الناس عماله تفتى و خلاص ......

[ahmedeihab]

كل شويه واحد داخل يقول ان قطع غيار الهوندا غاليه و مش موجوده

طب حضرتك عرفت الكلام ده منين اكيد من واحد مفتى

المفتى ده اسأله كده قوله تعرف ايه عن الهوندا يقولك معرفش

طب ثباتها يقولك معرفش

طب ركبتها قبل كده لاء

طب مواتيرها يقولك معرفش

طب اضعف الايمان اذكر 3 انواع منها يقولك سيفيك

ده بأختصار يا حضرات الساده بنى ادم ميعرفش يعنى ايه هوندا اصلا ولا عمره ركبها و لا عمره شم ريحه صالونها ولا حتى اتصور جنبيها

ياريت اى حد يقولك الكلام ده كده قوله عرفت منين هيقولك اصل الناس بتقول تقوم رازعه قفا يوصله لحد عندى و لما يجيلى انا هفهمه

قطع غيار الهوندا موجوده يا جماعه كتير جدا جدا جدا موديلات من 93 ل 2000 اللى هتكلم فيه

مواتير بالعبيط

عفشه بالكيلو

صاج موجود بالهبل عدا الباب ممكن تدوخ شويه علشان تجيب نفس اللون بتاعك و يكون شمال بس الالوان التانيه موجوده يمين 4 باب كامل ب 1300 جنيه

ايه تانى صالون ده و مزاجك بقا

خلاصه الكلام لو انت مقبل على الشراء اشترى و لو موفرنلكش قطع الغيار اللى انت محتاجها بأقل سعر ممكن تتخيله فى حياتك ولع فى العربيه قصاد الشركه و انا ادفعلك 3 اضعاف سعرها

ناوى ان شاء الله على حاجه كده بس هقولهالكوا فى الوقت المناسب

يلا اقعدوا بالعافيه

سلام عليكوا

^_^

[Silent~Dream]

يا باشا مصر فيها دار افتاء واحد و 90 مليون مفتى و كمان احب اقولك مفيش هوندا سيفيك نزلت مصر اصلا

[Amr_tika88]

الهوندا اللي قطع غيارها غاليه ومش موجوده الاكورد وعن تجربه علشان كانت معانا وبعناها لهذا السبب وكانت موديل ٨٨

[SAMEH_FOUAD]

طول عمرك جامد يابو حميد , تغيب تغيب , وتطلع بموضوع لذيذ كالعادة

الشعب المصرى شعارة الجديد " all faty all the time "

[saddam]

صديقي المواطن
هون.على.نفسك ومفيش داعي تتعصب وهدي نفسك الحياة متستاهلش دي هوندا ولما نعطل في قطعة غيار في يوم من اﻷيام حنكلمك
ودمتم للنضال

[S O P H O S]

ههههههه في اي وقت
هوندا هو اي حد يتكلم عن الهوندا
دي برنسيسة الياباني كله

[akmm]

طول عمرك جامد يابو حميد , تغيب تغيب , وتطلع بموضوع لذيذ كالعادة

الشعب المصرى شعارة الجديد " all faty all the time "

حلوه دى ............ كل الفتى طول الوقت ............. ايوه صحيح وزى اللى يفتى انها وحشه عن العربيات الصينى طيب جلربتها ايه اللى وحش فيها ايه تجربتك السياه مهاها او مع حد تعرفه لغايه الدرجه الرابعه .. معرفش وحشه وخلاص . كله فتى في فتى .

[maryano]

منوهم لله الفتين ضيع عليا فرصه اني اكون من ملاك السيفك اول مكلغت رخصه بسبب حكايه قطع الغيار الغاليه كان الواحد لسه معندوش خبره

[OilMan]

واللي يفقعك بجد تلاقيه متسلسل فى الكلام زى البربنط وشغال فتى حتى الموت

ولما بقى تقدر تاخد فرصه وتفرمله من رجله اليمين وتساله يا ده انت فاهم جامد جدا

يقوم هو منفوش زى الديك فى وسط الفراخ وهنا بقى تقوم مديله كيك داون على الهادى

وتساله انت حضرتك شكلك معاك العربية يقوم يقولك لا تقوله امال المعلومات الهيله ديه منين

يقوم الريش اللى اتنفش ينام ويبقى فرخه وش وعاوزه تبيض ويقولك بنبره هاديه ليا واحد حبيبى وجوز اخت ام مش عارف مين قاللى

هنا بقى تكون انت بتنفخ لرزع القفى المتين اللى يوصله لحضرتك وش

بس اوعى لما يجيلك تقطف ريشه لوحدك ابقى اعزمنا على شوربته

تقبل تحياتى

[M I D O]

اية يا باشا صلي علي النبي كدة انت محروق كدة لية معروف ان مصر 90% منها فتايين يبقي احنا نحرق دمنا لية ؟؟ احنا نتأقلم معاهم نسمع من اليمين ونطلع من الشمال

[ahmedeihab]

طول عمرك جامد يابو حميد , تغيب تغيب , وتطلع بموضوع لذيذ كالعادة

الشعب المصرى شعارة الجديد " all faty all the time "

حبيبى يا موحه كله الا الهوندا ما انت عارف

^_^

واللي يفقعك بجد تلاقيه متسلسل فى الكلام زى البربنط وشغال فتى حتى الموت

ولما بقى تقدر تاخد فرصه وتفرمله من رجله اليمين وتساله يا ده انت فاهم جامد جدا

يقوم هو منفوش زى الديك فى وسط الفراخ وهنا بقى تقوم مديله كيك داون على الهادى

وتساله انت حضرتك شكلك معاك العربية يقوم يقولك لا تقوله امال المعلومات الهيله ديه منين

يقوم الريش اللى اتنفش ينام ويبقى فرخه وش وعاوزه تبيض ويقولك بنبره هاديه ليا واحد حبيبى وجوز اخت ام مش عارف مين قاللى

هنا بقى تكون انت بتنفخ لرزع القفى المتين اللى يوصله لحضرتك وش

بس اوعى لما يجيلك تقطف ريشه لوحدك ابقى اعزمنا على شوربته

تقبل تحياتى

[color="rgb(0, 191, 255)"]

هههههههههههههههههههههههههههههه الكومنت ده فصلنى ضحك

^_^

[/color]

[ahmedeihab]

اية يا باشا صلي علي النبي كدة انت محروق كدة لية معروف ان مصر 90% منها فتايين يبقي احنا نحرق دمنا لية ؟؟ احنا نتأقلم معاهم نسمع من اليمين ونطلع من الشمال

مبعرفش اعمل كده للاسف عندى موضوع رزل اسمه يا تقنعنى يا اقنعك

^_^

[fepsceasar]

انا معايا ستروين اكسارا نفس مسلسل الفتى ويمكن اكتر شوية

[kar!m]

بالنسبة لقطع غيار الهوندا .. فأنا ليه موقفين معاها .. مش ليه شخصيا بس حصلوا قدامي.

واحد زميلنا معاه هوندا سيتي 2009 .. ماجد و هو معروف هنا في المنتدى .. ازاز الباب الخلفي بتاع عربيتة اتكسر .. راح يغيره .. بسأله غيرته بكام؟ .. قال لي قول انت كده .. قلت له أنا كنت عاو اغيره في السوزوكي عشان كان مصنفر لقيته ب 60 جنية .. قلت بلاش .. قال لي انا غيرت ازاز الباب ب 980 جنية !!

معلش يعني ليه ازاز باب يبقى بألف جنية ولا حراري ولا حاجه .. و يا ريت محدش يتكلم عن الجودة .. عشان مهما كانت الجودة لا يمكن توصل للسعر ده.

الموقف التاني بيحصل مع ناس كتير و حصل مع اتنين من أصدقائي معاهم هوندا سيفيك 2010 و حصل عندهم المشكلة الشائعة بتاعة قاعدة الموتور اللي بتتغير ب 1100 جنية تقريبا .. أنا غيرت قواعد موتور في سوزوكي سويفت و كيا سيفيا و أوبل كورسا سيدان و أوبل فيكترا b2 .. و عمر قاعدة الموتور ما عدت 350 جنية في الفيكترا الجي ام الأصلية و في قواعد تانية ب 200 و 250 .. قاعدة الموتور عبارة عن حديد و جواة كاوتش .. تبقى ب 1100 جنية ليه؟ !!

للأسف قطع غيار الهوندا فعلا غالية .. العربية فعلا محترمة و حاجتها جودتها عالية بس فعلا أسعار قطع الغيار مبالغ فيها جدا.

[SAMEH_FOUAD]

مش مبالغ فيها ولا حاجة , يعنى مثلا القاعدة اللى بتتغير ب1250 جنية ودة بقى تمنها على فكرة واحتمال تكون غليت تانى

دية مش قاعدة عادية , لأ دية قاعدة زيت ( hydralic ) مانعة للاهتزاز , عشان تريح الماتور , غير القواعد الكاوتش العادية

لكن طبعا سعر الزجاج مستفز جداااااا , وعلى فكرة السيتى قطع غيارها اغلى من السيفيك