أبقى قابلنى لما المستورد و الوكيل ياكلنى !!!

[AMA]

بسم الله الرحمن الرحيم
السلام عليكم ورحمة الله وبركاتة


الموضوع باين من عنوانه
أبقى قابلنى بس لما المستورد والوكيل ياكلنى !!!
الكل مستغرب ليه العنوان كدة أشرحلكم الموضوع ببساطة
فى أهرام الجمعة فى يوم 4 يناير عام 2008 أتكتب موضوع عجيب شوية كدة عن ألغاء الجمارك عن السيارات الزيرو الداخله لمصر عام 2019 طيب ماشى (حلااااااال) بس أبقى قابلنى جمب البنزينه إلى جمب قصر الرئاسة لو الجمارك أتلغت بالسهولة دى أكيد الشحن بدل مايكون ساعتها بـ500 دولار إلى 1000 دولار هيبقى بـ10 ألاف دولار أهوه أى مكسب و خلاص و سرقة و خلاص دا غير الضرايب طبعا إلى سعرها هيضرب فى السحاب والدنيا هتمطر (بيبى) من فضلات المسؤلين فى مصر لأنهم بيحطوا فكروشهم فلازم الفضلات فى الأخر تنزل على راس الشعب
المهم نعمل نفسنا غلابه ونصدق الكلام دة فعلا ونقول أن هيبقى فيه ضمير
(رغم أن الضمير أتلغى من زمان والكلمة دى بقيت عباره عن مسمى لشئ الإنسان عمتا بيفتقده وميعرفش هوا بيكون أزاى)
يعنى العربيه هيتدفع سعرها أخيرا + مكسب المستورد و الوكيل
أة من هنا جت النقطة السودا و إلى تودى فى داهيه أصل لما تكون الماروتى بـ24 ألف بعد الجمارك والضرايب و الوكيل يشتريها بـ24 ألف ويبيعها بـ35 ألف يبقى فين الـ11 ألف ؟ ودا مثال على أرخص عربيه فى مصر أمال بقى الكيا سيراتو إلى بعد الجمارك والضرايب قبل كدة واحد فى المنتدى قال إنها بتكون بـ74 ألف جنيه وبتتباع بـ109 ألاف صباح المكاسب العسل و طبعا كل عربيه ليها مكسب مخصوص يعنى الماروتى دى بيكسبوا فيها الـ11ألف عشان دى أرخص عربيه فمصر ومينفعش تغلى عن كدة لكن الوكيل بيقدر يسرق فى حاجات كتير تانيه
طيب دا شرح الموضوع

خلاصة الموضوع بقى
نعتبر نفسنا لو لينا عمر و نصيب فى الدنيا و أحنا فى يوم 1يناير عام 2019
على سبيل المثال الماروتى هتكون بـ5 ألاف جنيه + 0 جنيه جمارك + ألف جنيه ضرايب دخول + مكسب الوكيل الغامض
هتلاقى العربيه فى الأخر بدل ماتتباع بمكسب طبيعى من الوكيل هتلاقيها مثلا بتتباع بـ 15 ألف جنيه والوكيل حاطيت 9 ألاف فى جيبه أصلها بالبركه كده

السؤال هنا بيطرح نفسه
فين المسؤلين عن التوكيلات والمعارض و المستوردين !!!؟
هل الأسعار دى أدميه !!!؟
أحنا مثلا ليه كلنا كدة منقدمش مثلا شكوى للشركة الأم بتاعة شيرى أو فيات أو هيونداى نقولهم على الأسعار دى مش يمكن تجبر الوكيل بالتخفيض لأن دة يعتبر سوء أستخدام لأسم الشركة


يا رب تكونوا فهمتوا الموضوع يا جماعة و أى أستفسار أنا جاهز
وصباح الفل عليكم و إن شاء الله فى 2019 قابلونى جمب البنزينه إلى جمب قصر الريس ساعتها هكون عامل قهوة جمبها و نكون أحنا عواجيز نقعد نشرب معسل قص أو سالوم و نقول أن زمان فى 2010 كان فيه خير عن كدة (لأن الحال هيبقى أسوء) طول ما المنظومة هيا هيا بنفس الأشخاص بتوع الفضلات

[amrelsaqqa]

ياباشا سنة 2019 هتتلغى الجمارك عن الاوروبى فقط مش اليابانى ولا الكورى ولا الامريكى
طبعا هتقوللى اشطة ده الاوروبى ده اهم حاجة
المرسيدس والبي ام والفيات و الفولكس والبيجو والرينو والسكودا والاوبل و .......
وكمان البورش والفيرارى والرولز رويس والبوجاتى و المايباخ بقى بالمرة ..


بس الموضوع بكل بساطة ان الجمارك هتتلغى وتتحط تحت مسمى تانى اللى هو ضريبة المبيعات ده غير ضريبة العربية نفسها ورسم التنمية و رسم ورسم ... و رسم استعمال راديو !!! زي ما مكتوب في ورق الرخصة


وطبعا لعبة اسقاط الجمارك دي عشان اتفاقيات مع اوروبا بحيث لما ماحدش بيقدر يقول له حاجة لأن الفلوس تحت مسمى ضرايب وده شأن داخلى ملوش دعوة بالاتفاقيات
وصباح الفل والدنيا عال العال ويحيا القانون وتحيا مصر يا عم الحاج

المهم الحل عشان ما تتعبش نفسك ياباشا شيل من دماغك موضوع الجمارك والعربيات ده الى ان يقضى الله امرا كان مفعولا

[Usama Nagi]

الجمارك هتتلغي 2019 علي كل السيارات علشان دي اتفاقية الجات
جمارك الأوربي هتقل لغاية 2019 و دا استثناء لجمارك الأوربي بسبب الشراكة المصرية الأوربية فبيطبق تخفيض الجمارك تدريجي

[amrelsaqqa]

هم مش كانوا قالوا في التسعينات ان اتفاقية الجات دى هتطبق سنة 2005 ؟؟؟!!!

[dode2002]

جنب البنزينه بالضبط طيب نسيت تقولي الساعه كام

[AMA]

ياباشا سنة 2019 هتتلغى الجمارك عن الاوروبى فقط مش اليابانى ولا الكورى ولا الامريكى
طبعا هتقوللى اشطة ده الاوروبى ده اهم حاجة
المرسيدس والبي ام والفيات و الفولكس والبيجو والرينو والسكودا والاوبل و .......
وكمان البورش والفيرارى والرولز رويس والبوجاتى و المايباخ بقى بالمرة ..


بس الموضوع بكل بساطة ان الجمارك هتتلغى وتتحط تحت مسمى تانى اللى هو ضريبة المبيعات ده غير ضريبة العربية نفسها ورسم التنمية و رسم ورسم ... و رسم استعمال راديو !!! زي ما مكتوب في ورق الرخصة


وطبعا لعبة اسقاط الجمارك دي عشان اتفاقيات مع اوروبا بحيث لما ماحدش بيقدر يقول له حاجة لأن الفلوس تحت مسمى ضرايب وده شأن داخلى ملوش دعوة بالاتفاقيات
وصباح الفل والدنيا عال العال ويحيا القانون وتحيا مصر يا عم الحاج

المهم الحل عشان ما تتعبش نفسك ياباشا شيل من دماغك موضوع الجمارك والعربيات ده الى ان يقضى الله امرا كان مفعولا

مانا للأسف عارف أنها على الأوروبى بس نسيت أقول فى الموضوع
يعنى السيارة الأوروبى سعرها فى حدود 200 ألف مثلا بعد خصم الجمارك و أضافة الضرايب سعرها هيكون 170 ألف يعنى كأنه عرض أو خصومات لموسم التصفيه دا السعودية لما بتعمل خصم على عربيه بتنزلها بالأربعين ألف والله يـــــــــا حلاوة الحلاوة السايبه

الجمارك هتتلغي 2019 علي كل السيارات علشان دي اتفاقية الجات
جمارك الأوربي هتقل لغاية 2019 و دا استثناء لجمارك الأوربي بسبب الشراكة المصرية الأوربية فبيطبق تخفيض الجمارك تدريجي

طيب ليه مش هيحصل فى الأسيوى مثلا عندك الصين عندك كوريا ليه بقى ؟
ولا هوا خلاص مكتوب علينا أرخص عربيه فى مصر الماروتى أمو 35 ألف جنيه
أنا أة بحب الماروتى و بحترمها و بحترم كل ممتلكينها لكن أنا واحد الناس مش مقتنع بسعرها دى 800 سى سى والله أنا مادفع فيها أكتر من 15 ألف جنيه رغم حبى ليها بس أحنا فمصر للأسف المفروض الجمارك تتحسب بعد الألف سى سى لكن دى محسوب عليها جمارك وضرايب و مكسب وكيل ومكسب مستورد و نقل
نفسى أعرف الماروتى مثلا فى بلدها بكام أو الشيرى كيو كيو أو غيرها و غيرها
و على فكرة الصينى لو أترفع عليه الجمارك بس بزمه و ضمير والكلاء أحترموا نفسهم هتلاقوا الشوارع كلها صينى مع عدم تحيزى للصينى برضة

[AMA]

هم مش كانوا قالوا في التسعينات ان اتفاقية الجات دى هتطبق سنة 2005 ؟؟؟!!!

ياااااااااااااااة
كنت تقولى كنت أقابلك ساعتها على القهوة بس ساعتها كنا هنشرب تفاحه مش معسل

جنب البنزينه بالضبط طيب نسيت تقولي الساعه كام

مش هيفرق الوقت لأنى هبقى قاعد فيها 24 ساعة ماهو دة حال الشعب كله
شباب قبل الوظيفة على القهوة
بعد الشغل إلى بيكون مالوش علاقة بالمؤهل برضة على القهوة
بعد المعاش أوبعد مايكبر برضة على القهوة
فمتقلقش هتلاقينى لازق فى الكرسى

[romeo_6887]

و الله ال........* دي بتشتغلنا

[mmffor]

لولا ان الكلام في السياسه ممنوعه في المنتدى و ده مخلي الواحد حتى مش عارف يفضفض. بس الرساله واصله و مسموعه! و ربنا يتوولانا برحمته و يخلصهم ممنا و من قرفنا! احنا طول عمرنا شعب بتاع رفاهية و عز اثبتها و قالك ازمة البوتاجاز بسبب ان الناس غنيه و بتاكل كتير

[د.محمود صلاح]

توقع انخفاض الجمارك يعقبها ارتفاع حاجة تاني

[AMA]

و الله ال........* دي بتشتغلنا

فعــــــــــلا أنا عارف قصدك لأن أول حرف منها نفس أول حرف من كلمة (حمار) و الحمار دة إلى مسؤل عن المنظومة إلى أنت بتقول عليها بتشتغلنا

لولا ان الكلام في السياسه ممنوعه في المنتدى و ده مخلي الواحد حتى مش عارف يفضفض. بس الرساله واصله و مسموعه! و ربنا يتوولانا برحمته و يخلصهم ممنا و من قرفنا! احنا طول عمرنا شعب بتاع رفاهية و عز اثبتها و قالك ازمة البوتاجاز بسبب ان الناس غنيه و بتاكل كتير

فعلا و إلى باين كدة فى السيارات أن الكماليات سعر و العربيه الفاضية سعر سبحان الله مفيش دولة فى الدنيا فيه حاجة أسمها كماليات عندها لأن دى أساسيات يعنى التكييف و الجنوط و هكذا دى حاجات عاديه فى أى عربية برة
منهم لله والله فعلا و حسبى الله و نعم الوكيل

توقع انخفاض الجمارك يعقبها ارتفاع حاجة تاني

دا الطبيعى يا دكتور محمود عندك البنزين هيغلى تخفيض الجمارك دة هيكون فايدة للوكيل و المستورد على فكرة لأن الشعب أتعود أن أرخص عربيه الماروتى بـ35 ألف جنيه و كأن الجمارك عملت كدة وبتقول للمستوردين و الوكلاء خدوا دى هديه مننا ليكم ضد الشعب بالنسبه مكسب المستورد هيتضاعف و كأن حرام المواطن يشترى حاجة بسعر معقول أو المستورد يكسب مكسب معقول دا غير نقل السيارة هيتعمل له تسعيره خاصه و دا غير مكسب الوكيل و المعارض إلى هيكون مضروب فى 3 أضعاف و دا غير الضرايب إلى هتكون كالعادة عاليه و طبعا الشعب مالوش حق يعرف أية الضريبه دى للأسف حاجة تكسف لما نفكر فى المنظومة المتحكمه فى الجمارك والضرايب و المكاسب إلى بتروح لأشخاص معدودة و معروفة و الشعب كله بيدفع بس مش بياخد