عيوب ومزايا الفتيس الاتوماتيك والمانيوال

[seka]

انا يا جماعة كنت عاوز اكتب عن عيوب الفتيس الاتوماتيك ومزاياه وانا هقول شوية وياريت اللى عارف حاجة زيادة يقولها او لو قولت حاجة حاجة غلط ارجو التصحيح
عيوب الفتيس الاتوماتيك
1. ينقل ببطء
2. بيشد بنزين
3. بيخلى تيل الفرامل يتأكل بسرعة
4. الواحد ما يعرفش يشد زى المانيوال وعمل الغرز ع الطريق السريع
5. بتاثر بالتكيف فى السحب عن المانيوال
مزاياة الفتيس الاتوماتيك
1. ان اى عيل صغير يقدر يسوق العربية الاتوماتيك عن المانيوال اللى عايزه شوية حرفنة
2. صيانتة اغلى بالنسبة للمانيوال
عيوب الفتيس المانيوال
1. التركيز الشديد اثناء النقل ويكون النقل مظبوط
2. اختيار التوقيت المناسب للنقل
3. معرض اكتر للاعطال عن الاتوماتيك
4. القرص الشديد و بكثرة ع نقل واحد دون التغيير يسبب ضف الماتور وتقليل العزم وايضا ضعف الاسطوانة والديسك
5. مش اى حد يقدر يسوق المانيوال خاصة الناس المتعودين ع الاتوماتيك
6.عدم الضغط الكامل ع الديبرياج يسبب تلف فى تروس الفتيس
مزاياة الفتيس المانيوال
1. صيانتة اقل من الاتوماتيك

[Ahmed Anwer]

أضيف لعيوب الفتيس الأتوماتيك :_
1- مينفعش تجر عربية تانية
2- لو البطارية نامت مينفعش تزق العربية عشان تدورها
3- ناس كتير بتشوف إنه مفيش متعة ،

بص هاقول خلاصة عن الفتيس الاتوماتيك ،، إنه لا غني عنه في مدينة زي القاهرة و مش رفاهية ،،

حاجة تانية ،،
الناس بتخوف منه أوي بدون داعي ،،

بتشبيه بلدي كده
زي اللاب توب في الكمبيوتر ، كلنا كان نفسنا فيه و الناس تقولك ده مش مضمون و مالهوش صيانة و لما تجيبه لازم تجيب ماركة محترمة

و لما جبناه لقيناه زي أي كمبيوتر بل استخدامه اظرف و اسرع و عملي اكتر و اختراع ظريف جدا ،، مايستدعيش كل الخوف ده منه

[limo]

انا مشكلتى الوحيده مع الفتيس الاتوماتيك هيه استهلاكه البزين العالى غير كده الاتوماتيك مريح جدا جدا لواحد مش فارق الشد والجرى
على فكره انا معايا عربيه اوتوماتيك وبفكر اجيب عربه مانيوال علشان البنزين مش اكثر

[hesham2004]

من اكبر عيوب الأوتوماتيك ان اغلب الناس مبتعرفش تستعمله خاصة فى اول سيارة يمتلكوها ، و نسية كبيرة من الى بيستعملوه مابيعرفوش نوع الفتيس الأتوماتيك الى فى عربيتهم و الطريقة الصح لاستعماله او صيانته و طبعا ده بيأثر على عمره الأفتراضى

[MTAK]

1. ان اى عيل صغير يقدر يسوق العربية الاتوماتيك عن المانيوال اللى عايزه شوية حرفنة

عذرا اخى سيكا
و لكنى لا اوافق على تلك الكلمه "عيل" و افضل عنها "لا يمتلك الخبره الكافيه"

لان ليس كل من يسوق اوتوماتيك و تكون اول مره يسوق فيها بيكون "عيل"

و كمان الخبراء لم يولودا على عجلة القياده

اسف و لكن الكلمه لم تعجبنى

[seka]

يا استاذ Mtak انا مش اقصد ان اللى بيسوق الاتوماتيك اول مرة و ع طول بيبقى عيل انا مش قصدى كدة بس قصدى من كتر سهولتها ممكن ان بجد العيال تسوقها و والله بشوف فعلا عيال كانت بتسوق عربيات اتوماتيك بس هو ده قصدى والف شكر ليك ياباشا

[MTAK]

يا باشا ما انا كمان بشوف عيال كتيييييييييييييييييييير اوى بيسوقوا مانيوال
و بشوف عيال اكتر من الكتير بيسوقوا ميكروباسات الترامكوا و انواع تانيه غريبه فى الهرم و بولاق و تقريبا فى كل القاهره
انا فى سن العاشره كان لى اصحابى بيسوقوا مانيوال و باحتراف كمان

ده تعقيب صغير
انا معاك طبعا ان الوتوماتيك اسهل بكتيييير فى السواقه "و عن تجربه شخصيه"
و على العموم انا فهمت قصدك و اشكرك على الرد

[seka]

بس اتمنى ياباشا ان انت تكون لسه مش زعلان من الكلمة و زى منا قولتك قصدى اية بالظبط وشكرا

[MoToRiZeR]

فعلا .. انا واحد صاحبي متعود عالاوتوماتك ساعات اما ابقي راكب معاه .. اقوله يبني الموتور بيزغرط اديله غيار !! يقولي ايه ده !! هي العربية منقلتش !!

بس الصراحة بالنسبة لمصر .. الاوتوماتك اريح .. رغم اني مفيش متعة في سواقته بس هو حاليا مفيش متعة في السواقة اصلا .. ده حتي المحور و الدائري الواحد بيمشي فيهم زي ما يكون ماشي في رمسيس الساعة اتنين الظهر .. الطرق في مصر علي طول واقفة و كل شوية تمشي متر و تقف

[fahd_628]

1- مينفعش تجر عربية تانية

لية يا باشا ؟؟؟؟

اعتقد انة يتفع كل عربية و ليها Towing capacity حتى لو كانت اوتوماتيك ولا انا فاهم غلط

[Ahmed Anwer]

لية يا باشا ؟؟؟؟

اعتقد انة يتفع كل عربية و ليها Towing capacity حتى لو كانت اوتوماتيك ولا انا فاهم غلط

ده كلام الخبراء سبعاوي و ا / أدهم ، أنا مبفهمش خالص في الحاجات دي ،،

بيقولوا من أخطر الأشياء علي الفتيس الأتوماتيك ،،

[dragonsmith]

ده كلام الخبراء سبعاوي و ا / أدهم

السلام عليكم،

بالمناسبة هوا الأستاذ أدهم مختفي فين؟

[Ahmed Hassan]

لية يا باشا ؟؟؟؟

اعتقد انة يتفع كل عربية و ليها Towing capacity حتى لو كانت اوتوماتيك ولا انا فاهم غلط

لأ يا فندم... سيادتك فاهم صح.. العربيه الاوتوماتيك فهلا ممكن تقطر عادي.

[حاتم سليم]

اعزائى
على كل من يملك سيارة اوتوماتيك
1 - ان يكون معه كابلات للتوصيل من بطاريه لاخرى و هناك تسلسل و طريقه محدده ستجدها مذكوره فى كاتالوج السيارة
2 - عملية سحب السيارة فى حالة تعطلها لها طريقة خاصة فلو الجر امامى يجب رفع العجلات الامامية وقطرها و ان كان الجر خلفى يحدث العكس او يتم فك الكردان. والافضل رفع السيارة كلها على سيارة اخرى خاصه بنقل السيارات المعطلة.
3 - استهلاك البنزين المرتفع سببه الاساسى النقله الاولى لأن نسبتها اكبر من مثيلتها فى السيارة المانيول لكن لو الطريق مفتوح او حتى لا تقل فيه السرعة عن 50 كم فالفرق بين استهلاك الاوتوماتيك و المانيوال سيكون بسيط .
و هناك سبب اخر لزيادة استهلاك البنزين و هو اننا عندما نقف فى اشارة او عند وقوف المرور نضغط على الفرامل و نحن على D و افضل ان نكون على N ثم ننقل للوضع D عندما نريد التحرك و هذا من شأنه تقليل استهلاك الفرامل أيضا.
4 - اذا اهملنا الحاجه الى الجرى و السحب و الغرز فأعتقد ان السياره الاتوماتيك ستكون ممتعه.
5 - الصيانه فى مواعيدها سواء بتنظيف فلتر زيت الاتوماتيك او تغيير الزيت بعد كيلومترات محددة.
6 - لا داعى لزيادة Rpm عن 2500 لفه و هذا من شأنه تقليل استهلاك البنزين.
7 - يفضل عند شراء سياره اتوماتيك ان يكون عدد النقلات اربعة و ليس ثلاثه فكلما زادت النقلات كلما قل استهلاك البنزين .

و اخيرا
اذا كان كاوتش السياره تيوبلس ( الاربع عجلات ) فيجب وجود منفاخ يعمل بالقدم ( يجب ان يكون نوع جيد و يفضل ان يكون له 2 ماسوره ) و فى هذه الحاله لن تحتاج الى الكوريك او الاستبن و عندما تجد العجله "نايمه" انفخها بالمنفاخ و اذهب الى اقرب واحد لتصليح العجله دون المشقه فى تغيير العجله.
و اتمنى لكم قياده ممتعه ...

[Heshaam]

لأ يا فندم... سيادتك فاهم صح.. العربيه الاوتوماتيك فهلا ممكن تقطر عادي.

+1

الجين تو الأتوماتيك مثلا من ضمن عدتها عتلة لقطر سيارة أخرى؛ وبيبقى متحدد في كتيب التعليمات الخاص بالسيارة الحد الأقصى للوزن الممكن قطره

صيانتة اغلى بالنسبة للمانيوال

ديه ميزة ولا عيب