اريد سيارة مستعملة اوتوماتيك ارجو المساعدة ؟؟؟؟؟

[sonik2]

يا جدعان عاوز حد يساعدنى انا بقالى اكثر من 3 شهور بدور على سيارات مستعملة وتكون اوتوماتيك بس انا معايا حوالى
50000 ومش عاوز اكتر عن كدة ده كده اخرى فى السعر
بس عاوز اقول حاجة كل ماجى ابحث على سيارة واحبها جدا فى الاخر الاقى الناس بتقول فيها عيوب كثيرة انا عاوز اخر كلام ومضمون 100% عشان مش كل شوية ابحث على سيارة
يعنى على سبيل المثال بحثت على نوبيرا بس قالولى انها مش تمام وبحثت على البراتو وعارف انها مش اوتوماتيك برده قالولى مشى كويسة كده يعنى
وارجو ان تساعدونى فى ايجاد سيارة اوتوماتيك مستعملة فى حدود 50000 ايه انواع العربيات الى تنصحونى بيها

بس انا مش عاوز اى عربية صينى او مش معروفة لازم تكون قطع الغيار متوفرة وكمان تكون واسعة فى حدود 5 افراد يعنى اسرة بس هو ده الى انا عاوزة وشكرا جدا لاهتمامكم ولمساعدتكم

وشكرا

[sonik2]

هو مفيش حد فى المنتدى ولا ايه

[mailo]

النبرة مش تمام ليه ؟

[M.Mostafa80]

كيا سيفيا ومعاك من موديل 99 لحد 2003 واخرها 45 الف جنيه والسيفيا عربيه محترمه

[mailo]

النبرة مش تمام ليه ؟

قصدي نوبيرا مش تمام ليه ؟

[sha2e]

كرولا 92 (الملكه)
لانسر كريستاله 94-98
دول فى رينج اواخر الاربعينات بس عيبهم انهم واطيين
كمان الهوندا سيفك 92-95 فى نفس الرينج بس ارتفاعها اعلى منهم حاجه بسيطه اوي
التلاته دول ياباني
الكوري (بعيد عن الدايو فى الاتوماتيك) فى الفيرنا 2005 ممكن تزيد الفين ولا حاجه بس عيبها انها مش واسعه
دول الى فى بالي دلوقتى وأكيد الاخوه الاعضاء هيقدرو يزودو كمان الاختيارات بالنسبه ليك

[sonik2]

شكرا جدا جدا للمتابعة


معلش طيب فى كلام تانى

لو عاوز اشترى سيارة فى نفس المواصفات بس مش اوتوماتيك ايه رأيكم فى
1) اوبل كورسا

2) هيونداى اكسنت

3)كيا سيفيا

ايه احسن حاجة وايه عيوب كل سيارة منهم بالتفصيل وشكرا جدا جدا

والاخ الى كان بيسال ليه النوبيرا مش حلوة

انا بقولك انى فى ناس كتير اشتكو منها وكمان عامة الدايو وحشة فى الاوتوماتيك وفى صفة عامة الكورى

وارجو ان اكون قد وفقت فى اجابة سؤالك

وشكراا

[marsguy]

لو هيونداي نيو أكسنت تبقى كويسه، ما سمعتش عن حد إشتكى من الفتيس الأوتوماتيك بتاعها، لكن لو أكسنت قديمه ما أنصحكش. غالباً هاتكون مستهلكه أوي.

جرب تبص برضه على بروتون ساجا أوتوماتيك مستعمله، ممكن أوي تكون قريبه من رينج الـ 55 ألف عشان هي كانت جديده بـ 69 في أول 2010.

[sonik2]

مشكور جدا على الردود بس انا كنت بسأل على عيوب السيارات الى انا ذكرتها سابقا الى هى
1) اوبل كورسا

2) هيونداى اكسنت

3)كيا سيفا

المرة ده انا بسأل على دول عامة مش على الوتوماتيك ايه رأيكم فيهم

وعلى فكرة يا اخ marsguy انا اخرى فى الفلوس 50000 مش عاوز اكتر جنيه واحد لان لو انا هجيب مستعمل ب50000 لازم مصرفش عليها كتير لان ده اخرى وشكرا جدا على اهتمامك واهتمامكم

[sha2e]

1) أوبل كورسا : عربيه حلوه وشكلها لذيذ هتكون فى رينج 45-55 موتورها كويس واستهلاكه للبنزين اقل من الفيكترا التسعينات
عيوبها : قطع غيارها اغلى سنه من الكوري - مش واسعها من جوا - ثباتها اقل من باقى عائلة اوبل

2) هيونداي أكسنت : لو القديمه تبقى فئه اقل من الفئه الى بنتكلم عليها لو النيو اكسنت (خلاص مبقتش نيو بقى بعد نزول الار بي ) او الرابيت على وجه التحديد فبتبدأ من 55 الف للمانيوال واهم حاجه بتميز الرابيت هيا استهلاكها للبنزين القليل جدا وسحبها حلو ومنتشره واسعار قطع غياره كويسه
عيوبها : فى المانيوال سعات طقم الدبرياج بيحتاج يتغير على فترات متقاربه - وفى بعض الموديلات (سنه او اتنين ) ظهرت بعض المشكال فى الدريكسيون الى ان تم تغيره فى الموديلات الاحدث - الاتوماتيك منها بيبدأ من 60 لو تقدر توصل للمبلغ ده تبقى اختيار ممتاز نظرا لحداثة الموديل (ساعتنها ممكن تدخل فى منافسه مع الاوبل فيكترا 2001 اتوماتيك 1600)

3) كيا سيفيا : هتكون فى رينج 40-42 مو99-01 وهيا عربيه ممتازه جدا بالنسبه لسعرها موتورها 1500 لكن نشيط ويتفوق على عربيات 1600 - ثباتها كويس جدا (اثبت من الكورسا والرابيت) ومن جوا واسعه جدا (اوسع من الاتنين برضو)
عيوبها : صاجها ضعيف جدا جدا يعنى اى حاجه بتبان فيه - في منها مانيوال واتوماتيك (الاتنين بنفس السعر تقريبا) الاتوماتيك فيها قد يكون افضل من الدايو لكن لا يرقى للاوتوماتيك فى الياباني

تحياتي

[أبو_حمزة]

أقول لك على اللى انا مجربها
لانسر 99 اتوماتيك
واسعة و يعتمد عليها و قطع غيارها متوفرة و الفتيس الاتوماتيك ممتاز و ما لوش اى مشاكل و الحمد لله و اعتقد انها فى نفس حدود ميزانيتك
و موضوع انها واطية ده مش للدرجة اللى الناس بتقولها و عربيات كتير زيها
أى سؤال انا تحت أمرك
ربنا يوفقك للخير

[شاهين - بنز]

هز السعر شوية وهات ميجان 2005 حتبقى في حدود 55- 60 ألف جنيه بحالة فابريكة ومتسدقش كل الإشاعات إللي بتطلع عالعربية المحترمة دي أنا إن شاء الله حجيب واحدة بانوراما قريب
هات ميجججججججججججججججججججججججااااااااااااااااااااااااا اااانننننننننننن

[sonik2]

انا اشكرا جدا اعضاء المنتدى كلهم على الردود الحلوة ده وبخصوصا sha2e و أبو_حمزة و شاهين - بنز اشكرهم جدا جدا

وانا كنت بقول يعنى من الاخر بجد عشان انا خلاص بجد زهقت لو هشترى مستعمل دلوقتى واخرى اخرى اخرى 50000

اشترى ايه ويكون الكلام مضمون 100% وياريت طبعا تكون موديل حديث شوية مثلا 2001 2002 2003 2004 2005 كده يعنى بس احنا حوالى 5 افراد ومش مهم قطع الغيار انشاء الله هنحافظ عليها وكل واحد ونصيبة

وشكرا جداجدا جدا جدا جدا جدا جدا جدا جدا

[sonik2]

معلش يا جدعان انا عصرت دماغى وفى الاخر فى 3 سيارات اوتوماتيك او مانيول

1) اوبل كورسا

2) كيا سيفيا

3) كيا سبكترا

ايه رايكم ايه احسن فيهم وعارف ان السبكتر تكملة للسيفيا لكن ايه الافضل فى 3 سيارات دول عشان ناوى انى اشترى خلاص

وفيه سيارة معروضة قدامى كيا سبكترا 2004 وفيها الحاجات ده

مريات كهرباء * زجاج كهرباء * إريال كهرباء * جنوط إسبور * أتوماتيك * باور * تكييف * سنتر لوك * جهاز إنذار * كاسيت cd * ليست بحاجه لأى مصاريف 1600 س س
و سعرها 52000 ممكن افاصل معاه وانزلها 50000 عشان ده اخرى ايه رأيكم فيها وفى السيارات الاخرى

[sha2e]

الاسبكترا عربيه جميله وثباتها ممتاز جدا يقترب من ثبات الالمانى وموتورها كويس
عيبها الوحيد قطع الغيار مرتفعة الثمن بدون مبرر بالاضافه الى صعوبه الحصول عليها
لكن كعربيه من جوا كويسه وثباتها ممتاز
بخصوص المعروضه امامك فسعرها في رأيي 49 ولابد من التأكد والكشف على السياره جيدا - والتأكد من انها فابريقه من الداخل بالكامل وكذلك التأكد من حالة الفتيس بدقه

وبخصوص الترشيحات انا ارشحلك نيسان صنى 2001 اتوماتيك ودي بتكون تقفيل ياباني مش مصري وموتورها 1300 اقتصادي فى البنزين وبتكون فى رينج 52 الف (معتقدش ان الالفين جنيه هما الى هيكونو مشكله)
ولو تقدر تصبر على الشراء شويه يكون افضل (لان دلوقتى يعتبر الموسم والعربيات بتكون كلها شدا فيه شويه)

تحياتي