عربيتى وقعت من على الونش وهو ماشى!!!!!!!!!!!!

[tutankhamoun]

أستاذ هاني
أنا حزين جدا .......... على عربية حضرتك ......... و إن شاء الله تكون بسيطة بعون الله
و بإذن الله الموضوع يتحل و العربية ترجع زي الأول و أحسن

بس هما دول المصريين ......... هانعمل أيه
ده ابتلاء من عند ربنا إننا نعيش مع الناس دي و للآسف اللي هما شعبنا و ناسنا و أهلنا ........... بس للآسف

[أبو_حمزة]

اتمنى زيكم تكون حاجة بسيطة
بس العقل بيقول ان لو كانت بسيطة كانو رفعوا العربية و كملوا سكتهم و يحاولوا يطرمخوا على الموضوع
لأنى لا اتصور ان الشركة تكون امانتها و ضميرها حى
انما كده شكلها للأسف اصابات جامده
يا رب ما تسيبش حقك و تكون عملت محضر زى ما اخوانا قالوا
قدر الله و ما شاء فعل

[3llamy]

لاحول ولا قوة الا بالله
ان شاء الله تكون بسيطه بس انت هدي نفسك وامشي قانوني من الاول
ومنتظرين منك تطمنا الوضع ايه

[islamnabil]

لا حول ولا قوة الا بالله
قدر الله ما شاء فعل
ابقى طمننا و ان شاء الله خير

[mohamed_rhem]

ده اسمه تسيب واهمال جثيم
شوف قبل اي حاجه شوف هما عندهم استعداد لتعويضك ولا لاء؟
وبناء عليه حتقرر انت تعمل ايه
يعني لو مستعدين ومحددوش رقم كويس يمضولك علي وصل امانه وشيك بثمن العربيه لحد ما تتصلح
اما لو قالولك تعوضك في حدود كذا يبقي محتاجين قرصه عليهم
اما يا معلم لو قالولك حنعمل ايه والحوارات ده بيقي من الاخر اي اجراء تاخده ضدهم من حقك
ومتنساش تتطمنا

[Tamer_Merit]

قدر الله وما شاء فعل ...
ان شاء الله تكون بسيطه .... وما تزعلش ده ابتلاء من ربنا
وياريت تطمنا .

[Goodle]

طمننا يا باشا.. إيه الأخبار؟؟

[aif]

ان شاء الله خير ... منتظرين تطمننا

[Hossam_Hassan]

يا ريت لو حد يعرف يوصل لهانى علشان يطمننا

[hamedo0]

لا حول ولا قوة الا بالله... قدر الله و ما شاء فعل

يا هاني طمنا ايه الحصل هو ماحدش معاه تليفونه

[ابو سيف]

يا ريت بجد لو حد معاه رقم تليفونه

اعتقد سيات لافر ممكن يكون معاه رقم تليفونه و يطمنا اولا العربيه حصل فيها ايه و اتصرف ازاي مع الشركه !!

[hero]

هاني باشا..
اولا: قدر الله ما شاء فعل..
ثانيا: طبعا دة اهمال جسيم من الشركة ايلي بتنقل العربية...
ثالثا: زي ما كل الاخوة قالوا....تشوف اية الاجراءات الرسمية وتعملها لضمان حقك وتعويضك عن الاضرار سواء كانت بسيطة او كبيرة...وربنا يسترها ان شاء الله وتكون بسيطة...

[د.أحمد سمير]

أعتقد أن سيناريو وقوع العربية من فوق الونش في التصور الطبيعي يعني :
أن الواير اتفك .. أو ساب
العربية نزلت بضهرها إلى الشارع
على منزل العجل وهووووب
اصطدمت بأرضية الشارع كالتالي
إكصدام خلفي
ثم الشكمان
ثم تانك البنزين
ثم سقطت بقيتها على الأرض لتتحمل العجلات الأمامية الصدمة بطريقة خفيفة .

يعني الخسائر المفروض انها تكون في الإكصدام والشكمان وتنك البنزين فقط
وممكن خبطة في الشاسية ... وبكدة لازم تاخد حقك منهم تماما .

لكن وآه من لكن هذه

لو كانت هناك صدمات جانبية فهذا معناه إنها وقعت على جنبها وده معناه إن الباشا السواق كان بيغرز من غير ما يربط العربية من تحت ، وساعتها ولع فيهم كلهم

لو فيه صدمات أمامية قوية فده معناه إن العربية لما نزلت جريت على الطريق (رغم إنها معشقة بفرامل اليد ، ودريكسيونها معشق وتقيل علشان باور ) وخبطت في حاجة ، وده معناه إن الباشا السواق كان بيجري بسرعة كبيرة فنزلت وجريت وخبطت .. وكدة برضة تولع فيهم تمام .

المصيبة بقى إنهم يكونوا طلعوا العربية بالعكس على الونش يعني وشها لورا ، وده معناه خسائر رهيبة في حوض الموتور والشاسية
ولو قالوا كدة اعلم أن السيارة عملت حادثة وواحد من البهوات سايقها ، وقالوا لك حكاية الونش دي علشان يبرروا الحادثة .. وهنا تولع فيهم وفي المركز وفي صاحب التوكيل .

وربنا يحفظهالك ، وطمنا عنك

تقبل خالص مواساتي وغضبي

[FLYINGPEUGEOT]

اولا : الف الف الف الف شكر ...لاخواتى وحبايبى....اللى سألو عليا....ويارب يخليكو ليا...انتو والله اخوات بجد...وفعلا الصديق وقت الضيق...
المهم ...اليكم تقرير عن المهذلة :

طبعا انا بعد مافوقت من الصدمة نزلت جرى..على حبايبى فى القسم وخدنا بوكس وطلعنا على هناك....متجهين لمكان الكارثه
واليكم العجب !!!!!!!!!!!
.................
العربيه بتاعتى...وقعا على جنبها !!!!...جنب الونش...يعنى من الآخر اتقلبت من على الونش من الجنب...طبعا البيه الله يجحمو شكلو كان بياخد غرزه...!!!!!
والمدهش اكتر ان مافيش حاجه كانت ماسكه العربيه..غير الواير اللى بيسحبو بيه !!!!!!!....هتقلولى طب السواق ابن ال**** مربطهاش ليه بالحاجات المخصصه لكده...وايه السبب الفعلى لحدوث الواقعه ؟؟؟؟؟؟؟
طب تعالو كده ندور على السواق ونسألو؟؟؟؟ يا عم ياسواق....يا سواق بيه...انت ياد ياسواق...؟؟؟!!!!..مفيش سواق.....طب راح فين...وساب العربيه مقلوبه...والونش كمان سابو وساب المفاتيح فيه ؟؟؟؟!!!!!!!.....السواق...فص ملح ودااااااب؟؟؟؟!!!
.........................................
تفتكرو اخوكو flyingpeugeot عمل ايه ياترى !!!!؟؟؟؟؟؟
....
عملت اللى لو ماكنتش عملتو....ماكنتش هاخد حقى ولا هطول مليم احمر ؟؟؟؟!!!!
اولا : تم الاتصال بشركة انقاذ....الناس جت عدلو العربيه بتاعتى...وسحبوها..وراحو وخدينها على القسم ...فى حماية البوكس العزيز...:D
.وانا فضلت مكانى بحجة انى هستنى الناس بتوع الشركه...عشان نجيب الونش ونيجى.....طبعا ماحصلش....;)
هما مشيو من هنا والشاطر flying راح راكب الونش ومدور وطالع....وخد الونش وقال يافكيك...
وتم التحفظ عليه فى مكان آمن !!!!
شغل عصابات بجد..:D
بس بلدنا....لازم تاخد فيها حقك بدراعك...
المهم : بعد ماخفيت الونش.....رحت طالع على حبايبى....متجها للقسم
...............
فين ياعم الونش ؟؟؟ وفين الناس صحاب الونش؟؟؟؟
رحت قايلهم عل اللى انا عملتو ....حاله من هستريا الضحك احتلت القسم؟؟؟:D
وقالولى بس كده غلط ولازم تجيب الونش...قولتلهم انا بس بعمل كارت ارهاب لغاية ما اشوف الناس دى ناويه على ايه...وعلى العموم اول ما ندخل فى الجد هجيبلكو الونش وانتو اتصرفو...اوكى
...............
المهم اتصلت بالشركه...وطلعو معندهمش اى خلفيه عن الموضوع...وطلع السواق هو اللى اتصل بيا.!!!!!!!!!!!!!!
..فيه الخير والله:D
....
الناس جت القسم.....شافو منظر العربيه...سألو على الونش ....الظابط الجامد راح قايل...احنا متحفظين على الونش والعربيه لحين فض المشكله...ويعنى خلصت بعد سنه او بعد 10 سنين محدش هيستلم حاجه غير بعد ما المشكله تخلص...سواءا الونش او العربيه
...طبعا دا كللو فيلم ....

صحاب الشركه طلعو ناس محترمين:D..(خوف مش اكتر)
وحسبوها بالعقل...وقالو ...خلاص نستلم الونش والعربيه...واحنا
مسؤلين عن كل التلفيات من جنيه لمليون..
..............
اولا:الحمد لله الحمد لله ان الموضوع اتحل رغم كل شىء
ثانيا:نوجه الشكر للشاطر flying عشان حركة خطف الونش دى :D:D
ثالثا:الشكر كل الشكر للدعم الامنى المكثف..واللى لولا
تدخلهم ماكنش الموضوع هيخلص....ولعبة الونش المخطوف دى ماكنتش هتنجح وكنت هجيبو ورجلى فوق رقبتى :D
ثالثا: الشكر كل الشكر لكل من سيادة
العميد حسن طلعت غراب وسيادة العقيد سيد جوهر
وبوعدهم...بعد ما العربيه تخلص..كل واحد هياخد لففه ... :D
.........
واليكم محصلة الخسائر الغرييبه...واللى مش قادر اعمل بسببها سيناريو للحادثه لحد دلوقتى :(:(
كل ما يطلق عليه لفظ زجاج ....اتفشفش
اكصدام امامى
اكصدام خلفى
شكمان
تنك بنزين
طقم فوانيس امامى
فانوس خلفى
2 باب
رفرف
مرايا
تلفيات بالعفشه
تلفيات بالجنوط
والمصيبه الكبيره..ونظرا لحجم الموتور المهوول..
.الموتور خد القواعد والفتيس
واستقل بنفسو تاركا هيكل السياره

........
عملية الترميم والمشتريات سوف تتم تحت اشراف الناس اللى بيعددلولى العربيه...ومندوب من شركة الونش ومندوب من الشرطه....
...........................................
.....وحسبى الله ونعم الوكيل......
يعنى هخشلى فى شهر كمان...
.....
بس مبسوط انى عرفت آخد حقى...ولو مش بدراعى ماكنتش هاخدو
....

وهى دى مصر يا عديله

[ASD peugeot]

طبعا العربيه يستحيل ترجع زي ما كانت بس طبعا كويس انك عرفت تاخد حقك طبعا شغل (اسود) انا متعاطف معاك جدا و لكن قدر الله و ما شاء فعل تحياتي ليك و اهم حاجه سلامتك
بيجو الي الابد