ماهي المتطلبات العملية و الفعلية من السيارة في مصر(دعوة للمناقشة الهادئة و الجادة)

[Samir Elshahawy]

الاخوة الكرام ...

أسعد الله صباحكم بكل الخير ...

مازال الناس في مصر و منتدانا العزيز يتشاحنون و يختلفون بشدة حول تلك السيارة او تلك و السبب قوة الموتور و السحب و فرق السرعة و الصالون و الشكل الي أخره

و لكن هناك شئ اخر مهم جدا ...
عند قرار الشراء ماهي الاعتبارات و المتطلبات التي تهم كا منا في السيارة التي يود أن يمتلكها :
- أهي السرعة ؟
- أم قوة الموتور ؟
- أم الشكل الخارجي ؟
- أم عوامل الامان و السلامة ؟
- أم الصالون ووسائل الرفاهية ؟
- أم العامل الاقتصادي من سعر و سعر اعادة بيع و أستهلاكات و غيره ؟
- أم ماذا ؟

ماهي متطلباتنا من السيارة في مصر بظروفها و طرقها و طقسها و عادات شعبها ؟
سؤال مطروح للمناقشة الهادئة و الجادة بعيدا عن ذكر أي نوع أو ماركة من السيارات حتي نستطيع ان نتفق و نضع أسس و معايير الاختيار السليم عند قرار الشراء او الاستبدال


مع خالص تحياتي
م/ سمير الشهاوي

[dode2002]

السلام عليكم يابشمهندس سمير
بالنسبه لي
اولا عوامل الامان والسلامه
ثانيا الصالون ووسائل الرفاهيه ( الراحه ) خاصه في الجلوس
ودي اهم شئ بالنسبه لي بالاضافه الي العامل الاقتصادي بالنسبه لاستهلاك السياره للوقود
وبس خلص الكلام

[Samir Elshahawy]

السلام عليكم يابشمهندس سمير
بالنسبه لي
اولا عوامل الامان والسلامه
ثانيا الصالون ووسائل الرفاهيه ( الراحه ) خاصه في الجلوس
ودي اهم شئ بالنسبه لي بالاضافه الي العامل الاقتصادي بالنسبه لاستهلاك السياره للوقود
وبس خلص الكلام

و عليكم السلام و رحمة الله و بركاته

شكرا جدا علي ردك الموجز و الوافي الكافي


مع خالص تحياتي
م/ سمير الشهاوي

[acceleration]

انا بالنسبة لى 1- قوة الموتور ...2- الصالون والرفاهية
(شاب بقى ) :)

[Samir Elshahawy]

تمت أضافة الاستطلاع المرجو المشاركة فيه و قد تعمدت أن يكون أستطلاع غير متعدد الاختيارات حتي يسهل تحديد أي المتطلبات التي تحظي بالاهتمام أكثر

مع خالص تحياتي
م/ سمير الشهاوي

[Mahmoud Nagieb]

بالنسبالى:
1-عوامل الامان الايجابية (abs-ebd-esp) ....
2-الرفاهية والصالون لان هى ده اللى هيحسسنى بقيمة الفلوس اللى دفعتها
3-قوة التوكيل وسعر قطع الغيار للسيارة واستهلاك العربية بوجه عام (بنزين وخلافه)
4-الشكل الخارجى
5-اخر حاجة بالنسبالى هى قوة الموتور

[د.محمود صلاح]

مع زيادة الحوادث الصغرى والتي تؤدي لفتح الغيرباج وارتفاع تكلفة الإصلاح

ضف لما سبق : - رخص تكاليف اصلاح الحوادث وده أصبح رقم 1 في وجهة نظري

[abdelmessih67]

أهلا بالاخ الفاضل كورال سي

في رأيي أولا : أختبارات الامان في حالة لا قدر الله التصادم بسبب أن مصر من أعلى الدول عالميا في حالات الوفيات بسبب حوادث الطرق , ثانيا : توافر قطع الغيار ( الاصلية ) لان هناك بعض الموديلات القديمة التي لا يتوافر لها قطع غيار أصلية و هذا يؤثر على سلامتها .

بصراحة انا لا أحبذ فكرة تفضيل السيارات ذات قطع الغيار الرخيصة لانها تكوت غير معمرة و بيتم تغييرها كثيرا مما يسبب تكلفة عالية على المدى الطويل بالاضافة للأرهاق لكثرة المشاوير ذهابا و ايابا للميكانيكي و يصبح مالك السيارة لعبة في أيدي الصنايعية .

يعني لو سيارة ناجحة في أختبارت السلامة و قطع غيارها ( غالية ) في رأيي أفضل الف مرة من السيارت التي يقال عنها :

( دي رخيصة قوي و قطع غيارها تلاقيها عند البقال .)

حتى و لو كان سعر اعادة البيع غير مرتفع

[أحمد علاء]

موضوع مميز باشمهندس سمير
1-الإعتمادية لجميع الأجزاء (في نظري الإعتمادية اهم وسائل الأمان الأمان ,لأن ببساطة من اهم وسائل ان السيارة متعطلش وتتوقف تماما بلا اي مقدمات في طريق خطر كما ان يمكن ان تسير السيارة وبها عطل صغير حتى اقرب مركز خدمة).
2-الوكيل (سمعة الوكيل وإلتزامة الفعلي بأنه وكيل لشركة ما بالإضافة إلى توافر قطع الغيار بسعر معقول)
3-عوامل الأمان والسلامة (في التصميم أولا ثانيا في الوسائل الإضافية مثل الوسائد الهوائية وانظمة الفرامل المانعة للإنغلاق وانظمة الثبات)
4-الشكل الخارجي
5-الصالون ووسائل الرفاهية

[mailo]

عوامل الامان و السلامة
الصالون ووسائل الرفاهية
قوة الموتور
الشكل الخارجي
السرعة
العامل الاقتصادي من سعر و سعر اعادة بيع و أستهلاكات و غيره

[jisso82]

أكيد : 1- عربية عالية عشان المطبات الوهمية اللى عندنا
2- صاج ناشف عشان الحوادث الغير مبررة بالمرة اللى بتحصل كل دقيقة
3- عفشة ناشفة عشان تستحمل برده الطرق الجميلة
4- وسائل أمان عالية زى abs و epd و وسائد هوائية
5- بعض الرفاهية و الشياكة فى الصالون
6- سعر مناسب لإمكانيات المشترى
7- جاذبية الشكل الخارجى
8- قوة الموتور

[shaddadfalcon1]

في رايي كل حاجه

[Ahmed Nouh]

انا شايف ان الموضوع ملوش قاعدة عامة ، كل واحد فينا ليه ظروفة وشخصيته اللى بتحدد هيرتاح مع انهى عربية فى كل فئة

يعنى فى واحد لو عربيته مش اسرع عربية فى فئتها مش هيقدر يعيش معاها ، فى واحد تانى لو عربيته شكلها مش حلو من برا والناس كلها بتقول عليها واو ومش منتشرة مش هيفكر فيها اساسا ، واحد تانى مهم عنده قوى العلامة التجارية واسم العربية الرنان ، وغيرهم اللى يهمه الراحة ومصاريف التشغيل

انا شخصيا ده ترتيب المتطلبات عندى من الاساسيات للشكليات

1 - الرحابة والراحة فى المقصورة والعملية فى مساحات التخزين وعدد اماكن الركاب واخيراً الكماليات المتوفرة

2 - الجودة مقابل السعر

3 - مصاريف التشغيل والصيانات واسعار قطع الغيار وسعر اعادة البيع

4 - الامان

5 - الشكل والعلامة التجارية

6 - الاداء

دايما الاداء مش مهم بالنسبة لى علشان مش هسابق بيها ولا من هواة الجرى ، برغم ان الامان مهم جدا عندى لكن واقعيا البحث عن الامان فى السوق المصرى هيخلى الواحد ياخد قرارات خسرانه مادياً فبخليه بعد الحاجات الاهم منه

الرحابة والراحة دى اهم حاجة علشان وانا جوا العربية لو مش مرتاح مش هحب اى حاجة تانية فيها ، الجودة علشان متوسط عمر العربية فى مصر طويل ومصاريف التشغيل علشان يبقى فى امل اعرف اكل واشرب جنب مصاريف العربية ده بجانب سعر اعادة البيع علشان العربية فى مصر توازى دخل حوالى 5 سنين من متوسط مرتبات مصر المرتاحة يعنى مش حاجة لو اتسوحت فيها هقول وايه يعنى 6 شهور المرتب اللى راحت

[MISS_MONA]

انا بالنسبالى بقى
الامان
التوكيل
الشكل الخارجى
الصالون