السواقه و الموبيل. انت بتحس بايه؟

[night_phoenix]

بقالي فترة كل ما اشوف واحد هيعمل بلوة وهوة سايق الاقيه بيتكلم وماسك الموبيل بايده الي بيتكلم و ماسك نص الشارع براحته لا تعرف تعدي كده و لا كده والي اخد شماله و يولع الشارع و راه والي مع كل انفعاله يميل بالسيارة و طول الوقت كده
(والله مرة وحده كانت بتحط مكياج في عنيها و انا سايق وراها علي الكورنيش وهيا فرشه كده و فرشه كده في المرايه و الله ما بهزر واحنا علي 80 تقريبا ومع كل فرشه الدركسيون معاها مرة يمين و مرة شمال هيا بعيده عن الموبيل بس افتكرتها وقلت اقولها)!!
انا شخصيا بيقي نفسي انزل اضربه علي وشه بالقلم بس طبعا مش هقدر اعمل كده
انت نفسك تعمل ايه؟
.

[NoRmAl]

فعلا بيبقى شىء مستفز
مجرد التفكير أن واحد أو واحده ممكن تبقى سبب فى أى أذى من أى نوع
علشان يتكلم فى الموبايل أو تحط مكياج!!
يعنى حتى لو لاقدر الله عملت حاجه وماتت
تقابل ربنا تقله أيه؟
كنت بتمكيج
أنا وأنا رايح الكليه شوفت واحده على كوبرى أكتوبر بتسوق بكيعنها علشان بتبرد دوافرها
دى عدم مسؤليه
ولازم الواحد يفكر أنه مش بس مسؤل عن نفسه وهو سايق
دا مسؤل عن كل مستخدمى الطريق وهى ثانيه وممكن تقابل وجه كريم ياريت نفكر هنقله متنا علشان أيه
وشكرا على الموضوع

[A.Saad]

بسمعه احلى رنة
الكلاكس
علشان يفوق شوية

[night_phoenix]

بسمعه احلى رنة
الكلاكس
علشان يفوق شوية

نفسي اتعلمها بجد
بس انا مش متمكن منها

[gazzar91]

فعلاً هستخدم نفس الوصف بتاعي للنوعيات دي....
دواب ورا الطارة!!!
اللي عاوز يتكلم في الموبيل ولا يغير شريط الكاسيت يدي إنتظاره و يقف في اليمين و يعمل اللي هو عاوزه!!!
في رعاية الله..

[A.Saad]

نفسي اتعلمها بجد
بس انا مش متمكن منها

انا مش بشتم
انا بلزق ايدى فى الكلاكس
على العموم الموضوع ده فى اخر صفحة فيه فيديو للغة الكلاكسات

http://www.nilemotors.net/Nile/67141-a.html

هات كلاكس فى البيت اتعلم عليه

[m_mekkawy]

انا بستخدم سماعة البلوتوث ومش مركز قوى امال لو مسكته فى ايدى
انا اعتقد ع الهاى واى مفيش مشكله اللى بيلخبط وانت فى الزحمه

[Mshawky]

عالم مستهتره لما تبقا ارواح الناس بالنسبالهم ولا حاجه علشان يتكلمو فى الموبايل

ربنا يحفظنا من شرور الطرق

[Amr A.salam]

يا جدعان أنا شفت واحد بيلف سجاير وهو سايق !!!!!!!!

لزقت فيه وعملت له زفة ما اتعملتلوش يوم جوازه

[fadyspot]

ليه يا رجالة كده بس الطيب أحسن :)
الصراحة انا على طول بتكلم في الموبيل بس باخد بالي اوي من اللي ورايا و مش بعطل السكة ، أينعم انا نفسي اجيب سماعة بلوتوث عشان انا تعبت من ال50 جنيه اللي بدفعهم غرامة كل شوية بس يقال ، الله أعلم ، انها بتعمل صداع خصوصا على الفترات الطويلة :(
يا ريت لو حد عنده تجربه مع السماعات دي او يعرف نوع كويس يقوللي عليه يبقى كسب فيا ثواب كبير و رحم جيبي من ال50 المتبعزقة على المرور كل شوية دي .
و اوعدكم انشاء الله انني مش هكون سبب في عطلة المرور بسبب الموبيل :)
تقبلوا مروري.

[M.Osman]

انا بستخدم سماعة ...

المشكلة لما اكون عايز اطلب رقم ... و الvoice dialing دا افشل اختراع عمله البتي آدم
غير كدا الرد بيكون سهل... بس برضه الكلام في الموبيل بيقلل التركيز حتى لو بالسماعة ...

[د.محمود صلاح]

واللي بيقرأ جرنال وهو سايق تقولوا فيه ايه ؟

[بحري]

واللي بيقرأ جرنال وهو سايق تقولوا فيه ايه ؟

والله شفتها أكثر من مرة..وفي إسكندرية كمان مش في القاهرة فقط..يعني لما شوفتها في القاهرة قلت يمكن عشان الإشارات والزحمه..لكن في اسكندرية؟؟!!!!!..واللي يغيظ إن تلاقيه ماسك الأهرام مثلا

[Imhotep]

فعلا كل ما تلاقى واحد اما ماشى مش مركز او موقف طريق حارة واحدة ببرود يحسد عليه تلاقيه بيتكلم فى الموبايل قال يعنى خلاص المكالمة متستناش لما يغور فى داهية من طريق الناس اللى دمها محروق..... ناس معتدهاش دم

[بحري]

عموما الناس بتتكلم كتير في التليفون في كل الأوقات وبالتالي ده هينسحب على فترة السواقة..لكن في بعد نفسي في الموضوع وهو إن بعض من يتحدث في الهاتف أثناء القيادة يشعر بنوع من اللذة (العوجان) وده بيكون ملحوظ جدا وخاصة لو حاولت تنبهه تلاقيه بصلك بطريقة مليئة بالغرور والتعالي نظام (إيه الناس اللي مش مشغولة زيي دي)
كنت باعلم واحد صاحبي السواقة وتاني مرة يركب عربية تليفونه رن راح ماسك الدريكسيون بإيده الشمال وساند كوعه على الشباك ومدخل إيده اليمين بيطلع التليفون من الجيب الداخلي للجاكت بحركة كده مفعمة بالـ (سينس)....خلاني زعقت فيه واديته اللي فيه النصيب..غالبا الروح دي انتقلت له من ملاحظته لطريقة الناس في التعامل مع الموقف ده