عرضن مغرى .. ادخل الهوندا فى c180

[arabmarket]

السلام عليكم يا هونداويه

معروض عليا عرض ادخل الهوندا بتاعتى si93 فى مرسيدس c180 موديل 2000

الحكايه بقه ان ليا صديق معاه المرسيدس c180 وكنت فى زياره عنده فى الشغل واخوه ماشاء الله راكب مرسيدس e350 2012 والاتنين كانوا راكبين هوندا si وليهم ذكريات ممتعه مع الهوندا
والهوندا الى كانت معاهم كانت من الزيرو ومفرطوش فيها لغايه ما وقعت عليها بلكونه

المهم وانا عندهم اخوه الكبير شكر فى الهوندا جدا وقالى العربيه دى ليها طعم تانى وقالى ما تبعلى العربيه دى قولتو لو فكرت ابيع هقولك اكيد هديها لحد فاهم قيمه الهوندا ويستهالها زيك
بعدها صاحبى قابلنى وقالى ما دخل الهوندا فى c180 ضحكت وقولتلو هتدفع فرق كام :)
هو كان بايع العربيه دى على 98000 الف لواحد صاحبه ورجعو فى البيعه وبيقولى تمنها حوالى 105000 بس عشان صاحبه نزل المبلغ ده
عن حاله العربيه خارجيا وداخليا عاوزه شغل لان صديقى مهمل جدا جدا وبيشتغل فى المقاولات يعنى عادى ممكن يحد شكارتين اسمنت عالكرسى الى جنبه يعنى من جوه مبهدله الصراحه وعاوزه تقريبا كده ككل 15000 تظبيطات من كلامه اما موتور وفتيس كويسه على كلامه

الديل ده ممكن يخلص على 30000 فرق ادفعهم لانو غاوى قوى ورجع كلمنى النهارده تانى وقالى معاك يومين فكر
ايه رايكم ؟
الى اعرفه عن قطع غيار المرسيدس انها غاليه لكن هل غاليه قوى زى الجديد ولا معقوله فى الغلو على قد الركوبه
انا حاسس انى هفرط فى عيل من عيالى ومش هاين عليا الصراحه اشوفها معاه ممكن اتنقط
الهوندا بتجرى فى دمنا .. سوشيرو شكله عامل تعويذه للعربيه دى :)

[elmkaneeki]

خليك في الي مربيها وعارفها

[S O P H O S]

مش هقارن مين الافضل
ولكن مدام بتحب عربيتك بلاش كرأي

[zangry]

لو عايز تغير طبعا ديل حلو والمرسيدس لا يعلى عليها لكن لو حابب عربيتك ومش عايز تفرط فيها يبقي متبعهاش

[Ahmed TRAVCO]

مفيش حد بيبيع عيل من عياله... وده معناه انك متسيبش عربيتك طالما حاببها قوي كده...

انما المرسيدس في الاخر قصة تانية خااااالص حتى لو حالتها نص نص...

[buddha]

هوندا قطع غيارها ببلاش وبتمشى بالهواء مش بالبنزين
المرسيدس قطع غيارها مولعة واستهلاكها للبنزين غبى


ومفيش وجهة مقارنة يا صديقى مابين العربيتين او ممكن اقولك لا يجوز مقارنى عربية باسكوتر
مع انى اعشق الهوندا بس الواقع ان كل مسمار فى مرسيدس محسوب ومدروس مفيش كلام

[محمد أنور]

شكارتين اسمنت عالكرسي ؟ انا متخيل حالة العربية اللي بتتكلم عليها دي و نصيحة مني بلااااش
هتدخل عربيتك في عربية مهلوكة ليه حرام لو عايز مرسيدس بيع عربيتك و دورلك على واحدة نضيفة
و بعدين بلاش تبيع لواحد صاحبك ولا لقريبك .. عشان العربية لو ناقص فيها مسمار هتلاقيه كل شوية يكلمك و يصدع دماغك .. افتكر اني قولتلك بلاش :)

[SAMEH_FOUAD]

هيثم حبيبى عامل اية يابرنس

شوف ياباشا , طبعا محدش يقدر يتكلم كلمة واحدة على الفرق مابين الهوندا والمرسيدس , من حيث الفخامة - التقفيل - الاوبشن والامان الرفاهية , كل دة يديها التفوق على الهوندا

بس لو بقى جيت شوفت الاساسيات اللى هتخليك تحب العربية او تكرها هتلاقى الاتى :

1- قطع غيار غالية جدااااااااا سواء جديدة او استيراد

2- العربية مش موفرة فى البنزين

3- العربية ضيقة جداا من الخلف

4- ترخيص فى المرور اغلى بفرق محترم

4- العربية من كلامك انة مهمل فيها , ودة هيتعبك كتيييييير اوى على ماتفهم العربية وعلى ماتعرف التجار بتوعها , واصلا تمن القطع الغيار نفسها كل دة هيخلى العربية مصاريفها تقيلة عليك وحاجة من الاتنين يأما هتكرهها يأما هتصبر على الحاجة على ماتجمع فلوسها , وفى الحالة دية العربية هتتهان ومش هتحس بمتعة ركوبة المرسيدس

يبقى نصيحة منى اركب العربية وشوف هتحس بأية , هل محتاجة حاجات كتير عايزة تتغير ولا لأ

وفية حاجة تبقى عارفها , المرسيدس مش زى الهوندا من حيث سهولة التعامل يعنى المرسيدس لو مثلا سينسور باظ فيها , العربية ممكن تقف فورا , وطبعا هيكون بمبلغ وقدرة , ممكن تنزل كدة لبتوع قطع الغيار وتسأل على حاجاتها وتشوف اسعارها

[svneleven]

بما أن حضرتك راكب هوندا يعني بتقدر متعة السواقة و طبعا مرسيدس ركوبة عالية جدا لكن المهم حالتها لأن لو هلكانة هتكرهك في نفسك و هتفضيلك جيبك. علي رأي أ/سامح أركب المرسيدس و جرب و فرامل و بنزين و ملفات و أمريكاني و كله و أرفعها في مكان محترم و بعد كده لو سليمة أتوكل و صدقني هتحب النجمة الفضية و مش هتحب تنزل منها.

[arabmarket]

شكرا يا جماعه للردود والنصائح

انا صرفت نظر عن الفكره عشان مش وقتها غير انه فعلا هعوز وقت على ما اتقلم عليها غير المصروف الى هينصرف عليها مش هقدر احدده فى الاول
لكن الى طالعت بيه من الموضوع هو ان الهوندا عربيه مميزه وميقدرهاش غير الى ركبها

اشكركم يا وحوش

[الشقنقيرى]

اسمحلى ليه وجهه نظر
انت تعمل الديل عادى وتاخد المرسيدس لانها تقريبا حتكون واقفه عليك ب75000 جنيه ودة طبعا مش سعرها واركبها شويه ومتع نفسك وبيعها حتكسب فيها تروح تجيب هوندا اعلى شويه من عربيتك
دى وجهه نظرى

[abou-yahia]

توكل علي الله وغير

المرسيدس حتاخد وقت وجهد وفلوس لاكن في الاخر حيكون معاك حاجه اسمها عربيه

[SAMEH_FOUAD]

توكل علي الله وغير

المرسيدس حتاخد وقت وجهد وفلوس لاكن في الاخر حيكون معاك حاجه اسمها عربيه

وقت وجهد وفلوس ,على مايصلح اللى فيها , وبعد مايصلح اللى فيها يكون حاجات تانية باظت , ويغيرها , لحد مايلاقى نفسة بيدفع تمن الفلوس اللى دفعها مرتين

وحاجة المرسيدس غالية , يعنى هتخلى الواحد يفكر الف مرة قبل مايغير الحاجة

صدقنى العربيات دية سعرها مش بينزل من فراغ , بس عشان كل واحد عارف ان كلمة المانى فى مصر بتجر وراها مبالغ صيانة عالية

يعنى من وجهة نظرى اللى عايز يستمتع بعربية المانى , يشتريها زيرو , او كسر زيرو ماتعديش 10000 الاف كيلو بالكتييييييير , غير كدة اى حد هيتعب معاها اوووووووووى

انا بشوف عربيات المانى عطلانة على الطريق لا يمكن اى حد يتوقعها

1- s class 500 2013 كانت عطلانة موقفة الشارع وراكبها راجل ومراتة

2- bmw 7 series 750li 2010 عطلانة على الدائرى فى وسط الطريق

3- c class دية بشوفها عطلانة كتيييير وخصوصا موديلات 2002-2007

فتخيل دول لما يعطلوا تكلفة تصليحهم كااااااااااام

[Thebutcherr]

في مثل صينى بيقولك : " ابني في حجري و اروح ادور عليه"
انا جاي اقولك كلمة واحدة بس:
اعمل الصححححح
اعمل الصح

[No Comment]

انا بشوف عربيات المانى عطلانة على الطريق لا يمكن اى حد يتوقعها

1- s class 500 2013 كانت عطلانة موقفة الشارع وراكبها راجل ومراتة

2- bmw 7 series 750li 2010 عطلانة على الدائرى فى وسط الطريق

ده لان اكيد الكمبيوتر بتاعهم طلع ايرور بان الهواء اللى داخل للماتور فى ساعات الزحام غير صالح لعملية الأحتراق ... فا بالتالى لازم تقف وتعطل الدنيا :)