أزاى عايزين الكورى يتقدم وأحنا عقولنا مبتتقدمش!

[NoRmAl]

هو فى ناس أستوعبت الكلام غلط
مبقولش الكورى جاب الاوروبى "هو جاب اليابانى فدى مش هتكلم فيها دا موضوع حسم بالنسبالى"
لكن بقول الناس الى بتنتهج الطريقه دى فى التفكير مش سايبه حتى الباب موارب لأى تغيير أو تحديث
وضربت مثال لعربيات مش أحنا الى بنقول عليها علشان محدش يقولى أصلك راكب كورى لأ دا العالم كله أجمع أنها تتطورت
وحسام أوبتراوى أشار ليها
لازن نفهم ان التغيير سنه الحياه ولازم هيجى يوم الكورى جودته هتعلى وهيبقاله تكنولوجيا هوه كمان
موضوع الكورى مبيبتكرش الصراحه مش فاهم أنتوا بتتكلموا فى أيه :)
لاهو أنا راكب مرسيدس علشان أكتب على ضهرى أنا راكب العربيه وأنا عارف أن الفتيس بتعها من أختراع بلدها!!
أيه القصه يعنى
وهل فى ضرر أو عيب أن كوريا تحط فى عربياتها أحدث ما توصل أليه من تكنولوجيا
يعنى السؤال كانت هتعجب لو قدمتلنا العربيه فاضيه علشان هما مبتكروش حاجه!!
مش عايز أضيع وقت فى النقطه دى
الموضوع لم يقتل بحثا ولا حاجه أنا بتكلم فى جزئيه أخرى
ممكن كمان 20 سنه نشوف دوله أفريقيه بتاخد كاس العالم
لأن البصير هيلاحظ أن خريطه الكوره فى العالم بتتغير يبقى لازم الكل يعرف أن ترتيب أمريكا اللاتينيه ثم أوروبا ثم أسيا وبعدين أفرقيا أتمحى
وبقى فيه ترتيب جديد
كذلك الحال الكورويين دلوقتى بيعملوا عربيات محترمه جوده كويسه وأعتماديه مقبوله جدا وحطوا رجليهم على الطريق الصح وكفايه وجود مصممين على أعلى مستوى
الدور مش على أى حد غيرنا أننا نستوعب أن فيه أمكانيه لحدوث كدا
مش أننا نضع الترتيب السائد دا موضع المقدسات ونجعل منه عقيده لا تمس
لازم نجرب ونحكم ومش نحكم وأحنا مجربناش
أو نجرب ونعاند ونقول لأ أصلحا متجيش
يعنى يبقى فيه جوده بس أنت مش شايفها نتيجه أنها "متجيش يعنى"

[Egyzizo]

طيب اشمعنى الكورى هو اللى متحمسين له ، ليه مش الصينى ، ما هو ينطبق عليه نفس الكلام ..

لاحظ ان أوقات كتير حين المقارنة بين كورى وصينى ، أصحاب الكورى بيمسكوا فى كلمة صينى ويتجاهلوا المعايير الأخرى واللى أحيانا بتكون العربية الصينى متفوقة فيها.

فلا تلوموا أصحاب الأوروبى لأن نظرتهم للكورى هى نظرة صاحب الكورى للصينى.

[NoRmAl]

الصينى فى مرحله تانيه خالص
دا ناشىء ومازال فى مرحله ما تحت الاقتباس
دا بيجمع قطع عربيات مختلفه ويعمل منها عربيه
نقارن الى بيقلد تبيكال بالى دافع ملاين فى مصممين عالمين؟

[Egyzizo]

بس أصحاب الصينى مش شايفين كده ..
زى ما أصحاب الكورى مش شايفين ان الكورى أقل من الأوربى.

[NoRmAl]

يا باشا مين قال بس أن الكورى أفضل من الاوروبى :)
معلش أقرا مشاركاتى تانى علشان تقدر تفهمنى انا مش عايز أقول كدا خالص.

[Egyzizo]

مين قال ان الكورى أفضل من الأوربى ؟؟
أنا ما قلتش كده
أنا بأقول ان وجهة نظرك فى الكورى بالنسبة للأوربى
هتكون وجهة نظر البعض فى الصينى بالنسبة للكورى

[Mzeid]

و الله العربيات كلها فيها عيوب صناعة الاوروبي قبل الامريكي و الكوري
ببس فيه فرق في التفكير بيختلف حسب المنطقة يعني تفكير الكوري غير الالماني غير الامريكاني
و طبعا لازم نفرق بين كذا حاجة

حد عايز يعمل عربيات و خلاص الصين
حد عايز يعمل عربيات علشان تبدا تنافس مع اللحفاظ على السعر القليل المناسب كوريا
حد عايز يعمل عربيات و يبين فيها التكنولوجيا اللي عنده اليابان
حد عايز يعمل عربية حجم و خلاص و سعة امريكا
حد عايز يعمل عربية متخرش المياه الاوروبي

[ahmed88hassan]

يا جماعة انا شايف ان الناس مبقتش بتتجنب الكوري زي الأول ولا بتقلل منه بدليل ظاهرة إنتشار النيو سيراتو اللي واضحة لأي حد
اظن ان ده افضل دليل ان الناس بدأت تديهم حقهم بغض النظر عن الكلام النظري اللي بنسمعه ساعة المقارنات

[Car's Sniper]

يا جماعة انا شايف ان الناس مبقتش بتتجنب الكوري زي الأول ولا بتقلل منه بدليل ظاهرة إنتشار النيو سيراتو اللي واضحة لأي حد
اظن ان ده افضل دليل ان الناس بدأت تديهم حقهم بغض النظر عن الكلام النظري اللي بنسمعه ساعة المقارنات

فعلا العملى غير الكلام النظرى...

[gazzar91]

مش سرقة , دا مجال المنافسه بشكل عام اى ابتكار جديد بتعمله شركه كل الناس بتمشى وراها

عربيتك مثلا معظمها حاجات متاخده من شركات تانيه , شركه ساب هى مثلا اول من قدمت حزام امان فى عربياتها وبعدين كل الشركات عملت زيها , كرايسلر وكاديلاك هما اول من قدم ال ABS وبعدين الشركات بقت تقدم تطويرات عليه لحد ما وصل للشكل ده , مرسيدس هى اول من قدمت تقنيه حقن الوقود اللى معروفه دلوقتى وبعدين كان من اهم التغيرات فى تاريخها اضافه من BMW على النظام

حديثا بقا قيس الكلام ده كتير من اول ال iDrive بتاع BMW لحد حساسات ضغط الاطارات وحساسات الاضاءه ونظام تنظيف المصابيح وحتى الانظمه الالكترونيه

مفيش شركه بتمشى على ابتكاراتها بس كله بينقل من بعضه علشان ميبقاش اقل من المنافسين

أنا آسف جداً.... أنا مش مقتنع بصراحة
طيب ماهي مرسيدس لما عملت حزام أمان كانت أول عربية بـ3Point seat belt هل ده معناه انها قلدت ساب؟؟
و أظن إن مرسيدس بنز برضه هي اللي كان ليها السبق في الموضوع ده من 1979 و لو كان في حد قبلها يبقى كلامك صح...
الباقي بقى غرض واحد بوسيلة مختلفه.... شوف في كام تقنية variable valve timing ....كتييييييييييييييييييير
و كل شركة ليها تقنية معينة...
و على فكرة منظومة الـ Anti Locking Brakes في مرسيدس مختلفة عن كل العربيات اللي في السوق و اللي عملوا الـ ABS يا دوب دلوقتي.....

يعني لكل طانع تكنولوجيا مختلفة بيطبقها في عربياته... يمكن تدي العميل بتاعه نفس اللي تديهوله ماركة تانية... لكن بطريقة مختلفة....

و الله أعلم...
في رعاية الله...

[gazzar91]

لاهو أنا راكب مرسيدس علشان أكتب على ضهرى أنا راكب العربيه وأنا عارف أن الفتيس بتعها من أختراع بلدها!!
أيه القصه يعنى
وهل فى ضرر أو عيب أن كوريا تحط فى عربياتها أحدث ما توصل أليه من تكنولوجيا
يعنى السؤال كانت هتعجب لو قدمتلنا العربيه فاضيه علشان هما مبتكروش حاجه!!

هو حضرتك خدت كلامي عن الفتيس بتاعها تريقة؟؟؟؟

[hamdy]

كنت مرة سمعت ان سبايك المواتير مثلا في الالماني تتقوق عن الياباني و الياباني يتفوق علي الكوري لفرق وذا اللي بيجعل مواتير الالماني تملك عمر افتراضي اطول

[Ahmed Nouh]

أنا آسف جداً.... أنا مش مقتنع بصراحة
طيب ماهي مرسيدس لما عملت حزام أمان كانت أول عربية بـ3point seat belt هل ده معناه انها قلدت ساب؟؟
و أظن إن مرسيدس بنز برضه هي اللي كان ليها السبق في الموضوع ده من 1979 و لو كان في حد قبلها يبقى كلامك صح...
الباقي بقى غرض واحد بوسيلة مختلفه.... شوف في كام تقنية variable valve timing ....كتييييييييييييييييييير
و كل شركة ليها تقنية معينة...
و على فكرة منظومة الـ anti locking brakes في مرسيدس مختلفة عن كل العربيات اللي في السوق و اللي عملوا الـ abs يا دوب دلوقتي.....

يعني لكل طانع تكنولوجيا مختلفة بيطبقها في عربياته... يمكن تدي العميل بتاعه نفس اللي تديهوله ماركة تانية... لكن بطريقة مختلفة....

و الله أعلم...
في رعاية الله...

ههههههههههههههههههههه , يا بوحميد انا مبتكلمش عن التقنيات دى فى حد ذاتها

انا اقصد ان العرف الجارى من قديم الازل فى عالم السيارات ان اى ابتكار بتعمله اى شركه يادوب بيبقى حصرى لحد طرح جيل جديد من اى موديل منافس وده بيبقى عن طريق نسخ التقنيه دى من المنافس وتطويرها وتعديلها بما بناسب فكره الخاص

يعنى هو هو الحزام بس اتضاف عليه شويه حاجات علشان ميبقاش تقليد ويبقى مرسيدس لها فيه لمسه , وهى هى الايرباج بس شويه اماكن زياده وتحسين فى الاداء , وكذلك حقن الوقود وما شابه من تقنيات او افكار او تكنولوجيا

حتى خامات الانتاج , الكاربون فايبر مثلا اول مره يظهر فى عربيه طريق كان فى الماكلارين f1 وكان طفره بكل المقاييس

دلوقتى الكاربون فايبر بينزل فى الفئه الثالثه الرياضيه !! , والجاى هو الكاربون كومبوزيت فى الماكلارين ال mp4 وقريب برده هتلاقيه انتشر

هى دائره ابتكار مفتوحه والكل بيقدم جديده وجديد المنافسين فعلشان كدا اصبح مجال صناعه السيارات دلوقتى مفيهوش كلمه تقنيه حصريه او شركه بتعمل حاجه غيرها ميقدرش يعملها

يعنى هيونداى مثلا مش مستحيل تعمل عربيه اداء زى النيسان ال gtr الفكره كلها انهم مش محتاجينها دلوقتى ومش فى خطتهم للتطور انما هيجى وقت وتتعمل

زى ما فولكس فاجن مثلا مش عايزه تدخل الفورميلا 1 رغم الاغراءات اللى بتتقدم ليها , ورغم ان تحت ايدها تقنيات وخبره لمبورجينى وبورشه وأودى وبوجاتى بس برده ده مش من ضمن خطتهم , هل معنى كدا انهم اقل من فيرارى ولا لوتس ولا مرسيدس ولا تويوتا ولا هوندا ؟؟

لا بس كل حاجه وليها وقتها

الخلاصه بلاش نقلل من قدر اى صناعه سيارات فى العالم , كوريا فى مجال السيارات زى الثور وشايطه فى وشها المنافسين جامد واثبتت وجودها فى العالم كله وفى اصعب الاسواق

منجيش نقول الكورى لا يقارن باليابانى ولا الاوروبى , المفروض ان الناس هنا فى نايل موتورز من كتر القراءه والاطلاع على الموضوعات اللى من النوع ده تكون كونت فكره كويسه جدا عن صناعه السيارات العالميه احنا معانا فى المنتدى ما شاء الله ناس عمالقه يعنى

التحيز بيخلى شكل صاحب العربيه صغير قوى وزى ما يكون متعلق فى لعبه جديده فرحان بيها وبيقول دى احلى لعبه , حتى الصين اللى شخصيا عمرى ما ارشح عربيه من عندها لحد ماشيه بسياسه ما هتخليها فى يوم كابوس شيطانى لصناعه السيارات العالميه , هى دلوقتى بس عاملة زى اللى بيخترع قنبله نوويه بس محتاج يجرب واحده كل فتره هتطلع من تحت ايده شويه تجارب كارثيه صحيح زى ال qq والهافى لوبو وما شابه بس اول ما يلاقى الفكره اللى بيدور عليها هيبقى صاحب اليد العليا

الصين فى رحله للبحث عن تشكيله من الخامات تحقق جوده عاليه بسعر قليل ومهما طال الوقت مسيرهم فى يوم هيعملوها

[kemoelord]

شكلك مبقوق أوي يانورمال :d

بالرغم من أني من المعارضين تماما مع التصنيف المطلق لفئة أو لصناعة معينة

بس أنا عندي كام نقطة اطرحها للمناقشة

أول نقطة : تكنولوجيا التصنيع

تكنولوجيا التصنيع سواء تكنولوجيا تصنيع المواد واللي بتشمل السبايك والمعادن اللي بيتم تصنيع أجزاء المحرك منها والأجزاء اللي بتتحمل الأجهادات المختلفة
أو التكنولوجيا الرقمية والأجهزة الألكترونية .

وفي الحالتين أنا بقول فعلا إنهم أسرار حربية ، فعلا وبدون هزار ، لأن أقسام البحث والتطوير لما بتوصل لناتج جديد بعد ما بتصرف عليه في اقسام البحث مبالغ طائلة مش معقول يطلعوا على الملأ وينشروا اللي تعبوا فيه بلا مقابل .

ومن هنا بيجي التنافس بين الشركات من ناحية التطوير ، وقد يصل الحد لسرقة التصميمات ، ولا ينسى حد فينا حادثة الجاسوسية بين شركة عريقة زي مرسيدس على شركة فيراري .

تاني نقطة : هتكلم على عربية مع صديقي العزيز bmw 7 series e32 ، وهو متواجد بالسعودية ، العربية دي أو موديل ليها هو 1986 ، يعني من 24 سنة ( خلي بالكوا من التاريخ ده )

طيب تعالو نشوف ايه اللي في العربية دي:
1.كمبيوتر أعطال
2. Abs + ebd
3. ذاكرة تعديل مقعد السائق
4. حقن ألكتروني
5. مرايا كهربائية
6. تكنولوجيا الوصل إلى المنزل مع العطل :
ودي هاتكلم عنها شوية ، طبعا العربية باور ستيرينج ، لكنه بتعديل ألكتروني للحصول على نعومة مناسبة للدركسيون حسب السرعة ،بالرغم من أنه زيت مش كهرباء ، المهم القطعة الأكترونية اللي بتتحكم في الدركسيون باظت والباور فصل واللمبة بتاعته نورت، طبعا صاحبي بص على الجزء بتاع الباور ستيريج وفك العلبة اللي فيها القطعة ، لقاها واصلة بكابلين داخال للقطعة (ميل) وكابل خارج من القطع للطرمبة (فيميل) ، مجرد ما فكهم وركبهم ببعض الباور أشتغل تاني بلا مشاكل ومش بيه لمدة 4 شهور كمان.

7. 3 أوضاع للقيادة ( رياضية - عادية - مش فاكر التالت :) )

أيه رأيكوا في الكلام ده ، موجود في عربية من بي أم من 24 سنة ، وطبعا ده اللي أنا فاكره بس مش كل حاجه فيها

طبعا الحاجات دي ماشوفناهاش إلا بعدها بعدد معقول من السنين ، يترواح من4 إلى 14 سنة في ماركات مختلفة

تفتكرو بقى في الوقت اللي فيه باقي الشركات بتحاول تلحق بالتكنولوجيا دي ، هل تعتقدوا أن مهندسيين التطوير بشركو بي أم قاعدين ، ولا كانوا بيطوروا في حاجات تانية وهكذا ......

بجد والله انا احب احييك على ردك ده وانه اكثر من رائع ويا ريت الناس تفهمه وتفهم مغزاه وخصوصا نورمال , على فكره انا والله معجب من ارائك في معظم المواضيع ومتابعك بس في الموضوع تقدر تقول انا محتلف معاك فيه وجدا كمان ,, شوف انا كنت بسلم حاجة في الكليه مع دكتور الماده نفسه المهم البرنامج الي احنا عملناه ما حقق نسبة عاليه من النجاح بس اسمه نجح فقالنا قصه كده صغيره اوي :,, قالنا تفتكروا ايه الفرق بين الصين والمانيا مثلا في تصنيع السكاكين ايوة سكاكين المطبخ فقالنا الصينين مثلا بيجيبوا قطعة الحديد ويقعدوا يقطعوا فيها علشان يعملوها فبتبقى طبقه واحده وبيكون مستوى الخامه الي فيها وجودتها رديئه ,,, اما الالمان فبيجيبوا نفس قطعة الحديد وبدون ما يقطعوا بيضربوا عليها لغايه لما تاخد شكل السكين فبتبقى اقوى وامتن ومستوى جودتها عاليه اوي فمثلا نلاقيها احمى في التقطيع وتعيش بعشرات السنين شوفتوا يا جماعه الفكره الي في القصه ده بقى الفرق بين الصيني والكوري والياباني والاوروبي والامريكي ,, والمهندس احمد عنده حق انا فعلا بتكون زي الاسرار الحربيه وكل شركة بتبقى ليها اسرار في التصنيع والتكنولوجيا المستخدمه ومستوى الجوده والخامات فيا ريت يا جماعه معلش ما نستهزا بالناس بس الي بتفكر كده دلوقتي والي انا واحد منهم بصراحه ,, لان فعلا الفروق دي موجوده ولا احد يقدر ينكرها خصوصا خصوصا ان السيارات الي بتنزل عندها حتى الان بتبقى مختلفه كليا على الي بتنزل بره وطبعا بتكون اقل ,, ده انا يا راجل بسمع حاجات في العربيات ال "" زيرو "" في مصر ببقى متجنن وعمري مثلا ما سمعت ربعها في بلد زي السعوديه ,,, المشكله في مصر نفسها ومن الاخر تتلخص في الاسعار بمعنى انا واحد عندي استعداد اركب سوناتا " عربيه كوري " لانها ببساطه عربيه جامدة جدا لكن سعرها يخليني ما اشتريها , واشتري احسن عربيه اوروبي او ياباني عموما هي مش خناقه والمسالة مسالة اراء ووجهات نظر ويجب ويجب ويجب احترام وجهات النظر الاخرين ما نقولش زي ما بعض الاخوه تفضلوا وقالوا دي ناس مش فاهمه ولا مش بتعرف تركب ولا تفكيرها متاخر ومش مظبوط

[eng_ahmedryad]

هو فى ناس أستوعبت الكلام غلط
مبقولش الكورى جاب الاوروبى "هو جاب اليابانى فدى مش هتكلم فيها دا موضوع حسم بالنسبالى"
لكن بقول الناس الى بتنتهج الطريقه دى فى التفكير مش سايبه حتى الباب موارب لأى تغيير أو تحديث
وضربت مثال لعربيات مش أحنا الى بنقول عليها علشان محدش يقولى أصلك راكب كورى لأ دا العالم كله أجمع أنها تتطورت
وحسام أوبتراوى أشار ليها
لازن نفهم ان التغيير سنه الحياه ولازم هيجى يوم الكورى جودته هتعلى وهيبقاله تكنولوجيا هوه كمان
موضوع الكورى مبيبتكرش الصراحه مش فاهم أنتوا بتتكلموا فى أيه :)
لاهو أنا راكب مرسيدس علشان أكتب على ضهرى أنا راكب العربيه وأنا عارف أن الفتيس بتعها من أختراع بلدها!!
أيه القصه يعنى
وهل فى ضرر أو عيب أن كوريا تحط فى عربياتها أحدث ما توصل أليه من تكنولوجيا
يعنى السؤال كانت هتعجب لو قدمتلنا العربيه فاضيه علشان هما مبتكروش حاجه!!
مش عايز أضيع وقت فى النقطه دى
الموضوع لم يقتل بحثا ولا حاجه أنا بتكلم فى جزئيه أخرى
ممكن كمان 20 سنه نشوف دوله أفريقيه بتاخد كاس العالم
لأن البصير هيلاحظ أن خريطه الكوره فى العالم بتتغير يبقى لازم الكل يعرف أن ترتيب أمريكا اللاتينيه ثم أوروبا ثم أسيا وبعدين أفرقيا أتمحى
وبقى فيه ترتيب جديد
كذلك الحال الكورويين دلوقتى بيعملوا عربيات محترمه جوده كويسه وأعتماديه مقبوله جدا وحطوا رجليهم على الطريق الصح وكفايه وجود مصممين على أعلى مستوى
الدور مش على أى حد غيرنا أننا نستوعب أن فيه أمكانيه لحدوث كدا
مش أننا نضع الترتيب السائد دا موضع المقدسات ونجعل منه عقيده لا تمس
لازم نجرب ونحكم ومش نحكم وأحنا مجربناش
أو نجرب ونعاند ونقول لأ أصلحا متجيش
يعنى يبقى فيه جوده بس أنت مش شايفها نتيجه أنها "متجيش يعنى"

كلام لا غبار عليه

وفعلا ماينفعش كل بلد عاوزة تعمل عربية تبدأ من الصفر
لأ البدأ حيث أنتهى الآخرون ، لأن غير كده هو التخلف بحد ذاته ويمكن ده السبب الرئيسي في تخلف بلدنا
كل واحد يمسك مكان أو منصب يهد كل ما اتعمل قبله ، وبكده دايما نفضل مكانا بدون ما نتقدم أبدا