حركات رجالة ملهاش لازمة

[ann1]

كتير قرات في مواضيع هنا في المنتدى عن سواقة السيدات والبنات وانا مش بنكرها بس حابة بقى اقولكم على التجربة اللي حصلت معايا واللي تبين ان برضو في رجالة بيسوقو بغشمية وعافية وهو كدة وخلاص بجد حركات ملهاش لازمة كنت سايقة في مكرم عبيد ومعروف طبعا هي قد اية زحمة وماشية في طريقي عادي جدا والطريق يا خد 3 صفوف عربيات وانا كنت في النص راكبة عربية دياهتسو كانشيل وقدامي فراغ بسيط يادوب قد عربية صغيرة العربية اللي جنبي من ناحية السواق حدف على الرصيف شوية وسابت مسافة صغيرة بيني وبيها فجاءة وبدون مقدمات عربية 127 دخلت وعلمت صف 4 وماشي بسرعة رهيبة والدنيا زحمة وبداء يحاول يسبقني علشان يطلع في المسافة الصغيرة اللي قدامي يعني من الاخر بيعمل غرزة ملهاش اي معني الصراحة الطريق زحمة ومش محتاج غرز طبعا اللي الحصل ان العربية اللي حدفت على الرصيف جت ترجع في التراك بتاعها هو شافها راح داخل فيا لان للاسف معرفش حتى يشد بالسرعة المطلوبة راح داخل فيا من قدام بجنب عربيتة شال ليا الاكصدام الامامي والغريبة انه مكنش عايز يقف غير لما اصريت انا اني اجري وراه وقف بعد الخبطة بحاولي اكتر من 300 متر وقفت لاقيت الاكصدام بتاعي اتشال من مكانه خالص وقف معايا سواق تاكسي وجة شاب صغير وقالي في اية في العربية وشافها سائق التاكسي وقال دي تتكلف 80 جنية وزي ما يكون قال 80 الف جة بابا الشاب اللي كان سايق وقعد يبص على الاكصدام المرمي في الارض ويقول اممممممممم شكلو كدة مكسور قبل كدة انا مصدقتش قولت لية تعالي معايا نصلحها واللي تتكلفو تدفعوه قال ليا لا احنا مش فاضين وجة الشاب اللي كان سايق وبمنتهى الجراه يقول على فكرة انا ممكن اقول اني كنت قدامك مش جاي من ورا ومعايا شهود لتاني مرة مصدقتش ونعم الشهامة والرجولة طبعا اية رايكم بقى في حركات الرجالة

لكن اللي اقدر اشكرو فعلا سائق التاكسي اللي قدر الليلة ووقف معايا وقالهم انتو غلطانين

[amribrahim]

شباب أخر زمان و مش راجل

[hpxp]

لا عادي حضرتك في ناس بجحه جداااااا ويمما اتخنقت لدرجه اول امبارح وقفت في وش توكتك ولانوس جاين عكسي بس كبرت ومشيت
ومن ناحيه الغشوميه دي عند اي حد عادي جدا يعني انا بسوق من سن12 سنه يعني بسوق بقالي اربع سنين واول امبارح برضه عامل فيها فرع وبشد مع عربيه في طريق اتجاهين علشان اعديه لازم اخش في المقابل دخلت في المقابل وداخل علي ملف والقي عربيه في وشي بس الحمد لله لحقت نفسي
اما مثلا اما بنتريق علي البنات في سواقتهم دا بيبقي بخافوا جدااااااا هديكي مثال جدتي واخده ملف يتاخد علي مرة واحده وبسرعه جدتي خدته علي 3 مرات !!!!!!!!!!!!!!
خالتي مثلا بتلزق في الحارة مع اني شايفها عادي
اما بقي من ضمن فضيحي :-) لبست في بي ام بطريقه غريبه شويه
سعتها كنت في الرحاب والمهم روحت علي مول 1 علشان بنت عمي هناك ورايح اجبها المهم بنقل الفتيس علي p العصايه جدت p ومكنتش باصص علي الفتيس فلعشان عندي الفتيس زجزاج المفروض يعدي حته ويروح داخل في البي المهم زقيت العصايا ومجتش في حد ال p راحت العصايه ريحه لل r وانا قاعد جوة باصص علي المول وبقول هو المول بيتحرك ولا يه وفاجه دييييييييييب
لبست في بي ام دبليو << ادي حاجه بتدل علي ان السواقه مش معلمين
ووالدي بيسوق بقاله اكتر من 30 سنه قلب بينا عربيه في سنه 2004

[hpxp]

بالنسبه لشاب هو مش راجل لا موخذة والحدق يفهم

[king2islam]

لا ده عادى هما اساسا البنات قلبهم خفيف شويه بس مش معناه انى اخبط حد على شان هيا بنت ولا ولد معلشى دى رخامه وبقت عادى عندنا :)

[Ashraf_Ibrahim]

دي قلة ادب معلش
المهم اتحلت يعني وخدتي حق تصليه الاكصدام واللا لا ؟!

[eldell]

فى ناس كده كتير اوى وحمد لله على سلامتك

[poussi]

حاسه بيكى لان دى المعاناه بتاعتى دايما محدش بيحترم حد

انا بدى اشاره يمين وان حد يعدينى ابدا وبتضطر انى اقف فى وسط الشارع واسمع كلاكسات الدنيا من اللى ورايا لحد ما حد يتكرم عليا ويفتحلى طريق

وكتير ابقى ماشيه فى الحاره بتاعتى فى شارع رايح جاى والاقى حد مقابل ليا وجاى فى وشى واقلبله نور علشان يرجع مكانه وده ابدا لدرجه انى كنت هدخل فى الرصيف علشان البيه يعدى

وفيه ناس بقى بتتراخم اوى بتحب تلبخك شويه بم ان قلبك ضعيف شويه

واحد مره زنقنى فى نقل ووسعلى على اخر لحظه غير كده كان زمانى تحت النقل

ومره اتوبيس كسر عليا جامد وكان جاى من ورايا وراح واخدلى الباب ونزل يقولى انتى اللى غلطانه مع ان انا فى اليمين يعنى وانت اللى جاى عليا وفضل مصمم ان انا اللى غلطانه فكبرت دماغى وعديتها
انا بجد كرهت السواقه علشان الحاجات دى ياريت الناس تلتزم محسسنى ان البنات كائنات من كوكب اخر مش من حقها تعمل اى حاجه
انا بتكلم على النماذج اللى قابلتها لكن فى نفس الوقت فيه ناس كويسه كتير بس مش عارفه ليه مش بقابلهم

[ann1]

دي قلة ادب معلش
المهم اتحلت يعني وخدتي حق تصليه الاكصدام واللا لا ؟!

اه اخدت حقي طبعا الحمد لله سائق التاكسي ساعدني وقدر الليلة انها تاخد 80 جنية والتصليح اخد 70 جنية يعني تمام قوي ربنا يجازي السائق دة كل خير بجد

متشكرة فعلا لكل الرد عليا بس انا متخضتش من اللي عملو انا كل اللي كان مضايقني انها حركة ملهاش لازمة فعلا مكنتش هتوفر عليه وقت ولا غيرو ولا انا كنت معطلاه او مضيقاه طبعا مش بدعي اني بسوق كويس بس انا بقالي بسوق بقالي 6 شهور بعمل مشوار يومي من الزيتون لمصر الجديدة ومشوار تاني لمدينة نصر مخربشتش حتى العربية دا جة شالي الاكصدام حاجة تضايق وياريته كان ذوق معايا الحمد لله انها جت على قد كدة

عندك حق يا poussi فعلا كتير بتحصل والواحد بيخرج منها لاني بسيب اللي قدمي يعمل اللي هو عايزة بتعبرة مش بيعرف يسوق لو كسر عليا بفرمل واهدي واسيبة بس في ناس اول لما يشوفو بنت اكنهم لاقو لاقية تحسي انهم بيقولو يلا نلعب يلا هنعمل اية نصيبنا كدة

[Dr.SherifMansy]

الحمد لله على سلامتك.

المشكلة عندنا ان ناس كتيرة فى الشارع كل واحد ماشى بالمبدأ المصرى الصميم و الأصيل و هو الفتاكة و الفهلوة و ان هو اذكى واحد فى الكون و الباقى مابيفهموش حاجة.

تلاقى الأشارة واقفة و واحد قاعد ينور و يضرب كلاكسات ... ليه ؟ علشان اللى قدامه يكسر الأشارة و الباشا يمشى..

تلاقى الشارع اتجاه واحد و الناس كلها ماشية فيه و واحد فتك داخل عكس و مصر يرجع طابور عربيات لورا ... ليه ؟؟ اصله بيته على بعد 100 متر و مش معقول يلف الشارع زى البنى آدمين .. يخش عكسى اسهل و مش مهم العطلة بتاعة الناس و المشاكل.

تلاقى ال يو تيرن زحمة و بدل ما الناس اللى عايزة تلف تقف طابور ورا بعض ... كذا واحد يعملوا فتكين و ييجوا من الجنب علشان يدخلوا الملف قبل الناس اللى مستنيه و فجأة تلاقى الطابور بقى 3 او 4 طوابير و الشارع اتقفل علشان الملف.. و مش مهم اللى عايز يمشى دوغرى ... يستنى هو كمان.

واحد عامل فتك زى اللى خبطك و يحاول يجرى لأنه بيعتبر ان دى شطارة و فهلوة

السرفيس و التاكسى و الأتوبيسات اللى بيستمتعوا بالغلاسة على الملاكى و بيعتبروا ان كل ما الواحد فيهم طلع عين سواق الملاكى انه كده يبقى جدع و جاب الديب من ديله.

انا باسوق بقى لى حوالى 25 سنة ، و سواقتى عموما هادية ، آخرى جوه البلد 60-70 كم ، و مرة سواق سرفيس قعد يغلس على قبل شيراتون الجلاء لحد ما زهقت و فقدت اعصابى و الشيطان القديم صحى .. فكنت هادخله فى الرصيف اللى بيفصل النفق عن الشارع ، لقيته راح منادى لى بعد ما وقف ، توقعت انه هاينزل يتخانق و استعديت له ، لقيته من غير ما ينزل راح مشاور لى و قال لى "على النعمة انت سواق كده ، نهارك فل" و راح مسلم على من عربيته و مشى ...

تخيلوا ... لما قليت ادبى فى السواقة و عرف انى ممكن اكون مؤذى اكتر منه ... عجبته و احترمنى !!!

بالذمة هى دى السواقة ؟؟؟

يا عينى علينا فى شوارعنا ...

المفروض الأخلاقيات دى تبقى جوانا ... ياريت

و تحياتى

[Mohamed.Ramah]

الاغلبية مبقوش بيقفو وصدقينى مش بسبب ان حضرتك بنت لا دة بقت بلطجة وقلة ادب ودة حصل قدامى واحد بكيا عمل كيك داوون علشان يطلع من عربية 28 ماشية على مهلها قام مقدرش المسافة لان حظة كان فى عربية راكنة صف تانى مقدرش المسافة وراح كحت العربية بالكامل من الجمب فى 28 ووقف قدام ونزل يبص على العربية وهو متنرفز بص على الاكصدام بتاعة وبص لصاحب العربية التانية بقرف ولا عبرة وراح ركب العربية وجرى مع ان الشاب اللى نزل من 28 كان رايح يكلمة ولا زعق ولا راح اتخانق معاة ولا صوتة على حتى بجد همج واحد تانى بمرسيدس وشارع اتجاهيين وتاكسى دخلة في المراية شبة شلهالة وطبعا التاكسى وقف بعيييييييييييييييييييييييييييييد لانة عارف اكيد لو رجع حيدفع كام لصاحب المرسيدس ولا نزل سواق التاكسى بص حتى ولا كانة غلطان

[abo_lamar]

وجة الشاب اللي كان سايق وبمنتهى الجراه يقول على فكرة انا ممكن اقول اني كنت قدامك مش جاي من ورا ومعايا شهود لتاني مرة مصدقتش ونعم الشهامة والرجولة طبعا اية رايكم بقى في حركات الرجالة

بالزمة في راجل يقول كده ... جاتك60 الف خيبة عريت الرجالة:019f3b~14:

[sharpvision]

والمهم بيهدد انه يجيب شهود زور ايه البجاحه دى!!!!!

[mrghost]

دى مش رجوله ولا حاجه لان ده لو ليه اخت او والدته بتسوق عمره لو ماشى جنبها ماهيعمل كده على الاقل مش هيربكها بنه يزنق بعربيته عليها معلش قدر الله وماشاء فعل

[ann1]

الحمد لله انها جت على قد كدة لولا اني فرملت جان دخل خبط في جنب العربية كلها مش الاكصدام بس وساعتها الله اعلم بقى كان اية اللي حصل الحمد لله وقدر الله ماشاء فعل متشكرة للكل اللي رد عليا انا كنت مضيقة وحبيت اكتب اللي حصل