مفيش حد معاه سيفيك 92 ؟ او 93 , 94

[Shocky]

السلام عليكم ورحمة الله وبركاتة

انا مش عارف الموضوع مخالف ولالا , إن شاء الله يكون مش مخالف

انا بسأل عن الناس اللى معاها العربية دى عشان انا مش شايف ولا موضوع عنها هنا

قلت اسأل عشان نعرف مين الاعضاء اللى معاهم نفس الموديل هوندا سيفيك 92 , 93 , 94

عشان نتناقش عن العربية و اللى عندة معلومة مفيدة او تجربة فى شئ ما فى العربية يقدر بفيدنا

فى إنتظاركم إن شاء الله

[Shocky]

طيب انا هبدأ بنفسى إن شاء الله

هوندا سيفيك موديل 92 ex مواصفات خليجى

وياريت اللى عايز يسأل عن شئ او يضيف شئ يتفضل

[Shocky]

وا اسفاه :D

ولكن مش هيأس و فى إنتظار تجاوب الاعضاء الكرام اصحاب موديلات 92 : 94

ياجماعة انا غرضى النقاش و الله و نعالج سوى مشاكلها ونقول مميزاتها و كدة

يعنى لو اى حد عندة تجربة يقولها بالنسبة لهذا الموديل عشان كلنا نستفاد

وفى إنتظاركم

[Ahmed Hassan]

انا معييش منها.. بس اعرف فيها كويس.. لو عايز حاجه انا تحت امرك.

انا معلافش مشكله في العربيع غير ان ارتفاعها منخفض... لكن عموما العربيه ممتازه.

بما ان اللي معاك EX خليجي يعني مكيفه و باور و ازاز كهربه و فيها عداد RPM و الموتور 1500 صح؟؟

بس يا ترى هيا اوتوماتيك و لا مانيوال.. و كربيراتير ولا انجيكشين؟

[Shocky]

اهلا بيك ياباشا

فعلا كلام حضرتك مظبوط بخصوص الإرتفاع , لذلك بضطر اخد المطبات بالعرض لو معايا ناس ورا

والحمد لله هى ممتازة فعلا

وهى ex خليجى فيها كل اللى انت قلتة وبالنسبة لسؤالك هى اوتوماتيك , كربراتير

وشكراً لتشريفك الموضوع

[khaledloda]

ربنا يباركلك في عربيتك هي سمعتها حلوة جدا

[medo_2060]

يا ريت تحكي مميزاتها وعيوبها وهل تنفع اول عربيه تشتريها؟
وشكرا يا زعيم

[ahmed azab]

قطع غيارها ايه الاخبار مع امثلة ياريت

[Shocky]

يا ريت تحكي مميزاتها وعيوبها وهل تنفع اول عربيه تشتريها؟
وشكرا يا زعيم

اهلا بيك

مميزات العربية : شكل جميل , لو اوتوماتيك هتكون مريحة فى سواقتها جدا , سعر اعادة البيع كويس اوى , الموتورين سواء ال 1500 الكربراتير او ال 1600 الانجكشن الاتنين سحبهم حلو اوى (بتجرى) , رائعة فى ثباتها مع الجنوط العريضة , استهلاكها فى البنزين معايا مريح جدا

عيوب العربية : ارتفاعها عن الارض (منخفضة جدا) , العيب دة هيضايقك شوية فى المطبات لو معاك حد ورا , الموديل دة فى شباب كتير جريت بية ولعبت بية لحد ما هلكتة , لذلك هتحتاج تدور على عربية حالتها حلوة ودة صعب


نصيحة : هاتها اوتوماتيك , حضر نفسك فى شوية مصاريف بعد ما تشتريها , هاتها si لو تحب يكون فى فتحة سقف

واهلا بك

[Shocky]

ربنا يباركلك في عربيتك هي سمعتها حلوة جدا

الله يبارك فيك , والعربية فعلا ذات سمعة طيبة جدا فى مصر والخارج كمان
وشكرا لك

[Shocky]

قطع غيارها ايه الاخبار مع امثلة ياريت

والله هى العربية بقالها فترة بسيطة معايا لذلك ملحقتش احكم على النقطة دى

لكن هدى حضرتك بعض امثلة بسيطة :

زرار الإنتظار : 50 جنية من بورسعيد
الإشارة اليمين : 60 جنية من الحرفيين

وهكذا , هى الحاجات لا تبدو غالية يمكن عشان استيراد لكن انا لسة لما ابتدى اشدها تانى هكتب إن شاء الله عن تجربتى

[medo_2060]

شكرا لانك رديت على الموضوع وعلش هتقل عليك لانك الوحيد اللي بتفهم فيها هنا على ما يبدو
انت اشتريتها اول عربيه؟لاني مش عايز اجيب عربيه 128 او كده في الول انا عايزاجيبها علطول ايه رايك؟
ولو معايا3 الاف مثلا اجيب بيهم ايه من الاكسسوارات او الجنوط
اسف لو طولت عليك
وشككرا مفدما

[Shocky]

شكرا لانك رديت على الموضوع وعلش هتقل عليك لانك الوحيد اللي بتفهم فيها هنا على ما يبدو
انت اشتريتها اول عربيه؟لاني مش عايز اجيب عربيه 128 او كده في الول انا عايزاجيبها علطول ايه رايك؟
ولو معايا3 الاف مثلا اجيب بيهم ايه من الاكسسوارات او الجنوط
اسف لو طولت عليك
وشككرا مفدما

العفو و متقولش كدة يا اخى انا تحت أمرك فى اى سؤال إن شاء الله

فعلا دى اول عربية اشتريها وكنت فى نفس حيرتك بالظبط , وبعض الناس قالتلى اشترى الأول 128 او حاجة صغيرة اتعلم فيها و بعد كدة اشترى السيفيك , لكن العربية كانت عجبانى جدا ومش شايف مبرر إنى استنى وبعدين اجيبها , ورأيى لو انت بتسوق خلاص يبقى توكل على الله واشتريها ونصيحة هاتها اوتوماتيك عشان تريحك اولاً وعشان الزحمة الرهيبة اللى فى القاهرة ,

انا هكتبك الكماليات والإكسسوارات إن شاء الله واختار انت المناسب ليك

- بالنسبة للجنوط فى الغالب اللى انت هتجيبها إن شاء الله هتكون مجنطة واغلب السيفيك ال 92 اللى فى مصر مجنط وقليل اوى لما تلاقى واحدة بطاسات بس ,

- سماعات وكاسيت محترم لو ليك فى الأغانى .. اعتقد سماعتين كويسين فى حدود 250 جنية و كاسيت ب 800 جنية

- و فى صندوق لحفظ الأدوات و السى ديهات فى الكونسول الوسطى مكان مسند اليد فوق الهاند بريك , لإنها لو اوتوماتيك انت مش هتستخدم الهاند بريك خالص إن شاء الله دة ممكن يكون فى حدود 100 : 150 جنية انا مش عارف سعرة بالظبط

- لو بعد ما اشتريت لقيت الفرش مش عاجبك ومبهدل خالص , ركب فرش جديد كان كتب عنة الاستاذ كريم منير او استاذ اسلام شاهين حد منهم مش فاكر هو جلد المانى وكان بيكلف 650 جنية تقريبا , لو حالة الفرش كويسة هات كسوة جديدة وهتدى منظر كويس اوى زى الفرش بالظبط ودى فى سبير كار تقريبا سعرها 250 جنية يبقى انت ادامك اختيارين اهو فى الفرش


- لو عربيتك لونها رمادى او سيلفر او سوداء او كحلى (لونها غامق يعنى) هات فوانيس ورا كريستال , لإنها بتليق جدا فى الموديل دة لما تكون العربية غامقة , بالنسبة للفوانيس الكريستال دى فى منها نوعين , نوع جاهز بتشترية من دمشق او لو ليك حد فى بورسعيد يجيبهولك ,, النوع التانى بيتعمل بالتصميم اللى انت عايزة ليدات LED (لمبات صغيرة اوى مرصوصة جمب بعض)
ودة فى شباب بتعملة فى القاهرة الفوانيس اللى ورا بالتصميم اللى انت تختارة للهوندا السيفيك 92-93-94 سعرة تقريبا 800 جنية

- بالنسبة للفوانيس اللى ادام , فى منها رينجات ودى برضو موجودة فى بورسعيد لكن انا مسألتش عليها فى دمشق لكن عموما هتلاقيها ارخص شوية من الفوانيس اللى ورا

- بلاش الزينون لإنة طلع مخالف للقوانين والأحسن خليك ماشى فى السليم

- لو ركبت كسوة او فرش جلد , فى اعضاء فى المنتدى هنا كانوا عاملين فرش للأرضية جلد كمان عشان تنظيفها يكون سهل وشكلة جميل أكيد وهو ب200 جنية


كدة اللى انا كتبتهولك تقريبا فى حدود 2400 جنية (لو هتركب كسوة على الفرش, مش فرش كامل)
ولو هتركب فرش كامل هيبقى المجموع 2800 جنية


بس انا محسبتش الفوانيس اللى ادام , لإنى مسألتش على اسعارها لكن هى إن شاء الله يا اما فى دمشق يا إما فى بورسعيد

انا طولت عليك لكن انا حبيت افيدك باللى اعرفة عشان انا كنت محتار جدا زيك واكتر قبل ما اشترى
ولو فى اى سؤال تانى اتفضل

[Shocky]

دى أمثلة للفوانيس الأمامية الرينجات

والشكلين دول موجودين فى مصر

[Shocky]

ودة شكل غريب شوية للفوانيس الخلفية بس عجبنى جدا
وللأسف انا مشفتوش فى مصر
لكن اعتقد ان الشباب اللى قلتلك عليهم ممكن يعملوة