منع سير السيارات وسط القاهرة!

[د.محمود صلاح]

مشكلة التكدس المروري في كل المدن وليس في القاهرة فقط

[إبراهيم.صادق]

الحل مش بالشكل ده

هو كل غرضه من الموضوع انه يشغل الجراج الجديد "اللي أكيد طبعاً هايبقى غالي عشان يجيب تكلفته" إنما مافتكرش انه بيفكر في حل حقيقي لمشاكل البلد

منع دخول السيارات ممكن يكون أحد عناصر الحل لكنه لوحده مش كفاية

لو عايزين نحل الوضع المروري المأساوي داخل القاهرة يبقى لازم ننفذ كذا حاجة على مستوى القاهرة الكبرى مش بس وسط العاصمة:

• منع إنشاء أي مباني جديدة داخل القاهرة "مع تعويض أصحاب الأراضي باعطائهم أراضي بديلة بمساحات أكبر في المدن الجديدة"، مش عمالين نزود الطين بلة بالفنادق الجديدة على كورنيش النيل والأبراج اللي كل شوية تطلع في المهندسين على سبيل المثال
  
• توجيه الاستثمارات الحكومية ومشاريع التنمية إلى المحافظات الأخرى "يعني م الآخر جعل القاهرة مدينة طاردة للسكان"
• نقل الأماكن الجاذبة للكثافات المرورية العالية إلى خارج القاهرة "مش زي ما بيقول سيادة المحافظ النبيه عايز يرجع يبني الأوبرا دلوقتي في وسط البلد"
• أكيد طبعا توفير نظام نقل عام محترم "وأحد أهم عناصره مترو الأنفاق" بيساهم بفعالية في تقليل الزحام
  
• طبعاً لو عايزين حل جذري بجد يبقى لازم نفكر في عاصمة جديدة "زي تجارب دول كتير سبقتنا" وننقل العاصمة بالكامل "يعني وزارات وبرلمان وخلافه" لمكان جديد ويكون بعيد عن القاهرة مش أقل من 100 كم "الله يرحم السادات ومدينة السادات!!"

بعد كده بقى هنلاقي عندنا القاهرة التاريخية موجودة بمناطقها التجارية الجميلة في وسط البلد وساعتها نبقى نفكر نمنع السيارات الخاصة من دخول وسط البلد أو نعمل دخول القاهرة عموماً بفلوس

=====

بمناسبة الموضوع ده دايماً أفتكر مجموعة القرارات الغبية للمسئولين ومنها:

• نقل موقف سيارات الأقاليم من أحمد حلمي إلى مقلب زبالة بمنطقة عبود، والنتيجة زحام وتكدس رهيب بمدخل القاهرة ونشأة مجموعة من المواقف العشوائية برمسيس وأحمد حلمي والتحرير، وطبعاً منتهى الغباوة والتخبط إنهم بعد ماقالوا مافيش دخول لسيارات الأقاليم لقلب القاهرة راحوا عملوا مشروع ميناء الترجمان البري!!
• أختيار منطقة مدخل طريق اسكندرية الصحراوي لإنشاء المتحف المصري الجديد، بالذمة متحف تكلفته 550 مليون دولار مايستاهلش يتعملوا مدينة كاملة وتبقى مدينة المتحف؟؟ والفكرة دي مش فكرتي دي كان قالها إبراهيم حجازي من وقت االتفكير في مشروع المتحف بس مين يسمع ومين يفهم؟! والطريف بقى انهم دلوقتي بيتكلموا عن مشاريع لتطوير المرور بمنطقة الرماية لمنع الزحام مع افتتاح المتحف، مش فاهم إزاي بصراحة!!

=====

آسف للمشاركة الطويلة بس اتخنقت وحبيت افضفض معاكم ..

[إبراهيم.صادق]

وبعدين أسلوب المحافظ وكلامه عن "قوى الإعاقة الإجتماعية" مش عاجبني بصراحة

عايز يحسسك أنه الحكومة نفسها تصلح وتطور البلد وياعيني الشعب هو اللي رافض ومش عايز .. بصراحة كلام مستفز من محافظ فاشل ونظام حكم أشد فشلاً