استفسار عن عرض السعر اللي بيطلبه البنك للسيارة القسط

[adelmagdy]

يا جماعة عايز اعرف انا انشاء الله ناوي اجيب عربية سوبارو قسط عن طريق بنك ناصر المهم رحت سئلت عند عبد الهادي هل بيتعامل مع بنك ناصر قاللي عادي انشاء الله مافيش مشاكل المشكلة مش في كده المشكلة ان بنك ناصر شروطه انك لو جبت له عرض سعر بيبقي ساري لمدة اسبوع من طلب عرض السعر من المعرض وكمان لازم المعرض يديك رقم الشاسيه بتاع العربية اللي انت عايزها طاب لو انا مثلا عايز لون معين مش معروض قدامي يبقي ايه الحل وطبعا معرفش الامبريزا نظامها ايه في موضوع الحجز يعني لو رحت اخلص يديهاني في قد ايه يا ريت لو حد يعرف حاجة عن شروط عرض الاسعار او دخل في المواويل دي قبل كده يا ريت يفيدني

[goodwave]

السلام عليكم

شوف هو المفروض المعرض او التوكيل بيديك عرض سعر للعربية طالع بإسمك وفية مواصفات العربية بالكامل وسعرها وفعلا العرض ساري لمدة إسبوع فقط! وبناء على هذا العرض البنك بيمشي في الإجراءات بتاعته وهي الإستعلام عنك وتحديد قيمة القسط وخلافة.

نيجي بقى لجواب البنك إللي بيتعهد فية للمعرض او التوكيل إنة بموجب تسليم رخصة السيارة عليها حظر بيع للبنك سوف يقوم البنك بتسليم شيك بتمن العربية او المبلغ المتفق علية مع البنك.

طبعا البنك لازم يكون نعاة رقم موتور ورقم شاسية ولون علشان يقدر يطلع جواب للمعرض (او بيسموة أمر توريد) وجواب المرور...... يعني مش معقول البنك حيتعهد بدفع تمن سيارة مش موجودة!

ولذلك إنت ممكن تروح المعرض او الوكيل وتسيب عربون - جدية حجز) بس تكون العربية موجودة وتشوفها ويدولك على أساسها رقم الشاسية والموتور واللون وتروح بالجواب دة للبنك..... طبعا لحد ما البنك يخلص إجراءاته العربية مش ممكن تتباع ودة إللي بيخلى المعارض قلقانين بس ممكن مسئول من البنك يكلمهم ويطمنهم.

اما إذا كانت العربية مش موجودة من أساسة ولسة موصلتش فممكن المعرض يديك عرض اسعار فقط (قابل الزيادة) والعرض دة من غير رقم الموتور والشاسية غير كافي ليجعل البنك يطلع أمر التوريد للمعرض!

حاجة أخيرة..... ممكن امر التوريد يطلع حتى ولو العربية لسة ورقها كا خلصسش..... يعني المعرض بيبقى ضمن حقة إن البنك حيدفع فور التسليم بس هما بيفضلوا حاجزين العربية عندهم لحد ما ورقها يوصل (يعني يوم ما بتستلم هو نفس يوم الترخيص هو نفس اليوم إللي المعرض بياخد فية الشيك بتاعة).