عايز رايكم

[fahmy1000]

السلام عليكم
انا اول مره اشارك وشفت سياره صيني جديدة اسمها ليونسيل 2 الصراحة هي عجبتني جدا وفعلا اجزاء كتير جدا منها ياباني لدرجه ان الزجاج والدركسيون عليهم علامة لانسر ده غير الموتور والعفشة كمان وسعرها مناسب جدا 74000 جنيه وكل الكماليات مانيوال و1600 سي سي 100 حصان وتيبيكال لانسر 2004
افتوني ايه رايكم وتعرفوا ايه عنها ؟ وخصوصا انها افضل من الاسبرانزا اكيد والغريب انها ملهاش وجود في الشارع المصري مع ان في منها موديل 1 وبرضه تيبيكال لانسر 98 بس اعتقد ان الموتور فقط ياباني

[Karim_Monir]

مغامرة لازم تتحسب كويس
ولو انا مكانك عمري ما هافكر فيها
ولو عايز لانسر 2004 هاتجيبها 1300 2004 في نفس الحدود دي واسمها ياباني معروفة

[mada121977]

مغامرة لازم تتحسب كويس
ولو انا مكانك عمري ما هافكر فيها
ولو عايز لانسر 2004 هاتجيبها 1300 2004 في نفس الحدود دي واسمها ياباني معروفة

أؤيد طبعا رأى اخى العزيز كريم .. الايونسيل توكيلها هوا الرواس اللى هوا صاحب توكيل متسوبيشى والصيانه بتاعتها بتتعمل فى مراكز الخدمه بتاعته وشركه لايونسيل الصينيه اشترت اسطنبات موديل لانسر كرستاله من شركه متسوبيشى وبتنتجها باسمها ... بس المشكله انك هاتشترى عربيه صينى شكل لانسر القديم بسعر مبالغ فييه جداا ومش هتلاقى حد يشتريها منك بسعر مناسب لما تيجى تبيع وهاتخسر فيها جامد فأحسن حل تدور على واحده لانسر بومه مستعمله استعمال نضيف بنفس السعر

[Ahmed Samy]

العربية دي مش وحشة قد كده
بس ليس لها علاقة بالانسر (شبهها و موتورها و فتيسها) بس التقفيل سيء و التكييف مشاكله كتير و التعليق ضعيف
في واحد صاحبي جابها و كل شويه يعمل فيها حاجه و أنا راكب لانسر 2002 و ما بلمسهااااش الا زيت و بنزين و ساعات مية (الله أكبر ربنا يستر) :)
فنصيحة بلاش : هات لانسر

[fahmy1000]

دي يا سيدي الفاضل موجوده في الرواس وهو وكيلها برضه ومراكز الصيانة عنده وفي منها ليونسيل 1 ب60000 جنيه واشكركم علي الردود والاهتمام

[amr mokhtar]

وخصوصا انها افضل من الاسبرانزا اكيد

ليه أحسن من الإسبرنزا ؟؟ على الأقل عربية منتشرة و قريب هتلاقى قطع غيارها كتير فى المحلات
و بعدين على الأقل معروف إيه هى مشاكلها بمعنى ان مشاكلها هى التقفيل المصرى فقط إنما الليوسنل انت متعرفش ممكن يطلعلك فيها إيه

اللى انا أقصده ان لو الليونسل هتتقارن بالإسبرنزا فأنا شايف ان الأسبرنزا تكسب
إنما بشكل عام بمبلغ 75000 ممكن تجيب أفيو او جيتز مثلآ

[ahmedezzat78]

فيه ناس كتير بتشتكى من اسبرانزا

بومه نضيفه بنفس السعر احسن طبعا و اعاده البيع سهله جدا

دايما فى العربيات اللى تعرفو احسن من اللى ما تعرفوش