مفيش ميكانيكى هوندا (الحرفيين)

[tamerawaja]

عايز حل للعربيه الى معايا لما اشغل التكييف العربيه تبرجل رحت للميكانيكى قللى ال تكييف رحت للتكييف قللى التكييف تمام و اول ما اشغل التكييف الار ب ام بنزل و هتبطل ايه الحل لو حخد مرت عليه المشكله دى يا ريت يقولى ايه الحل و انهى ميكانسيكى و رقم تليفون المكيانيكى ضرورى

[kemo0o]

http://www.nilemotors.net/Nile/a/1645-a.html

[SAMEH_FOUAD]

شوف ياباشا الحل دة هتلاقية فى الفاكيوم بتاع الماتور عايز يعلى شوية وروح لاى حد وانت واقف هايعلوهولك ,دة طبعا بعد ماتتاكد ان الايدل والtps والفلاتر تمام ومتنظفة وعادى ياباشا مش هتلاقى اى مشاكل ان شاء الله

[human]

الموضوع بسيط
فيه واحد اسمه محمد عيد حتلاقيه فى الحرفيين جمب المطراوى بتاع الشكمانات
حوه حراق فى الفلوس بس ممتاز

[tamerawaja]

سمسم الغالى متشكر جدا على ردك بس المشكله كبيره اروح للميكانيكى يقولى روح لبتاع التكييف و يقوم الميكانيكى يعللى العربيه شويه هى انجكشن دى مره اروح لبتاع التكييف يقولى العربيه سليمه انا صارف على التكييف فريون يفضى اونطه فوق ال1500 جنيه حد يدلنى على واحد تليفونه حتى علشان انا تعب انا مغير حساس اللى فى الموتور و كل واحد يقولى اظبط العربيه على ظبتتى محدش يلعب فيها و شكرا يا عم سمسم بس انا تعبت انا هروح للراجل بتاعك

[akram2010]

بصراحه الهوندا والسيارات دة لازم وكاله ... نظام حقن الوقود محتاج كشف كمبيوتر يعنى حتى لا اطيل عليك اصرف شويه وصلحها فى الوكاله وسيبك من ميكانيكه الشوارع .. محدش فاهم حاجه وكله شغال بالبركه وتخصص تاكسى وبيجو قديم وفيات وفى الجديد بيحاول واى خراب بيكون على حسابك

[SAMEH_FOUAD]

ياتامر باشا صدقنى المشكلة عندك فى الفاكيوم بتاع العربية ,
شوف مش انت اول لما تيجى تشغل العربية بتلاقى بتسمع صوت الكمبروسير والتكة بتاعتة دية ,وتلاقى الاربى ام نزل لحد مثلا مابقى 50 لفة فى الدقيقة ,والعربية ترعش جامد ,واول لما تطفى زرار الa/c ترجع تانى لوضعها الطبيعى صح ,مش دة اللى بيحصل ,طيب انا بقولك انت دية حاجة ممكن تعملها بنفسك مش محتاج انك توديها لحد ,بس لو متاكد ان عندك الحساسات نظيفة ومظبوطة ودية تعرفها من غير ماتكون مشغل التكيف .تلاقى العربية وهية باردة الاربى ام بيعدى الواحد بشوية ,وبعد كدة ينزل مع ارتفاع درجة الحرارة لحد مايبقى عند 800 لفة فى الدقيقة ,كدة يبقى عندك الtps كويس ,
ثانيا وانت ماشى عادى وبدوس فرامل الاربى ام بينزل او بيتاثر جامد يعنى مثلا بينزل لحد 400 لفة وبعد كدة بيطلع تانى ,لو بيعل كدة يبقى نظف الايدل ,بالفيشة بتاعتة
لو الحمد لله الحاجات دية كلها تمام ومافيش اى مشاكل ,وبتحصل بس وانت مشغل التكيف ,يبقى سلانسية العربية عايز يعلى ودة اللى بنسمية الفاكيوم ,او مسمار الهواء فى الكربراتير ,دة لازم يعلى شوية عشان يظبط معاك العربية وهية عليها حمل التكيف
وبردة عايزك تجرب حاجة وممكن تكون بتحصل معاك ,لو العربية باردة خالص شغل التكيف ,مش هتلاقيها بطلت ,ولا اتاثرت ,عشان بتبقى العربية عالية لوحدها فالاربى ام مش هاينزل الا لما تسخن والبنزين يقل الامداد بتاعة فى الانجكشن ,شوف وجرب وربنا يسهلها ,واللى يقولك عيب تكيف يبقى مابيفهمش حاجة وبيشتغلك ,عشان لو عيب تكيف ,مش هايشتغل ,

[Toyo]

في واحد اسمه صبحي قليني متخصص ياباني ومشهور قوي في الحرفيين بس غالي جدا

[ahmadtaha]

السلام عليكم
روح عند الاميران امام سور نادي التوفيقية, محل قطاع غيار هوندا واسال عن المهندس رشيد, و قوله مشكلتك وان شاء الله مشكلتك تتحل, المحل يفتح يوميا ماعدا الجمعة

[loma_satanic]

لو الحرفين عدلى وسعد من غير كلام اراجل بصلح العربيه وهوا مخمض عنيه