وقفه للمطالبه بDrive Test قبل الشراء ؟

[mido]

يا جماعه لو فى حد معانا متصل بتوكيلات العربيات هل ممكن نوصل لحل بخصوص المطالبه بتجربة نفس موديل العربيه قبل الشراء انا عارف ان ممكن فى كيا و نيسان بس معرفش حد تانى بيرضى

حتى لو ده خيال ومش من حق المصرين الغلابه اللى تعبوا لحد ما جابو العربيه ممكن حد من الناس المعروفه فى المنتدى تجرب العربيات وتكتب انطباعها مثلا ودى تبقى احسن دعايه للعربيه ده على فرض انها كويسه اصلا

حرام تبقى العربيه زى البطيخه كده لو مسوقتهاش قبل كده يبقى انت وحظك

[amrbakly]

دة في الخليج اللي الناس فية بتغير عربية كل سنة بيعملوا ليهم تيست درايف

اما إحنا ولاد البطة السودة، مش من حقنا نعمل تيست درايف أبدا و كأن التوكيل المعفن مستخسر يضحي بعربية تمنها ما يجيش تمن ربع صفحة في أهرام الجمعة (أحيانا تصل أسعار بعض الصفحات إلي مليون جنية يوم الجمعة !)

حاجة معفنة، مفروض جهاز حماية المستهلك يجبرهم علي كدة

[Most_H]

الله، دة يبقى موضوع حلو d:

[mahmoud_magdy]

لو ضحو بعربيه وخلوها للتيست درايف بس
هيكسبوا اكتر من ثمن العربيه اضعاف في وقت قليل اوي
لكن المشكله في اماكن التيست درايف

[mido]

اعتقد المشكله ان معظم العربيات الموجوده لو جربتها احتمال كبير تكتشف حقيقتها السيئه والمشكله التانيه ان فى ناس هتستعبط وتروح تجرب وخلاص واصلا مش ناويه تشترى
وطول ما احنا ساكتين وبنشترى عمرهم ما هيعملولنا حاجه انا نفسى فى اضعف الايمان يكون فى هنا حد موثوق فيه يكلم التوكيلات ويروح يجرب ويعمل review

[yoko]

النهاردة كنا (العبد لله وdamasry) في توكيل فيات ووعد إن هيبقى فيه تيست دريف خلال كام شهر لموديلات فيات في مصر

[Terrible_DaRsH]

فى قسم مفتوح لتجارب الاعضاء و تقيمهم للسيارات ..

ساحة تجارب القيادة - :: نــايــل مــوتــورز:: - :: NileMotors.net ::

و لكن لو اتاح للناس عمل تست درايف للسيارة , الناس هتنقسم لنصفين :

نصف هيروح يجرب كل يوم عربية و مش هيشترى و نصف تانى هيغير رايه بعد ما يجرب العربية ..

فالوكلاء كده مش هيبيعوا , احسن حل انهم يوظفوا ناس تعرف تضحك على العميل و يلزقوا له العربية و الف مبروك ..

[mido]

اكيد ممكن يبقى فى ضوابط زى انك تدفع اى حاجه للتعاقد مثلا تسترد فى حالة ان العربيه معجبتكش اكيد مش كل الناس هتدفع الا لو عايزه تشترى

طب الناس بره بتعمل ايه ؟

[Abo_Lina]

نصف هيروح يجرب كل يوم عربية و مش هيشترى

فعلا هاتتحول لمصدر تسلية للمصريين و كله هايروح يعمل تست درايف و يتصور مع العربية سواء هايشتري أو مش في دماغه أصلا

[dr.nemo]

ممكن يبقى فيه رسوم بسيطة على التيست درايف
وتسترد في حالة الشراء

[Ahmed Nouh]

الممنوع مرغوب , وعلشان عندنا هنا العربيات سلعه غاليه قوى فهتلاقى اى حد عايز يجرب كل العربيات وسايب شغله وبيلف على التوكيلات

فى الخليج الوضع مختلف علشان الناس هناك غرقانه فى العربيات فمحدش منهم مثلا هيموت ويجرب عربيه عاديه من اللى بنركبها , نفس الوضع عندهم فى العربيات الغاليه مش اى حد بيجربها

[amrbakly]

علي فكرة بقي و حتي لو في ناس حتتسلي بالتيست درايف

أنت متخيل البني أدم اللي حيتسلي دة مؤكد انة مجنون سواقة و عايز يلم معلومات عن كل عربية

دة البني أدم دة في حد ذاتة إعلان متنقل يساوي عشرات الإعلانات الأسبوعية في الجرايد و خاصة لو شاب

فكروا فيها كويس، لو واحد من شباب المنتدي المدقدقين راح جرب عربية زي الإمبريزا مثلا اللي سوقها واقف و جهه هنا عمل موضوع عن العربية

تفتكروا كام واحد حيشوف الموضوع؟؟؟

دة الواحد بيعمل موضوع خايب تلاقي دخلة يجيي 2000 واحد علي الأقل !

يبقي فين الخسارة حتي لو واحد هايف

و بعدين مفيش مشكلة لو بقي التيست درايف بـ 100 جنية مثلا لمدة 20 دقيقة و يتعمل في اي جامعة كل اسبوع ايام الجمعة

[Michael_Lanos]

ممكن يبقى فيه رسوم بسيطة على التيست درايف
وتسترد في حالة الشراء

+1

انا معاك فى موضوع رسوم نسبه من ثمن العربيه علشان مش كل واحد يروح يجرب ويجرى

[ahmedsamir79]

+1

انا معاك فى موضوع رسوم نسبه من ثمن العربيه علشان مش كل واحد يروح يجرب ويجرى

ده كلام عاقل جدا و حل منطقي

[Hisham1]

لا طبعا رسوم ايه علشان التجربة دي دعاية للشركة
وبعدين في تجربة متاحة في الشركات المحترمة زي تويوتا ورينو