::جهاز حماية حقوق المستهلك:: ولا عزاء لمالكي هيونداي

[M.Gamaledeen]

عرض اخي منذ فترة (وهو من أعضاء المنتدى) مشكلته مع عربيته الفيرنا فيفا
وهي ظهور بارومة في جسم العربية من ناحية الرفارف وحوض الموتور (وده لينك للموضوع بالكامل http://www.nilemotors.net/Nile/105446-2008.html )
المهم
بعد عرض حلول غير مرضية وغير منطقية من التوكيل
قرر انه وبناء على نصيحة الكثير يروح يقدم شكوي في جهاز حماية حقوق المستهلك
وبعد مقابلات كتيييرة ولجان وفحوصات
تم تحديد ميعاد بمقر اللجنة بالمهندسين للإجتماع بممثلي من شركة غبور والجهاز وأخويا (وانا كمان)

وفي الميعاد المحدد
فوجئنا بإن مش احنا الوحيدين اللي جايين نشتكي هيونداي
كان في ست حالات اخري

الأولى
واحدة اشترت جيتز, وهي بترخصها في المرور شالت اللزق الأبيض بتاع الفبريقة فاكتشفت ان السقف كله مطبق ومعوج.(ودي كان معاها محامي تبع المعرض اللي اشترت منه)

الثانية
واحد من السويس معاه نيو اكسنت موديل 2009, العربية ولعت واتحرقت بالكامل وهي واقفة في مكانها (عمل محضر وفحص جنائي واثبت ان الحادث بسبب عيب في الكهرباء)

الثالثة
واحدة معاها اتوس بريم, البطارية كل شهر تفضى ع الآخر, وفي التوكيل غيرو البطارية أربع مرات والكاسيت مرتين ولسه الحال كما هو.

الرابعة
واحد من دشنا, معاه الانترا 2010, فوجئ بدخان طالع من موتور العربية وهو ماشي, وعقبال ماركن, ماعرفش يفتح الكبوت, ف ساعدة ولاد الحلال وفصلوا الكبوت عن العربية بس بعد ماراح الموتور والتابلوه في خبر كان.

الخامسة
واحد معاه فيرنا فيفا, بيشتكي ان صوت الفيتيس عالي جدا والعربية من ساعة ما جت وهي فيها حدفة شمال, و في التوكيل بعد ماغيرو الفيتيس مرة قالوله ان الصوت ده عااادي وإن القلق اللي عندك عامل "نفسي".

السادسة
عربية اخويا

دي الحالات على الترتيب
وبعض العرض على لجنة الجهاز كانت الحلول كالتالي

- مهله اسبوع لتغيير السيارة الأولى.

- دفع مبلغ 15000.00 جم فرق سعر مابين موديل 2009 و 2010 للسيارة الثانية واستلام سيارة جديدة.

- طلب من التوكيل وبكل "حزم وشده" الوقوف على حل لتلك السيارة وفحص المشكلة بدقة (لما خرجت صاحبة العربية من حجرة الإجتماعات كانت مبسوطة بشده المستشار القانوني للجهاز ونرفزته على اعضاء لجنة غبور, ودخلت انا وأخويا نسأل على حاجة فوجئت بالمستشار بيقولهم" معلش انا احتديت كده شويه عليكم علشان اهديها, احسن دي عمله لنا قلق ومغرقانا شكاوي !!!!"

- تكاليف إصلاح الـ إلانترا 75000.00 جم ( 55000.00 جم موتور و 20000.00 جم تابلوة وبادي وورك) يتم تقاسمهم مناصفة بين الوكيل وصاحب العربية( على الرغم بان العيب طلع في دايرة البنزين ولكن لم يستطيع اثبات ده بمحضر المعاينة الأولية للفحص الجنائي)

- صوت الفيتيس عادي ويمكن التغاضي عنه وبالنسبة للحدف شمال,, يبقى يروح يظبط زوايا. ولما ثار الراجل وطالب بعمل لجنة ومعاينة السيارة قاله احد اعضاء اللجنة " ماهو هو انا برضوا اللي هاكون في لجنة الفحص وهاقول انها مافيهاش حاجة!!!"

- نيجي بقى لعربية اخويا
اعضاء اللجنة الموقرة نزلوا وبصوا على العربية وقال واحد فيهم "انا شايف ان الصدا في جزء لايتعدى واحد سم مربع, ولا يؤثر على متانة السيارة, ويمكن اصلاحة, ف قلتله ده الجزء الظاهر وبعد سنة ! يبقى ايه اللي ممكن يحصل بعد سنتين تلاته؟؟؟؟
قالي انت ليه بتفترض الأسوأ, ياأخي خلينا في النهارده!!!!"
وبعد مناقشات ومداولات
عرض علينا احد مندوبي غبور ان يتم اصلاح السيارة ومد فترة الضمان على جسم العربية, وحصولنا على شهادة تفيد ان ماتم بالعربية من إصلاح ورش ودهانات نتيجة عيب صناعة وليس من حادث او خبطات علشان في حالة ما حبينا نبيع.

أو" بعد التأكيد على ان قرار اللجنة هو عدم وجود ضرورة لتغيير السيارة" عرض استرجاع السيارة وخصم مقابل استهلاك ( قسمة 160000 كم وهو عمر العربية الإفتراضي على عدد كيلومتر العداد )
يعني في حالتنا العربية عاملة 40000 كم (كانت عاملة 30000 لما قدمنا الشكوى)
160000 / 40000 = 1/4
65000(قيمة العربية)/ 4 = 16250 جم
65000 - 16250 = 48750 جم

تكمل عليهم وتاخد عربية تانية !!!

وطبعا الحلول دي كانت غير مرضيه
فتم اللجوء للصحافة وبعض الجهات التي اكدت على وجود شكاوى اخرى وحالات متشابهه في التعامل مع غبور والجهاز.


طولت عليكم ؟؟؟؟
بس كان لازم انقل لكم الموضوع بكل تفاصيله


ملحوظة :_

المصري اليوم نشرت في عددها الصادر بتاريخ النهارده (في الصفحة الأخيرة)عن الثلاث حالات (الفيرنا الفيفا وال الالنترا )

[ghazy12]

قريت الخبر فعلا يا باشا..... بس مش المفروض جهاز حماية المستهلك تشترط على غبور مايدفعكوش حاجه؟؟؟؟

لكن ربنا معاكوا والله........ و انتظر قريبا.... توكيل تاني هيحصل هيونداي

[hemeds82]

السؤال هل الصحافة من الممكن ان تضغط علي غبور لاصلاح العيوب
ربنا يصبرك حسبنا الله ونعم الوكيل

[eng.m7md.ali]

ربنا يعينكو ويعين ملاك الهيونداي علشان انكل غبور يكون مبسوط

[Eng_Mostafa_89]

الجهاز دة كان ماشي كويس اية اللى حصلة؟؟؟؟؟؟؟؟؟

[badblood]

ربنا يصبرك ويصبر الناس
الضمير مات خلاص حسبنا الله ونعم الوكيل

[nabaster]

مبدايا انا شايف ان الست حالات تلات حالات (50% من اجمالي الحالات) منهم محلوله بحلول مرضيه جدا جدا والتوكيل عمل الي عليه وزياده

الحاله الرابعه عيب الراجل صاحب العربيه لانه اصلا عمل محضر واثبت فيه انه عيب كهربا وبعدين طلع عيب في دايرة البنزين

لو رفع قضيه بالوضع ده هيخسرها ومش هياخد ولا مليم

فكده يعتبر برضه حل مرضي جدا جدا جدا جدا جدا وعيب من صاحب العربيه انه معرفش يثبت موضوع دايرة البنزين في المحضر كان التوكيل وقتها هيلبس الليله كلها وكفايه انهم راضيوا يتحملوا نص التكاليف (ضيف 17% علي الـ 50% يبقي كده 67%)

موضوع الفيرنا فيفا لازم لجنه محايده تفحص العربيه

نيجي بقي لموضوع حضرتك وهوا الي يعتبر حاله شاذه في وسط الست حالات

انا مش عارف بصراحه المشكله دي تتحل ازاي

بس فكرة اصلاح العيب ومد فترة الضمان والشهاده(الي في نظري صوريه وملهاش اي لازم اصلا) فكره كويسه جدا

وده هيدي ثقه للمالك ان العربيه في فترة الضمان الي هتتمد مفيش برومه هتحصل فيها

بس لو ضفت شرط ان لو حصل اي برومه تاني في العربيه ترجع العربيه للتوكيل فورااااااا مع عدم تحمل اي نسبة استهلاك كده هيبقي تمام اوي

لان اللجنه بتبقي معموله عموما بغرض المفاوضات

اتفاوض معاهم في الشرط ده وهتبقي ان شاء الله المشكله اتحلت (من وجهة نظري)

A.Yakout

[NoRmAl]

ربنا معاكم والله
بس طالما كده
الناس الى بتقول فى الجهاز ده شعر
بتتعامل معاه أزاى
أو بتاخد حقها تالت و متلت أزاى!!

[Tayer]

حسبى الله و هو نعم الوكيل فى غبور

[nabaster]

احب اضيف نقطه كمان

انا هدي للتوكيل 13 من 17 لحين اضافة الشرط في مشكلتك

كده التوكيل ياخد بالنسبالي 80% (مع العلم في 17% معلقين علي موضوع الفيرنا فيفا) فبلتالي انا شايف ان دي نسبه كويسه جدا جدا وممتازه كمان

A.Yakout

[nomercy22]

ربنا يعوضك يارب

[Ashraf_Ashraf]

الجهاز دة كان ماشي كويس اية اللى حصلة؟؟؟؟؟؟؟؟؟

رغم اننا بنسمع من طرف واحد ( مع شديد الاحترام له والتصديق الكامل )
بس من امتى فى مصر شئ بيفضل على حاله اشمعنى جهاز حمايه المستهلك هو اللى مش هيبوظ

الله يعين اصحاب المشاكل ويعينا جميعا فى بلد مافيهاش اى طريقه ممكن تاخد حقك فيها بالطرق السليمه

[M.Gamaledeen]

قريت الخبر فعلا يا باشا..... بس مش المفروض جهاز حماية المستهلك تشترط على غبور مايدفعكوش حاجه؟؟؟؟

لكن ربنا معاكوا والله........ و انتظر المفاجأه.... توكيل تاني هيحصل هيونداي قريبا ان شاء الله

ربنا يخليك يا باشمهندس
تخيل ان رد هيونداي على موقع المصري اليوم كان ان البارومة لا تتعدى 2 سم !!!!
وإن استخدام بنزين 80 هو اللي ادى لإحتراق ال إلانترا

[د.محمود صلاح]

والله حاجة تفرح وتحزن ,, الله يكون في عون أصحاب العربيات وأحييهم بشدة على صبرهم وشقهم الطريق الصحيح للشكوى

[M.ABDEEN]

الله يصبرك ويصبرهم ويعوض عليكم