اشتريت سايبا تيبا 2014 باركولى....

[announcer]

الحمد لله وبعد تفكير ....استلمت السايبا تيبا 2014
السعر ...٦٧ الف
الوكيل....ناشيونال موتورز
المواصفات...تكييف / باور / سنتر / اربعة زجاج كهربا / فرامل abs / إيرباج / زجاج فامية خلفى واتنين باب خلفى....

طبعا أنا كنت متردد جدا لان العربية جديدة ومحدش يعرف عنها حاجة لكن حسبتها على ظروفى أنا وعلى الامكانيات اللى هاخدها من العربية....
أولا السعر كان مناسب جدا بالنسبة لى...لان مفيش زيرو دلوقتى بالسعر ده وبالمواصفات دى...وانا الحقيقة كنت متوقع تكون العربية أداءها أقل من اللى انا شفته بعد مااشتريتها...

ثانيا العربية فيها مميزات مهمة ...يعنى عالية من على الارض فالمطبات بقت سهلة جدا وانا سايق...الصاج محترم بمعنى الكلمة يعنى لو اتقارن بصاج الاكسنت مثلا صاج التيبا يكسب...

الصالون معقول مش ضيق رغم ان العربية صغيرة ولا واسع ...الكنبة الخلفية تشيل تلاتة أحجام متوسطة أو اتنين بزلومة...

العربية نازلة جنوط 14 سبور وكاوتش 185 يعنى كاوتش عريض وده مديها ثبات جميل....

العربية جبت بيها 140 وفاتح الاربع شبابيك علشان الهوا يعمل غربلة لكن ماشاء الله ثباتها كان محترم...
ا
المكنة صوتها عالى شوية لكن بيهدا مع التليين ...يعنى صوتها أهدى كتير من ساعت ما اشتريتها....

طبعا من أهم المميزات أسعار قطع الغيار...حاجات ببلاااااااااش...يعنى اللى خايف من ان التوكيل يبيع القضية ممكن كل فترة يجيب شوية حاجات ويركنها...والموضوع ده مش قالقنى لأن العربية انتاجها مستنمر فى إيران وبالتالى قطع الغيار هتكون متوفرة....

التقفيل تقدر تديله 70%....فى حاجات تشطيبها ممتاز وحاجات نص نص

العيوب لما تظهر هكتبها طبعا (الله لايجعلها تظهر) ...وكمان هتابع معاكم بعد صيانة الالف كيلو..أنا يادووب عامل بيها 300 كيلو بس...
أى سؤال أنا فى الخدمة

[announcer]

ودى فيديوهات للعربية

https://www.youtube.com/watch?v=RUv7Hqqacd8&feature=youtube_gdata_player

https://www.youtube.com/watch?v=9SBm2ZgxVds&feature=youtube_gdata_player

[w-m-a]

الف مبروك
ربنا يرزقك خيرها ويكفيك شرها

[J A G U A R]

الف مبروك وربنا يباركلك فيها ويحفظهالك ..
فى انتظار تقرير ..

[MAHMOUD MOHAMD]

الف مبروك عربيه جميله وسعرها ومواصفاتها ممتازه جدا ربنا يباركلك فيها

[announcer]

نسيت اقول ان شنطة العربية واسعة جدا لدرجة ان الواحد ممكن يفتح فيها مطعم ....

[announcer]

W m a / jaguar / mahmoud .الف شكر ياجماعة ربنا يسها واعملكم تقارير كويسة عن العربية...

[Silent~Dream]

الف مبروك و ربنا يديلك خيرها و يكفيك شرها

[sasatony]

الف مبروك ربنا يديك خيرها ويكفيك شرها يارب

[ketoo]

الف مبروك ربنا يديك خيرها ويكفيك شرها يارب

[mohamedadelemam]

ألف مبروك يا فندم وربنا يديك خيرها ويكفيك شرها ويجعل لك معاها احلى ذكريات العمر

[eslamsubaru]

أولا: الف مبروك و ربنا يحفظهالك
ثانيا:
العربية عاملة لسه 300 كم يعنى لسه فالتليين .. فممنوع نهائيا تجيب بيها سرعة 140 علشان لو عايز العربية تكمل معاك .. اهم مرحلة فى حياة العربية فترة التليين : على حسب تعاملك مع العربية فيها , العربية هتعمر معاك أو لأ. خلى بالك و بلاش تزود سرعتك عن 90 الى 100 اول 1000 كم على الأقل

[Ahmed_m7md_A5]

الف مبرووك

[announcer]

أولا: الف مبروك و ربنا يحفظهالك
ثانيا:
العربية عاملة لسه 300 كم يعنى لسه فالتليين .. فممنوع نهائيا تجيب بيها سرعة 140 علشان لو عايز العربية تكمل معاك .. اهم مرحلة فى حياة العربية فترة التليين : على حسب تعاملك مع العربية فيها , العربية هتعمر معاك أو لأ. خلى بالك و بلاش تزود سرعتك عن 90 الى 100 اول 1000 كم على الأقل

معلش بقى كنت عاوز أجرب الثبات بتاع العربية....لكن عموما انا جبت 140 ونزلت تانى علطول للتسعين....وشكرا ياباشا ع النصيحة..

[هانى ظرف منصور]

مبروك وعقبال المرسيدس