هجيب هوندا سيفيك و محتاج مساعدة اصحاب السيفيك و اهل الخبرة

[red_4_blood]

السلام عليكم يا جماعة



انا قررت ان شاء الله اجيب هوندا سيفيك و عندي شوية استفسارات
و ياريت تساعدوني عشان انا ابيض في موضوع العربيات ده
انا عندي مازدا 3 و فقررت اجيب الهوندا سيفيك


1/ موديل 2009 نزل ولا لسة؟؟ ... لو لسة هينزل امتى ؟؟


2/ السيفيك بحسب معلوماتي 1600 سي سي .. صح كدة ولا إيه ؟؟

3/ ياريت يا جماعة حد يقولي شوية تفاصيل عن العربية .... زي الثبات و الفرامل و كل حاجة من النوع ده و استهلاكها للبنزين و اي تفصيل تيجي في بالك
وكمان ارتفاعها عن الارض عشان المطبات
عشان المازدا بتتعبني اوي اوي في المطبات

و السيفيك تقفيل اي بلد ؟؟؟ و هل 2009 هي اللي فعلا صورها نازلة و فيها الفانوس اللي ورا مختلف عن بتاع 2008 و بقيت الشكل ثابت ؟؟؟

4/ ياريت حد يكلمني عن مواصفات العربية من جوة ......... العدادات ( السرعة و ال ار بي ام و البنزين ) و الكاسيت و مواصفاتوو ( صوتو كويس ولا ايه و سي دي بس ولا فيه تيب Tape شرايط عادية يعني و هل ال سي دي بيشغل ام بي ثري )

و العربية ممكن تادخد كام شخص .... و المسافة بين اللي قاعدين ورا و الكراسي اللي قدام كويسة ولا ايه


و الشنطة تشيل كام شنطة من احجام شنط السفر مثلا ( شنطة المازدا عندي روعة )


يعني بالعربي عايز كل كبيرة و صغيرة عن العربية :D



ياريت يا جماعة كل التفاصيل دي بس في اسرع وقت عشان مستعجل على العربية

[digital_joe]

يا جماعة أنا كمان عايز اجيب هوندا سيفيك و عندى نفس الأسئلة تقريباً :
1. هل العربية واطية و بتحك فى المطبات خصوصاص لو فى كذا حد راكب ورا و فى حاجات كتير فى الشنطة؟
2. هل فعلا دهان العربية مش قوى و بيقشر بسرعة؟
3. ما هو معدل أستهلاك البنزين و ما هو زمن التسارع (من صفر الى 100 كيلو)؟
4. هل مساحات الكراسى للركاب واسعة خصوصا اللى ورا؟ و هل الشنطة كبيرة؟
5. هلى الفرامل مش قوية اوى و العفشة ناشفة زى ما بعض الناس بتقول؟
6. ما هى الكماليات الموجودة فى العربية (فتحة سقف – جنوط سبور – فوج لايت – مثبت سرعة- مرايات و زجاج كهرباء – تكيف تاتش – كاسيت سى دي يمكنه تشغيل ام بى ثرى – وصلة AUX- Bluetooth-مقابض و مرايات لون الباب –ABS-EBD-Airbags-Electric Power Steering- Vehicle Stability Assist with Traction Control- Tire Pressure Monitoring System)
7. انا معلوماتى ان العربية اللى بتنزل مصرتصنيعى يابانى بالكامل 4 سلندر1600 سى سى اتوماتيك (بس مش ستبترونيك) و موتورها 140 حصان بتكنولوجيا i-VTECDOHC و Drive-by-Wire. هل الكلام ده صح؟
8. هل العرية بتشتغل بدون كونتكت (Smart Key) و هل الدريكسيون Multifunction (فيه زراير للتحكم) ؟
9. ما هو التقييم العام لاعمال الصيانة فى التوكيل؟ التوكيل محترم و فاهمين؟ ولا زحمة و اهمال و عدم احترافية؟
10. انا اتصلت بكذا معرض و لقيت أن سعرها فى المعرض 153 الف لاى لون الا الاسود ب 155 الف و الاستلام فورى .لما اتصلت بالفطيم قالولى ب 143 الف بس الحجز بعد رمضان تدفع 30 الف مقدم و الباقى عند الاستلام بعدها بشهرين. هل التوكيل محترم و هيلتزم بالشهرين و لا الشهرين هيبقوا ستة؟

انا حاولت الدخول على موقع هوندا العالمى بس المعلومات اللى فيه عن عربيات مش بتنزل مصر اما موقع هوندا ايجيبت للاسف مفيش فيه معلمومات كفاية و اصحاب المعارض مش فاهمين معظم الحاجت الى باسال عليها ايه اصلاً عشان كده محتاج مساعدتكم. ياريت الاعضاء اللى اشترو العربية يفيدونا خصوصا الزميل MiMo لأنى شفت ليه كذا مشاركة وواضح انه عارف كل تفاصيل العربية دى...و شكرا

[Kamal-1]

استاذ red_4_blood
1- موديل 2009 لسه مانزلش وهينزل تقريبا في شهر 12 أو 1
2- مظبوط السيفيك 1600 سي سي
3- الثبات فوق الممتاز والفرامل كويسة وربما تواجهك مشاكل بسيطة في بداية استخدامك للعربية ولكن في صيانة ال 1000 كله بيتظبط
4-العربية من جوة شيك جدا عداد السرعة ديجيتال واللون الازرق رهيب جوة العربية وخاصة بالليل وباتلنسبة للكاسيت فهو ممتاز جدا جدا وبيشغل شرايط و سي دي بس
Audio


5- المسافه حلوة بين الكراسي والعربية تاخد 5 مستريحين جدا
6- الشنطة كبيييييييييييييييييييييييييييييييييييييييييييييييي ييييييرة

-----------------------------------------------------------

استاذنا digital_joe
1- انا ما جربتش اشيل حاجات كتير بس الناس بتقول بتحك
2- يقشر لأ بس لو اتجك بيطلع الدهان بسرعة خاصة من الفيبر
3- بالتكييف حوالي 10-12 لكل 100 كيلو ومن غير التكييف 7.5 لكل 100 والتسارع تقريبا من 10-11 ثانية
4-اطمن المساحاات كبيييييييييييييرة
5- العفشة ناشفة حبتين فعلا والفرامل كويسة جدا مافيش منها خوف وهتظبط عند صيانة الالف
6- ( مثبت سرعة - مرايات و زجاج كهرباء - مرايات لون الباب - ABS-EBD-Airbags )
7- العربية ياباني 100% ومش ستبترونيك بس الفتيس بتاعها حلو جدا والموتور 140 حصان ولكن القدرة الصافيه على العجل 125 حصان
8- لا - الدركسيون فيه مثبت سرعة بس ولو عاوز تركب زراير التحكم في الصوت بتركب عادي
9- التوكيل محترم جدا جدا
10- 3 شهور مش شهرين وموديل 2009 هينزل بفرق سعر يعني هيكون اغلى بحوالي 3-5 الاف يعني هيكون سعرها من 146-148 الف

[digital_joe]

متشكر يا كيمو باشا على الردود الوافية دى

انا هاتقل عليك و اسالك سؤالين كمان و اهوا كلو بثوابة يا عم كيمو و كل سنة و انت طيب.....

بالنسبة لموضوع الحك و انت عارف شوارع المحروسة و مطبات المحروسة هل السيفيك مصفحة من تحت عشات الحماية من الحك؟ انا شايف ما شاء الله عربيات كتير سيفيك مش معقولة كلهم ماشيين يحكوا فى المطبات؟؟

بالنسبة للفوج لايت مفيش طريقة الواحد يركب بيها فوج لايت من غير ما يخرج بره الضمان (بالمناسبة هو الضمان اد ايه؟)

بصراحة الواحد زعلان ان الاوبشنز الفظيعة اللى بتنزل فيها برة مصر مش موجودة فى مصر و ان كان فيه كتير بيقولو ان دا سببه ان الوكيل بيحاول يحافظ على سعرها فى المتوسط بتاع فئتها

على العموم الف شكر ليك و لكل الاعضاء على مساعتكم

[م/محمد صلاح]

متشكر يا كيمو باشا على الردود الوافية دى

انا هاتقل عليك و اسالك سؤالين كمان و اهوا كلو بثوابة يا عم كيمو و كل سنة و انت طيب.....

بالنسبة لموضوع الحك و انت عارف شوارع المحروسة و مطبات المحروسة هل السيفيك مصفحة من تحت عشات الحماية من الحك؟ انا شايف ما شاء الله عربيات كتير سيفيك مش معقولة كلهم ماشيين يحكوا فى المطبات؟؟

بالنسبة للفوج لايت مفيش طريقة الواحد يركب بيها فوج لايت من غير ما يخرج بره الضمان (بالمناسبة هو الضمان اد ايه؟)

بصراحة الواحد زعلان ان الاوبشنز الفظيعة اللى بتنزل فيها برة مصر مش موجودة فى مصر و ان كان فيه كتير بيقولو ان دا سببه ان الوكيل بيحاول يحافظ على سعرها فى المتوسط بتاع فئتها

على العموم الف شكر ليك و لكل الاعضاء على مساعتكم

ارد انا عليك يا باشا ...
1) العربيه فعلا مصفحه من تحت وان كان البعض يقول انها مصفحه من تحت الموتور بس فانا بقولك اتطمن انا العربيه بتاعتى اتحكت من تحت كام مره كده بس كنت شايل 5 افراد وزنهم تقيل الواحد مايقلش عن 100 كيلو بس لما روحت الصيانه كشفو عليها وقالولى مافيهاش اى حاجه

2) بالنسبه للفوج لايت ممكن تركبه بره التوكيل عادى و99% من الناس مركبينه بره التوكيل لان سعره فى التوكيل 2200 جنيه وبره 450 جنيه يعنى الفرق فعلا يستاهل (اما بالنسبه للضمان انت عمرك ماتخرج بره الضمان المقصود انك لو ركبت حاجه بره وعملتلك مشكله فى الكهربا هما ساعتها مش مسؤلين يصلحوهالك ببلاش وده طبعا لوجيك يعنى منطقى)

3) لو على الاوبشنز اللى نازله بره فانت ممكن تركب معظمها هنا
مرايات بالاشارات
زراير التحكم فى الكاسيت من الدركسيون
سبويلر بلمبة ستوب او بدون
بودى كيت

ولو عايز تجيب الحاجات دى فى كام واحد كده اعرفهم ابقى اقولك عليهم

[digital_joe]

الف شكر يا MIMO باشا و الله تاعبينك معانا
انا كان قصدى على بعض الاوبشنز اللى فيها هاى تكنولوجى زى الاتى:

1. Vehicle Stability Assist with Traction Control (تثبت العربية و تقلل من التعويم فى الملفات و الغرز)
2. Tire Pressure Monitoring System (ينبهك ان ضغط الهوا فى العجل محتاج يتظبط)
3. Honda Satellite-Linked Navigation System( جى بى اس بالبلدى)
4. Bluetooth
5. MP3/Auxiliary Input Jack
6. USB Audio Interface
7. Speed-Sensitive Volume Control (SVC) (يظبط صوت الكاست خسب سرعة العربية)
8. Maintenance Minder System (كمبيوتر اعطال)
9. Security System with Remote Entry (دور العربية من غير كونتاكت)
10. HEATED MIRRORS

طبعا بالاضافة للحاجات اللى انت قولت عليها(الفوجات و سبويلر بلمبة ستوب و بودى كيت و زراير التحكم فى الكاسيت من الدركسيون ) .لو ممكن تقولى فين الاماكن اللى ممكن نجيب منها الحاجات دى و اخبار الاسعار ايه هاكون شاكر جدا



و ياريت لو تقولى رايك فى موضوع الباركنج سنسور لان فى ناس بتشتكى من صعوبة الركن بالسيفيك لان ابعاد العربية مش سهل تشوفها من كرسى السواق


متشكر جدا على الردود يا جماعة و هو ده المتوقع من نايل موتورز

[blazer]

اللى اعرفه ان مش مكتوب فى البروشور بتاعها ان فيها Vsa/tcs

[red_4_blood]

shokran ya kemoooooooooooo ya gamed....................begad raddak fadne geddan

w as2eltak kaman ya gdigital nafa3tne



thnx 4 u all

[digital_joe]

يا استاذ blazer خش على الموقع ده http://automobiles.honda.com/civic- sedan/specifications.aspx

هناك هتلاقى كل مواصفات السيفيك اللى بتنزل بره هتلاقى فيه Vehicle Stability Assist with Traction Control

فى حاجات كتير فى اللينك اللى بقولك عليها للاسف مش بتنزل مصر

[digital_joe]

مش عايز اقولكم اد ايه انا معجب بالسيفيك انا صحابى مسمينى مجنون السيفيك لانى كل ما اشوف واحدة باقعد اتابعها...بس النهارة حصل موقف غريب.....كنت واقف فى الشارع مستنى واحد صاحبى و كان قدامى مطب...و لقيت سيفيك سودا معدية قولت اشوف اخبار الحك ايه....و فوجئت بصوت خلى قلبى اتقطع و صاحب العربية كان تقريبا ماشى بسرعة 4كم/ساعة (بالراحة خالص) و برضه حكت

انا قلقان جداً من موصوع الحك و تقريا دى الحاجة الوحيدة اللى مخليانى اترددد اجيبها لان كل حاجة تانية بتقول انها تحفة

بافكر اجيب الكورولا عشان اعلى فى ارتفاها عن الارض و سعرها مش بيقل كتير لو حبيت ابيعها... بس الكورولا ثباتها مش اوى و شكلها اوحش ده غير انها جنوب افريقى و فتيسها الذكى( ام ام تى) ممكن يشلنى من غبائه:confused2:

[Hondawy_2008]

مش عايز اقولكم اد ايه انا معجب بالسيفيك انا صحابى مسمينى مجنون السيفيك لانى كل ما اشوف واحدة باقعد اتابعها...بس النهارة حصل موقف غريب.....كنت واقف فى الشارع مستنى واحد صاحبى و كان قدامى مطب...و لقيت سيفيك سودا معدية قولت اشوف اخبار الحك ايه....و فوجئت بصوت خلى قلبى اتقطع و صاحب العربية كان تقريبا ماشى بسرعة 4كم/ساعة (بالراحة خالص) و برضه حكت

انا قلقان جداً من موصوع الحك و تقريا دى الحاجة الوحيدة اللى مخليانى اترددد اجيبها لان كل حاجة تانية بتقول انها تحفة

بافكر اجيب الكورولا عشان اعلى فى ارتفاها عن الارض و سعرها مش بيقل كتير لو حبيت ابيعها... بس الكورولا ثباتها مش اوى و شكلها اوحش ده غير انها جنوب افريقى و فتيسها الذكى( ام ام تى) ممكن يشلنى من غبائه:confused2:

يا اما المطب غبي و عالي و ساعتها أي عربية حتحك فيه أو ان الراجل محمل العربية جامد وفي الحالتين مفيش خوف لان العربية مصفحة من تحت

[digital_joe]

على فكرة فى واحد اقترح عليا انى اتغلب على موضوع الارتفاع عن الارض بانى اجيبلها جنوط اكبرمن اللى بينزل من الفطيم..... يعنى لو له بتنزل 15 اجيب 16 و لو 16 اجيب 17
انى عايز اسالكو سؤالين مهمين

• هى بتنزل من الفطيم بجنوط كام؟
• هل لو زودنا عن الجنط بتاع الوكيل نمرة ده فعلا هايعليها شوية؟ و هل ياثر على حاجة تانية (زى الثبات او العفشة مثلاً)؟

[Kamal-1]

• هى بتنزل من الفطيم بجنوط كام؟
• هل لو زودنا عن الجنط بتاع الوكيل نمرة ده فعلا هايعليها شوية؟ و هل ياثر على حاجة تانية (زى الثبات او العفشة مثلاً)؟

بتنزل ب 15.6

[digital_joe]

ازيك يا كيمو ايه الردود السريعة دى..؟؟؟؟

طيب لو ركبنا 17 مثلا ايه اللى بحصل.....؟؟؟

ممكن ياثر على حاجة تانية (زى الثبات او العفشة مثلاً)؟

[blazer]

يا استاذ blazer خش على الموقع ده http://automobiles.honda.com/civic- sedan/specifications.aspx

هناك هتلاقى كل مواصفات السيفيك اللى بتنزل بره هتلاقى فيه Vehicle Stability Assist with Traction Control

فى حاجات كتير فى اللينك اللى بقولك عليها للاسف مش بتنزل مصر

انا عارف ان اللى بتنزل مصر مفيهاش الكلام دا كله
وانا كلامى كان على اللى بتنزل مصر لان دى هى اللى ممكن تشتريها