حادث على الدائري - وفي وسط لجنة رادار

[shaddadfalcon1]

للاسف الشديد اسوأ طبقة فى المجتمع المصرى هي طبقة السواقين المذكورة فهم اكثر من جهلة
يارب ينتقم منهم جميعا وينتقم من اللى طلع لكل واحد فيهم رخصة امين يارب العالمين

انا والدي سواق نص نقل بقاله 30 سنه
ياتري كده انا والدي جاهل واسوأ طبقه في المجتمع؟

[A.Saad]

بعد المقايسة
هنصحك النصيحة المعتادة ليا
اعمل سمكرتك برة

المهم صنايعى يكون كويس

[Ahmed Anwer]

ربنا يعوض عليك و تطلع بسيطة إن شاء الله

قبل كده برده عربية نص نقل دخلت فيا في تقاطع في العاشر من رمضان

و أمين شرطة واقف ،، و أديته عشرين جنية لما كانت العشرين جنية مبلغ

رغم إني مش غلطان اساسا

لما روحنا القسم الضابط قالي لو عايز المحضر يتحول للنيابة و العربيات تتحجز و لا تتصالحوا

قالتله أتصالح و روحت ،،، كان بعربية 128

[yaserbasha2000]

انا والدي سواق نص نقل بقاله 30 سنه
ياتري كده انا والدي جاهل واسوأ طبقه في المجتمع؟

طبعا اكيد زميلنا ميقصدش التعميم اللي حضرتك فهمته كل شغلانه فيها الكويس و فيها اللي مش كويس
لكن المشكله اننا دايما بنبص للسئ و نعمم علي الكل لان السئ هو اللي بيبان اكتر

[mahmoud_anwar]

ياباشا متزعلش مني اخر حاجه تلجئ ليها المحضر وخدها مني كلمه
حقق تجيبه بدراعك زمان كانه بيقوله تخلف لكن حاليآ هو ده الحل احنا في مولد
يعني انا لو منك انتا واخوك كنتم سحلتوه ضرب وكنتو ظبط الترله
عارف قصتك دي مشبه لي قصه ليه كان معايه موبيل n73 ميوزك أول ما نزل كان عامل بتاع 2500 او 3000 مش فاكر بقاله فتره الحدثه دي ومن اسبوعين من شرائه رحت بيه الجم وحططه في صندوق الأمانه وقفلته بي المفتاح وبعد ما خلصت تمرين ابص علي الدرج مفتوح يمين شمال اكلم الناس محدش يعرف حاجه الواد الي ماسك الصاله مافيش رحت عملت محضر واتهمت الثلاثه الي في الصاله واتهمت الي خرج من الصاله علشان هو الوحيد الي كان في الصاله وخرج المحضر خلص عارفين خلص من غير اي حق من غير حتا ما اخد اتنين جنيه حتا
عارفين المحضر اتقفل ليه ان مافيش شهود انهم شهدو الموبيل معايه هل المفروض وانا ذاهب الي الجم اقول ياناس ياهوووووووووووووو معايه موبيل اهو ورايح الجم اهو واسحلي راجل اخليه يمشي ورايه بي كاميرا يصورني لغايه مدخل الصاله بي الموبيل بعد كده عرفت ان القنون بيطبق علي الغلابه امثالنا

[Mzeid]

ألف سلامة لحضرتك
ور بنا يستر طريقنا من بعض المتهورين دول

[Mzeid]

انا والدي سواق نص نقل بقاله 30 سنه
ياتري كده انا والدي جاهل واسوأ طبقه في المجتمع؟

لا طبعا مش كلهم أكيد فيه ناس محترمة و بتحترم الغير و فاهمين

انا مرة قعدت مع سواق عربية نقل قعدت اتكلم معاه في العربية لأنها كانت جديدة و كان فاهم كل حاجة و عارف ان العربية بيتكشف عليها بالكومبيوتر و كان محترم جدا و فاهم

[samcar]

خبر تعيس جدا
اليوم وأثناء توقفي للجنة رادار على الدائري المتجه من المريوطية لميدان لبنان – ضربت الانتظار وبهدي – وفوجئت بعربية نقل ( جامبو ) دي – جاية تشيل الجانب الشمال للعربية بأكمله – فانوس على رفارف على مرايا – كله

وكمل طريقه لولا نزلت للجنة وطلعولي عسكري بموتسكل وقفنا النقل بعد يجي كيلو – يقوله العسكري – ده احنا كنا بنوقف العربيات دي كلها علشان انت مقفوش رادار – ويهديك يرضيك – يقولي أخدها أصلحهالك – العربية فيرنا 2009 – قولتلوا تصلحها في التوكيل وهادفع انا الثلث – رفض وانا رفضت التصالح طبعا
والعسكري الي على المتوسكل يسلمنا لضابط في عربية جيب – الي يسلمنا النقطة على الدائري – الي يسلمنا للنجدة الي خلاني أكلمها بما اني رافض التصالح – النجدة تيجي تعمل تقرير عن الخسائر في العربيتين وتسلمنا لمندوب جه بعد ساعة ونص انتظار من القسم – المندوب في القسم يسلمنا لأمين شرطة يعمل المحضر
خليت والدي لما جه طبعا خد مراتي وابني الي كانوا معايا كل ده وروحت مع أخويا القسم
الكلام طبعا – كل شوية يتغير ويتبدل – وبقى في النهاية المحضر بدون أي حد من سلسلة العساكر والضباط الي كانوا حاضرين الحادثة كول كلهم – المحضر بقى كلامي قصاد كلامه – بقى أنا باقول واقف في اللجنة وده جه شالني – وهو بدل ما كان ماخدش باله والعربية تقيلة وماوقفتش معاه – الكلام بقى اني كنت باخد غرزة فنطيت أمامه – علما بأن فانوس العربية الخلفي معكوك – والأمامي محصلوش حاجة – طبعا كانت هاتبقى أول حاجة فانوسي الأمامي يطير لو انا كنت باخد غرزة – بس تقول لمين – ما العربيتين مرمين بره – ومحدش بيطلع يعاين – بقينا اتنين خابطين بعض ورايحين القسم – وبيقول في المحضر هو عنده تلفيات وانا عندي تلفيات ..؟؟

ولولا ستر ربنا – والله العظيم ستر ربنا في بلد لا يرجع فيها حق لصاحبه – ان سواق النقل مش معاه رخصة العربية – بيدعي انها بتجدد وماشي بورق ترخيصها الي عليه بصمة الماتور والحاجات دي – وان الضباط عمل حركة كويسة انه سحب منه رخصة قيادته الخاصة علشان السرعة قبل ما يسلمنا للنقطة – فالولد دخل القسم بالبطاقة فقط – والله العظيم لولا ستر ربنا كان زمانهم رموني جنب الواد في القسم لحد ما نتعرض على النيابة بكرة- لولا انهم تجاهلوا حبس في المحضر ده – وحبسوا السواق بسبب محضر ملحق بالمحضر الأساسي وهي جنحة مرورية للقيادة بدون رخصة السيارة

طب لو الحادثة كانت في وسط الدائري بدون شهود – ولا كان الضابط مسحبش رخصته – ولا كان يعرض صباح عسكري في أي حتى يخلي المحضر مايذكرش فيهم انه هرب وااني ( استنجدت) باللجنة الي وقفته بعد ذلك – ولا .. ولا .. ولا .. – كان زماني روحت في الرجلين ولا محبوس ولا حاجة

ستر ربنا اني مازلت مأمن على العربية مع شركة وثاق – وهاشوف بكرة ايه الاجاراءات الي أعملها علشان يبدأوا في التصليح – طبعا ياريت لو أي حد ليه معلومات عن القصة دي يا ريت ينصحني بيها

والسواق بفجره – واحنا في القسم يقولنا الضابط قبل ما يسلمنا للأمين – آخر كلام مش هاتتصالحوا – قولتلوا انا مستعد للتصالح – نروح للتوكيل ومستعد أدفع أنا حتى لو نص التكاليف – يقوم السواق يقوله وانا مين يصلحلي عربيتي وانا مش غلطان – حاجة تخليني هانفجر فوق الحر والشمس والعرق والضغط بتاع الموقف – أفرقع فيه – يا عم مش غلطان إيه – كاسر اللجنة وتقولي مش غلطان – يقول انا مكسرتهاش انا أول ما الموتسكل جه وقفت على طول – كلام أهبل وأي حاجة بس يعرف ويقدر انه أهبل اذا كان الي حضروا الموقف - والي سمعوا من الي حضر الموقف ومن ا لسواق ذات نفسه لما كان هايعيط أول ما عمل الحادثة – محدش منهم موجود – خلاص رتب قصته وداخل هادي وانا الي هافرقع

للاسف فى البلد الزباله اللى احنا فيها هو ده القانون- انا مريت بنفس الموال- وللاسف ضباط الشرطه - زى ما يكونوا مبسوطين فى صاحب الملاكى - خصوصا لو عربيه غاليه - لسان حالهم- انت جبتها ازاى - وان الحمار اللى خبطك غلبان - قال يعنى بيصعب عليهم الغلابه
ازبل مرور فى كل المنطقه العربيه هو المرور المصرى - وازبل قانون مرور هو برضه القانون المصرى - وشوف بقى زباله قانون مع زبالة تطبيق والله نحمد ربنا اننا بنرجع بيوتنا بعد كل مشوار - ربنا يبتلى كل مجرم مشارك فى المهزله دى بحادثه يكون فيها اتوبيس سياحى فاخر يدوس على رقبته

[slim_shika]

الحمد لله على سلامتك يا باشا, وإن شاء الله ربنا هيجيبلك حقك - حتى لو مش قدامك.

أنا عايز أقول إن ولا رادارت ولا لجان ولا حتى إيه هيقدر يمنع حوادث المقطورات غير لما يظهر قانون صح ويتنفذ صح.

[shaddadfalcon1]

لا طبعا مش كلهم أكيد فيه ناس محترمة و بتحترم الغير و فاهمين

انا مرة قعدت مع سواق عربية نقل قعدت اتكلم معاه في العربية لأنها كانت جديدة و كان فاهم كل حاجة و عارف ان العربية بيتكشف عليها بالكومبيوتر و كان محترم جدا و فاهم

يبقي ياجماعه مش المفروض نعمم في كل حاجه

هو يعني كل الملاكي اللي ملايكه
اطلع علي الكورنيش وشوف قلة الادب اللي بتحصل- تزنيق وغرز وحاجه ملهاش اي مبرر

مره والدي كان في المرور وسمع حكايتين من سواقيين نقل كبيير

الاول كان ماشي في طريق يادروب واخد العربيه ويعدي عربيه صغيره من جنبه وكان في وراه عربيه جامبو وملاكي وشغالين نور عالي وكلاكسات والمهم صاحبنا ملقاش حد غيرهم قام موسعلهم ولما بقو قصادو قام رامي عليهم مضيعهم عشان قال يعني هما كده عكننو مذاقه

والتاني علي النقيض تماما نازل من كوبري وفي عربيه تقريبا وقفت قدامه وعشان يفاديها العربيه قلبت منه من علي الكوبري ونزلت ترعه كانت جنب الكوبري مع انه لو خبطها مكنش هيحصله اي حاجه

علي فكره انا اكتر عربيات بتضايقني هي الجمبو وقبل كده كسر لي المرايا لان الصندوق بتاعها اعرض من الكابينه ودايما ابقي هتخبط منهم بسبب انه بيعدي وش العربيه ومش بيعمل حسابه علي الصندوق

[Nile Heart]

اسوأ صنف فى البلد هى ضباط الشرطه

المحترمين فيهم 1%

[dr.hany]

ربنا يستر.

[wisambasha]

للأسف مش معايا بس ممكن أذكرلك البنود الواضحة

تغيير اكصدام خلفي شمال
تغيير رفرف خلفي شمال
تغيير ( حاجة تانية تحت الرفرف تقريبا) خلفي شمال
تغيير باب خلفي شمال
تغيير باب أمامي شمال
تغيير غطاء تانك البنزين - والتأمين رفضها فهاتتسمكر
تغيير باب أمامي أيسر شمال
تغيير المرايا الشمال
تغيير زجاج السيارة الأمامي

وفيه تقريبا شغل دهان للحاجات الي هاتتغير دي - يعني ده الي قدرت أفتكره وده أغلب الشغل

كل دي مقايسة

صور عربية حضرتك بعد الحادث مش موضحة ده كله

[Sh_sunsea]

كل دي مقايسة

صور عربية حضرتك بعد الحادث مش موضحة ده كله

انا مش هاضحك عليك يعني

لا هو كان مبالغ شوية - على أساس ان التأمين المفروض بييجي يفاصل - بس هو قالي ان الباب الأمامي مثلا مش محتاج يتغير - بس هايكتب تغيير علشان التأميين يخليها تصليح بس - نوع من أنواع المساومة يعني

ولو اني لا أتذكر ان التأمين اعترض على حاجات من دي لما جه وافق على المقايسة ..؟؟

[ahmedsamir79]

لا حول ولا قوة إلا بالله
ربنا يعوض عليك