ما هو رأيك فى التوكيل أو مراكز الصيانة اللى إتعاملت معاها؟

[Sharky]

السلام عليكم

إيه رأيكم كل واحد فينا يحكى عن تجربته مع التوكيل أو مراكز الصيانة اللى إتعامل معاها؟

علشان نقدر نعرف إيه التوكيلات و مراكز الصيانة المحترمة فى البلد و فى نفس الوقت نعرف نتعامل إزاى مع التوكيلات الغير محترمة؟

[aeltokhy]

حكايتى مع اوتو ماجد التى إنتهت ب كونترولر سعرة 4000 جنية


فى البداية أشيد بالمكان وإتساعة وقربة من القاهرة بالمقارنة بعز العرب ولكن قطع الغيار غير متوفرة والأيدى العاملة غير مدربة وهذا الكلام عن تجربة مريرة
لقد سألت عن تغيير زيت الفتس وأنا رشحتة لانة كان عامل أعلان الكشف على البرتون مكجان لمدة شهر وطبعا شربت القلب ورحت وياليتنى ما رحت
أنا كان عندى خنقة فى السيارة فقلت يكشفوا عليها بالمرة وأعرف العيب فين وخصوصا إن عندهم كمبيوترفبعد الكشف خرجلى الأسطى سمير وأخبرنى أن المشكلة عندى فى البوابة وطبعا أنا مش فاهم يعتى إية البوابة فتوجست خيفة وأنا عارف إنهم لسة جداد فى ال عملية فأخبرتة أن لايعمل خاجة ويقفل الجوب ولاكنة طبعا فرصة جايلة زبون يجرب فية فك البوابة وقام ينظها وهتا كانت الكارسة فبد ما ركبها خاول يدور السيارة ويدوس على الإكسراتير لاتستجيب تدور أة ولاكن لايستجيب البنزين
فطلب منى أذهب إلى الحرفين وأشترى بوابة إستيراد
وذهبت ألى الخرافيين بالمواصلات وجبتة كانت الساعة الخامسة فركب الفيشة ولكن الإشارة الخارجة من الكنترولر لم تستجيب وفى اليوم التالى لم يستطيعوا أن يفعلوا شئ وكنت على وشك أن أحمل السيارة على الوينش الى عز العرب ولكنى كان معايا رقم تليفون الكهربائى فأتاى وجاب مهاة الكنترول يونت وطلب أن يركبة بنفسة فى العربية وطبعا المهندس وافق لانة لاحيلة لة فى الأمر ففصل كهربة السيارة وركب الكنترولر
وهنا عرفت المهنس هو إلى طاير الكنترولر لانة كان عمال يفك الكنترولر ويركبة والبطارية متوصلة
أنا آسف للإطالة ولاكنى أصريت على أن أروى القصة كاملة ليأخذ الأخوة حزرهم ولايقعوا فى الفخ مثلى
وشربوا مقلب أبو بلاش كتر منة[/b]
إحذروا هذا التوكيل


----------------------
تم تعديل السطر الاول وتوحيد لونة لتسهيل قراءته
03:50AM 22057 ADMIN4

[AlmAhAtmA]

التوكيل
انا عن نفسي جبت من فرع الفطيم في الاسكندريه
الناس علي قدر من الاخلاق و الذوق بيخليني اروح بس علشان اسلم عليهم من وقت للتاني
و بيكلموني في الاعياد يعني صراحه مش موجودين في اماكن كتير في مصر
الصيانه
بتعامل مع مركز صيانه المامون
الناس فاهمه بيعملوا ايه
يمكن انا ما افهمش في الميكانيكا قوي
لكن من خلال الصيانات الاعتياديه حسيت انهم بيفهموا في الشغل و شوفت عربيات بيتعمل لها شغل كبير فعلا بنظافه و احتراف
فعلا الناس دي محترمه

[NaderNabil]

ARTOC AUTO

sales persons are very polite and friendly i didn't imagine they would be like this, i worked at mercedes and the sales people werent at this degree of politness and understanding about the car and the company

the Service center ARTOC is the only one in cairo, and it is small relating to the huge number of skodas which increases every day, but i heard from an engineer their that they will open a new service center soon better than this one and much more larger.

the engineers there are very friendly too they accept ur complaints happily and do whatever u want

but their service prices are high, last time we changed oil+ filter and zabtna zawaia they took 400 L.E.

however parts are not very expensive, el kaboot costs about 800 L.E wel fanoos wara about 650

these are some info, and im ready for any questions
.

[kimo]

انا رحت مركز صيانة معتمد لرينو فى جسر السويس الناس يقابلوك كويس جدا
حبيت اغير كوتشة الكوبلن لانها مقطوعة وبعد يومين اكتشفت انهم لم يقوموا بتغييرها
كذالك المسحات قال لى عايز الاصلى ولا المصرى قلت لة الاصلى 50 ج بعد 3 ايام
ركبت القديم لان الاصلى اللى مدهولى بلاستك لو كان اعطنى المصرى كان انكسر وهو بيركبة
حسبى الله ونعم الوكيل

[Sharky]

السلام عليكم

فيه مركز صيانة تانى محترم قوى إسمه الميكانيكيون العرب فى شارع جوزيف تيتو بعد السندباد
ممكن تروحه و حيخلوك تشوف السيارة و هى بتتعمل و تشوف كل حاجة تتغير فيها .

[Abonora]

انا لو حكيت عن توكيل الامل الضائع مش هيكفيني فيهم كلام بس كفايه اقول حسبي الله ونعم الوكيل ناس قمه في التخلف وقله والذوق والجليطة وعندهم كهربائي عايز قطع ايديه اللي كل ما تمد في العربية تبوظ حاجة واللي بيصلحوا بيبوظ تاني علما باني 3 مرات اروحلهم علشان السنتر لوك بيعلق واروح استلمها الاقي العيب زي ما هو

انا دلوقتي حالا عربيتي عندهم بعمل صيانة ال10.000 وديه بيغيروا فيها زيت محرك وفلاتر زيت وهوا وبنزين وتيل امامي وطقم بوجيهات علماً بان العربية ادائها ممتاز ومش محتاجة ولا حاجة من دول بس لازم اعمل صيانة ال 10.000 عشان يصلحوا بكره التكييف وبخاخة الميه وقاعده الولاعة !!!

ربنا يستر وميخربوش فيها حاجة ادعولي بقي ترجع سليمه

[Sharky]

السلام عليكم

تجربتى مع توكيل رينو:
بصراحة الناس هناك محترمين قوى يعنى مثلا أول ما جبتها كنت حاسس إن التيل ناشف قوى فلما قولت للتوكيل كده غيروا التيل ببلاش و برده مرة تانية كنت بصيف فى مارينا و نزلت الصبح لقيت السيارة مش شغالة كلمت التوكيل على الكول سنتر بتاعهم قالولى دى بطارية و بعتولى مهندس من توكيل إسكندرية و فعلا جالى بعد ساعة تقريبا و غيرلى البطارية ببلاااااش برضه و دا غير إن الكول سنتر كان كل شوية بيتصل بيه علشان يطمن المهندس جه و لا لأ ؟ و السيارة إيه أخبارها ؟
المكان بتاعهم اللى فى المقطم شيك قوى و المشروبات طبعا ببلاش و فيها 2 كمبيوتر ممكن تدخل بيهم على النت علشان تتسلى و إنت قاعد مستنى السيارة .
بصراحة ناس محترمين جدا و من التوكيلات القليلة اللى فى مصر المحترمة.

على فكرة فيه كمان مركز خدمة معتمد من رينو إسمه الميكانيكيون العرب عند السندباد برضه محترمين قوى و بيخلوك تقف جنب السيارة و هما بيغيروا أى حاجة فى السيارة علشان تطمن.

[limo]

فعلا توكيل رينو فرع المقطم محترمين جدا سواء فى المعامله ولاصلاح بس برضو بفضل الميكانكيون العرب لنفس سبب حضرتك وهو انك بتعد مع العربيه وده لانى بستريح نفسيا لما اشوف ايه الى اتغير فى العربيه
وكمان فى سبب تانى ان عندهم قطع غيار ارخص من الفرنساوى يعنى انا مثلا الكلاكش اتحرق روحت روحتلهم قالى فى الفرنساوى ب200جنيه والايطالى ب60 جنيه ومعتمد من شركه رينو طبعا ركبت الايطالى وشغال زى الفل
وكمان بيغطى الضمان
توكيل ابو غالى وحش جدا او ما جبت العربيه الانوس وكنت جايبها مستعمله روحت ابوغالى غيرو حاجات مش محتاجه انها تتغير والحاجات الى عايزه انها تتغير معملوهاش .
ورحت بعد كده دايو موتوزه ابو رواس طلعوا احسن من ابو غالى 1000 مره

[Sharky]

السلام عليكم

فين تجارب الأعضاء مع مراكز الصيانة أو التوكيلات ؟؟
و لا محدش بيتعامل معاهم أصلا :D

[ragea Abdoo]

عفوا انا هاستلم التريوس ٢٠٠٧ الاسبوع القادم
ولكن كان عندى تيوتا ستارليت ورحت للتوكيل فى العباسية بعد الكوبرى لتغير الاسطوانة والديسك والبلية وهم ناس محترمة معرفين شغلهم ولكن فى مبالغة فى الاسعار شوية كتير ودفعت ٤٠٠٠ جنيه فى الديسك والبلية والاسطوانة وفلتر زيت وبنزين وهواء فى حين ان هذة العملية لن تكلفى اكثر من ١٥٠٠ عند اى مركز صيانة محترم ولكنى فضلت التوكيل الان الاسطوانة فى التيوتا لازم ترفع المتور علشان تركبها
والله عالى واعلم..

[ABU HAMZA]

وجيه اباظه

قمة الروتين:
دخول السياره للورشه ممكن ياخذ منك ساعه الى ساعه ونصف، بيحضر في الاول واحد يوزع عليك كيس بلاستيك مفروض انك تركبه بنفسك لكرسي السائق لزوم النظافه، بعد كده يحضر مهندس يدون مشكله السياره، بعد كده مسئول فحص وامن لاستلام المتعلقات و تدوين الاصابات الخارجيه في الدهانات بعد كده سائق لادخال السياره الورشه
قمة الاهمال:
جميع العامليين بالمركز لا يرتدوا القفزات اثناء العمل و هذا بجانب تعريضهم للاصابات يعرض السياره من الداخل و الخارج للشحوم و الاوساخ من ايديهم
قمه المبالغه في الاسعار:
مثال : فانوس 406 امامي بالتوكيل 1800 جنيه اشتريته من شارع دمشق بمصر الجديده ب 350 جنيه
قمه الاستهتار:
مكان استراحه الزبائن في منتهى القذاره مع تكييف سبليت تعبان و تلفزيون الوان ريموته مع موظف الاستقبال فقط، يوجد قهوجي يبيع شاى و قهوه في اكواب بلاستيك للزبائن

بص انا قرفان من ان اكمل الكلام !!!

[ahmad7610]

:)

[ahmad7610]

سوبارو امبريزا . وتوكيل ابو غالى
-
انا الحمد لله بروح مركز الصيانة المعتمد لسوبارو ( لانه الوحيد فى مصر اصلا:) )
المركز صغير فى الحجم يعنى يقدر ياخد 6 عربيات مثلا فى وقت واحد ومكان للغسيل واستراحة متوسطة
لكن المهم انك بتشوف كل حاجة ومفيش مانع عندهم انك تقف تتفرج جنب العربية ... ناس محترمة فعلا وعارفيين بيعملوا ايه
-
لى تجربة معهم فى فترة الضمان .. وغيروا طقم البلى كامل لانه كان خشن على الناحيتين ببلااااااااااش :) فى الضمان
-
المكان هناك نظيف و شغلهم مظبوط واهم حاجة اصلا فى توكيل سوبارو الناس المحترمة سواء فى المبيعات او الصيانة
-
وانا شايف ان قلة عدد عربيات سوبارو فى مصر مش عيب..لانى على طول بلاقى الصيانة فاضية

وكمان الاسعار معقولة جدا .. و زى اى عربية فى فئتها .. وأأقل كتير من الرينو و ستروين

[محمدايهاب]

توكيل الفولكس فاجن في العبور سيئ جدا خالتي عندها باراتي العربية فضلت عندهم أكتر من شهر بعد معاد التسليم صحيح المركز كبير و الإمكانيات عالية جدا و تتوافر قطع الغيار لكن استلمنا العربية مش متنظفة و فيها مشاكل كتير و كل مرة نروح نلاقي و لا حاجة تعملت و فولكس فاجن بقالها 3 سنين بتوعد بفتح فرع جديد للصيانة لكن مفيش فايدة و في كمان عنصرية أنا شفت الممثل عمرو واكد بيتعامل إزاي و أنا كمواطن عادي بتعامل إزاي صحيح في كتير ناس مؤدبة لكن الأدب من غير العمل ليس له لزمة
تأخير - عنصرية - زحمة جدا جدا جدا - المعاملة سيئة - الشغل نص نص - العربية بتتخدش عندهم كتييير جدا ( و لكن هم الحق بيعالجوا الخدوش ) بس ده لا يمنع عامل الإهمال - و أهم نقطة هي عدم التخصص يعني تلف على مهندس واحد وراء التاني
أما بالنسبة لمركز تويوتا يونايتيد المعتمد في العبور فهو محترم و فاضي و معملته كويسة و فيه تخصص بس أخر مرة إستلمت العربية كان في حرق في الفرش في 3 أماكن و ( اظن أن السبب هو السجاير ) و كمان المرة إلي قبلها كان في العربية 9 شرايط قرآن اختفوا ( لكن دي غلطتي إني نسيت أسأل ) و في مرة ضيعوا الطاسة فجابوا وحدة جديدة و غير حكاية السجاير الناس محترمة جدا ( مهندس أحمد سالم والمهندس محرم)