خلاص السولار هيغلى ومن بعده البنزين ؟؟

[mahamedaraby]

امبارح على البيت بيتك تامر اتصل بنائب وزير البترول - حاجه زي كده - و كان رده ان الكميه اللي بينزلوها هي هي ومفيش تغيير في الاسعار بس سبب المشكله ان الطلب تضاعف 3 مرات مرة واحد و بيقول ان السبب ان الناس بدأت تخزن .
بس بصراحه الكلام ده مش داخل دماغي انا مش متخيل ان الواحد يخزن بنزين او سولار

انا بردوا سمعت الكلام ده تقريبا الناس هى السبب علشان بتخزن السولار علشان خايفه ان هو يغلى

[mada121977]

النهارده وانا راجع من الشغل كل البنزينات اللى على طريق مصر اسكندريه الزراعى عليها زحمه كبيره جداااااا سواء عربيات نقل او نصف نقل او ميكروباصات ومفيش حد عارف يمون ........... ربنا يسترها معانا ونخرج على خير من البلد دى :(

[zakiali]

الناس بتخزن ؟؟ وسواقين السولار هيتخزنه فين يعني مثلا ؟ هيعبي من البنزينه ويروح يفضيه في خزان عنده في البيت ولا ايه ؟

[M_HaFeZ]

لقاهرة-محرر مصراوي- صرح المهندس عبد العليم طه الرئيس التنفيذي للهيئة المصرية العامة للبترول بأن سعر السولار والبنزين كما هو دون زيادة ولم يطرأ عليه اى تعديل وان المخزون منهما في معدلاته الآمنة المعتادة ولا يوجد بهما اى نقص.ونفى الرئيس التنفيذي للهيئة المصرية العامة للبترول الشائعات عن زيادة أسعار السولار والتي أدت إلى اندفاع المواطنين وزيادة الطلب على السولار في محطات التموين بشكل مبالغ فيه وغير مبرر حيث فاق ثلاثة أضعاف معدلات الطلب المعتادة وأدى إلى تناقص الكميات المتاحة بعدد من محطات التموين في بعض مناطق القاهرة الكبرى-حسبما ورد في وكالة أنباء الشرق الأوسط.
وأكد الرئيس التنفيذي لهيئة البترول أنه تم تشكيل مجموعات عمل بالتنسيق مع الجهات الأخرى المختصة للمرور الفوري على المحطات للتأكد من سلامة الإجراءات وتشديد الحملات لمنع التلاعب في استغلال السولار في غير الأغراض المخصص لها وبالطريقة الآمنة لاستخدامه من خلال المحطات من أجل ضبط السوق.
=======================
ماهو الناس نزلت استهلكت 3 اضعاف الاستهلاك اليومى لسبب من التالى

1 - انا عندى ميكروباص او عربيه نقل هامونها واروح بفنطاس احمل فيه سولار .. على اساس ان الفناطيس مترطره فى السوق ولو رحت عملت كده عادى واتفضل مون براحتك يابيه .. ومحدش واخد باله من اللى واقفين

2- انزل اجيب كام برميل واروح امون على اساس انه عادى اوى ان الواحد يروح ببرميل والناس فى البنزينه تخدمه فى قمه السعاده؟ وكمان الطابور اللى وراه عادى جدا بيملا براميل كانه داخل يشترى مولتو بالشيكولاته !!



3- اجيب جركل او اتنين املاهم ب 150 ليتر سولار واخزن عندى !!!!! على اساس ان الجراكل بتشيل الواحد 75 لتر



4- امون عربيتى وعربياتى التانيه اللى راكنها فى الجراج احتياطى علشان اخزن فيها بنزين .. على اساس ان عندى مصنع عربيات باستخدمهم كتانكات سولار وخلاص



5- اروح بعربيتى افولها .. وده اللى بيحصل كل يوم وكبيرى هفول ب 60 ليتر للميكروباص ومش عارف كام للنقل ولو كنت جامد اوى هاملئ لى جركل زيت فاضى


الناس دى فاكرانا ايه سذج ولا هبل ولا اى كلام بنصدقه وخلاص

اصل عادى يعنى الواحد يرجع لبيته جايب معاه 100- 150 لتر سولار او بنزين ويحطهم فوق الدولاب او تحت السرير او فى البلكونه احتياطى علشان الظروف !!!

[Khalid_Mostafa]

يا جماعه ...
اولاً عندنا في إسكندريه مفيش مشاكل في المحطات
ثانياً انا كنت شغال في مستودعات بترول المكس لمدة تلات سنين وعارف ان احياناً المشكله دي بتحصل لما يكون في عطل في المعمل (معمل التكرير) او خط او طلمبة فيها مشكلة لدرجة ان ساعات كانو بينقلو من إسكندرية عشان يغطوا محطات القاهرة
ثالثاً الحكومه طلعت و صرحت ان مفيش اسعار بنزين حتزيد ولا حاجه

[M_HaFeZ]

معلش ياستاذ خالد انت بتصدق الحكومه
لو هنقول كام تصريح للحكومه ومتحققش او اتعكس من ايام عاطف صدقى
مش هيكفى عشر توبيكات كل توبيك 15 صفحه من اللى هيتكتب د

اقربهم ... لامساس بالدعم .. اولوياتنا محدودى الدخل
بالله عليك انت مش شايف ان محدودى الدخل دلقوتى من 1500 جنيه وانت نازل

[MMamdouh]

ثالثاً الحكومه طلعت و صرحت ان مفيش اسعار بنزين حتزيد ولا حاجه

يبقى اكيد حيغلى

MMamdouh

[aif]

المشهد قبل الاخير ..فيلم الغالي علينا غالي ..........كلاكيت..... عاشر مرة