تقرير 20 الف كيلو هوندا سيتي 2016 هايلاين

[hosamfares]

هوندا سيتي 2016
- طبعا لازم أقول ان احساس كل شخص بعربية مرتبط بحاجات كتير منها خبراته الشخصية و عربيات ركبها قبل كده و شفنا ده كتير في تقارير يعقبها كومنتات تختلف تماما . حتى تقارير المحترفين بالاقي حد يمدح في قعدة العربية و انه مش حاسس بتفاصيل الطريق و حد تاني محترف بردو يقولها كعيب أنها وجعتله ضهره و مش مريحة تماما فيبقى بعد كل شئ اي عربية متاحة للتجربة لو لقيت اغلب اللي بتدور عليه جربها يمكن الحاجة اللي تحسها تخليها مش تعجبك او العكس
- تقرير 20 ألف كيلومتر
بعد هذه الرحلة القصيرة أقدر أقول انها تمتاز بالآتي
- عربية رياضية و اقتصادية عايز تسارع عايز مناورة و متعة في القيادة و استجابة سريعه هتلاقي
و في نفس الوقت توفرت المعادلة الصعبة جدا من خلال متابعتي لتقارير عربيات كتير انها تكون اقتصادية و بنزين 92 بتاعنا شغال معاها كويس جدا من غير حساسية زايدة بتلاقيها في عربيات تانية بأشوف ارقام ساعات بتوصل لأقل من 5 لتر في 100 كيلو
بالنسبة لطرقنا المكسرة اللي عارفين مشاكلها العربية متحملة و ماشية كويس جدا و تعتبر عالية نسبيا بالنسبة لكونها هوندا بتفضل تخلي عربياتها لازقة في الأرضة فسيتي وفرت المعادلة اللي تتناسب معانا و نادرا لما تحك لما يكون يعني راكب ناس ورا و مطب عالي اوي
الصيانة راضي عنها و اسعارها معقوله و ده ناتج طبعا انها عربية اعتمادية الى حد كبير و مصممه بحيث قطع غيارها تعيش و مش كل صيانة تلاقي نفسك هتغير كل حاجة
ميزة وسع العربية ابداع فعلا من بره تحسها صغيرة مساحتها جوه رائعة فعلا و دي تقارنها بأي عربية ,, عشان تلاقي عربية واسعة تستوعب قدام وورا كده محتاج عربية كبيرة جدا فعلا ...
- العيوب
مشكلة الكاوتش طبعا و دي وصلنا لحلول كويسة الحمد لله مقاس 195 55 و 205 50 و الاتنين متوفرين الى حد ما و دايما باوصي بالتركيز و المفاضلة على اساس اللود انه يكون 91 او xl فان شاء الله مايتأثرش بأي نقر او حفر و يخلي العربية حمالة أسية بدل الكاوتش الفافي اللي توكيلنا بلانا بيه ... الميزة الوحيدة انه خلانا نقرا و نفهم في الكاوتش حاجات عمرنا ما اهتمينا بيها و كنا زي اغلب الناس لما بتسأل السؤال التقليدي اجيب بريدجستون و لا كوننتنتال ؟ ياباني و لا اندونيسي ... smile emoticon
- السرعات العالية اوي خفيفة بمعني في السرعات العالية اوي مش هتحس ثبات عربيات اتقل بكاوتش اكبر و دي هتتحسن كتير مع الكاوتش 205 50 ان شاء الله
- تنك البنزين 40 لتر فقط بس احنا مش متضايقين عشان بيبقى فيهم البركه كانها عربية بتنك 55 مع فارق انك بتفول تدفع 100 ج يديك باقي ... ده احساس مختلف دايما كنت بافول باكتر من 130 ج مثلا
- الفرش البيج أنيق بس ممكن يبان عليه اي بقع ... بره العربية بتنزل بفرش بيج او فرش اسود .. حلولها معروفه فرش جلد جاهز او تفصيل يحمي الأصلي
فيظل انها بالنسبالي خيار ممتاز للي عايز عربية عملية اعتمادية (بس يغير الكاوتش ) اقتصادية عائلية آمنة

[melouk1]

ربنا يباركلك فيها ..
هل تستحق ثمنها من وجهة نظرك

[miam0502788391]

شكرا على التقرير
اعتقد انها 1500 سى سى
طيب متوسط الاستهلاك كام فى البنزين

[hosamfares]

ربنا يباركلك فيها ..
هل تستحق ثمنها من وجهة نظرك

إجابة السؤال ده أعتقد هتكون وافية بعد استخدام فترة طويلة
بس وقت شرائها تستحق
خدت مزايا عربية ياباني ارخص من الكورولا بأوبشن اكتر بكتير مع ميزة توفير في البنزين و عفشة ممتازة من غير ما يجي على المساحة الداخلية او الشنطة
كل تقييمات العربية بره تخطها من افضل السيارات الاعتمادية الاقتصادية
جميلة

[hosamfares]

شكرا على التقرير
اعتقد انها 1500 سى سى
طيب متوسط الاستهلاك كام فى البنزين

المتوسط بتاعها 7 لتر / 100 كيلومتر
ع الطرق السريعة بيوصل ل 5 لتر

[Totti999]

ربنا يديك خيرها ويكفيك شرها
العفشه عامله ايه معاك طريه ولا ناشفه وفي الطرق المكسره علبة الدريكسيون عامله ايه معاك

[hosamfares]

ربنا يديك خيرها ويكفيك شرها
العفشه عامله ايه معاك طريه ولا ناشفه وفي الطرق المكسره علبة الدريكسيون عامله ايه معاك

بالنسبالي وسط ... الدركسيون متعه ... التوجيه دقيق جدا ... هوندا بقى

[abd_el_7amid]

ماشاءالله ربنا يباركلك فيها

[TAMERMEGAHED]

ربنا يباركلك فيها وهر عربيه فعلا لها شانها وسط السيارات في فئتها

[3ml3ml]

ممكن صور للعربيه من جوا و من بره
لأن كل الصور على النت غير الحقيقه خالص فى مصر

[hosamfares]

ممكن صور للعربيه من جوا و من بره
لأن كل الصور على النت غير الحقيقه خالص فى مصر

دول صورتين من الخارج
هاصورلك كام صورة من الداخل
الفرش كله في مصر بيج مش زي بره

[S O P H O S]

ربنا يباركلك فيها
اللون النبيتي جميل فالسيتي

[Mostafa Bedo]

الكلام دة ينطبق علي اول فئة بردة ؟؟؟ معلش التعليق متأخر بس هتبقي اول عربية ليا بأذن الله