عضو جديد وعندي سؤال

[Walidghali]

السلام عليكم يا أهل الخبرة
أنا عضور جديد في المنتدى الشديد ومبسوط جدا من الخبرات الممتازة اللي عند الجروب وبصراحة انا عرفت معلومات كتير جدا في اسبوع واحد هو عمر اشتراكي في المنتدى
وبسأل بما انكم أهل الخبرة عاوز اشتري عربية لانوس زيرو وعاوزكم تقولوا لي ايه رايكم وايه السعر المناسب دلوقتي للعربية علما باني عاوزها لانوس اس فول اوبشن
شكرا لكم جميعا

[hazem_khidr]

اهلا و سهلا معانا يا استاذ وليد:
بالنسبه للانوس ف انا رايي تحاول تزود و تجيب افيو احسن لان اللانوس خلاص بقت قديمه و موديلها حينتهي السنادي و مش معقول تجيب عربيه زيرو انهارده بقلها 10 سنين بتنتج مش حتلاقي اي تميز خالص

[Walidghali]

شكرا على سرعة الرد

شكرا جزيلا أستاذ حازم على سرعة الرد انت عندك حق انا كنت تقريبا خلصت اجراءات شراء الافيو بس للاسف سعرها قفز قفزة جامدة جدا (77 الف) بدون مبرر في رايي واللي انا شفته بعيني ان موتور الافيو 1500 هو هو موتور الدايو اذا يبقى الفرق ده انا بدفعه في الشكل الجميل للأفيو
أرجوك لو تخالفني في الرأى توضح لي زيادة لاني انا معنديش خبرة كبيرة مجرد بتعلم منكم والله
وشكرا مليون مرة لردك السريع

[MMamdouh]

77 الف؟؟ كتيييييير اوى

لو كانت 70 كانت بقت قريبة و طبعا الافيو احدث بس كدة الفرق كبير اوى

MMamdouh

[major_memo]

محدش يقدر يقول حاجة عن الافيو الصراحة بس بالنسبة لمقارنتا بالسعر للدايو لانوس يبقي الدايو تكسب طبعا لانها هيا هياها الافيو بالظبط
والانوس الي بتنتج بقالها عشر سنين هيا هياها الافيو دلوقتي مع اختلاف الشكل للافيو طبعا احدث بس الانوس شكلها جميل وعصري بردوا وكفاية انها مالية شوارع مصر يعني بتجيب عربية منتشرة هتريحك في قطع الغيار وفي سهولة صيانتها
وربنا يوفقك إن شاء الله

[Walidghali]

يعني اتوكل على الله

يعني اتوكل على الله رب العالمين واجيب دايو
ودعواتكم جميعا معايا
شكرا جزيلا

[Nile_Storm]

متمسك العصايه من النص و تجيب فيرنا 1600 زيرو ممتازم ممتازم ممتازه
و شكلها احدث و موتورها تحدث بكتير من دايو لانوس

[Walidghali]

انا لسة محتار بردو

يا جماعة الخير
كدة العملية وسعت معايا واحترت اخر
لانوس ولا أفيو
فيرنا ولا فيفا
أسعارهم مختلفة بس مش بعيد عن بعض باستثناء الافيو هى اغلاهم
رايكم يهمني جدا جدا
السلام عليكم

[marsguy]

السلام عليكم ورحمة الله وبركاته،،،

أنا هاقولك نصيحه يا أخي العزيز.

إنت هاتسمع كلام كتير أوي في موضوع الفيرنا أفضل ولا اللانوس.

وفي النهايه تقريبا هاتلاقي إن عدد الناس المؤيدين للانوس مساوي لعدد الناس المؤيدين للفيرنا يعني هاترجع لنقطة الصفر.

أنا شايف إنك تجيب العربيه اللي إنت مايلها أكتر والمناسبه لظروفك الماديه واللي قطع غيارها أوفر وأرخص.

وفي النهايه هو الفرق ما بين الإتنين مش كبير خالص.

أنا شخصيا أميل للانوس وده ميل مش مبني على حقائق ولا حاجه بس أنا باحبها أكتر وكمان عشان الأهوال اللي الإخوه هنا بيحكوا عليها في توكيل غبور.

ربنا يوفقك للي فيه الخير ليك إن شاء الله

[sab3aawy]

تصدق ان فعلا الموضوع محير جدا

الأفيو شكلها حلو بس هى هى اللانوس القديمة وبالتالى غالية بدون داعى، الى جانب ان توكيلها بيعامل زبونه على انه راكب شيفورليه وليس دايو

اللانوس منتشرة ومضمونة وقطع غيارها رخيصة ومفرقتش عن الأفيو غير الشكل، لكن شكلها قديم ومكوناتها حاليا بييجى معظمها من رومانيا ودة بيخلى بعض مشاكل بسيطة بتظهر فيها زى تسريب زيت من جوان غطاء التاكيهات ، الى جانب بعض مشاكل التقفيل البسيطة زى عدم احكام الأبواب بالنسبة لتسرب الهواء

الفيرنا شكلها احدث وانتاج شركة من اسرع الشركات نموا فى العالم وقيادتها امتع شوية من قيادة اللانوس علشان ميزة التسارع ، لكن سمعة محركات الفيرنا المجمعة محليا مش عظيمة بسبب المشاكل التى ظهرت فى عدد ضخم من محركات الفيرنا اللى احتاجت لعمرات

الفيفا حل مميز للبعد عن تجميع غبور بس شكلها قديم ومش حلو

والله العظيم انا نفسى احترت،

قلبى ميال للفيرنا وعينى رايحة للأفيو لكنى عقلى فى ظل الظروف الحالية بيقول اللانوس، لأنها اقل مخاطرة بأفضل سعر

بيقى لو عايز تحكم العقل هات اللانوس

[Walidghali]

يبقى نسمع صوت العقل ونتوكل على الله

انا صحيح جديد في المنتدى لكن متابع للاعضاء ومشاركاتهم من زمان. وأخيرا تحدث أ. سبعاوي وأنا معجب جدا بمشاركاته وتحليلاته المختلفة شكرا جزيلا للنصيحة وأظنها صائبة وأشكركم جميعا على نصائحكم الغالية.
دعواتكم....
السلام عليكم

[analyzer]

الترتيب من وجهة نظرى الشخصية والمبنية على التجارب
فيرنا 1600
لانوس
ولو كانت الافيو فى نفس رنج السعر كنت هقولك هتها هى بس فرق كبير بعد ما بفت 77 الف

[analyzer]

اقولك على حاجه مهمة جدا نسيت اقولها

صلى صلاة استخارة

وان شاء الله ربنا هيهديك للاصلح ليك

تمنياتى بالتوفيق

[Ahmed Anwer]

طيب هاقولك حل وسط ،،

جيتز أو سيريون ،،

هما اغلي شوية مش كتير ،

بس تقفيل بلادهم

مع التضحية بشنطة و إعادة بيع و انتشار مش في صالحهم

و الفيرنا في رأيي أفضل من اللانوس

[Walidghali]

فكرت في سيريون

المشكلة اني عاوز حاجة مش اقل من 1500 cc علشان ماتتعبنيش في السفريات وسيريون ممتازة جدا جدا بس اللي شفتها كانت 1300 cc حد يعرف اذا كان متاح منها 1500 ولا لأ