سؤال عن ايجار السيارات لمدد طويلة!

[NaderNabil]

كنت عايز أعرف ايه الأسعار لو واحد حب يأجر سيارة لمدة شهر أو شهر و نصف..النوع مش مهم.. لانوس ممكن, أو أي حاجة في الرخيص
و هل فيه مسافة معينة يتمشي بيها؟؟؟ولا مفتوح.

[analyzer]

ممكن توضح طبيعة احتياجك للعربيه الايجار ايه
والاساعار متفاوته على حسب العربيه
من لانوس ل فيرنا ل نوبيرا وكمان الموديل والحاله
لمزيد من الاستفسار 0123742967

[NaderNabil]

احتياجي مشوار كل يوم من حلوان للمطار حوالي 100-120 كم 5 أيام بالاسبوع
أقل عربية موجودة تقضي الغرض

[ZALABANY]

بص يا باشا أنا بقالي حوالي سنه ونص بأجر عربيات لأني كنت قاعد بره مصر
واتمرمط كتير في القصة دي
بص ياباشا اول مره اجرت كنت مأجر اكسنت 99 يومين وساعتها اضحك عليا وكنت واخد اليوم ب 160 بحد أقصى 250 كيلو
بعد كده اتصلت بأحد الإعلانات في الجرنال والناس قالولى لو هاتاخدها اربع او 5 ايام هانحسبلك العربية بحوالى 120 لليوم دي كانت لانوس 2003
بعد كده اجرت لانوس برده 2003 ب 100 في اليوم بس كنت واخدها 15 يوم وكانت عداد مفتوح يعني ما بيحاسبكش على العداد
ومره تانية اجرت ديهاتسو سيريون ب 130 بس كنت واخدها 3 ايام عداد مفتوح
ده بالنسبه للحاجات المتوسطه اما اللانسر والكرولا موديل السنه بتتكلم فى رنج 170 او 180 لليوم وممكن لو بالشهر تنزل لحد من 120 ل 150 والأسعار دي موجوده في كل مكاتب ايجار السيارات بتاعة يوم الجمعه في الأهرام
الاجراءات بتمضي على عقد ايجار تقول فيه انك استلمت السيارة اللى قيمتها كذا وبتمضي على وصل امانه بقيمة السيارة وفي الغالب وصل نور عشان يثبت محل الإقامه
نصيحه لو هاتأجر أجر أحدث حاجه تقدر تأجرها عشان ما تتبهدلش لو العربية قديمة شويه لأنها اكيد هاتكون هلكانه
الحاجه التانية شيك على العربية كويس جدا وخليه يعلم على كل الخبطات والخدوش اللي في بادي العربية في عقد الإيجار ودورها وجرب التكييف وياريت تطلع بيها عشان تبقي وائق ان العربية تمام ده لأن في ناس كتير مش كويسين الاما رحم ربي في طبعا مكاتب محترمه بس لازم تأمن نفسك كويس ولو حابب اديك تليفون الناس اللي كنت بأجر منهم

[analyzer]

عندى الانوس بــ 120 جنيه فى اليوم ودى موديل 2006
وكمان فيرنا 140 جنيه ودى موديل 2007
عبد المجيد سالم 0123742967

[ZALABANY]

وده للايجار الشهري كمان ولا لو بالشهر السعر بيختلف وهل العداد مفتوح ولا هاتقيدنا ب 100 كيلو بس

[analyzer]

العداد مفتوح ولو لشهر او ما يزيد الاسعار هتختلف

[ZALABANY]

والله كويس جدا يا استاذ أحمد طيب حضرتك مكانك فين وايه الضمانات اللي بتاخدوها

[SaLM!Na]

انا بقى عندي سؤال مهم اوي بالنسبة للموضوع ده
انا في ناس كتير اوي بيحذروني من تأجير اي عربية
بيقولولي ان اغلب مكاتب التأجير بتطلع عربيات اساسا فيها عيب و بعدين يتهموا اللي كان مأجرها
هل الكلام ده صح وللا اية
انا نفسي أأجر بس خايفة جدا

[ZALABANY]

والله كلام حضرتك صح بنسبة كبيره بس ده ما يمنعش ان في فعلا مكاتب محترمه بتأجر عربيات وكمان بتبقى متأمنه تأمين شامل عشان لو لاقدر الله حصل فيها حاجه والأفضل أنك تأجري من حد يكون معرفه ما يكونش ما تعرفيهوش
أنا قعدت في الدوحة سنه ونص بعربية فيرنا ايجار ونزلت فى السنه ونص دول حوالي 6 مرات اجازات كنت بأجر فيهم كلهم عربيات في مصر زي ما قلت فوق
وبعدين برده في شركات كبيره دي الواحد يأجر منها وهو مطمن زي AVIS بس أظن إسعارهم عاليه وعامة لو اجرت تأجري عربية موديل السنه دي عشان احتمال ان فيها مشكله بيكون قليل جدا

[dragonsmith]

السلام عليكم،

لو حضرتك بتفكر في عربية مؤمن عليها بمعنى ان لو حصل حادث متتحملش التكاليف يبقى مفيش غير الشركات ال multimational زي Avis و Hertz و Budget و خلافهم. دول اسعارهم عالية جدا و في حالة الحادث بيحملوك مصاريف ادارية تتراوح ما بين 200 و 250 دولار كمان. الفائدة طبعا لو في حادثة كبيرة و التكلفة عالية. (ربنا ما يجيب حوادث ان شاء الله)

البديل ليهم Smart Car. أسعارهم أقل و خدمتهم أحسن و المصاريف الادارية 125 دولار فقط.

الكلام ده عن تجربة لمعظم الشركات حوالي 20 مرة.
شكرا.