تحويل السيارة لتعمل بالغاز بدلا من البنزين

[majormostafa]

هو رأيكم فى تحويل السيارة لتعمل بالغاز بدلا من البنزين وهل فى خطورة على الموتور فى حالة التغيير مع العلم [gdwl]المتر المكعب 45 قرشا) = 1لتر 90 ب 1.75 أو لتر 92 ب 1.85[/gdwl] وعلى فكرة نفس المسافة فما رأيكم فى هذا وما هى أحسن الشركات فى مصرأنى سالت كذا واحد وخصوصا سائقى التاكسى الحديث والكل أجمع على انه 10/10 وخصوصا فى التوفير والسلام عليكم

[ahmed_mido1889]

من جهه التوفير فهو بيوفر
لكن بيقصف العمر الافتراضي للموتور
وبيبقي الموتور مبرجل
لو العربيه مش نازله بيه استنادرد يبقي بلاش

[mostafa mahmod]

متهيالى مش كويس الا فى التوفير انما اللى هتوفره هتدفعه تصليح فيما بعد
مهو لو كويس كانت مصر كلها عملته و مكانش بقى فيه بنزين خالص
ده رايى و نستنى بقى الاعضاء الكرام يفهمونا اكتر

[JUVENTUS]

بص يا باشا معرض فورميلا الاهرام اللي فات ده كان فيه شركة كار جاز متواجدة و انا اتكلمت معاهم و فعلا قالولي ان الموضوع مش زي زمان و اتطور كتير عن الاول و مفيهوش اي مشاكل و لا يؤثر على الموتور و خصوصا في السيارات الحديثة بس مقدرش اقولك كلامهم صح و لا غلط لاني مش خبير
و بالمناسبة كان فيه عربية لانسر شارك اوتوماتيك محولينها غاز و بيقولو انها شغالة كويس جدا و مفيهاش اي مشاكل
و انا شوفتها و عاملين الشغل حلو اوي الحتة اللي بيتمون منها الغاز جنب البنزين (عند باب تانك البنزين) مش في الكبوت بس ده يختلف من عربية الى اخرى على حسب المساحة المتاحة عند غطاء التنك
و تقريبا كار جاز هي افضل شركة في هذا المجال
لو عايز تتصل بكار جاز و تاخد فكرة و تسألهم زي ما انت عايز ارقامهم و عنوان الفرع الرئيسي في الصورة دي
و طبعا لما تقولهم على نوع العربية هم هيقدرو يفيدوك و اسال على اي حاجة تخطر على بالك

[faragalla]

انا معايا اسبيرانزا 620 موديل 2008 حولت العربيه غاز و العربيه ماشيه زى الفل و مفيش مشاكل و طبعا التوفير زى الفل انا بفول التنك ب 7 جنيه بالبقشيش و بمشى بيه 160 كم فى حين انى بالبنزين 92 كنت بعمل فى حدود 27 جنيه لنفس المسافه تقريبا

[abdalah_hashem]

هو حلو من ناحية التوفير لكن المشكلة ان السبيكة اللى معمول منها الموتور مصممة للبنزين فممكن تتفاعل مع الغاز نتيجة نسبة الكبريت العالية اللى موجودة فى الغاز المصرى

لكن فى عربيات بتنزل من ابوها غاز ومش بيبقى فيها بنزين ودية افضل لان سبيكة الموتور بتبقى مصممة عشان الغاز
( ومتوقعش ان الشركة ممكن تحط الغاز على موتور بنزين لان دوة هيقلل عمر الماتور ودة هيبقى عيب فى حقها )

لكن قوة العربية فى الغاز ممكن تلاقيها اقل حاجة بسيطة من البنزين
لكن فى ناس بتركب غاز للعربية وتسيب البنزين موجود بحيث انك
تدور العربية وتبطلها على البنزين و تبقى كل فترة تمشى شوية على البنزين

[AkramArafa]

سؤال بسيط و معلش اني خرجت عن الموضوع
هل تانك الغاز بتاع العربيه بيتمون غاز مضغوط زي بتاع الانابيب و الولاعات كده ولا بيكون ساءل عادي؟؟٠

[abdalah_hashem]

سؤال بسيط و معلش اني خرجت عن الموضوع
هل تانك الغاز بتاع العربيه بيتمون غاز مضغوط زي بتاع الانابيب و الولاعات كده ولا بيكون ساءل عادي؟؟

لاة يا باشا تانك الغاز بتاع العربية بيتمون غاز طبيعى بس مضغوط يعنى بيبقى جوة التانك الغاز الطبيعى دوة فى صورة سائلة
الغاز الطبيعى دوة زى اللى متوصل فى مواسير للبيوت
لكن غاز البوتجاز دة حاجة تانية خالص

[HSHM]

هو مشكلة الغاز في ترسباته اللي جوة الموتور اللي بتخليك تحتاج في اوقات قريبة من بعض تعمل صيانة للموتور بتاعك و لكن في حل بسيط اوي للترسبات دي و هو انك كده كده في بداية الدوراة الصبح تبقي العربية بنزين و ياريت تمشي عليه اد كيلو مثلا كده يعني قول عقبال ما تخرج من المنطقة السكنية وتستلم طريقك و برده نفس الحكاية و انت مروح اخر كيلو كده او برده و انت داخل على المنطقة السكنية حول العربية من غاز لبنزين عشان تنضف الرواسب اللي كونها الغاز و ياريت في الحالة دي تستخدم بنزين من محطات نضيفة و ياريت يكون مش اقل من 92 عشان تضمن نضافته .. يعني مثلا مش كفاية رواسب الغاز وكمان تحط بنزين 80 عشان تنضف بيه في الأخر .

[Ahmed Nasr]

متابع باهتمام

[AkramArafa]

لاة يا باشا تانك الغاز بتاع العربية بيتمون غاز طبيعى بس مضغوط يعنى بيبقى جوة التانك الغاز الطبيعى دوة فى صورة سائلة
الغاز الطبيعى دوة زى اللى متوصل فى مواسير للبيوت
لكن غاز البوتجاز دة حاجة تانية خالص

الف شكر يا باشا

[abdalah_hashem]

الف شكر يا باشا

على اية بس
كلنا بنفيد بعضنا

[omaroof]

هو مشكلة الغاز في ترسباته اللي جوة الموتور اللي بتخليك تحتاج في اوقات قريبة من بعض تعمل صيانة للموتور بتاعك و لكن في حل بسيط اوي للترسبات دي و هو انك كده كده في بداية الدوراة الصبح تبقي العربية بنزين و ياريت تمشي عليه اد كيلو مثلا كده يعني قول عقبال ما تخرج من المنطقة السكنية وتستلم طريقك و برده نفس الحكاية و انت مروح اخر كيلو كده او برده و انت داخل على المنطقة السكنية حول العربية من غاز لبنزين عشان تنضف الرواسب اللي كونها الغاز و ياريت في الحالة دي تستخدم بنزين من محطات نضيفة و ياريت يكون مش اقل من 92 عشان تضمن نضافته .. يعني مثلا مش كفاية رواسب الغاز وكمان تحط بنزين 80 عشان تنضف بيه في الأخر .

كلام مظبوط بس تمشى 5 كيلو على الاقل :b4_388::b4_388::b4_388: