لو كلامى منطقى يبقى ليه مناخدش حقنا ؟؟!!!

[احمد ابراهيم]

السلام عليكم
انا عايز اعرض عليكم حاجتين كده و ناخد اراء بعض علشان لو لينا حقوق ندور ناخدها ازاى
اول حاجة : ( الفاميه )
بصراحه انا مش عارف هو ليه ممنوع مع ان المفروض ان العربيه ملكيه خاصة لصاحبها و المفروض ليها حرمه زى البيت .. اعتقد كده ..
يعنى مثلا لو افترضنا انى راكب انا و مراتى و عايزه تعدل الحجاب بتاعها مثلا تعمل ايه ؟؟
لو معاك حد تعبان و مش عايز تعرف حد انه تعبان مثلا هعمل ايه من غير فاميه
لو مش عايز حد يقعد يبص مين اللى جوا العربية و بيعمل ايه مع انى بكون راكب لوحدى اعمل ايه ؟
لو نسيت لاب مثلا و انت مش مفيم ممكن الزجاج يتكسر و تتسرق

دا غير انه بيحمى من الشمس
غير ان لما تشغل التكييف و انت مفيم حاجة تانية خالص

نيجى بقى للكلام اللى بيتقال ان الفاميه لازم يبقى ممنوع .. طب ليه يا خوانا ؟؟
قالك عشان ممكن اللى مركبه ممكن يعمل اعمال منافيه للاداب العامة ... يعنى من غير الفاميه مش هيعمل نفس الاعمال و لا هيركن فى شارع ضلمه و لا ياجر اى مكان .. محدش بيغلب
قالك ممكن يشربوا فيه مخدرات و يسكروا و يمشوا يعملو حوادث ... على اساس انه مش ممكن يشرب فى اى مكان و يطلع يسوق العربيه و يعمل بيها نفس الحوادث
قالو ممكن يبقى فيها مجرم و مستخبى ورا الفاميه ... يا سيدى اللى مركب فاميه و داخل على لجنة يبقى ينزل القزاز و الظابط يشوف رخصه ... و بعدين مش لما ترجعو العربيات اللى اتسرقت الاول و مكانش عليها فاميه يعنى المجرم مش مستخبى و بردو اتسرقت
قالو بتحجب الرؤية الداخلية و الخارجية ... طب اللى برا عايز يبص على اللى جوا ليه ؟؟؟؟ و بعدين هتحجب الرؤية الداخلية ازاى هو فى حد هيفيم القزاز الامامى ؟؟؟!!!!! يبقى مش هتحجب الرؤية الداخلية و كمان ممكن يتقص مكان عند المرايا عشان تشوف مرايات الجنب

الحاجة الغريبة ان الفامية ممنوع عشان بيحجب الرؤية و الشماسات مش ممنوعة مع انها بتحجب الرؤية بردو


الحاجة التانية : ( الزينون )
طبعا الناس الللى مركبه زينون النور فارق معاها بس لو مش مركب عدسة هيمى اللى قدامه سواء فى المرايا او لو الطريق اتجاهين

طيب انا جربت اقف فى وش عربيه مركبه زينون و عدسات و حاولت ابص فى الفانوس مباشرة و لا عينى و جعتنى و لا اى حاجة و فى نفس الوقت اللى مركبه شايف بوضوح جدا و على مدى بعيد و مش بياذى حد

و الغريب ان كل العربيات الجديدة نازله بزينون و عدسات و الدول الاوروبيه بتنصح بيه

يبقى احنا ليه منركبهوش و نشوف المطبات و نشوف الناس اللى بتطلع فجأة كده و تلاقيها فى وشك
و نبقى ماشيين شايفين كويس و فى امان


انا بصراحة محتاج ارائكم عشان لو من حقى انى يبقى عندى الامكانايات و فى نفس الوقت مش باذى حد يبقى ليه تتمنع عنى
و بفكر فعلا انى اروح ارفع بيها دعوة قضائية بس لو فى محاميين يشاركوا معانا و يقولو رايهم

مع العلم ان العربيات الحديثة بتنزل بالزينون و بتنزل بفاميه فى بعض العربيا ت

و اسف على الاطالة

[A.Saad]

يب انا جربت اقف فى وش عربيه مركبه زينون و عدسات و حاولت ابص فى الفانوس مباشرة و لا عينى و جعتنى و لا اى حاجة

!!!!!!!!!!!!!!!!!!!!!!!
العربيات اللى بزينون فابريكة زى ما حضرتك قلت بعدسات
اللى بيركب عادى من غيرها

الفامية بينزل فاريكة فى بعض العربيات
اولا بينزل زجاج ملون
ثانيا
درجته اخف من درجة الفامية كتير
ثالثا
درء الضرر مقدم على جلب المنفعة

[احمد ابراهيم]

!!!!!!!!!!!!!!!!!!!!!!!
العربيات اللى بزينون فابريكة زى ما حضرتك قلت بعدسات
اللى بيركب عادى من غيرها

الفامية بينزل فاريكة فى بعض العربيات
اولا بينزل زجاج ملون
ثانيا
درجته اخف من درجة الفامية كتير
ثالثا
درء الضرر مقدم على جلب المنفعة

بالنسبة للزينون انا بتكلم ان الزينون يركب و عليه عدسات مش لوحده لان لو لوحده هيبقى مؤذى جدا للناس
ثانيا انا بتكلم على الفاميه و بقول ان العربية ملكيه خاصة و ليها حرمه المفروض يعنى .. سيبك بقى من العربيات اللى بتنزل فابريكة بزجاج ملون (( هو اصلا الزجاج الملون درجه من درجات الفاميه ))
ثالثا فين الضرر اصلا اللى هتجنبه و هسيب عشانه المنفعه ؟؟؟؟؟؟؟

[alaasaid]

السلام عليكم ,

حضرتك عند حق فى الكلام دة لكن بشروط زى ما قال ا/ أحمد سعد (دفع الضرر مقدم على جلب المنفعة) , يعنى ممكن المرور يسمح مثلا بالفامية بس يكون محدد الدرجة بحيث أمنيا ممكن تسمح برؤية من بداخل السيارة و كدة صاحب السيارة استفاد و بدون مخالفة للقواعد و نفس الموضوع برضة للزينون و اى حاجة تانية , كل حاجة يكون ليها مواصفات محددة عشان ميكونش فى ضرر على أى واحد .

و الله أعلم

[modo88]

معاك ان الفااميه يطبق بس يبقا بدرجات عشان نتكلم كلام عقلاني الدول بره بتسمح للفاميه بس بنسبه مش بتسمح بالسوبر دارك مش هانيجي احنا ونقول لازم نفيم اغمق درجه لا نبقا قانونين شوية ونطلب زي الناس
نيجي لحوار الزينون مش هانقف للكل بقا ياباشا ونقوله انت مركب عدسات عدي وانت مش مركب عدسات اركن ولا ايه؟
(علما اني مفيم اغمق درجه ومركب زينون من غير عدسات)

[marsguy]

على فكره

من أسباب منع الفيميه هو إن اللي وراك ممكن يشوف الطريق من خلال زجاج عربيتك

لكن لو إنت مفيم سوبر دارك هو مش هايقدر يشوف غير لحد عربيتك

[Elawany13]

على فكره

من أسباب منع الفيميه هو إن اللي وراك ممكن يشوف الطريق من خلال زجاج عربيتك

لكن لو إنت مفيم سوبر دارك هو مش هايقدر يشوف غير لحد عربيتك

معاك حق
انا لو ماشى ورا عربيه مفيمة سوبر دارك ببقى مخنوق ومش شايف الطريق ومحاولة تجاوز هذه السيارة بيكون مخاطرة لإنعدام الرؤية
الاخ اللى مفيم سوبر دارك بيعرض نفسه وغيره للخطر
اللى حاطط فاميه لو بيشوف بالنهار كويس
بالليل هيعمل ايه !!!!
الاخ الفاضل صاحب الموضوع مع كامل احترامى ليك ولكن عفوا كلامك غير منطقى
الفاميه والزينون بدون عدسات ضرره اكثر من نفعه بكتييييييييييييييير

[kono]

الزينون ده أكتر حاجة مؤذية خصوصا لو لحد عنده استجماتزيوم عالى
بجد بيبقي نفسي اوقف اللى مركب زينون من غير عدسات واضربه :)

[alaasaid]

على فكره

من أسباب منع الفيميه هو إن اللي وراك ممكن يشوف الطريق من خلال زجاج عربيتك

لكن لو إنت مفيم سوبر دارك هو مش هايقدر يشوف غير لحد عربيتك

السلام عليكم

عند حضرتك حق فى النقطة دى , بس مش الفامية بس دى فى كمان ستائر بتكون غامقة اوى و متعرفش تشوف منها الطريق

[Moe86]

الكلام دة اتكرر كتير قوى و مافيش فايدة
قلنا 100 مرة فى دول كتير متقدمة عننا سامحين بالفامية بنسبة معينة و الزينون اللى عليه عدسة
بس تقول اية بقى فى القوانين الغبية و الروتين
بعد الثورة سمعت كتير جملة "من النهردة دى بلدك" بس واضح انها لسة مش بلدنا, دى بلد الظباط و وكلاء النيابة بس !!

[alaasaid]

الكلام دة اتكرر كتير قوى و مافيش فايدة
قلنا 100 مرة فى دول كتير متقدمة عننا سامحين بالفامية بنسبة معينة و الزينون اللى عليه عدسة
بس تقول اية بقى فى القوانين الغبية و الروتين
بعد الثورة سمعت كتير جملة "من النهردة دى بلدك" بس واضح انها لسة مش بلدنا, دى بلد الظباط و وكلاء النيابة بس !!

ان شاء الله بكرة تفرج و هنعمل اللى احنا عاوزينة

[احمد ابراهيم]

مش عارف تقريبا الناس قرت بعض الكلام و فى جزء كبير متقراش

بقول يا جماعة زينون بعدسااااااات
و الفاميه بصراحة انا مش مقتنع ان اى حد معدى كده فى الشارع يقعد يبص كده كانى مخبى حاجة عيب و لا حرام

[Amr Axel]

اولا : بالنسبة للفيميه انا مع منعه لكن مع تحديده بدرجة معينة فليكن الزيرو كويس اوي و ده لأكتر من سبب و هم

- زي مقولت ممكن يحصل اي اعمال منافية للاداب و النظام العام و الموضوع ده شوفته كتيير و انا ماشي و ع كوبري اكتوبر كمان بيستغلوا الفيميه سواء منافي للاداب او شرب مخدرات و ببقي عايز انزل ارميهم من فوق الكوبري و مش بليل بس لأ بالنهار كمان شوف البجاحة

- لو المجرم ورا الفيمية و معاه سلاح و بيطلعه ممكن الظابط ميشوفش لكن لو الازاز عادي هيتشاف و يتبص كويس في الاشخاص اللي قاعدين لأنك لما تيجي تبص في عربية مفيمة من كتر الضلمة مش هتشوف حاجة جوة لأن مفيش منفد لدخول اي اضااءة خارجية و تخيل بقي بليل تبقي عاملة ازاي ( حالكة الظلام هههه )

- اعاقة رؤية لطرفين صاحب العربية و الاخرين يعني صاحب العربية ممكن ميشوفش او مياخدش باله و بالنسبة للغير في ناس بتبص بنظرة طويلة شوية ع الطريق قدام اللي قدامه عشان يعرف امتي يوقف او لو في حاجة
زي حالاتي لأني باجي ورا ناس كتيير يخلوك بتبقي هطأ من عيشتك و تلاقيه بيضرب فرامل فجأة
يعني الموضوع زي انك تجيب اوتوبيس قدامك و متشوفش باقي الطريق


اما بالنسبة للزينون

برده انا مع منعه لأن هنا عندنا ناس في مصر مش عايز اغلط يعني بيستخدموه اسوء استخدام
لو ع الطريق الصحراوي هقولك معلش مش شايف انما وسط البلد و تلاقيه ضاربه في عينك او يفضل يقلبلك عشان خاطر يطلع منك و بالتالي عينك هتوجعك اذا كان الواحد لما يتفتح في عينه النور العالي بيتعب تخيل بقي زينون
جايز انت عينك مش بتوجعك بسم الله ما شاء الله- الله اكبر -عينك تستحمل
لكن في غيرك اي اضاءة عالية بتتعبه و ممكن تعميه مؤقتا و بكده هيعمل حادثة
في ناس مثلا بيتحرج عليهم ميقربوش ناحية اي دخان عشان عينيهم زي حالاتي و في ناس عندهم حساسية من الضوء العالي
بالاضافة ان اغلب اللي بيركبوا بيبقي مركبه منظرة شغل حركات و ترويش مش لهدف انه بيسافر صحراوي كتيير اللي يستحق الموضوع ده اللي بيسافر كتير صحراوي ممكن يجيب حاجة تثبت و ياخد تصريح من المرور

تاني حاجة ان ممكن واحد يدخل ع لجنة و يفتح في وش كله الزينون و يجري و ميعروفش يشوفوا

طبعا حضرتك ممكن تقولي انا مش هعمل زي الباقيين و اقلب نور او افتح في عين حد طب المرور ايه اللي عرفه شخصيتك اذا كنت هتسخدمه صح و لا لأ او هتحط عدسات و لا لأ

فكرك مثلا انا مش عايز اركب زينون و فيميه اكيد عايز و خاصة ان و انا نازل او طالع اغلب طريقي صحراوي السويس او صحراوي اللي بينزل ع الحي السادس عالطول و نظري ضعيف لكن مش بركبهم ليه :
- احتراما للقانون مش خوفا من المخالفات زي الاغلب
-مراعاة الاخرين لأني بحط نفسي مكان اللي قدامي لو مثلا حد فتح النور العالي في عيني ساعتها موقفي هيبقي ازاي و كلنا مجربيين الاحساس المقرف لما شخص يفتح نور عالي في عينك و يفضل يقلب لما يعميك
- و اخيرا لنفسي انا يعني الفيمية ممكن ميخلنيش اشوف كويس خاصة بليل يبقي عشان خاطر اتمنظر اضيع نفسي أكيد لأ

اما بالنسبة للعربيات اللي بتنزل فبريكة
بالنسبة للفيميه ديه عربيات بتنزل ازاز ملون فبريكة و مش كتيير يعني كام موديل مش كله
بالنسبة للزينون الفبريكة ده بيبقي نازل مظبوط و بعدسات و بتكون اضائته محددة لكن اللي بيحطوه هنا بيبقي بمثابة انفجار زينوني و حتي ديه برده موديلات معينة اللي بتنزل بيه

بالنسبة الناس اللي بتقول انهم برة سامحين بيها في كل مكان مع اني اول مرة اعرف المعلومة ديه انا اعرف انها مسموحة في دول و دول مش كله يعني
بس هسألك سؤال لو افترضنا ان الكلام ده صح فكرك ان نسبة الحوادث عندهم قليلة بالعكس الحوادث بالكوم هناك ده احنا هنا ارحم بالرغم كل ده
بالاضافة ان اغلب الطرق الطويلة عندهم اللي هي الصحراوي بتبقي كبيرها حارتين صغيرين او متوسطين و مفيهاش اضاءة خالص و كل اللي حواليك غابات او صحرا و بتمشي ع اضاءة العربية فقط مش زي عندنا عواميد النور مالية كل مكان ليل نهار شغالة
و بمناسبة الاضاءة
فرنسا المنطقة اللي حوالين برج ايفل كل الانوار فيها بتتقفل من حوالي الساعة 10 تقريبا و اللي بينور المكان هناك بس الاضاءة بتاعت برج ايفل و الناس بتخاف تمشي هناك ( ده ملوش علاقة بالموضوع لكن كمعلومة يعني :) ههههه)

كل بلد و ليها ظروف مينفعش تقارنها بغيرها

و كمان يا ريس لو عايز اضاءة بيضا فيه اللمض الهالوجين اضاءة بيضا و احسن من العادي و اقل من الزينون زي الفيليبس رالي و الكريستال فيجين الحاجات ديه

بالنسبة للتفييم انا شايف انه درجة الزيرو تتحط لايت لايت بلاك
يعني تحس ان اللون ادي ع عسلي و بكده هتخف الشمس عليك و كل اللي في العربية بتشاف سواء بليل او نهار و في ناس كتيير محدش كلمهم ع افتح درجة في الفيميه

فتخيل انت عندك ناس من غير حاجة معندهمش استعداد يحترموا القوانين و بيمشوا عكس و عايز تسمح لهم بالزينون و الفيميه يبقي هتلاقي اي واحد جي في وشك عكس و فاتح الزينون او واحد يمشي غلط و يخبط اي حد او يعمل مصيبة و يجري محدش يعرف شكله

يعني من الاخر بالنسبة ليا
التفييم يكون مسموح درجة واحدة للعايز و ده نظرا للصيف الرهيب عندنا فليكن اخف درجة خالص الزيرو
اما الزينون يكون للاشخاص اللي بيسافروا صحراوي طول الوقت و بتصريح من المرور و يكون للملاكي فقط مش النقل

الحاجة الاخيرة ان الظباط يتعاملوا زيينا في موضوع الفيمية و الزينون ده اللي اتمناه فعلا

هي ديه وجهة نظري يا ريس :)

[beshomilan]

كلام استاذ Axel مظبوط جدا
وانا راضى عن اضاءة العربية العادية بتاعتى طالما بتورينى الطريق ومبتأذيش حد
بس انا بستغرب جدا جدا من موضوع الفاميه ده وان معظم العربيات مفيمة ده حتى التاكسى فيموا العربيات!!!!!!!!وتلاقى اشكالهم اعوذ بالله وتقرف تقرب لتاكسياتهم ومعليين الكاسيت جدا باغانى شعبى منيلة ويعدوا على ظباط فأشارات ومحدش يكلمهم
دانا بلاقى عربيات 127 و 128 وسيات وعربيات قديمة مع احترامى لاصحابها مفيمة تماما ومحدش بيكلمهم فى الاشارات ولا فأى حتة!!!يعنى دول مثلا ظباط ولا ايه!!! وانت بس لو ماسك التليفون فأيدك وانت بتسوق تتاخد مخالفة فورى من غير ماتعرف
بجد حاجة وحشة اوى انك تحس بالظلم وانك تشوف حد بياخد نمرتك عشان نسيت تربط حزامك بينما اللى جنبك مفيم العربية وبيجرى بيها وبيدوس الناس ومحدش بيكلمه
وتحس بالظلم انك نفسك تحط اول درجة من الفيميه اللى هى العسلى عشان الحر وخايف تقف فلجنه يطلعلك حد يقولك انت مفيم وتعمل مشكلة من لاشىء..لانه للاسف حافظ مش فاهم
وتحس بالظلم لما عربيتك الوحيده تتكلبش فى الشارع وانت راكن صف تانى عشان استغلال الناس لحق ملكية الارض زى ماكله بيعمل ناو وانت مش لاقى مكان وتلاقى كل الناس راكنه فى الشارع صف تانى وتالت ومحدش كلمهم وانت الوحيد اللى تدفع

انا بغلط ساعات وانا مبنكرش كده..بس امتى هحس بالمساواة بينى وبين باقى الناس الاعلى منى والاقل منى ولا لو ركبت مرسيدس تلاقى كله بيعظملك وتحت امرك ولو ركبت 128 اتهان واتبهدل

[sha2e]

موضوع الزينون مع العدسه معتقدش ان ممكن حد يرفضه خصوصا ان الزينون لو كان نازل بعدسه مظبوطه بتكون درجة أيذائه للاخرين اقل من ايذاء اضائة السياره العاديه
لكن بدون عدسه الوضع بيكون مؤذي جدا جدا

بخصوص الفاميه فى نقطه مهمه انت ناسيها وهيا ان الزجاج الملون مسموح بيه فى بعض الدول للزجاج الخلفي فقط
ومفيش دوله واحده مسموح بيها الزجاج الملون للزجاج الامامي
دي نقطه حبيت اوضحهالك