شكر واجب لابوغالي -سوبارو مصر

[khalid_adel]

اخيرا والحمد لله اولا واخيرا استلمت العربيه النهارده اخر النهار وطبعا السياره في التليين الكامل والحمد لله كله تمام ان شاء الله
طبعا فاكرين لما قولتلكو بعد ما قعدت مع المهندس خالد مدير خدمة ما بعد البيع والمهندس ايهاب مدير الصيانه ولما قالي ان في اسواء الاحوال حيعملوها 50%
المهم فعلا التوكيل بعت لليابان وقالهم عالمشكله كلها بالتقرير الفني والصور المرفقه للموتور والبساتم فللاسف اليابان ردت وقالتلهم ان ده عيب من طريقه سواقه او عيب بنزين اقل في الاوكتين وان ده امر يخصكم (يعني ملهمش دعوه ) واطلعت فعلا على الميلات دي والرد وهكذا
طبعا اضايقت الناس قالتلي معلش وكده واحنا يبقى نصلحها والتكلفه بالنص وقد كان والحمد لله العربيه اتصلحت ولسه مستلمها وكانت اجمالي تكلفه العمره 5540 جنيه وبالنص يعني دفعت 2750 جنيه تقريبا وعملت صيانه ال80 الف كيلو بالمره ودي صيانه كبيره شويتين كلفت 1500 جنيه تقريبا (شامله جميع الزيوت والقلاتر وحاجات كتير كده بس من غير كلمة وابقى راضي الرجاله :):):) ) بس وان شاء الله مستني اخلص التليين 1000كم احسن لازم امشي 60 او 80 يالكتير
وبقيت بحط بنزين 95 وربنا يستر وميغلاش اكتر من كده
الخلاصه ان بجد الناس بتوع ابوغالي ناس محترمة اوي وبيقدرو وبيحافطو على العميل اوي وده نادر في مصر

[khalid_adel]

اه نسيت كمان اقولكم انهم مديني حاجه كده اسمها كارت جولد وده لاني معاهم في كل حاجه وده بيديني خصم 7.5% لاجمالي الفاتوره على اي صيانه او تصليح اعملو

[SEATLOVER]

الف مبروك يا خالد باشا على حل مشكلتك ..بصرف النظر عن الكلام اليابانى ..خلينا فى المصرى بتاعنا و حمد الله على سلامة عربيتك
وخلى بالك بردو من البنزين 95 فية منة كتير مضروب بردو .
وربنا يسترها معاك .

[fahd_628]

الف الف مبرووووووووووووك على العربية والله انا انبسطلك :)

[mahamedaraby]

الف الف مبروك وبجد انا كنت متابع مشكلتك من الاول والحمد لله ربنا سترها معاك

والله كويس انا فيه توكيلات محترمه كده

وان شاء الله العربيه متعملهاش تانى خالص بعد كده

[Nader]

الف مبروك يا خلووود ولين على مهلك ومتخليش عمر فراج يغريك:) وخلي بالك على

لفات الموتور برضة مش عداد السرعة بس يعني متطلعش عن 3000 لفة في الدقيقة.

[GoldenManEye]

الحمد لله إن المشكلة إتحلت والف مبروك.

فعلاً أبوغالى محترمين عن تجربة.

[Ghamrawy]

الف مبروك يا باشا و ربنا يكملها بالستر ان شاء الله بس معلش برضه السواقة على 160 ك او 170 ك ماتعملش كده فى عربية 1600 و لا حتى البنزين المضروب بالجاز او الميه علشان العربية لازم حتقطع وتنتش والموتور يصقف لازم لازم ده يحصل مع أى موتور فى الدنيا و كنت اول ما حاطيط بنزين كان حايبان فى ساعتها اول لما تطلع من البنزينة
المهم مبروك مرة تانية و حاول تبيع قريب

[أبو عبدالله]

ربنا يباركلك ان شاء الله

[piezo]

الف الف مبروك يا خلود وخلي بالك من ولاد الحرام بتوع البنزينات و شوف بنزينه محترمه و هي الي تمون منها علطلول بعد كده وربنا يكفيك و يكيفنا شرهم يارب

[Sharky]

الف مبروك يا خالد و الحمد لله إنها إتصلحت على خير

[oshy]

ألف مليون مبروك يا باشا
نفسى أقولك بيعها لكن صعبانه عليا

[aif]

الحمد لله ان مشكلتك اتحلت ربنا يباركلك فيها
لكن فعلا لازم تمون من بنزينة او اتنين تكون مطمن لهم وما تغيرهمش
بس مش ملاحظ ان دي اول مرة المصريين يطلعو اجدع من اليابانيين :)
والاهما مش من اليابان نفسها ... يعني من كفر ابو اليابان مثلا :d

[OsKaR]

الف مبروك على العربيه الجديده و حافظ بقى عليها :)(:

مش ملاحظ ان دي اول مرة المصريين يطلعو اجدع من اليابانيين :)
والاهما مش من اليابان نفسها ... يعني من كفر ابو اليابان مثلا :d

ولا مش ممكن يكونوا المصريين مش من مصر نفسها :)

[khalid_adel]

ربنا يجازيكو كل خير ولا اراكم الله مكروها ابدا
بجد والحمد لله اني عندي اخوه حلوين زيكو كده وكفايه وقفتكو معايا وكل مين سأل عليا وشد من ازري وواساني
واديني اهو ماشي عال 90 اخري وانا جايب الخامس وطبعا حاسس اني مشلول بس بقول الحمد لله احسن من قلتها وان بجد العربيه دي نعمه من عند ربنا وربنا يديمها علينا نعمه اجمعين