ايه أغبى حاجة عملتها بعربيتك

[magdawy76]

ساعات الواحد بيعمل حاجة غبية او تركيزه بيقل وعاوزين نستفيد بالحاجات دى عشان نتعلم منها ونساهم فى تقليل الحوادث . بالنسبة ليا أنا هابدأ بنفسى واحكيلكم عن حاجة غبية حصلتلى
أولا انا فى الأمارات وعارفين ان فيه التزام بقواعد المرور المهم كنت داخل على اشارة وخلاص هتقفل عليا بصيت ورايا مالقتش حد جاى المهم فرملت ووقفت بس كنت معدى الخط الأبيض والخطوط هنا مقدسة المهم رجعت العربية بس الغباء انى سبت العربية على الr طبعا العربية اوتوماتيك المهم اما الإشارة فتحت بتزود بنزين وتطلع لقتنى بارجع لورا المهم ربنا سترها لأن لو الراجل اللى ورايا لو كان اتحرك كان لبس فيا .

[dolly13]

انا حصللى الموقف ده مرة
توقفت اسال على عنوان وكنت رجعت ورا شوية علشان اسال واحد واقف
وجيت اطلع لقيتنى بارجع وكان واقف ورايا تاكسى
الراجل جاله انبهار من اللى بيحصل بس طبعا الموضوع مش بياخد اكتر من ثانية وبتاخد بالك
بس طبعا فضلت اضحك ييجى ساعة
لا الموقف اللى بجد كان بشع
فى شارع مصطفى النحاس كنت ماسكة اليمين وامامى بمسافة كدة عربية واقفة وجانبى على طول عربية نقل من شمالى
انا قلت انا لسة هاستنى وقمت شادة بالعربية علشان اطلع من النقل
مش عايزة اقولك ان ربنا سترها معايا علشان كنت لسة جديدة فى السواقة
اللى هو نظام غشيم ومتعافى

[pro_samir]

طيب لزومها إية الفضايح بس

[romeo_6887]

من نحيه الغباوه ... اطمن علي الاخر استغبيت كتير
مره باخد غرزه بالفيرنا و انا بتكلم في الموبايل قمت داخل بوش العربيه من الجنب اليمين في ضهر عربيه نص نقل بس الحمد لله عربيته متهمستش و الا كنت هتسوح و طبعا الجنب اليمين معدلوش ملامح

[CryptonX]

حاجتين .

كنت في العين السخنة ,, و كنا عايزين نخش بالعربية في حتة على الرمل شوية .. للاسف اعتمدت على المدام .. و خليتها تنزل تديني اتجاهات علشان مغزرش ..

كانت النتيجة ان بعد 5 دقائق بالظبط .. غرزت .. لدرجة ان الكاوتش الامامي مبقاش باين منه حاجة !

و استنين 4 ساعات عقبال وصول سيارة اخرى لصديق لي .. و ساعتين حفر و ردم و استخراج العربية .. و انتهى اليوم الاجازة الوحيد :).


و :


اول ماكنت بتعلم سواقة ... واحد طلع من Uturn قدامي بعربية شاهية و خمس في ال Uturn و حرق و طلع !

قلت انا مش اقل من الشاهين ... و رحت عامل زيه .. بس طبعا متوقعتش رد فعل السيارة و النتيجة اني لفيت نصف لفة و كنت حكمل في الرصيف .. علشان تاخر رد فعلي في رد الدركسيون .. و طلعت ,, و الناس ضحكت عليا .. و بطلت الف من ال U-turn ده من ساعتها :)

[ali.mahmoud]

انا بقى عملت زى احمد حلمى لما كانو داخلين على لجنة وهو راجع بضهره ويقول لجنة تااااااانى
انا بقى كنت واقف على الكورنيش بس كورنيش بنها قامت خناقة وكانو قريبين من العربية فقلت انا اوسعلهم ياخدو راحتهم رحت راجع وانا عمال ابص على الخناقة والعربية ماشية وانا مش حاسس انا كل تركيزى ع الخناقة لقيت واحد جاى يقولى من الشباك انت خبطتنى رحت نازل بس الحمد لله ما حصلش حاجة بس ما كنتش قادر من الضحك

[medo2o1o]

يوه كتييير ايام الشقاوة كنت باخد الغرزة و انا مغمض عينى و ادعى انها تيجى من كتر ما هى ديقة

مرة قفشت معايا اعدى قبل الاتوبيس و يارتها ماكنتش قفشت اعمل ايه بقة فى الدماغ الصعيدى

[M_Nabil]

في حاجات كثير غبيه الواحد عملها بس من أكثر الحاجات مرة زمان داخل بنزينة وكان فيه مياة على الأرض ورحت مخمس والعربية ماشية بالعرض المهم جيت عشان أقف لقيت العربية بتزحلق جامد ومافيش تحكم وخلاص داخله في طرمبات البنزين والحمد لله ربنا ستر وقفت قبلها بالظبط نزلت لقيت المياة اللى كانت على الأرض مليانه زيت وجاز

[Abdo_Eldesokey]

عندنا في الجراج الـ 128 جوا والتويوتا برا

فمرة بطلع التويوتا .. بدل ما أجيب الـ R جبت الـ D ، قمت داخل في الـ 128

طبعاً الـ 128 يا دوب صحت من النوم ، والتويوتا اكصدامها اتشرخ جامد

[aymenseef]

اول عربيه اوتوماتيك سوقتها كانت سيفيك من عشر سنين تقريبا
وكنت بجربها عشان واحد صاحبي كان بيشتريها وكنا اربعه فى العربيه
وعند كل ملف كنا انا واللى جنبي نلزق فى القزاز واللى قاعدين ورا يتخبطو فى الكراسي اللى قدام
اكتشفت بعد ما نزلت من العربيه اني كنت بدوس فرامل برجلي الشمال ههههههههههه

[Eng.Geo]

لسة من قريب كنت بجرب اقرص جامد علي العربية وكنت بنقل قبل ما تفصل علي طول وقعدت حوالي ساعة ونص ال rbm مبينزلش عن 4000 و جبت الخامس علي 160
لدرجة بعد الحكاية ده العربية بقت بتجيب بالدبرياج بس من 25 ل 40
العربية اوبترا
بس خلاص اتظبطت دلوقتي

[w-m-a]

كنت فى اشارة الجلاء بالدقى وواقف ولقيت التاكسى ورايا عمال يدى كلاكس ومش بس كدة ده بيزقنى بالعربيه رحت نازل ازعق لقيت الناس كلها بتقولى ايه يا بك ايه ياحاج
انت عمال تريح بضهرك على الراجل وهو يكلكس ولا انت هنا طبعا وشى جاب الوان وسكت ومش عارف ارجع العربية ولا اتأسف ولا اعمل ايه
مرة تانيه فى اول الهرم فى شارع بينفذ على خاتم المرسلين وفى تقاطع والناس الى فى التقاطع مصرين يخشوا برغم ان طريقهم واقف وقفلوا على بصراحة اتجننت لانى كنت متاخر على الشغل وبوصل المدام قمت متنرفز وقافل على الكل وشادد الهاند وساحب المفاتيح ونازل من العربية وبزعق ومتنرفز وانا ضغطى عالى المهم من النرفزة معرفتش اقول ولا كلمه صح من الزعيق والتهديد بعدم المشى
وطبعا الناس ضحكوا والمدام ضحكت
وواحد قالى ياحاج انت راجل طيب صلى على النبى وامشى وحقك على
انا طبعا انا ضحكت ومشيت

[mr_sameh]

طبعا الواحد اخطاءه كتير مره كنت بجري ورا عربيه باسات وكان راكبها راجل كبير وكان معايا العيله وحمايا وحماتي كنا خمسه المهم الراجل يشد بالباسات وانا عاوز اثبت للي معايا اني راكب احسن عربيه في العالم وصلنا 170 بعد شويه انا هديت لاني اتزنقت بين عربيات بتاع الباسات طبعا اختفي ومعنتش شايفه قولت هيروح مني فين هجيبه يعني هجيبه فوجئت وانا علي 160 اني طالع كوبري علوي ونزلت من الكوبري لقيت ملف جامد جدا طبعا انا شوفت الملف وروحي راحت العربيه صفرت ومالت جامد انا اعتقد انها يمكن مللي وكنا بالسلامه واللي كانو معايا نزلو صويت لكن الحمد لله ربنا ستر من يومها وانا معنتش بشد مع حد خالص الكلام ده كان طريق المنصوره القاهره

[KHALED AYMAN]

على طريق المحله طنطا ....
ماشى حوالى 175 او 180 ...
طبعا سرعه كبييييييره جدااااااااااااااا
لقيت ادامى عربيه مرور فى اليمين ..
و جمبه عربيه تانيه مش فاكر ايه ..
المهم قلت انا لو فرملت هفرمل جااااااامد اوى و ممكن متجبنيش ...
قلت اخد غرزه...
هوووووب
داخل الغرزه ...
اكتشفت انها متجبنيش اصلا ...ههههههههههههههههه
لانى كنت سرحان ابص اشوف عربيه المرور راكبها عسكرى بس ولا معاه ظابط ..!!
مش عايز اقولها الحركات الى عملتها بالعربيه فى نص الطريق ..
وااااااااااااقف على الفرامل ..
و عمال اجيب العربيه يمين و شمال على ما تهدى ...
و الحمد لله عدت على خير ...

مره تانيه معدى من ادام معرض عربيات فى طنطا ..
و الطريق ادامه واقف ...
صحبى بيقولى بصصصصصصصص العربيه دى ..
اديرت ابص ...
و سرحت
طاااااااااااااااااااااااااااااااخ
دخلت فى الى ادامى هههههههههههه


مش فاكر ايه تانى بس المواقف كتير !!ههههههههه

[eino666]

يا ما فى الجراب يا حاوى
هههههههههههههههههه
مش عارف احكى عن كل يوم بسوق فيه العربية
يييووووووووووو ما تعدش
هههههههههههههههههه
بلاش فضايح وخلينا مستورين
................................*
محمود عينو