جلسة خاصة مع مهندس من توكيل هوندا

[Ghost2]

السلام عليكم


انا كنت وعدت الناس اني لما اقعد مع المهندس ده هقولكو انا طلعت منه باية :

1- العربية ممتازة من حيث الشكل والراحة الداخلية والاداء على الطريق
2- توكيل هوندا بيبدأ يغير سياستة شوية يعني من ناحية اسعار قطع الغيار والصيانات الدورية وده اتجاه عام على كل الموديلات مش السيتي بس
3- المشكلة الوحيدة في توكيل هوندا انك لو لعبت في حاجه بره التوكيل بيطلعوها ضمان وهو قالي يعني من الاحسن انك مدتخبش نفسك في متاهات
4- العربية بدات تنتشر فعلا والطلب عليها زاد والدفعة قربت تخلص خلاص
5- الفئات التانية من العربية محدش يعرف عنها حاجه خالص يعني لسه مش معروف هينزلو منها ايه والقيمة السعرية هتعمل ايه

ده يا جماعة اللي طلعت منه بيه والله على ما اقول شهيد





اخوكم احمد مختار

[Fadi Ezzat]

شكرا عل كتابة كلامة لنا

[kemo0o]

كويس جدا جدا
وتقريبا كده هنقول مبروك قريب ... ولا ايه

5- الفئات التانية من العربية محدش يعرف عنها حاجه خالص يعني لسه مش معروف هينزلو منها ايه والقيمة السعرية هتعمل ايه

بص يا سيدي الفاضل .. سيتسة الفطيم انه يجيب اقل عربية في الاوبشن تماام وبعدين يشوف سوقها هيعمل ايه ! وبالتالي يقدر يحدد اذا كان العميل هيرضى بسعرها بعد الاوبشنز الكاملة ولا لأ

زي السيفيك نزلها سنتين ونص بدون أوبشنز ولقى الاقبال عليها زائد والناس بتركب كماليات واكسسوارات وبتصرف فعرف انه لما يجيب الفول اوبشن هتبيع وهتبيع كويس

[Ghost2]

ههههههههههههههههه والله يا كيمو انا مش عارف بس بيني وبينك العربية عاجباني لان اول حاجات مهمة عندي في العربية هي الموتور والثبات والتكييف ... بعد كده كله كلام فارغ ممكن احنا نظبطه اذا كان كاسيت ولا لمبة هالوجين بس بيني وبينك العربية عمالة تاكل في دماغي زي مرات الدبور المتطلقه بس ان شاء الله اسبوعين وتكون معايا بس لسه محتار في اللون

[Hosam_Optrawy]

يعنى طلعت اوتوماتيك مفيش مانيوال

صح ؟

[Ghost2]

ايوه صح يا حسام والكلام ده من مهندس في التوكيل

[Ahmed.TV]

طالما قعدت مع المهندس واتطمنت وطالما دماغك بتفكر صح من ناحية الماتور وكفائته وثباته والتكيف يبقا توكل على الله وهات العربية دى وكفاية انها هوندا بجد وبالسعر ده وبعدين على قد ما السيراتوا حلوة بس بردوا الكاملة منها غالية جدا وحرام الواحد يدفع مبلغ كبير اوى فى كيا وكمان التوكيل بتعهم مش حلو فخليك فى الهوندا سعر كويس اداء جبار ومعمرة وتوكيل محترم جداااا ومش تنسى بقا بالاخبار دايما والتقارير اللى تديهالنا على العربية بعد ما تجبها والف مبروك مقدما

[Ghost2]

ربنا يخليك يا على وانا اوعدك ان شاء الله هعملك تقرير عن العربية مش هيتكرر

[Ghost2]

وبعدين 74 مشاهدة و 8 ردود بس منهم تلاته بتوعي

[silicon25]

ماشى يا عم
و دي مشاركة علي الماشي
انا جبت السيتي يوم السبت 18\7 بس بقيت علي الحديدة
عملت 600 كيلو و بعد صيانة الـ1000 لينا كلام

[Ahmed.TV]

يا جماعة انا شايف العربية مش واخدة حقها مننا لازم اصحاب الهوندا ستى او اللى عنده معلومات يدخل ويشارك بجد عشان العربية تاخد حقها فى السوق وخصوصا بعد ما سعرها بقا 114 الف ونشجع الناس عليها لانها تستحق ,, والعضو سليكون بردوا يقولنا طالما جابها اخبارها ايه معاه ويشجع الناس ويشجع الراجل ده الحيران عشان يشتريها ,, بس فعلا ماتور جديد ويستحقق ويارب اقدر فى يوم من الايام يكون معايا مهرها لان بحترم فى اليابانى الهوندا والتويوتا فقط

[ahmed4000]

هو الحقيقة مش واضح انت بتكلم على انهى عربية لكن من ردود الناس واضح انها السيتى

وفعلا انا الحاجة الوحيدة الموقفانى عن السيتى انى مش لاقيها منتشرة خالص وحتى هنا غالبية الموضوعات عن السيفيك

فلازم اصحابها يتكلموا عنها شوية

[Ghost2]

لا العربية انتشرت فعلا وكلام من المهندس كريم نفسه ان الدفعة الاولى من العربية قربت تخلص وطبعا ده في وقت قليل جدا وبجد انا حاسس انها مظلومة و ان شاء الله هنبدأ حملة دعايا خاصة للسيتي 2009

[ahmed4000]

معلش مع احترامى لكلامك لكن هل تعرف المهندس ده شخصيا ولا ده واحد قابلته فى الصيانة مثلا
لانه طبعا حيقول كلام حلو عنها وانها منتشرة واحسن عربية
لكن فى الواقع نادر لما بشوفها حتى بعد مرخصت
(انا بأكد تانى انى مقتنع بالعربية جدا بس بتكلم على وضع فى السوق)

[Ahmed.TV]

وضع السوق اللى بيحكمه التجار لان اكتر المعارض اللى بتروح تشترى منها بيطلع لها مصلحة وسبوبة لما تبيع مثلا من الهيونداى كتير او الكيا لان بيطلع لهم مصالح من التوكيلات دى زى بردوا لما بتروح اى معرض وقوله عاوز اشترى عربية كاش شوفى حيتعامل معاك ازاى وروح تانى وقوله عاوزها قسط شوف حيطير بيك قد ايه لان طبعا فى مصالح بتجيله من ورا كدا ,, المهم يعنى هى مصالح مش اكتر والعميل او المشترى بيصدق طبعا كلام مندوبين المبيعات واى واحد بيروح يشترى ومعاه فلوس اكتر من 100 الف شوفوا كمية الحيرة اللى بتكون فيه والتردد ولما حد بيقوله كلمة على دى او دى بيروح يغير رايه فى ثانية ,, هى سوقها كان واقف لاسباب اول سبب وهو ان كان سعرها غالى جدا اول ما نزلت وتانى حاجة كان سعرها قريب من السيفك فالناس ابتدت تعمل مقارنات فكان بتكسب طبعا السيفك والسبب الاخر هو المعارض ومندوبين المبيعات اللى بيروجوا لعربيات تانية غيرها عشان المصالح زى ما قولت...,,, دلوقتى بقا سعرها نزل جدا وبقا فى المتناول ودخلت مع عربيات اخرى فى نفس الفئة السعرية وابتدت تنتشر شوية وبردوا المندوبين المبيعات بيحاربوها وبيقولوا ان قطع غيارها غالية هههههههههههه هو فى دلوقتى قطع غيار عربية رخيصة وغير كدا دى عربية هوندا يعنى قطع غيار معمرة وتوكيل محترم وبصراحة لو معاي المبلغ بتعها وعاوز اشترى حشترى السيتى لان ماتور هوندا متطور وغير كدا انا بدور على الماتور والسمعة واعتقد سمعة هوندا جبارة ولا تقولى كيا ولا هيونداى ولا اى انواع اخرى ,, وغير كدا حتى الموديلات القديمة اللى الناس شككت فيها وده كان من كلام الميكانيكة اللى لما حد بيسالهم عليها بيقولوا وحشة عشان مش بيفهموا فيها كانت عربية رائعة وعن تجربة شخصية وغير لما سالت اصحاب الموديلات القديمة منها كلهم شكروا فيها جدا جدا وبعدين سعرها فى البيع عادى جدا يعنى مثلا موديل 2006 منها لما تبيعه حيكون حالته فى حدود 65 الف احسب بقا كان سنة استهلكت العربية ده الانسر بيتباع موديل 2006 ب65 بردواالماتور 1300 سى سى فيعنى اعادة بيعها عادى جدا ,, فارجوكم بلاش ندى ودنا وعقولنا لناس مش بيفهموا فى حاجة وروحوا اى معرض وحطوا فى ودانكم قطن واتفرجوا على المواتير السيتى مثلا والسيراتوا والانسر وغيروا وغيروا واحكموا بعد كد وركزوا على المواتير مش الكماليات وبلاش طمع ,, بمعنى لما العربية تكون فيها كل الكماليات تقولوا اصل كان نقصها شنطة كبيرة او مش عارف ايه ولو ناقص فيها كماليات تقولوا بردوا اصل ماتور جبار بس كان ناقص كذا ,, بطلوا طمع ولو عايزين كلو يبقا روحوا فصلوا عربية جديدة بكماليات رهيبة وماتور جبار وقطع غيار رخصية اوى وتكون واسعة اوىىىىىىىى ههههههههههههههههههههههه اه وسعرها 50 الف ههههههههههههههه