سامح باشا محتاجك يا كبير

[foxhonda2008]

دلوقتي انا معايا سيفيك ٢٠٠٨
و كنت عايز أغير الجنوط و كنت مقتنع بال ١٦ الإستوك و لاقيته عند فيصل في الحرفين ب ٣٠٠٠ و النهارده لقيت واحد عارض جنوط هوندا اصلي مقاس ١٧ و شكلها حلو أوي بس انا خايف من حوار ال١٧ احسن يبهدل العفشه و يتعب ألعربيه
قولي اعمل ايه يا كبير

[JapRuleZ]

والله معاك حق و مشكله كبيرة يفدنا فيها ا\ سامح الخبير الاجنبى بتاعنا :)

بس معظم السيفيك مش بيليق عليه ال 16 اوى زى ال 17 بيبقى جااامد و ال 18رات اوفر شويه على العربيه

ال 17 شكلها بيبقى تحفه بس القصه بالنسبالى ان العفشة و الموتور هل يستحملو فعلا عشان انا بشوف الكيا ريو 17رات عادى جدا و موتور 1400 فقط , ولا ال 17رات بيبقى وزنها خفيف اوى مش زى الحديد ف المحصله النهائيه انها مش بتأثر على السحب و العفشه ده سؤال مهم اوى

غالبا اللى حيجيب ال17رات حتضحى ب جزء بسيط من السحب و اقتصاديه البنزين و راحه المطبات و لكن على حساب تزويد جمال الشكل الخارجى و الثبات على الطريق
المعادله صعبه

بالمناسبه فى امريكا اللى نازله 17رات ال سيفيك ال SI مش ال LXI و ال VTI

بس كون العربيه 1600مش 1800 او 2000 cc ( موتور مش ضعيف بس عاوز تحافظ على تفوقك كسحب بين الناس و ده اللى خلى معظمنا يجيب الهوندا من اساسه ) و عفشتها الناشفه نسبيا و طرقنا المنيله على عينها ....

كمان الجيل الثامن مستفيد شويه من ارتفاع السيارة اما الجيل التاسع 2012 و ما فوق لو حط ال17رات حتظبط الشكل طحن بس العربيه الخلوص الارضى حيعلى من 16.5 ل 17 على الاقل و هيا مش ناقصه علو خالص حظطر انزل سوست و قصه كده

ال حاجات دى للاسف يرجحوا كفه ال 16رات رغم تحفظى على شكلهم نسبيا
ياريت الباشا يقولنا المفيد

[Ahmed emad has]

عادي ال17 مش هيعمل حاجة . دي الاوبل كورسا 1400 و نازله ب17

[M2014]

السلام عليكم
نصيحة غالية سمعتها من أحد خبراء عالم السيارات وهو عدم تغيير مقاس الكاوتش أو نوع الچنط الخاص بفبريكة السيارة لدرجة أنه ينصح عند مرور فترة العمر الإفتراضي للكاوتش بالبحث عن نفس نوع كاوتش الفبريكة وأيضاً (النقشة) الخاصة بكاوتش الفبريكة وكل التفاصيل الخاصة بذلك .
التبرير لذلك هو أن إتزان السيارة وعزمها وإستجابة الفرامل والقراءة الصحيحة للسرعة من عداد السرعة تكون فى أعلى مستوياتها عند الإبقاء على كل مايخص كل (تفاصيل) بيانات كاوتش وچنوط فبريكة كل نوع من أنواع السيارات وعند الضرورة يتم الإستبدال بنفس كل تفاصيل البيانات وذلك للحفاظ على أداء السيارة وأمانها بشكل عام وأيضاً للحفاظ على قيمتها عند إعادة البيع بشكل خاص .
خالص تحياتى .

[esam91]

متابع

[SAMEH_FOUAD]

بالنسبة للجنط ال 17 , هو هينشف العفشة فقط , لكن اداء وسرعة , عشان مايتأثروش لازم تكون الجنوط الاصلية و light weight عشان مايأثرش على اى حاجة فى العفشة او الجلب والمساعدين والقواعد وسرة العجل

نصيحة منى لو عايز ( اداء + عفشة مريحة + استهلاك بنزين افضل + تسارع افضل + سرعة عالية- عفشة بعمر اطول ) خليك فى ال 16 ممتاز جداا

لكن لو عايز شكل على حساب كل دة يبقى ركب ال 17 بس لازم يكون اصلى ووزن خفيف وكاوتش من نوع نظيف وطرى مش ناشف

[foxhonda2008]

بالنسبة للجنط ال 17 , هو هينشف العفشة فقط , لكن اداء وسرعة , عشان مايتأثروش لازم تكون الجنوط الاصلية و light weight عشان مايأثرش على اى حاجة فى العفشة او الجلب والمساعدين والقواعد وسرة العجل

نصيحة منى لو عايز ( اداء + عفشة مريحة + استهلاك بنزين افضل + تسارع افضل + سرعة عالية- عفشة بعمر اطول ) خليك فى ال 16 ممتاز جداا

لكن لو عايز شكل على حساب كل دة يبقى ركب ال 17 بس لازم يكون اصلى ووزن خفيف وكاوتش من نوع نظيف وطرى مش ناشف

تسلملي يا كبير
انت كدا ريحتني خلاص ان شاء الله اجيب ال١٦