شقلباظات سلك الدابرياج في الـ 128

[aliabutaleb]

سبحان الله
كنت باتكلم من كام يوم في المنتدى هنا عن سلك دبرياج الـ 128
عشان كان نفسي حد يفيدني في حل جذري للمشكلة دي
اللي خليتني مغيره ييجي 4 مرات دلوقتي من ساعة ما جبت العربية من حوالي 9 شهور
النهاردة وانا راجع من اسكندرية الفجر ودخلت ميدان الرماية ولمن لا يعرف القاهرة ما أدراك ما ميدان الرماية
فوجئت بسلك الدبرياج قطع قبل ما أدخل على آخر فيصل
واييه بقى
العربية محملة شنط كتير وفيها زوجتي وبنتي وخالي وزوجته
واقف بقى ياريس في نص السكة وزوق العربية لغاية ما تجيبها على اليمين
الكلام ده كان النهاردة الصبح الساعة 8
وكمان يوم احد
يعني إني ألاقي ميكانيكي كان من رابع المستحيلات
فضلت ألف ساعتين ونص
من الحاجات اللي أثرت فيا أوي إني وقفت راجل كبير في السن أسأله على ميكانيكي صمم ييجي معايا لغاية بيت
2 ميكانيكية في شارع هناك
وكمان صمم يحاول يكلم لي ميكانيكي تاني يعرفه من موبايله ومقلحتش إني أقنعه أنه ياخد موبايلي يتصل منه عشان مغرمهوش رصيد
والله الدنيا لسة بخير
وفي الاخر رحت بنزينة شل اللي في آخر فيصل وسألت عن الميكانيكي وعرفت إنه بييجي الساعة 10
كلمته على الموبايل وقال 10 دقايق وجاي
الحمد لله جه بعد ساعة وربع
ولما جه بعتني أجيب سلك جديد (لأني مكنتش شيلت سلك احتياطي لسة بعد نصيحة الشباب هنا)
ولأنه يوم الأحد زي ما قلت دوخت لغاية ما لقيت محل قطع غيار
رحت من آخر فيصل لمحطة حسن محمد
طبعاً أنا أصلاً من اسكندرية ولا أعرف حسن محمد ولا حسن أبو علي
لقيت السلك الصيني بـ 10 جنيه والايطالي بـ 13
طبعاً جبت الايطالي ومقاتنيش المرة دي أجيب واحد احتياطي كمان
ورجعت ركبت السلك وانطلقت
اخدت مشوار لغاية حلوان عشان اوصل خالي وبعدين رجعت اكتوبر
وبكدة انتهى مشواري النهاردة الساعة 2.30 قبل العصر اللي بدأ 4 ونص الفجر
والحمد لله على كل حال

[أبو عبدالله]

يا ربي
ربنا يكون في عونك بجد
والحمد لله

[FLYINGPEUGEOT]

حمد الله على السلامه ياباشا...

بس انا كنت عايز اديلك معلومه صغيره....بالذات فى المواقف الحرجه اللى زى دى
...وانا عن نفسى عاملتها كذا مره...والحمد لله نفعتنى جامد...واى ميكانيكى بيعملها..
....
اولا انا عايز أؤلك انى قبل كده رجعت من بورسعيد...الى الهرم...بسياره سيتروين
اكسارا.....بدون سلك دبرياش....او فورش كمان ...!!!!
....وكنت بمشى على ال160 و180 كمان...
:D
....
بص ياسيدى انت هتعمل حاجه...بنسميها....تمشى العربيه مارش...بمعنى
طبعا هتبطل العربيه...وبعد كده هتحط الغيار الثانى
وتدور العربيه..ماتخافش هى طبعا هتفضل تنط تنط تنط ..وبعد كده هتظبط وتمشى....
لحد كده كلام جميل ..طب هتحط غيار أزااااى بءه وانت ماشى......
بص يا سيدى...قبل ما الrpm يعلى هتروح دايس دوستين بنزين جامد وفى نفس الوقت اللى بتدوس فيه الدوسه التانيه.....حط الغيار التالت بسرعه...وهكذا لكل الغيارات...
.............
بس ملحوظه....انت ممكن تعمل حكاية الغيارات دى وما تجيش معاك..وممكن لاقدر الله
ما تعملهاش صح...وتكسر تروس جوا الفتيس...يعنى لازم يكون سائق محترف...وعملها قبل كده او حتى عندو فكره....

فانصيحتى الاخيره...انك لو مش متمكن اوى....والكلام دا للناس كلها
يبقى تعمل اول خطوه بس واللى هى تبطل العربيه وتحط الغيار التانى..وتدور...وتسبها تتنطط لحد ماتظبط وتمشى...وتفضل ماشى برراحه خالص...و متخليش ال rpm يعلى
..او تفضل على السرعه المناسبه للغيار الثانى ...ودا حسب عربيتك طبعا....

وشكرا

وياريت اى سندويتش عا الماشى :D:D

[sab3aawy]

هقوللك على حاجة عجيبة اوى ، وان شاء الله هتحل لك مشكلة سلك الدبرياش الى غير رجعة

شيك على وصلة الأرضى بتاعة الموتور اللى موصلاه فى جسم السيارة، ولو مش موجودة او تعبانة اعمل له وصله محترمة

وبرضه شيل معاك شلك دبرياج احتياطى واتعلم تغيره، لعلمك انا كنت بغيره فى 5 دقائق بمفتاح 10 ومفتاح 13، بس غالبا لو المشكلة بتاعة الأرضى كانت هى السبب هتحل لك المشكلة

[hazem_khidr]

هقوللك على حاجة عجيبة اوى ، وان شاء الله هتحل لك مشكلة سلك الدبرياش الى غير رجعة

شيك على وصلة الأرضى بتاعة الموتور اللى موصلاه فى جسم السيارة، ولو مش موجودة او تعبانة اعمل له وصله محترمة

طب بعد اذنك يا باشمهندس وضح ليا النقطه دي لحسن مش قادر استوعبها :)

[aliabutaleb]

أبو عبد الله
ربنا يجزيك خير على دعائك
مش عارف ليه حاسس إن السيريون بتقربلي :)

فلاينج بيجو
على رأي خالي انا لسة في سنة أولى سواقة
وبالرغم من إن المعلومة انا عارفها نظرياً بس اللي منعني إني أطبقها إني ممكن أعملها وأدور العربية
بس لما أقف كل شوية في زحمة الرماية وآخر فيصل هاعمل إيه؟
معقول هادورها كدة كل نص دقيقة؟
أما موضوع تظبيط الغيارات ده فرحم الله امرءاً عرف قدر نفسه
أظن لسة صعبة عليا شويتين دي

سبعاوي
هاجرب وربنا المستعان
بس منين اعرف إن مشكلة الأرضي دي هي السبب؟
ولا هو الكهربائي اللي يقدر يعرف بس؟
انا فعلاً المرة دي جبت سلك احتياطي
وركزت مع الراجل أوي وهو بيركبه
مين عارف يمكن الزنقة الجاية - ربنا ما يخللي فيها زنقة جاية - أقدر أركبه لوحدي :)

[sab3aawy]

طب بعد اذنك يا باشمهندس وضح ليا النقطه دي لحسن مش قادر استوعبها :)

الموضوع ابسط من البساطة، المحرك ماسك فى جسم العربية بقواعد كاوتش ، ومعظم توصيلات الأجزاء المتحركة مع الأجزاء الثابتة من خلال جلب كاوتش، وده بيخلى طريق مرور كهرباء الإشعال الى الأرضى فى جسم السيارة طريق عالى المقاومة، علشان كدة دايما بتكون فيه وصلة ارضى معمولة للموتور علشان مرور شحنه تيار الإشعال، لما الوصلة دى بتكون مش موجودة او مهترئة بيدور التيار على اى توصيل معدنى بين الموتور وجسم السيارة، واحد الوصلات دى هى سلك الدبرياج اللى ماسك من ناحية فى فورك وبلية الدبرياج ومن الناحية التانية ماسك فى الدواسة المرتبطة بجسم السيارة، ومرور تيار الشحنه من سلك الدبرياج يسبب سخونته، ومع السخونة يكون السلك قابلا للمط والتصلد، ومع كثرة الشد على السلك اثانء ضغط الدبرياج وهو ساخن من التيار يحدث للسلك اجهاد ومن ثم كلال فينقطع

[hazem_khidr]

شكرا يا هندسه علي المعلومه الجديده و التفسير الجميل :)

[ahmedsrs]

فعلا كلام الأستاذ سبعاوى تمام انا كان عندى سلك الدبرياش فى عربيتى 125 بيقطع كل شهر وبيبقى ثقيل رحت لكهربائى لقى الأرضى بتاع المارش ملخلخ ضبطه وعمر ماالسك قطع بعدها

[thegoodhacker]

يا ريت يا AboRoqaiaa تقولنا الكهربائي لقي كابل الارضي كان مفكوك ولا ايه كان السبب بالضبط ؟

[Mzeid]

1000 حمد الله على سلامتك و أنك رجعت بالسلامة ..
:):)

[aliabutaleb]

جزاكم الله خيراً جميعاً
للأسف مرحتش لكهربائي لغاية دلوقتي لانشغالي بتسقيط موتور للعربية
عندي شوية حاجات عاوزة تتظبط في الكهرباء
فمجرد ما هاروح هايكون أول شئ أتكلم عليه ان شاء الله