هل دي صدفة و لا تقليد و لا إتجهات تصميمية جديدة

[ahmedfd]

أنا بلاحظ بض التشابه في التفاصيل في سيارات نفس الفئة.... يعني مثلاً مش ملاحظين إن السيارات الجديدة زي الكورولا و اللانسر و السيفيك و الإلنترا و السوزوكي SX4 و السيراتو و غيرهم كله بقى دلوقتي بالفوانيس المسحوبة ...
هتقولوا عادي؟؟؟ ماشي طب خدوا بقى عندوكو:
- الجنوط بتبدأ من 15 بوصة و الكاوتش أقل حاجة 195/65/15
- مسامير العجل 5 بدل 4 في الموديلات الأقدم
- أكرة الباب بتفتح زي المرسيدس
- التابلوه أصبح الكونسول الأوسط واخد معاه جزء التكييف و الكاسيت منفصل عن جزء العدادات (بإستثناء السيفيك الدنيا كلها داخلة في بعض :)) يعني كأن التابلوه بالكامل أصبح 3 أجزاء غير الموديلات الأقدم شوية كان التابلوه بالعدادات بالجزء الأوسط حته واحدة.
- كلهم عصاية الأوتوماتيك فيهم stepgate مش مجرى واحدة عدلة (حتى الكورولا الـ MMT).

حد لاحظ الكلام ده و أيه تعليقكم؟

و شكراً.

[Mzeid]

لأ دة بس صدفة لأن كل شركة بتصمم بمفردها العربيات الخاصة بيها و في أثناء التجارب بيغطزها بالأسود زي ما بتشوف علشان التجسس الصناعي و التشابه الللي بينهم دة نتيجة لأنهم من فئة واحدة و متنساش إنهم من منطقة واحدة - جنوب شرق آسيا - يعني تفكيرهم واحد . :):):):)

[محمد ابراهيم 1]

ده توارد خواطر

[magomago]

أظن ان الحاجات أكبر من اننا نخمن واحنا قاعدين مكانا
لان فى مافيا وقرصنة ومع سهولة الاتصالات ممكن تصميم يتنقل بسهولة وفى ثانية
يعنى زى موضة الملابس ...تلاقى فى سنة جميع بيوت الازياء منزلة فساتين فوق الركبة أو بدون أكمام
الموضوع كبير

[SEATLOVER]

دى كلها لها علاقة بتقارير بتيجى من قسم المبيعات للمصمم بتحتوى على توصيات بالحلول دى مع اعطاء فرصة لبعض الاقتراحات الجديدة (افتكاسات) و تجربتها و خصوصاً على الموديلات التى لم تحقق الاقبال المتوقع لها فى الماضى او بعض الموديلات الجديدة كلياً حتى لا تدخل فى نطاق مقارنة مع قريناتها فى نفس السعر و لآعطاء صفة متميزة لها نسبياً ... وهذا لا يعنى تكملة نفس الموديل بنفس الطريقة فى الموديلات القادمة ..و لكن بتكون عملية (جس نبض) فقط وإذا نجحت بتستمر فى الموديل دة .. وبالتالى بتنتشر و بتصبح ظاهرة قد تستمر لبعض الوقت و منها ما يستمر لفترات طويلة .

[BomBom]

على فكرة مش كل الشركات بتصمم الشكل الخارجي لسياراتها ، في بعضها بتديه لشركات تصميم تانية و اغلبها ايطالي علشان يصمموا لها موديلاتها المختلفة. و يمكن يكون ده سبب في التشابه في بعض الاحيان.

[eng_mkhalaf]

لا يا جماعة أنتم لو تلاحظو هتلقوا كل كام سنة فى نقلة نوعية على مستوى العالم سواء فى التصميم الخارجة أو الداخلى - يعنى بس لحقبة 1960 وبعدها 1970 إلى أخرة كل فترة هتلاقوا تطور معين وبيبداء فى موديل وبعد كدة بيمر على جميع الموديلات

[جمال]

اعتقد ان سبب التشابه هو برامج الكمبيوتر و التى تستخدم للتصميم لانها نفس البرامج او على الاقل متشابهه و بالتالى تعطى حلول متشابهه

[SEATLOVER]

اعتقد ان سبب التشابه هو برامج الكمبيوتر و التى تستخدم للتصميم لانها نفس البرامج او على الاقل متشابهه و بالتالى تعطى حلول متشابهه

لا يا haima متظلمش برامج الكمبيوتر ..عملية التصميم بتمر بمراحل كتير من اول الاسكتش اليدوى مروراَ بالرسم الهندسى على الكمبيوتر CAD و بعدين برامج المحاكاة و الانيميشن و بعدين النحت اليدوى لنموذج مصغر من العربية .

[ahmedfd]

بس يا جماعة فيه تفاصيل صغيرة غريبة جداً زي موضوع الخمس مسامير في الجنوط ده... ده غايظني جداً على فكرة... يعني في الكورولا و اللانسر و المازدا 3 و السيفيك و الأنترا و السيراتو كلهم صحيوا فجأة و حطوا 5 مسامير في العجلة في الموديل الجديد رغم إن القديم كان 4 مسامير عادي جداً؟.. أنا عارف إنها حاجة صغيرة.. بس الإتفاق عليها بين كل المتنافسين غريب قوي.

[mahamedaraby]

انا اللى اعرفه ان ده تصميم بتناسب يعنى مع القوانين الفزيائيه يعنى بص على عربيه موديل 80 وبص على عربيه موديل 2000 هتلاقى انهم مصممين العربيه بطريقه تناسب مرور الهواء علشان مياثرش على العربيه او سرعه العربيه

فاانا راى انها تكولوجيا واحده فى الاخر بتنج عربيات متشابهه

[MM_Mohsen]

التشابة واضح و مش محتاج تأكيد .. و العملية بقت زى موضة الازياء
خطوط رئيسية للجميع و الاختلاف فى تفاصيل بسيطة .. مثلا الفانوس الخلفى
اللى نصه فى الشنطة و النص التانى بره بدأ فى شركه و معظم الشركات قلدته
و كل حاجة سواء فى التصميم الخارجى او التابلوه او الاكسسوارات تبدأ فى شركة
و كله يقلد .. مثبت سرعة - مفتاح مشفر - مفتاح سمارت ..الخ - المنافسة
صعبة و كله بيحاول يستفيد من اخر حاجة اخترعها منافسينه .. و احيانا العربيات
الرخيصة زى الصينى تلاقيها فى الشكل ما تفرقش و احيانا اجمل من الغالية ..