نقرة كوبري قها عملتلي مصايب ..

[Aymanemen]

إمبارح .. في وسط طلعة كوبري قها ( بتاع القطار ) وقعت في نقرة محترمة ... جابتلي فردتين كاوتش في لحظة والعربية هبدت في الأرض .... غريتهم وجبت جديد والحمد لله على ما قدر وفعل ... بس العربية كان فيها حاجات بتترجرج كده ... المهم النهاردة وأنا ماشي على القطامية لقيت عداد السرعة بيلعب لوحده صعوداً وهبوطاً حتى استقر على الصفر وعلى نهاية الطريق لقيت الفتيس الأوتوماتيك ما بينقلش ؟؟؟ جبتها على الأول ثم الثاني كأني شغال مانيوال ثم أراد ربنا وخدت الرابع ومشيت بيها لحد راس غارب وهناك كهربائي قاللي ( الساعة مكسورة ومحتاج مكنة سرعة ) ؟؟؟؟؟ صراحة أنا جديد في العربيات ومش فاهم حاجة .... ممكن المشرف أو أحد الأعضاء يساعدني .... ربنا يجازيكو خير

[mohamedxsayed]

متابع ومش عارف ايه مكنه سرعه ديه ؟
بس الرجرجه كنت لازم تكشف عالعربيه من تحت عفشه ومساعدين وكده اما لو فى الدركسيون يبقى كراسى مكنه

[speed_magnum]

لا حول ولا قوة الا بالله
ربنا يعوضك ان شاء الله

[abo-berry]

موديل العربيه ايه طيب عشان نقدر نساعدك !!

[Aymanemen]

العربية هوندا أكورد 91 مواصفات خليجية

[SAMEH_FOUAD]

قدر الله وماشاء فعل والحمد لله انها جت على قد كدة

عموما مكنة السرعة اللى الميكانيكى قالك عليها يقصد بية ( حساس سرعة )

ودة تمنة استيراد ب150 جنية

موضوع بقى ان الفتيس مش بينقل فدة حضرتك هتتأكد من الحاجات دية

1- كشف على الفتيس والفارغة بتاعتة هل اتأثرت بأى حاجة ولا لأ

2- هتربط عفشة وتتأكد من الزوايا عشان ممكن تكون المقصات خلفت

3- هتركب حساس السرعة ( speed sensor) وهتراجع على مقياس زيت الفتيس بعديها عشان تظبطة

وان شاء الله خير

[Aymanemen]

مشكوووووووووووووووور جداً أستاذ سامح .... بارك الله فيك وفي جميع الأعضاء

[feky]

ربنا معاك قلبى معاك والله
الحاجات ديه بتبقى فداء لحجات تانى قول الحمد لله

[ابو لؤى]

الله يخربيت الكبارى على سنينها بلدنا بتتعامل معانا اكننا راكبين لودر تخيل كوبرى اكتور مليان من كده وتلاقى حفر كتير اوى حاجه مستفزه لو قاصدين مش هتبقى عامله كده حسبنا الله ونعم الوكيل

[jackal]

بص لو الكمبيتر بتاع عربيتك من النوع الي بيفهم هيكون مشكلتك كولها في ساعه السرعه لان هيا الي بتعرف الفتيس انتا ماشي علي كام
بس خلي بالك في عربيات زي عربيتي فيها ساعتين سرعه واحده ان و واحده اوت