هو فيه أيه ؟؟؟

[Samir Elshahawy]

النهاردة و أنا راجع البيت و عند وصلة الكيلو 4,5 و أذا بالطريق واقف كالعادة (لحد كده عادي و مافيش مشكلة)

الجديد بقي ....

كان علي يميني عربية أسعاف و شكله مستعجل و شمالي صف عربيات و بدأ الطريق يضييق و يادوب يأخد عربيتين

طبعا أديت أشارة شمال علشان أدخل في الشمال ووسع للأسعاف لكن فجأة عربية شيروكي بتقودها واحدة ست ظهرت من شمالي و راحت داخلة بأقصي سرعة و كادت أنها تأخد الرفرف الشمال بتاعي في طريقها

و علشان هيا واحدة ست و راكبة شيروكي أضطريت أوسع لها و بدأت أحاول أدخل وراها لكن العربية اللي جاية وراها (ماتريكس) كبست عليا و بدأ الطريق يقفل و كان خلاص فاضله سنتيمترات و يقعد جنبي و مصمم يعدي حتي لو هايخبطني

المهم ببص في المراية اليمين لاقيت الاسعاف وقف تماما رغم أني مديله أشارة شمال و بدأت أوسع له علشان يدخل هو من يميني ألا أنه أختار ينتظر علشان حس أني أتزنقت علشان أوسع له بينما الناس التانية ماعندهاش من الاحمر

و فعلا دخلت يمين وورايا الاسعاف

المهم مواقف من دي أتكررت تاني علي الدائري و باقي الطريق ناس تغير الحارة فجأة بدون مبرر و ناس تعدي من اليمين و المرايات تكاد تلامس بعضها و اللي يقف قدامك فجأة بصراحة حسيت أني بألعب في midtown أو crazy taxi

نفسي أعرف هو فيه أيه

[M.Zaher]

اقولك فيه ايه يا بشمهندس

مش عارف اقول ايه !!!
البلد دي عمر ما حالها يتصلح

هوه فيه ايه ؟؟؟

[A.Saad]

فيه ناس تيت بنت تيت
راكبين عربيات معندهمش دم
يارب الاسعاف تشيلهم بكرة ونرتاح

[AirForces]

دى crazy taxi و need for speed و gta
ثقافة شعب المفروض يعملوا محو أمية القيادة وتعليم الأخلاق والذوق فى كورسات

[د.محمود صلاح]

مافيش أي بادرة امل ولو بسيط لتحسن الحالة العامة للمرور المصري

[Samir Elshahawy]

مافيش أي بادرة امل ولو بسيط لتحسن الحالة العامة للمرور المصري

ممكن الوضع العام يتحسن في مصر و لكن بشرط أستخدام قنبلة ذرية من العيار الثقيل علي نمط الأعلان القديم أنسف حمامك القديم

[Miss_Pharma]

يعني محدش فيهم ممكن يتخيل انه لا قدر الله يكون هو اللي في عربية الاسعاف دي !!!
المفروض ان الاسعاف دي يكون ليها احترامها مهما كان ..
مش عارفة اقول ايه والله ..
ربنا يهديهم ..

[mrwho1982]

في ............ حرف جر

بص اعمل زي وارمي بوز العربية واللي عايز يخبطها يخبطها بس ماحدش يزعل من اللي هايحصلو

وكمان انت مش مدي اشارة خلاص انت كده عملت اللي عليك ولا ناقص بقي انك تروح تسوقلو

فعلا عالم تيت وبالنسبة للست اللي راكبة جيب وانت وراها افضل اديها في كلاكسات مش هي فرود وعايز تعدي ماتمشي الطريق بقي يافرود

ابو عبد الله

[Samir Elshahawy]

في ............ حرف جر

بص اعمل زي وارمي بوز العربية واللي عايز يخبطها يخبطها بس ماحدش يزعل من اللي هايحصلو

وكمان انت مش مدي اشارة خلاص انت كده عملت اللي عليك ولا ناقص بقي انك تروح تسوقلو

فعلا عالم تيت وبالنسبة للست اللي راكبة جيب وانت وراها افضل اديها في كلاكسات مش هي فرود وعايز تعدي ماتمشي الطريق بقي يافرود

ابو عبد الله

الفكرة انه لو خبطني صحيح غلطان و هأعرف اعلمه أزاي يحترم الناس بعد كده بس انا هاكون أستفدت أيه غير أن عربيتي اتخبطت و اتشوهت ده غير عطلة الاقسام و المحاضر و الاصلاحات

علشان كده بأتقي شر الناس دى و أسيبهم يغوروا في 60 ألف ........ (سلامة ) بس عربيتي ماتتعورش

مع خالص تحياتي
م/ سمير الشهاوي

[omaroof]

ربنا يرحمنا برحمته

[gazzar91]

حسبنا الله و نعم الوكيل............
عندي كلام كتييييييييييييييييييير عاوز أقوله في الناس دي بس ماينفعش على المنتدى!!
في رعاية الله...

[Ghamrawy]

انا فى نفس موقفك يا باشمهندس سمير كل يوم فى مدخل مطلقة البحر الابيض المتوسط الاسكندرية سابقا

مدخل اسكندرية من الصحراوى عبارة عن خمس حارات تضيق ليصبح 3 ثم 2 عندى مطلع كوبرى محرم بك و من هنا تبدأ المهزلة
عربيات نازلة من فوق الكوبرى الجديد على عربيات جاية من الصحراوى و كل ده عايز يطلع الكوبرى القديم اللى ينزل على شارع قناة السويس
ال500 متر دول بياخدوا منى كل يوم 20 دقيقة تقريبا فى وقت الذروة من 3 و نص لغاية 4 الا ربع 4 الا عشرة
و كله بيحدف على كله علشان يطلع الكوبرى و البقاء للاقدم و الاكبر و الاشجع اخيرا
كل حاجة فى المخروبة دى بقت بالدراع

[lolly136]

ربنا يرحمنا برحمته

+111111111

[Akram]

إزيك يا باشمهندس سمير ,
انا طريقي كل يوم الدائري و بقيت قبل ما اطلع الدائري بستعد علشان الناس اللي بتفور الدم دي ,
عربيات نقل ماشية في اليمين ,
ناس جاية بسرعة و عايزاك توسع و حتى مش مديك فرصة انك تتركله الحارة اللي انت ماشي في بأمان ,
أو تلاقي ناس ماشية من اليمين للشمال و بعدين لليمين , المهم يجري بسرعة كأنه في سبق ,
و اللي فجأة يجي أدامك من غير اشارة أو انه يراعي المسافة اللي بينكم ,
دا غير الفواصل و الحفر و المطبات اللي الواحد بقى بيحفظها و بيحاول يتفاداها ,
يعني أول ما ألاقي عربية نقل ابعد عنها ,
أول ما ألاقي موتوسيكل أبعد عنه ,
أول ما ألاقي عربية سايقاها واحدة أبقى حريص جداً ,

يعني بصراحة ضغط أعصاب كل يوم ,
بس بحاول مع كل ده إني أهدي نفسي و أمشي بالمعقول و اللي عايز يعدي يعدي ,
و اللي ماشي غلط بحاول أنبهه و أكمل طريقي ,
و ربنا يسترها معانا جميعاً في السيرك اليومي اللي احنا عايشين فيه.

[aly_moh]

عايز تعرف فى اية ؟؟

اقولك انا


في قلة حياء
فى انانية
فى ان محدش بيفكر ان اللى الاسعاف رايح يجيبة ممكن يبقى حد عزيز عليك
فى ان الى معاة فلوس افتكر انة اشترى البلد
فى ان مفيش احساس بالمسؤلية تجاة المجتمع
فى ان نفسى ثم نفسى ثم نفسى ثم طظ فى الاخريين
فى ان حالة اللامبالاة بقت شئ عادى
فى ان البلد دى هتفضل كدااا طول مافيها ناس كدااااا
فى ان كل الناس بتفكر فى دلوقتى و بينسوا يوم القيامة او حتى بينسوا ان كما تدين تدان
فى ان اللانانية بقت مطلقة و غطت الناس كلها
فى ان ان لم تستحى افعل ما شئت
فى ان حسبى الله ونعم الوكيل