرب يوصل لل h روحت مهدي طبعا و كنت ناوي أقف خالص بس لما هديت شوية لقيت الحرارة بتنزل
استنيت لحد لما المؤشر بقي في الوضع الطبيعي بتاعه تحت النص بشوية و بعدين قلت أزود السرعة تاني فوق ال 100 أو 120 لقيت المؤشر بيرفع أقلل السرعة عن كده المؤشر ينزل
المهم فضلت ماشي 90 - 100 و موقفتش خالص و الحرارة في المعدل الطبيعي بتاعها و لما وصلت استنيت العربية تبرد شوية و بفك غطاء الريداتير لقيت البلف متاكل خالص و يدوب بلمسة بأيدي لقيته اتقطع نصين و وقع روحت مركب الغطا تاني من غير بلف
طبعا زودت مياه قبل ما ارجع تاني و ماشي 90 - 100 و الحرارة زي الفل مرفعتش وللا حاجه و اول لما وصلت القاهرة اشتريت غطاء ريداتير جديد و ركبته
السؤال بقي هل ممكن يكون الغطاء هو السبب في رفع الحرارة وللا لازم أكشف علي حاجة تانيه؟؟؟
و علي فكرة تاني يوم لما دورت العربية و هيه بارده فتحت الغطاء و ملقيتش المية بتنتر بره الريداتير وللا حاجه و ملقيتش الميه مخلطة زيت و مفيش دخنه بيضاء و لله الحمد فهل كده أستبعد جوان وش السلندر وللا ايه؟؟؟
جزاكم الله خيرا و اسف علي الإطالة

[SAMEH_FOUAD]

الحمد لله كدة مافيش حاجة حصلت وكل شىء طبيعى , وطبعا الغطاء هو سبب ارتفاع الحرارة

[M_Nabil]

ارتفاع درجه الحراره عند السير على السرعات العاليه يتسبب فى ذلك انسداد بعض انابيب المشع (الريداتير) فعند السرعات العاليه تكون سرعه المياة داخل دوره التبريد عاليه نظرا لارتفاع عدد لفات المحرك وعند مرورها على الريداتير يحدث لها اعاقه نظرا للانسداد فلا يستطيع الريداتير توفير التبريد اللازم للمياة فترتفع درجه حراره المحرك.

روح لحد بتاع ريداتيرات ينظفوا كويس وحط مياة مقطرة أو مياة خضراء وان شاء الله المشكلة هتتحل

انما لو حالة الريداتير تعبانة يبقى يفضل تغيرة و تجيب واحد جديد تايواني أو اصلى استيراد بيعملوا تقريباً نفس السعر 450 - 500 جنية

تحياتى

[tsaid]

الحمد لله كدة مافيش حاجة حصلت وكل شىء طبيعى , وطبعا الغطاء هو سبب ارتفاع الحرارة

الله يطمنك يا سامح ريحت قلبي :)

ارتفاع درجه الحراره عند السير على السرعات العاليه يتسبب فى ذلك انسداد بعض انابيب المشع (الريداتير) فعند السرعات العاليه تكون سرعه المياة داخل دوره التبريد عاليه نظرا لارتفاع عدد لفات المحرك وعند مرورها على الريداتير يحدث لها اعاقه نظرا للانسداد فلا يستطيع الريداتير توفير التبريد اللازم للمياة فترتفع درجه حراره المحرك.

روح لحد بتاع ريداتيرات ينظفوا كويس وحط مياة مقطرة أو مياة خضراء وان شاء الله المشكلة هتتحل

انما لو حالة الريداتير تعبانة يبقى يفضل تغيرة و تجيب واحد جديد تايواني أو اصلى استيراد بيعملوا تقريباً نفس السعر 450 - 500 جنية

تحياتى

أنا فعلا روحت إمبارح نظفت الريداتير و قالي إن حالته كويسه و حطيت مياه خضراء
جزاك الله خيراً يا باشا