ليه بياخدوا المفتاح

[esraa29]

ايه رأيكم يا جماعة في الموضة الي ماشيه اليومين دول كل ما اجي اركن في جراج يقولي سيبي المفتاح اكني اعرفه والمفروض بقي اني اثق فيه واديله المفتاح
طيب ما ممكن يقولي انا ما شفتكيش ولا انت ركنتي في الجراج من اصله وانا معنديش اي دليل وقتها
يا ريت لو حد مشترك في جراج بالطريقة دي يقولي هل دي حاجه عاديه والناس كلها بتعملها وانا بس الي بخاف ولا ايه بالظبط
خصوصا ان انا عرفت من اختي ان صاحبتها كانت بتركن في جراج والسايس عرف مواعيد شغلها وأخد عربيتها وعمل بيها حدثة خبط واحد ودخلت في مشكلة كبيرة ولولا ان اخوها وكيل نيابه ما كانتشي هاتعرف تخلص من المشكلة دي .....يا ريت اعرف رأيكم في الموضوع ده

[mrsailor]

ايه رأيكم يا جماعة في الموضة الي ماشيه اليومين دول كل ما اجي اركن في جراج يقولي سيبي المفتاح اكني اعرفه والمفروض بقي اني اثق فيه واديله المفتاح
طيب ما ممكن يقولي انا ما شفتكيش ولا انت ركنتي في الجراج من اصله وانا معنديش اي دليل وقتها
يا ريت لو حد مشترك في جراج بالطريقة دي يقولي هل دي حاجه عاديه والناس كلها بتعملها وانا بس الي بخاف ولا ايه بالظبط
خصوصا ان انا عرفت من اختي ان صاحبتها كانت بتركن في جراج والسايس عرف مواعيد شغلها وأخد عربيتها وعمل بيها حدثة خبط واحد ودخلت في مشكلة كبيرة ولولا ان اخوها وكيل نيابه ما كانتشي هاتعرف تخلص من المشكلة دي .....يا ريت اعرف رأيكم في الموضوع ده

على فكرة اكبر غلط انك تسيبى المفتاح لان اول حاجة عربيتك بتبقى ملطشة يعنى ممكن يحطها فى اى حتة و كل شوية يحركها علشان يطلع حد تانى و هكذا يعنى بيعملها لعبة و ممكن تتخبط .. تانى حاجة ممكن يعملها غرفة نوم و ينام فيها او يدخن فيها و لو نسى السيجارة لاى سبب ممكن تولع .. الاخطر من كده لو عرف مواعيدك او مثلا هو متاكد ان مفيش بنت حاتخرج باليل متاخر ممكن يقضى بيها مشاويره و يخبطها .. و فى كل الاحوال مش حاتلاقى حد يهتم اقصى حاجة حايرفدوا اللى عمل كده .. انا عن نفسى مش باسيب مفتاح العربية لاى حد ولا حتى فى المواقف العمومية .. و ممكن تشوفى جراج فيه اماكن فاضية و تشطرطى عليهم ان يكون ليكى باكية يعنى مكان جوة الجراج و تقفلى عربيتك اامن من انك تسيبى المفتاح لحد لان للاسف الضمير اتعدم فى بلدنا..

[خالد خليفة]

اقول لك انا هما الحجة اللى بيقولوها انه لازم يحرك العربية حسب وضع كل عربية تانية لان مواعيد الناس بتختلف واحد طالع وواحد بايت وواحد يومين مش طالع وهكذا فلازم يحرك اى عربية علشان ميعطلش غيرها وخصوصا لو كان جراج ضيق زى معظم الجراجات لكن وبعد تجربة مريرة مع الجراجات بقيت بركنها فى الشارع لانهم مرة اخدو البطارية وركبوها فى عربية تانية ولما رجعوها مركبوش القواطيش بتاعتها (الكابلات) صح لكن يادوب لمسوها وانا ماشى على الطريق السريع وسايق 130 فوجئت العربية قطعت كهربا خالص وربنا ستر ولما رجعت انكرو فاخدت عربيتى والجراج التانى ظبطت الولد خارج بيها ولما قلتله رايح فين قال ده نا شكيت فى حاجة فى صوت الموتور قلت اجربها قلت هو انت صاحبها او انت ميكانيككى ومشيت من عندهم والتالت كان مهمل ويدخن جواها وانا بكره الدخان واشم ريحته مهما كان بعيد او ضعيف ويشرب الشاى ويدلقه جواها وميمسحوش فقررت اركنها فى الشارع صحيح الشارع عندنا العربيات فيه كتير جدا وبنلاقى ركنة بالعافية لكنه ارحم من الجراج نصيحة لله اركنيها فى الشارع

[هيثم]

بيتهيالى الافضل فى الاحوال ديه انى اسيب العربيه
من غير ما ارفع فرامل اليد او ادى غيار

[yehia]

بسيطة قوي لو حد قال لحضرتك سيبي المفتاح ... قوليله اتفضل المفتاح أهو بس اديني بطاقتك الرقم القومي خليها معايا لحد ما أرجع ... قاللك لا - وطبعا حيقول لا - قوليله مفيش مفتاح .... أخره عندك انك " تتكرمي وتتفضلي " وتسيبيله العربية ممورة وحتى من غير ما تبقى مفتوحة ..... ده طبعا اذا كانت ركنتك صف تاني ... إنما لو صف أول يبقى يخبط دماغه في أطخن عامود ....

الناس دلوقتي بقت تسوق في الاستهبال ولازملهم وقفة ....

[الغزالى]

دة الالعن والاضل من كدة انهم كمان مش بيعرفواااا يسوقواااا اصلا يدوبك بيخبطواااا انا كنت مع واحد صاحب وفى وسط البلد ها نركن فى شارع جانبى والراجل قال لصاحبى طيب انزل انت وسيبنى انا اركنها طبعا قالة لا وبع كدة نزلنا نقعد على قهوة فى نفس الشارع اقسم بالله كان بيفرك بالعربية فرك ولا كأنها بتاعت الى جابوة دة غير كمان انة كان بيلحق نفسة على اخر لحظة قبل ما مش يخبطها قبل ما يفرهما مع العربية الى قدامها

[abo_lamar]

الأخت العزيزة اسراء
الموقفين اللي حقولهملك دلوقتي حصلوا والله العظيم قدام عيني :
1- في جنب بيتي جراج لقيت السايس طالع بعربية اوبترا زيرو لسه بشوكها وكانت مراته واقفاله على يمينه وهو طالع بيكلمها ومش واخد باله راح لاطش عربية 128 جايه عمودي عليه وماشية في الشارع الرئيسي.. طبا الاوبترا ربنا يعوض على صاحبها .

2-جراج تاني بغسل فيه عربيتي العيال اللي شغاله فيه عمرهم 12 سنه مره واحد فيهم كان بيطلع لانوس بره الجراج عشان عربية تانية تطلع راح خابط جنب العربية اللي قدام ناحية الرفرف في عمود خرسانة .
فنصيحة ماتسبيش مفتاح عربيتك لحد خااالص .

[romeo_6887]

ما اللي هياخد المفتاح ده هياخد بيها لفه او هيروح بيها مشوار او او او

[Karim_Monir]

مضوضوع غاية في الخطورة لانه لو عمل بيها جناية انتي اللي هاتتحاسبي وبدون زعل وقتها القانون لا يحمي المغفلين
مرة واحد فقط عملتها من سنتين كان عندي مشوار مهم جدا في اسكندرية في منطقة ميامي في شهر 7 وما ادراككم ما مياكي في شهر 7 مفيهاش خرم ابرة يتوقف فيها
لقيت مدخل عمارة بيصف العربيات قاللي 10 جنية في الساعة وتسيب المفتاح
قولتلة موافق وخد العشرة جنية مقدم
ركنت العربية وانا نازل قولتلة خد بالك منها عشان في التابلوة الطبنجة الميري :-)
رجعت لقيته موقفها اول واحدة برة وغاسلها وسايب ال 10 جنية مع امة واقفة حارس جنبها والمفتاح في ايدها :-)
ومش عايزين ياخدو الفلوس خالص
سيبتلها الفلوش حق الغسلة نضفوها بصراحة
هاهاهاها

[الغزالى]

مضوضوع غاية في الخطورة لانه لو عمل بيها جناية انتي اللي هاتتحاسبي وبدون زعل وقتها القانون لا يحمي المغفلين
مرة واحد فقط عملتها من سنتين كان عندي مشوار مهم جدا في اسكندرية في منطقة ميامي في شهر 7 وما ادراككم ما مياكي في شهر 7 مفيهاش خرم ابرة يتوقف فيها
لقيت مدخل عمارة بيصف العربيات قاللي 10 جنية في الساعة وتسيب المفتاح
قولتلة موافق وخد العشرة جنية مقدم
ركنت العربية وانا نازل قولتلة خد بالك منها عشان في التابلوة الطبنجة الميري :-)
رجعت لقيته موقفها اول واحدة برة وغاسلها وسايب ال 10 جنية مع امة واقفة حارس جنبها والمفتاح في ايدها :-)
ومش عايزين ياخدو الفلوس خالص
سيبتلها الفلوش حق الغسلة نضفوها بصراحة
هاهاهاها

طيب فين الطبنجة دلوقتى
:b4_444::b4_444::b4_444::b4_444:

[Eng_AmrAllam]

انا حصلت معايا لسة امبارح بس بجد انا اصلا كنا في موال تاني
وكنت كمان في المهندسين عند مستشفي الفاسكان وكان والدي بيعمل عملية
وكان لازم اطلعله ضروري
فملقتش مكان ومش عارف اركنها فين وقالي هتركن هتسيب المفتاح
وادتهوله بس بعد ساعتين تقريبا نزلت ولقيته راكنها في مكان كويس ولا عربية ادامها ولا وراها يعني مفيش لزمة ان المفتاح يبقي معاه
روحت وخدت منه المفتاح
بس طبعا لقيت العربية محكوكة من الجانبين
من الاكصدام ورا وطبعا مكلمتوش عشان انا الي غلطان اني سبتله المفتاح يعني الغلط من عندي وكمان عشان انا كنت في موال تاني خالص
بس طبعا لو حصلي الموقف دة تاني يستحيل اسيب لحد المفتاح تاني اصلا عشان انا من النوع اللي محبش حد يركب عربيتي اصلا

[ahmed4000]

فى الطبيعى مبسبش المفتاح
لكن اللى بيزل وسط البلد او مثلا المهندسين لو موت مش حتلاقى مكان لو قعدت تلف عشر ساعات ويطلعلك واحد يقولك حركنهالك بس سيبلى المفتاح ولو قلت لا مش حيرضى وحضرب دماغى فى الحيط خاصة ان عربتى مبتتمورش

[تامر.محمد]

جنب شغلي فيه سايس بيسيبوا له المفتاح برده
بيعامل العربيات اسوأ معاملة

[kemoelord]

الحمد لله ان فيه ناس رايهم من راي وان مش ينفع اسيب المفتاح لحد او اخلي حد يركب عربيتي لان الموقف ده كان بيحصلي لما كنت في الجامعه " القاهره " وكنت بدوخ بجد والله لدرجه ان فيه مره روحت البيت تاني بعد لف ساعه كامله على مكان ومش لاقي بالرغم ان كان فيه اكتر من جراج قدامي بس كان بيشترطوا اني اسيبلهم المفتاح معاهم علشان يقدروا يتحكموا في طلوع العربيات ولما كان بيبقى معايا اصحابي يقولولي وايه المشكله لما تسيب المفتاح اقولهم لا وكاني بشتمهم فالحمد لله اني لاقيت ناس متفقه معايا في المبدا ده وفعلا السايس بيعامل العربيات اسوا معامله والله اعلم اذا كانوا بيعرفوا يسوقوا ولا لا ويا سلام بقى لو العربيه اتوماتيك ويقعد يرزع في الفتيس

[eino666]

انا واحد من الناس لا بخلى السايس يركن لى ولا اسيب له مفتاح عربيتى ابدا من المهازل اللى الواحد بيشوفها واللى بيسمع عنها
........................
محمود عينو