هيه مصر بيجيلها مواتير مخصوص ؟

[MaZaGAngeE]

كنت بقلب في موقع ادموندز بشوف تقييمات لسيارات اغلبها موجود في السوق المصري ..
العجيب بقى و لا عربية لقيتها 1600 و لا 1300 اقل حاجة لقيتها تويوتا ياريس و كانت 1500 ...
امال الموديلات اللي بتنزل مصر بمواتير 1300 و 1600 مش موجوده خالص ليه ؟ هيه دي بتكون طلبيات خاصة من الوكلاء و التجار ؟

[ahmdmagdy]

اكيد بيبقي طلب الوكيل انا لي قريب عايش في امريكا كان جايب هيونداي سوناتا بيقولي موتورها تقريبا 3500 سي سي و هي تقريبا بتنزل في مصر ب 2000 سي سي و غالبا بيعملوا كده عشان الجمارك

[Amrrr]

آه
والهوندا والباسات واكيد عربيات كتيرة

[mahmoud_afifi]

مصر بس ولا الشرق الاوسط ؟
عشان تقريبا السعوديه نفس النظام في بعض الموديلات

[Ahmed Nouh]

كل شركة بيبقى عندها مواتير كتير بتختار منهم اللى يناسب كل عربية فى خطوط انتاجها على حسب المكان اللى هتتسوق فيه والفئة اللى بتنافس فيها

يعنى هى نفس العربية بس بتنزل بموتور هنا غير هناك والشركة بتنتج سعات ومواصفات مختلفة بما يناسب السوق اللى بتنافس فيه , جمارك واستهلاك والوقود المفضل وكمان القيود البيئية

يعنى المواتير مش معمولة لمصر مخصوص هى بتنزل هنا وفى دول تانية برده بيحبوا المواصفات دى , احنا سوق اضعف بكتير جدا من ان يبقى ليه مواصفات خاصة

[human]

احنا سوق الخميس بتاع العربيات بتاع العالم
الزباله تنزل هنا

[wsamir]

مصر دولة كبيرة و مميزة فى كل حاجة لازم يجيلها مواتير مبتنزلش فى اى مكان

[zanativich]

فعلا
يعنى ليه معندناش عربيات ديزل
لان الديزل رخيص ولا علشان الضريبة غاليه

[Usama Nagi]

فعلا
يعنى ليه معندناش عربيات ديزل
لان الديزل رخيص ولا علشان الضريبة غاليه

المشكلة ان مفيش حد يفهم من الميكانيكية في المواتير الديزل ده غير ثقافة الشعب ان الديزل ده للعربيات النقل والأتوبيسات فقط

كانت بيجو 407 نزلت مصر بموتور 2000 ديزل

[د.محمود صلاح]

سياسات تسويقية .

[N.a.j.d]

كل وكيل وليه طريقه تسويقيه معينه

[Mzeid]

الحكاية و ما فيها أنك كنت بتتابع التقييم على ادموندز اللي هو موقع أمريكي و بيقيم السيارات الموجودة في السوق الامريكي
و من المعروف ان السوق الامريكي بيفضل المحركات الكبيرة و القوية
علشان كدة لو السيارة بتنزل من الشركة بأكثر من محرك فالجزء المخصص للسوق الأمريكي بيكون مزود بالمحركات الكبيرة في الفئة
يعني مثلا السيراتو بتنزل 1.6 2.0 2.4 ليتر تقوم شركة كيا تبيع ال 2.0 و 2.4 في السوق الامريكي
و نفس الكلام متلاقيش في مرسيدس c180 عندهم خالص اللي بتنزل عندهم اللي هى أقوى نسخة ال 300

و حب الأمريكان للمحركات الكبيرة واضح في المحركات اللي هما بيصنعوها
يعني تلاقي سعات فوق ال 5000 و لو فيه عربية مثلا 2.4 تبقى عربية على قدها

و اللي هيقدر يأكد كلامي أو ينفيه أستاذ فدود لأنه عايش هناك

اما بالنسبة للطلبيات الخاصة فإحنا سوق ليست مؤثرة بتاتا كي تكون لها الحق في الامور دي