مشكله بماستر الفرامل لهوندا سيتى 2011

[madeh_elsheikh]

السلام عليكم اولا ،،
ثانياً ارجو الافاده من اهل الخبره
عندى دواسه الفرامل بتوصل للاخر بدون اى تاثير "توقف" للعربيه بس لو ضغطت على الدواسه اكثر من مره ورا بعض بتوقف روحت للعفشجى يبص على الفرامل و التيل قال ان المشكله فى الماستر بدون ميكشف العيب فى ايه
بدأت اتفحص العربيه لقيت ان فى هوا فى دايره فى الاربع فرد و زيت الباكم واصله ميه من الغسيل لان الغطا بتاع قربه الباكم مكنش مقفول كويس يعنى فيه زيت و ميه على بعض سحبت المايه اللى فى القربه ب كومبرسور وصفيت زيت من الاربع فرد و زوت زيت جديد و ضبط الهوا ومفيش تسريب للزيت و التيل متغير قريب من اقل من شهر وحالته جيده فرامل العربيه ظبطت مع المشى بس رجعت عملت نفس المشكله بعدها ب ٤ ايام او بمعنى ان المشكله مبتظهرش غير مع المشى لمسافات "سفر من مكان لمكان"
ثالثاً والاهم لفيت على ماستر فرامل ليها ملقتش غير فى التوكيل ب ١٩٠٠ جنيه
رابعاً رجعت للعفشجى تانى قال ان فيه طقم اصلاح برده بدون ميشوف الماستر او ممكن اشوف بديل للماستر يعنى اشوف ممكن ماستر السيفك يركب عليها او ماستر موديلات اقدم منها او ماستر عربيات تانيه يابانى تكون مشابهه للماستر بتاع السيتى ٢٠١١
خامساً اشترى ماستر جديد من التوكيل ولا انزل بورسعيد يمكن الاقى حاجه تكون استيراد
وشكراً لحضراتكم

[SAMEH_FOUAD]

اعمل سحب هواء تانى , وجرب النتيجة , عشان لو الماستر فية مشكلة , ماكنش هيظبط 4 ايام

فعايزك تكرر عملية سحب الهواء دية لكل مرة تحس فيها بالاداء , وهية مش مكلفة او فيها تكلفة عليك

وساعتها نبقى نشوف اية النتيجة وبناء عليها هنقول هل هتغير ماستر ولا لأ

[tasaka]

هل ممكن مازال هناك ميه فى دوره الفرامل .. ممكن

لماذا لم تنظف الدوره كامله .. انا سمعت انه فيه ماكينه بتشفط الدوره اثناء ادخال الزيت الجديد ( خصوصا لما يكون فيه abs ) .. للاسبرانزا حوالى 100 جم مصنعيه فى التوكيل لتغيير دوره زيت الفرامل

تحياتى

[SAMEH_FOUAD]

اة طبعا فية جهاز , لظبط دورة الفرامل , بيقوم بتنظيف الدائرة وسحب الهواء بدون الحاجة لاى تدخل او الطريقة المعتادة اللى الناس كلها بتعملها

وكمان بيظبط الضغط بتاعها وتكلفتها 200 جنية شامل الزيت

بس دية ماتعملهاش الا لما تكون متأكد تماما من كفائة الماستر

[madeh_elsheikh]

سامح بيك شكراً جداً على رد حضرتك السريع
والله يافندم الواحد محتار مع الصنايعيه فى البلد دى المهم جربت العربيه امبارح روحت بيها مشوار يعنى بتاع ٨٠ كيلو رايح جاى والحمدلله الفرامل مش اد كده برده بس فى فرامل توقف العربيه مع السرعات العاليه مش زى قبل كده خالص و من اكتر من اسبوع مختش هوا للفرد كلها بس استعمالى للعربيه قليل لان معايا عربيه الشركه يعنى مبسوقهاش غير فى الاجازات و برده نزلت عملت كام مشوار النهرده و الفرامل كويسه برده مبقتش عارف المشكله دى من ايه بالظبط
و السؤال هل ممكن اروح لحد بتاع عفشه اقول له شوف ماستر العربيه ولا هو الماستر يا بايظ يا لا وهل مشكله الماستر بتستمر فى تهريب الفرامل بعد ماخد هوا للفرد؟؟

[Mecha]

غير مسطر ,الهوا في الديره بسبب الجلد القديم

[SAMEH_FOUAD]

اكشف على الزيت تانى وشوف هل لونة اتغير ولا لأ ؟؟

لو لونة زى ماهو , يبقى تسحب هواء وتحط زيت dot 4 المانى او موبيل بس انا بفضل الالمانى

وان شاء الله يبقى فية تحسن , وهتظبط معاك , بس انت من كلامك بستبعد الماستر حاليا

[tasaka]

نصيحه لوجه الله .. الفرامل مفيهاش هزار .. او تراخى

و بعدين مال العفشجى بماستر الفرامل ؟؟؟؟

زيت الفرامل من مواصفته امتصاص التكثيف .. و انت دخلت ميه جوه الدائره مباشره

لو كانت جلد الماستر ضعف بسبب هذا او اى سبب آخر .. ممكن فى دوسه مفاجئه ان الزيت يهرب من وراء جلد الماستر و لن تجد فرامل نهائيا ( مع الدوسه الضعيفه للفرامل ممكن ده ما يحصلش )

3 احتمالات للمشكله ( الاقرب من وجهه نظرى )

لو كان زيت الفرامل لا ينقص فى العلبه .. يبقى هناك احتمالين ( جلد ماستر - او هواء فرامل ) .. و ممكن احتمال ثالث ان الزيت فقد خواصه مثلا بسبب الماء !! ؟؟

1- خد هواء الفرامل و تأكد ان كان فيها هواء ام لا .. اذا كان فيها هواء خذ الهوا و زود زيت فرامل وجرب .. اذا كانت الفرامل بعد اخذ الهواء مره ضعيفه و مره قويه و مره بدال تحت خالص و مره عادى ( يبقى ساعتها تبص على الماستر كشف )

2 -اما ان ان كان الخارج زيت ( يعنى مفيهاش هواء ) .. يبقى الاحتمال الاكبر ساعتها يكون اما ماستر او ان الزيت فقد خواصه

3- أكشف على الماستر للتأكد انه سليم ام لا ( بدون تصليح ) .. اذا كان جلد الماستر كويس .. يبقى الشيئ الوحيد الباقى زيت الفرامل تأثر بالماء و فقد بعض خواصه

و فى جميع الاحوال عندما تعرف المشكله و تحلها .. غير دوره زيت فرامل كامله

[tasaka]

اخى العزيز

انا راجعت ردودك .. انت بتتكلم عن عفشجى هو اللى بيعمل لك الشغل ده اكثر من مره ؟؟

شغل الفرامل .. اختصاص الميكانيكى فقط لاغير

بالتوفيق

[tasaka]

ثالثاً والاهم لفيت على ماستر فرامل ليها ملقتش غير فى التوكيل ب ١٩٠٠ جنيه

لم انتبه للسعر سابقا ..

يبقى بسبب السعر ده .. نفذ الخطوه الثالثه اولا ( تغيير دوره الزيت ) .. قبل تنفيذ الثانيه ( كشف على الماستر)

يعنى قبل اللعب فى ماستر الفرامل 1900 جم .. غير دوره زيت الفرامل 200 جم بالماكينه علشان تتأكد ان اى ميه خرجت ( مع شرح دخول الميه لمهندس التوكيل ) و جرب

و طبعا روح لميكانيكى و ليس عفشجى ..

و فى حال ثبت ان العيب من الماستر .. فالعربيه لسه جديده يعنى صعب الماستر يكون سيئ .. أسأل على طقم اصلاح الماستر فى التوكيل ( و من وجهه نظرى اصلاحه بطقم اصلاح اصلى من التوكيل افضل من طقم اصلاح بلدى )

[madeh_elsheikh]

الاخوه الكرام اشكركم على ردودكم السريعه و تواصلكم
هذا ما حدث اليوم
روحت لمركز خدمه وصيانه من باب ان التوكيل اساتذه فى التقليب و قلت اكشف على العربيه قبل مروح التوكيل
وجد الاتى بعد سرد كل شئ للمهندس و فنى الصيانه
الزيت مش زيت ،، الزيت لزوجته كانك بتلمس ميه مش زيت ده اولا
تم تنظيف القربه كلها من الزيت و غسيلها و حطيت زيت dot4 المانى ب ٥٥ جنيه و عمل تنظيف لدوره الزيت كلها و الحمد لله الفرامل على الشعره بفضل الله و حضرتكوا طبعاً
ثانياً مهندس الصيانه قال التالى لايمكن يكون الماستر شغال و لسه لحد دلوقتى بتمشى بيها وجربها قبل ميغير الزيت قال ان الفرامل كويسه بس المفروض تكون افضل من كده
ثالثاً قال ان لايمكن يكون الماستر بايظ وتاخد هوا للفرامل و يشتغل لان مهما خت هوا و الماستر بايظ هيهرب برده قلتله انى بمشى عليها مسافات طويله اكتر من "٨٠ كيلو" قال والله انا هظبطها وان شاء الله هتتحسن معاك بس لو الفرامل خفت معاك حاجه بسيطه غير ماستر بعد كده ولا طقم اصلاح ولا الكلام ده هات واحد من التوكيل وركبهولك و ده اضمن ليك و لحياتك ،،، السم فى العسل بس كلامه منطقى كنت عايزه يقول هل الماستر بايظ ولا لاء قال جرب عربيتك انت ادرى منى بيها

[tasaka]

و عمل تنظيف لدوره الزيت كلها

- كما توقعت .. السياره جديده و صعب الماستر يعطل ( و لكن ممكن يتأثر لو سبت الميه دى جوه فتره طويله قبل الاصلاح ) .. و الزيت طبعا فقد خواصه و ده طبعا سبب ضعف الفرمله

- هل السياره فيها abs .. و هو عمل دوره التنظيف ازاى ؟؟ .. و خرج الزيت اللى جوه ال abs ازاى ؟؟؟؟

معلوماتى ان ماكينه تنظيف الدوره بتكون فى التوكيل .. يعنى انت دفعت 50 جم زيت + مصنعيه

و الموضوع كله 200 فى التوكيل شامل الزيت .. و بيسحب الزيت اللى جوه ال abs

التصرف الصح انك بعد الكشف .. كنت رحت التوكيل نظفت الدوره

الماستر لو بايظ تقدرتعرفه نسبيا .. دور العربيه و دوس فرامل و خليك دايس .. طبيعى البدال حينزل شويه و بعدين يقف ( يثبت ) .. كده الماستر كويس

اذا استمر البدال فى النزول المستمر و لم يثبت بعد فتره .. كده الماستر فيه مشكله

و اتوقع ان الماستر ها يثبت .. و لكن اكرر لك .. لازم تغير دوره كامله فى التوكيل بعد ما تتأكد ان المشكله انتهت معاك

[madeh_elsheikh]

قصد حضرتك ان البدال بيثبت زى مكون طافى العربيه وضغط على الدواسه ولا قصد حضرتك ان يكون فى ممانعه فى الدواسه ،، لان اللى بيحصل معايا ان الدواسه بتتقل بس بوصلها لى نهايه المشوار مش بتثبت زى متكون مطفيه رجعت اشك فى الماستر تانى بامانه و للعلم مغيرتش التيل الخلفى خالص بس قلت اتلافى ده فى انى اشد الهاند بريك مش عارف تشخيص حضرتك ايه

[ahmedabeed]

ياريت تقولنا على اسم المركز عشان عايزاغير الزيت واكشف على الدوره عندى انا كمان