مغامرتى للحصول على سيارة

[smartghost911]

السلام عليكم و رحمة الله و بركاته
مساء الخير
أنا خالد 25 سنة طالب بالفرقة السادسة كلية الطب جامعة المنصورة
و كل يوم بضطر أروح الكلية من منزلى فى منية النصر لكليتى فى المنصورة عبر طريق المنزلة المنصورة لمسافة حوالى 35 كيلو و لداخل مدينة المنصورة حوالى 5 كيلو
و لأنى مش بحب أروح الموقف من الفجر علشان أركب بصورة آدمية و أو أتزاحم مع زملائى علشان أتحشر فى العربية ولا أتخانق كل يوم أو أتوسل إلى التاكسيات ..و بطلت حتى أروح الكلية ..
فقررت أشترى عربية
و لأن مفيش عندى أى فكرة عن العربيات و عندى معرفة محدودة بالانترنت فتعرفت على المنتديين اللى هكتب فيهم المشاركة دى..
و بدأت أقرأ كتير و استفدت كتير و بقيت عارف إن الكارتير مش بينقط كهربا و لا حاجة ..
و لأن مفيش معايا غير 40 ألف جنيه
حددت احتياجاتى و لأنى معرفش حد أثق فيه قد كده واحد قريبى ذو ثقة دورلى على عربية لانوس 2001 و اشتريتها من خلاله على 36 ألف جنيه على خلفية انها فابريكة من جوة و رشة برة
و قاللى كمان انها محتاجة تظبيطات و هخليها عنده يظبطها لأنه محل ثقة و هيحاسبنى على أى زيادة و أنا دفعت الفلوس و ركبت العربية لفتين و أنا مش سواق أساسا بس سقت كذا مرة قبل كده ..و مفتحتش حتى الكبوت ..
و قاللى على ما أخلص الورق و الاجراءات و لأن فى مفضلش فى رخصتها إلا أقل من شهر ..
و دفعت فوق الألف جنيه فى الورق و الشهر العقارى و المرور و الضريبة و التأمين والاكراميات ولسه رايح أرفع البصمة علشان أنقل العربية لمرور محافظتى, مهندس الفحص أصر على حرق صدر الحوض ليتأكد من الرقم المحفور هناك .. و يردد أن العربية راشة حوض و قريبى بجوراى لا يعترض رغم زعمه الدائم أنها فابريقة و زى الدهب من جوة و زى الزيرو و ما إلى ذلك .. و عرض على استرجاع أموالى .. و لم نحدد موقف الأموال المنفقة فى قطع الغيار من جهته و فى الاجراءات من جهتى ..
فأنا محتاج عربية محترمة و مش بتاعة مقالب و موفرة فى البنزين و فى حدود 36 إلى 40 ألف جنيه و طبعا مش شرط لانوس لو فى اقتراحات أحسن يا ريت طبعا تبقى أول يد استعمال بيت يعنى ..
شكرا جزيلا لاهتمامكم

[motoxp]

تم الرد على الخاص

[Karim_Mohy]

ممكن اكسنت 1500 سي سي او لانوس.......دول قطع غيارهم متوفرين وموفرين في البنزين بالنسبة لماركات اخري في نفس السعر

[د.محمود صلاح]

كيا برايد كوري هاتش باك بحوالي 27 الف ,,

[tayam]

اكسنت2000 /2001 او لانوس 1/2 قضي الامر الذي فيه تستفتي

اكسنت2000 /2001 او لانوس 1/2 قضي الامر الذي فيه تستفتي

[M.Osman]

بالتوفيق يا باشا... دوّر و ان شاء الله هتلاقي حاجة حلوة

[maka]

ربنا يكون فى عونك وحاول تخليك فى الكورى المنتشر علشان الصيانة وقطع الغيار

[powerofhelll]

ابيزا - فابيا - هوندا سيفيك

[أحمد كمال]

ابيزا - فابيا - هوندا سيفيك

فيه سيفيك ب 40 الف؟؟؟؟؟؟

[M.Osman]

فيه سيفيك ب 40 الف؟؟؟؟؟؟

اعتقد اه... بس هتعوز شوية توضيب

انا شايف ان صاحب الموضوع يدور على فيرنا 2006 2005
اعتقد هيلاقي حاجة كويسة و بالتوفيق

[mr_sameh]

خليك في اللانوس

[الغزالى]

فيه سيفيك ب 40 الف؟؟؟؟؟؟

وب 37الف كمان بس موديل 93 او 92 الى هيا ال si
اتوماتيك وعادى ممكن تكون بالسعر دة ونضيفة جدا

[zoro007]

احسن لك اليبانى ارشح لك متسوبيشى بطه هتعملها حاله نضيفه جدا من 38 ل 40 الف وبالتوفيق