نقل ملكية في المرور للهيونداي

[kokmedo]

السلام عليكم ورحمة الله
أنا لسة جايب عربية هيونداي أكسيل 95
ولسة مرحتش المرور وعايز أكتبها بأسمي في المرور وأعمل الرخصة لمدة 3 سنين هو في الرخصة القديمة الفحص مكتوب في 2010 والرخصة هتنتهي في شهر 6 سنة2008
ومش عارف هتتكلف كام وهأخذ معي إية لما جيبتها أعطاني البائع كشف المخالفات
مع العلم العربية مرور مدينة نصر والبطاقة بتاعتي شبرا يعني تبع مرور عبود
أعمل إية
والسلام عليكم ورحمة الله

[aif]

فية حاجة مشابهه ممكن تشوفها في الرابط ده
بس رسوم العقد والضريبة طبعا ح تختلف حسب نوع السيارة والموديل

http://www.nilemotors.net/Nile/showthread.php?p=192079#post192079

[kemo_nagy]

بص يا سيدى اولا لازم تروح تجيب شهادة بيانات وشهادة مخالفات من المرور بتاعها عشان تنقل ملكيتها
ثانيا هتروح الشهر العقارى القريب منك او اللى انت تابع لية و انقلها بأسمك وهتحتاج التوكيل بتاع العربية معاك كمان وهتدفع حوالى 355 جنية تقريبا و هيخدوا منك 5جنية زيادة 2 جنية تبرع و التلاتة التنين فى جيب الموظف ماعلينا
ثالثا بعد كدة تاخد الورق و تروح على المرور الأولانى هيسحب النمر منك (مش شرط على فكرة على حسب اللى هيقلهولك)عموما انا اتسحبت منى و بعد كدة روحت مرور السلام و من حظى وأنا فى الطريق و قفنى ظابط محترم قالى فى سحب عربية و هنوديها و نجبها لآنك لازم تمشى بنمر عموما خلصت الموضوع على 20 جنية بعد كدة روحت مرور السلام و قالى ان النمر خلصت بس الحمدو لله كلمت حد اعرفة جابلى نمر.....نصيحة ماتديش نمرك للمرور الأولانى الآ لما تتأكد ان فى المرور التانى اللى هتحولة نمر......اه نسيت الف مبروووك على العربية يا باشا بس خد بالك العربية دى التابلوة بتاعها بيتشقق لو سيبتها فى الشمس....وربنا يكفيك شرها

[محمد ابراهيم 1]

أولا لو الرخصه ساريه مش حتحتاج شهاده بيانات يكفى عشان تسجلها بإسمك الرخصه والتوكيل
ثانيا ممكن تسجلها فى اى شهر عقارى مفيش اختصاص مكانى فى الموضوع ده
ثالثا لو عايز تنقلها بإسمك فى المرور يبقى حتاخد العقد المسجل والرخصه وشهاده المخالفات والبطاقه بتاعتك وتطلع على المرور اللى انت تبعه وحتضطر تفحص تانى فحص كامل (أمن ومتانه -بصمه شاسيه وموتور - عادم - طفايه ) وبعدين حتاخد تصريح مؤقت لحين ورود الملف
لو مش عايز توجع دماغك فى المرور اليومين دول يبقى ممكن تمشى بالتوكيل وممكن تسجلها فى الشهر العقارى بس متمضيش مشترى امضى بايع بس لأنك لو مضيت مشترى يبقى لازم ترخص فى خلال شهر
ولو ممضتش مشترى يبقى ممكن تستنى العربيه لغايه رخصتها ما تقرب تنتهى

[fiatmomo]

طيب يا جماعة لو عربية موديل 2002 ... 2003 .. 1600 ومستورده ... يتكلف نقل الملكية كام ؟